1 `ಯಾಕೋಬನಿ ಜೋ಼ಡ್ಮ ಈಜಿಪ್ಟ್ ದೇಖ್ಹ್‌ನ ಇವ್ಣ ಇವ್ಣ ಘರ್‌ವಾಳಾನ ಕೇಡೆ ಆಯಾತೆ ಇಸ್ರಾಯೇಲ್‌ನು ಪರ್ಖ್ಹಾ ಲಡ್ಕಾವ್ನು ನಾಮ್‌ಖ್ಹಾರು: 2 ರೂಬೇನ್, ಸಿಮೆಯೋನ್‌, ಲೇವಿ, ಯೆಹೂದ, 3 ಇಸ್ಸಾಕಾರ್, ಜೆಬುಲೂನ್ ಅಜು಼ ಬೆನ್ಯಾಮೀನ್; 4 ದಾನ್, ಗಾದ್, ನಫ್ತಾಲಿ ಅಜು಼ ಆಶೇರ್. 5 ಯಾಕೋಬನು ಅಖ್ಖಿ ಪಿಳ್ಗಿವಾಳು ಒಟ್‌ ಖ್ಹಡ್‌ತೀನಿಖ್ಹ್ ಜ಼ಣು ಕತೋಬಿ ಯೋಸೇಫಾನೆ ಪಹಿಲೇಸ್ ಈಜಿಪ್ಟ್ ದೇಖ್ಹ್‌ಮಾಸ್ ಥೊ. 6 ಇನಪಾರ್ ಯೋಸೇಫಾಬಿ ಇನೊ ನ್ಹಾನೊ ಭೈ ಅಜು಼ ಮೋಟೊ ಭೈಬಿ, ಯೊ ಪಿಳ್ಗಿವಾಳು ಖ್ಹಾರು ಮರಿಗಯು. 7 ಕತೋಬಿ ಇಸ್ರಾಯೇಲ್‌ವಾಳನು ಲಡ್ಕಾವ್ ಘಣೇಥು ಭಡ್‌ತು ಹುಯಿನ್ ಘಣಿ ಗಣ್ತಿಮ ಭಡಿನ್ ಘಣು ಶಕತ್ ಲೀಲಿದು ಅಜು಼ ದೇಖ್ಹಸ್‌ ಅಖ್ಖು ಇವ್ಣೇಥಿ ಭರೈಗು. 8 ಇನವಾರ್ ಯೋಸೇಫಾನ ಮಾಲುಮ್‌ ಕರಿರಾಖ್ಯೊಕೊಂತೆ ನವೊ ರಾಜ಼ ಈಜಿಪ್ಟ್ ದೇಖ್ಹ್‌ನ ಚ಼ಲಾವನ ಆಯೊ. 9 ರಾಜ಼ ಇನ ಅದ್ಮಿನ, "ಇಸ್ರಾಯೇಲ್‌ವಾಳು ಜಾ಼ಖ್ಹತ್ ಜ಼ಣು ಛಾ಼ ಅಜು಼ ಅಪ್ಣೆಥೀಬಿ ಘಣು ಅಜು಼ ಅಪ್ಣೇಥಿ ಶಕತ್‌ವಾಳುಬಿ ಹುಯಿರುಸ್ ದೇಖೊ". 10 ಜಂಗ್ ಶಾತ್ತೊಬಿ ಹುಯುತೊ ಇಸ್ರಾಯೇಲ್‌ವಾಳು ಅಪ್ಣ ವಹೇರ‍್ಯಾವ್ನಿ ಜೋ಼ಡ್ಮ ಮಳಿಜೈ಼ನ್ ಹಮುನ ಹರೈನ್ ಹಮಾರೇಥಿ ಛು಼ಕಿ ಚ಼ಲ್ಯುಜಾಷೆ. ಇನಖ್ಹಾಜೆ ಇವ್ಣೆ ಭಡ್ಣುನಾತೆ ತಿಮ್ ಅಪ್ಣೆ ಉಪಾಯ್ ಕರಿಯೆ"ಕರಿ ಬೊಲ್ಯೊ. 11 ಇಮ್ಮಸ್ ಇನು ಅದ್ಮಿವ್ ಇಸ್ರಾಯೇಲ್‌ವಾಳನ ಖ್ಹತಾಪ್ಣಿ ದ್ಯಾವಲಗ್ಯು. ಫುಗಟ್‌ಥಿ ಕಾಮ್ ಕರೈಲಿದು. ಚು಼ಪ್ಕೆ ಕಾಮ್ ಕರಾವನ ಅದಿಕಾರಿಯೇವ್ನ ನೇಮ್‌ಶೈನ್ ಫರೋಹನ ‘ಪಿತೋಮ್ ಅಜು಼ ರಾಮ್ಸೇಸ್’ ಕರಿ ಕಣಗಿ ಕೋಠಾನ ಖ್ಹಯೇರ್‌ನ ಭಂದಾಯೊ. 12 ಈಜಿಪ್ಟ್‌ವಾಳು ಇಸ್ರಾಯೇಲ್‌ವಾಳನ ಕೆತ್ರೆ ಖ್ಹತಾಪ್ಣಿ ದಿದೂಕಿ ಜಾ಼ಖ್ಹತ್ ಹುಯಿನ್ ಫೈಲೈರ‍್ಹುತೆ ಖ್ಹಾಜೆ ಈಜಿಪ್ಟ್‌ವಾಳು ಇಸ್ರಾಯೇಲ್‌ವಾಳಾನಿ ಬಾರೇಮ ಘಣು ಡರ‍್ಯು. 13 ಈಜಿಪ್ಟ್‌ವಾಳು ಇಸ್ರಾಯೇಲ್‌ವಾಳಥಿ ಕಠಣ್‌ಥಿ ರಬೈಲಿದು. 