1 ಯೆಹೋವನೆ ಮೋಶೆನ, "ತೂ, ಆರೋನ, ನಾದಾಬ್, ಅಬೀಹೂ ಅಜು಼ ಇಸ್ರಾಯೇಲ್‌ವಾಳನ ಶಾಣವ್‍ಮ ಖ್ಹಡ್‌ತೀನಿಖ್ಹ್ ಜ಼ಣು ಆ ಪಹಾಡ್‌ನ ಛ಼ಡಿನ್ ಯೆಹೋವಕನ ಅಯಿನ್ ದೂರ್‌ಮ ಭೀರಿನ್ ಆಡ್‌ಪಡಿನ್ ಆರಾದನೆ ಕರ‍್ನು. 2 ಮೋಶೆ ಎಕ್ಲೋಸ್ ಯೆಹೋವನ ಖನ್ನೆ ಆವ್ಣು ಪಣ್ಕಿ ಬಿಜು಼ ಕೋಣ್‌ಬಿ ಖನ್ನೆ ನಾ ಆವ್ಣು. ಉಭ್ರಾಸ್ತೆ ಅದ್ಮಿ ಪಹಾಡ್‌ನ ನಾಸ್ ಛ಼ಡ್‌ನು" ಕರಿ ಬೊಲ್ಯೊ. 3 ಮೋಶೆ ಅದ್ಮಿಯೆವ್‌ಕನ ಅಯಿನ್ ಯೆಹೋವನು ಅಖ್ಖೀಸ್ ವಾತೆವ್‌ನಾಬಿ ಅಜು಼ ಹುಕುಮ್‌ನಿ ನಿಯಮ್‌ನಾಬಿ ಬೋಲಿವತಾಳಿನಿ ವಖ್ಹ್‌ತೆ ಅದ್ಮಿಖ್ಹಾರುಬಿ, "ಯೆಹೋವನಿ ವಾತೇವ್ನ ಪಾಡಿಚಾ಼ಲೆಸ್" ಕರಿ ಎಕ್ಕಸ್‌ದಮ್ ಜವಾಬ್ ದಿದು. 4 ಮೋಶೆನೆ ಯೆಹೋವನು ಹುಕುಮ್‌ಅಖ್ಖಾನ ಲೀಖ್ಯೊ. ವ್ಹಾಣೆ ಉಠಿನ್ ಯೊ ಪಹಾಡ್‌ನ ಹೇಟ್ ಬಲಿಪೀಠ್‌ನ ಭಂದೈನ್ ಇಸ್ರಾಯೇಲ್‌ವಾಳನು ಭಾರ ಖೂಮ್‌ನ ಭಾರ ಬಂಡಾನ ಖಂಬಾನ ಭೀರಾಖ್ಯೊ. 5 ಇಸ್ರಾಯೇಲ್‌ವಾಳನು ಜ಼ವಾನಿನ ತುಮೆ ಯೆಹೋವನಖ್ಹಾಜೆ ಅಖ್ಖೀಸ್ ಶರೀರ‍್ನು ಬಲಿನ ಅರ್ಪಣ್ ಕರಿನ್ ಸಮಾಧಾನ್ನಿ ಬಲಿನಖ್ಹಾಜೆ ಕೆಲ್ಡಾನ ಅರ್ಪಣ್‌ ಕರ‍್ನುಕರಿ ಹುಕುಮ್‌ದೀನ್ ಮೋಕ್‌ಲ್ಯೊ. 6 ಇನವಾರ್ ಮೋಶೆ ಯೊ ಲ್ಹೋಯಿಮ ಆಧಾನ ಲೀಲಿನ್‌ ಕಟೋರಾವ್‌ಮ ಭರಿನ್ ಆಧಾನ ಚಾ಼ಚ಼ರ್‌ಪರ್ ಛಿಡ್‌ಕ್ಯೊ. 7 ಇನವಾರ್ ಒಪ್ಪಂದಾನು ದಪ್ತರ್‌ನ ಲೀನ್ ಅದ್ಮಿವ್ ಖ್ಹಮಜ್‌ಪಡಾನಿತರ ಪಢ್ಯೊ. ಇವ್ಣೆ ಖ್ಹಮ್‌ಜಿನ್, "ಯೆಹೋವನಿ ಖ್ಹಾರಿ ಹುಕುಮ್‌ನ ಪಾಡಿಚಾ಼ಲಿನ್ ಮುಡ್‌ಕ್ಯು ಝು಼ಕೈಯೆಸ್" ಕರಿ ಬೋಲ್ಯು. 8 ತದೆ ಮೋಶೆನೆ ಯೊ ಲ್ಹೋಯಿನ ಲೀನ್ ಅದ್ಮಿನಪರ್ ಛಿಡ್ಕಿನ್‌, "ಹಂದೇಖೊ ಆ ದಪ್ತರ್‌ಮ ಬೋಲೈರ‍್ಹುತೆ ಅಖ್ಖಿ ಹುಕುಮ್‌ನಿ ಪರಕ್ಮ ಯೆಹೋವ ತುಮಾರ ಜೋ಼ಡೆ ಕರ‍್ಯೊತೆ ಒಪ್ಪಂದಾನು ಲ್ಹೋಯಿ ಆಸ್" ಕರಿ ಬೊಲ್ಯೊ. 