ವಿಮೋಚನಕಾಂಡ 9

ಜಾನ್‌ವಾರ್‌ನು ಮರಣ್‌

1 ಇನವಾರ್ ಯೆಹೋವಾನೆ ಮೋಶೆನ ಶಾತ್‌ಬೋಲ್ಯೊ ಕತೊ, "ತೂ ಫರೋಹಕನ ಜೈ಼ನ್ ಇನ, ‘ಇಬ್ರಿಯವಾಳನು ದೇವ್‌ಹುಯಿರ‍್ಹೊತೆ ಯೆಹೋವ ಇನ ಆರಾದನೆ ಕರಾನಿತರ ಇನ ಅದ್ಮಿನ ಹುಕುಮ್ ದೇವ್ಣುಕರಿ ಬೋಲಿರಾಖ್ಯೊಸ್. 2 ತು ಇವ್ಣುನ ಹುಕುಮ್ ನಾದೀನ್ ಬಿಜೂ಼ಬಿ ಇವ್ಣುನ ಅಡ್ಡಿ ಕರ‍್ಯೊತೊ, 3 ಯೆಹೋವ ಜ಼ಂಗಳ್‌ಮಛಾ಼ತೆ ತಾರು ಹಿಡಿ ಜಾನ್ವರ್‌ನಾಬಿ, ಘೋಡೊ, ಗಧೇಡೊ, ಊಟ್, ಢಾಂಡು, ಮೇಂಢು, ಬೋಕ್ಡು ಆ ಅಖ್ಖಾನ ಮೋಟೊ ರೋಗ್‌ದೀನ್‌ ತುಮೂನ ಶಿಕ್ಷೆ ದೆವುಸ್‌. 4 ಯೆಹೋವ ಹುಯಿರೋತೆ ಮೇ ಇಸ್ರಾಯೇಲ್‌ನ ಜಾನ್ವರ್‌ನಾಬಿ ಈಜಿಪ್ಟ್‌ನ ಜಾನ್ವರ್‌ನಾಬಿ ಫರಕ್ ಕರಿಶ್. ಇಸ್ರಾಯೇಲ್‌ವಾಳನ ಛಾ಼ತೆ ಜಾನ್ವರ್‌ಮ ಏಕ್‌ಬಿ ಮರ್ಶೆಕೊಯ್ನಿ’ ಕರಿ ಬೋಲ್ನು" ಕರಿಬೋಲ್ಯೊ. 5 ಆಸ್ ಕಾಹೆತೆ ಯೆಹೋವ ಹುಯಿರೋತೆ ಮೇಸ್ ಕಾಲೆ ಆಸ್ ವಖ್ಹತ್‌ಮಾಸ್‌ ಆ ಕಾಮ್ನ ದೇಖ್ಹ್‌ಮ ಕರೀಶ್‌ಕರಿ ಬೋಲ್" ಕರಿಬೋಲ್ಯೊ. 6 ತಿನವ್ಹಾಣೆ ಯೆಹೋವನೆ ಯೊ ಕಾಮ್‌ಖ್ಹಾರು ಹುವಾನಿತರ ಕರ‍್ಯೊ ಈಜಿಪ್ಟ್‌ವಾಳನು ಜಾನ್ವರ್‌ಖ್ಹಾರು ಮರಿಗಯು. ಇಸ್ರಾಯೇಲ್‌ವಾಳನ ಜಾನ್ವರ್‌ಮ ಎಕ್ ಮರ‍್ಯುಕೊಯ್ನಿ. 7 ಫರೋಹ ಪುಛಾ಼ವಖ್ಹತರ್‌ ಇಸ್ರಾಯೇಲ್ನ ಜಾನ್ವರ್‌ಮ ಏಕ್‌ಬಿ ಮರ‍್ಯುಕೊಯ್ನಿಕರಿ ಮಾಲುಮ್ ಕರಿಲಿದೊ. ಕತೋಬಿ ಫರೋಹನೆ ಹಟಕರಿನ್, ಯೊ ಅದ್ಮಿವೊನ ಜಾ಼ವಾನ ಕೊಮ್ಹೇಲ್ಯೊನಿ.