14 ಮಾಟಿ ಖೋಂದಾನ ಕಾಮ್ಮಬಿ, ಇಟ್ಕೆ ಕರಾನ ಕಾಮ್ಮಬಿ, ನಾಗ್ರಾನು ಅಜು಼ ಇನು ಬಿಜು಼ ಅಖ್ಖೀಸ್ ಥರಾನು ಚಾ಼ಕ್ರಿಮ ಕಠಣ್‌ಥಿ ರಬಾಡಿನ್ ಇವ್ಣ ಜಿವ್ಣನಾಸ್ ಖಟು ಕರೈನಾಖ್ಯು. ಈಜಿಫ್ಟ್ ಇಸ್ರಾಯೇಲ್‌ವಾಳಥಿ ಕರಾಯುತೆ ಅಖ್ಖುಕಾಮ್ ಘಣು ಕಠಣ್ ಹುಯಿರ‍್ಹುಥು. 15 ಅತ್ರೇಸ್ ಕಾಹೆತೆ ಈಜಿಪ್ಟ್ ದೇಖ್ಹ್‌ನ ರಾಜಾ಼ನೆ "ಶಿಪ್ರಾ" ಅಜು಼ "ಪೂಗ" ಕರಿ ನಾಮ್ನಿ ಬೇಜ಼ಣಿನ ಮದತ್‌ಕರಿನ್, ಇವ್ಣುನ ಇಬ್ರಿಯಾನ ಲಡ್ಕಾವ್ನ ಜ಼ಣಾವವಾಳಿನ ಜೋ಼ಡೆ ವಾತೆ ಬೊಲ್ಯೊ. 16 ಇನೆ ಇವ್ಣುನ, "ತುಮೆ ಇಬ್ರಿಯಾನಿ ತಯೇಡಾವ್ನ ಜ಼ಣಾವನಿ ವಖ್ಹ್‌ತೆ ಇವ್ಣೆ ಜ಼ಣಾತೆ ಲಡ್ಕು ಪರ್ಖ್ಹೊ ಲಡ್ಕು ಹುಯಿರ‍್ಹುತೊ ಮಾರಿನಾಖಿದೆವೊ, ತಯೇಡ ರ‍್ಹಯೂತೊ ಬಚಾ಼ನ ಮ್ಹೇಲೊ" ಕರಿ ಬೊಲ್ಯೊ. 17 ಕತೋಬಿ ಜ಼ಣಾವವಾಳಿಯೆ ದೇವ್‌ಥಿ ಡರಿನ್ ಈಜಿಪ್ಟ್‌ನ ರಾಜ಼ವ್ನ ವಾತ್ನಿತರ ಕೋಕರ‍್ಯೆನಿತೆ ಪರ್ಖ್ಹಾ ಲಡ್ಕಾವ್ನ ಜಾನ್‌ಥಿ ಬಚಾ಼ಡ್ಯು. 18 ತದೆ ಈಜಿಪ್ಟ್‌ನೊ ರಾಜ಼ ಜ಼ಣಾವವಾಳಿಯೇನ ಬುಲೈನ್ "ತುಮೆ ಇವ್ಣ ಪರ್ಖ್ಹಾ ಲಡ್ಕಾವ್ನ ಬಚಾ಼ಡಿಶನ? ಅಮ್ ಶನ ಕರಿಯೆ?" ಕರಿ ಬೊಲ್ಯೊ. 19 ಜ಼ಣಾವವಾಳಿಯೆನೆ ಫರೋಹಾನು "ಇಬ್ರಿಯಾನಿ ತಯೇಡ ಈಜಿಪ್ಟ್‌ನಿ ತಯೇಡನಿತರ ಕಾಹೆ, ಘಣು ಚಾ಼ತುರ್ ಅಕ್ಕಲ್‌ವಾಳು, ಜ಼ಣಾವವಾಳಿಯೆ ಆವಾನ ಅಗ್ಗಳಸ್ ಲಡ್ಕಾವ್ನ ಜ಼ಣಿಲೇತಿಥಿ" ಕರಿ ಬೋಲ್ಯು. 20 ಇನಖ್ಹಾಜೆ ದೇವ್ನೆ ಯೊ ಜ಼ಣಾವವಾಳಿಯೇನ ದಯಾ ಕರ‍್ಯೊ. ಅನೇಥಿ ಇಸ್ರಾಯೇಲ್ನು ಅದ್ಮಿ ಜಾ಼ಖ್ಹತ್‌ಹುಯಿನ್ ಘಣು ತಾಖಥಿ ಹುಯು. 21 ಜ಼ಣಾವವಾಳಿಯೆ ದೇವ್‍ಥಿ ಡರಿಯೇತೆಖ್ಹಾಜೆ, ಇನೆ ಇವ್ಣಿ ಪಿಳ್ಗಿನ ಭಡಾಯೊ. ಇಸ್ರಾಯೇಲ್‌ವಾಳು ಜಾ಼ಖ್ಹತ್ ಶಕತ್‌ವಾಳು ಹುಯು. 22 ಇನವಾರ್ ಫರೋಹಾನೆ ಇನ ಅದ್ಮಿವ್‌ನ, "ಇಬ್ರಿಯವಾಳನು ಪೈದಾಖ್ಹ್‌ನ ಪರ್ಖ್ಹಾ ಲಡ್ಕಾವ್ನ ನೈಲ್ ನದ್ದೀಮ ನಾಕ್ಣು’ ತಯೇಡ ಲಡ್ಕಾವ್ನ ಮ್ಹೇಲಿದೇವ್ಣು" ಕರಿ ಹುಕುಮ್ ಕರ‍್ಯೊ.