9 ಮೋಶೆ, ಆರೋನ, ನಾದಾಬ್, ಅಬೀಹೂ ಅಜು಼ ಇಸ್ರಾಯೇಲ್‌ವಾಳನ ಶಾಣಾವ್‌ಮ ಖ್ಹಡ್‌ತೀನಿಖ್ಹ್ ಜ಼ಣು ಪಹಾಡ್‌ನ ಛ಼ಡ್ಯು. 10 ತದೆ ಇಸ್ರಾಯೇಲ್‌ನು ಇವ್ಣೆ ದೇವ್ನ ದೇಖ್ಯು. ಆಬ್‌ನ ಗೋಳಾನಿತರ ಘಣು ಪಾಕ್‌ಥಿ ರ‍್ಹವಾನು ಇಂದ್ರನೀಲಮಣ್ಕನಿ ಪಾಯಿರೀಯೆ ಇನು ಗೋಡಾನೊ ರಚ್ಚೊ಼ಹುಯಿರ‍್ಹುಥು. 11 ಇನೆ ಇಸ್ರಾಯೇಲ್‌ವಾಳನ ಗಲ್‌ಢಾವ್ನ ಖಿವು ಲುಕ್ಷಾನ್‌ಬಿ ಕೊಕರ‍್ಯೋನಿ. ಯೊ ದೇವ್ನ ದೇಖಿನ್ ಖಾಣುಪಾಣಿನ ಖಾದು.

12 ಯೆಹೋವನೆ ಮೋಶೆನ, "ತೂ ಪಹಾಡ್ ಛ಼ಡಿನ್ ಅಯಿನ್ ಮಾರ ಖನ್ನೆಸ್‌ ರ‍್ಹೆ. ತೂ ಆ ಧರ್ಮಶಾಸ್ತ್ರನಬಿ ಅಜು಼ ಹುಕುಮ್‌ನಾಬಿ ಅದ್ಮಿಯೇವ್ನ ಭೋದನ್‌ಕರಾನಿತರ ಮೆ ಯೊಅಖ್ಖು ಲೀಖಿರಾಖ್ಯುತೆ ಖೊಡ್‍ಶನ ಪಲ್ಗಾವ್ನ ತುನ ದೆವುಸ್‌" ಕರಿ ಬೊಲ್ಯೊ. 13 ಮೋಶೆನೆ ಇನೊ ಶಿಷ್ಯ ಯೆಹೋಶುವನ ಜೋ಼ಡೆ ಉಠಿನ್ ದೇವ್ನ ಪಹಾಡ್‌ಪರ್ ಗಯೊ. 14 ಇನ ಪಹಿಲೆ ಇನೆ ಶಾಣವ್ನ, "ಹಮೆ ಫರಿನ್ ತುಮಾರಕನ ಆವಲಗು ತುಮೆ ಹಜ್ಜಾ಼ಸ್ ಜ಼ಪಿರ‍್ಹವೊ. ಆರೋನಬಿ ಅಜು಼ ಹೂರ ತುಮಾರಕನ ರ‍್ಹಿಶೆ. ಕಿನಾತೋಬಿ ಝ಼ಗ್‍ಡೊ ಉಷೇತೊ ಇನಕನಸ್ ಜಾ಼ವದೆ" ಕರಿ ಬೊಲ್ಯೊ. 15 ಮೋಶೆ ಪಹಾಡ್‌ನ ಛ಼ಡ್ಯೊ ಅಜು಼ ವಾದ್‌ಳು ಪಹಾಡ್‌ನ ಮೂಚೈ಼ಗಯು. 16 ಯೆಹೋವನಿ ಉಜಾ಼ಖ್ಹ್‌ ಸೀನಾಯಿ ಪಹಾಡ್‌ಪರ್ ಭೀರಿಗಯು ಅಜು಼ ಯೊ ವಾದ್‌ಳು ಛೋ಼ ದನ್‍ಲಗುಬಿ ಪಹಾಡ್‌ನ ಮೂಚಿರಾಖ್ಯುಥು. ಖ್ಹಾತ್‌ನ ದನ್‌ಮ ಯೆಹೋವ ವಾದ್ಳಮಾಥು ಮೋಶೆನ ಚಿಕ್ರಿನ್ ಬುಲಾಯೊ. 17 ಯೆಹೋವನಿ ಉಜಾ಼ಖ್ಹ್‌ ಬಳಾನಿ ಆಗ್‌ನಿಮತ್ ಇಸ್ರಾಯೇಲ್‌ವಾಳನ ದೆಖಾಯು. 18 ಮೋಶೆ ಯೊ ವಾದ್‌ಳಾನ ಮಹಿ ಪೇಶಿನ್ ಪಹಾಡ್ ಛ಼ಡ್ಯೊ. ಇನೆ ಯೊ ಪಹಾಡ್‌ಮ ಚಾ಼ಳಿಖ್ಹ್ ರೋಜ಼್ ರಾತ್‌ದನ್ ಯೊ ಪಹಾಡ್‌ಮಾಸ್ ಥೊ.