ಉಕ್ಳಾನು

8 ಯೆಹೋವಾನೆ ಮೋಶೆ ಅಜು಼ ಆರೋನ್ನ, "ತುಮೆ ಛು಼ಲ್ಲಾನಿ ರಾಕ್‌ನ ಪಖ್ಹ್‌ಲಿಭರಿ ಪಾಡಿಲೆವೊ, ಮೋಶೆ ಇನ ಫರೋಹನ ಡೋಳಾನ ಖ್ಹಾಮ್ಣೆ ವಹಿರಾಮ ಉಡಾವದೆ. 9 ತದೆ ಈಜಿಪ್ಟ್ ದೇಖ್ಹ್‌ಮ ಅಖ್ಖೂಸ್ ಧೂಳ್‌ಹುಯಿನ್‌ ಈಜಿಪ್ಟ್ ದೇಖ್ಹ್‌ ಅಖ್ಖೂಸ್ ಫೈಲೈನ್ ಅದ್ಮಿಪರ್‌ಬಿ ಜಾನ್ವರ್‌ ಪರ್‌ಬಿ ಫೋಡಾನೊ ಫರ್‌ಪೋಲೊ ಉಠಾನಿತರ ಕರ್ಷೆ" ಕರಿಬೋಲ್ಯೊ. 10 ಇಮ್ಮಸ್ ಮೋಶೆ ಅಜು಼ ಆರೋನ ಇವ್ಣೆ ಛು಼ಲ್ಲಾನಿ ರಾಕ್‌ನ ಪಾಡಿಲಿನ್ ಫರೋಹನ ಖ್ಹಾಮ್ಣೆ ಭೀರ‍್ಯ. ಮೋಶೆ ಯೊ ರಾಕ್‌ನ ವಹಿರಾಮ ಉಡಾಯೊ. ತದೆ ಯೊ ಅದ್ಮಿಪರ್‌ಬಿ ಜಾನ್ವರ್‌ಪರ್‌ಬಿ ಫಲೈನ್ ಫರ್‌ಪೋಲೊ ಹುಯಿನ್‌ ಫೋಡಹುಯು. 11 ಆ ಕಾಹೆತೆ ಜಾ಼ದುಕರಾವಳು ಫೋಡಾವ್ನ ಖ್ಹಾಜೇಥಿ ಮೋಶೆನ ಖ್ಹಾಮ್ಣೆ ಭಿರಾವನ ಕೊಹುಯುನಿತೆ ಚ಼ಲಿಗಯು. ಶನಕತೊ ಫೋಡಖ್ಹಾರು ಮಂತರ್‌ ಕರಾವಳಪರ್‌ಬಿ. ಈಜಿಪ್ಟ್‌ವಾಳಪರ್‌ಬಿ ಉಠಿರ‍್ಹಿಥು. 12 ಕತೋಬಿ ಯೆಹೋವ ಮೋಶೆನ ಬೋಲಾನಿತರಾಸ್ ಹುಯು. ಯೆಹೋವ ಫರೋಹನ ಹಟ ಕರಾಯೋತೆ ಇನಖ್ಹಾಜೆ ಯೊ ಇವ್ಣಿ ವಾತೆನ ಖ್ಹಂಜೊ ಕೊಯ್ನಿತೆ ಗಯೊ.

ಗಾರೊ

13 ಇನಕೇಡೆಥು ಯೆಹೋವ ಮೋಶೆನ, "ತು ವ್ಹಾಣೆ ಉಠೀನ್ ಫರೋಹನ ಖ್ಹಾಮ್ಣೆ ಜೈ಼ನ್ ಭೀರಿನ್ ಇನ, ‘ಇಬ್ರಿಯಾನೊ ದೇವ್‌ಹುಯಿರ‍್ಹೋತೆ ಯೆಹೋವ ಹುಕುಮ್ ದ್ಯವಾನು ಶಾತ್‌ಕತೊ ಮನ ಆರಾದನೆ ಕರಾನಿತರ ಮಾರ ಅದ್ಮಿವ್‌ನ ಹುಕುಮ್‌ ದೇವ್ಣು. 14 ಆ ಹಲ್ಲ ಮಾರಿ ಚ಼ಪ್ಪಣ್‌ಮ ಛಾ಼ತೆ ಆ ಖ್ಹತಾಪ್ಣಿನ ತಾರ ಅದ್ಮಿವ್‌ನಾಬಿ ಅದಿಕಾರಿವ್‌ನಾಬಿ ಹುವಾನಿತರಾಬಿ,ಅಜು಼ ತುನಾಬಿ ಹುವಾನಿತರಬಿ ಕರೀಶ್. ಅನೇಥಿ ಖ್ಹಾರಿಸ್ ಜಗತ್ಮ ಮನ ಸಮಾನ್ ಕೋಣ್‌ಬಿ ಕೊಯ್ನಿಕರಿ ಮಾರಿ ಬಾರೇಮ ತೂ ಮಾಲುಮ್ ಕರಿಲಿಷ್. 15 ಮೇ ತುನಾಬಿ, ತಾರ ಅದ್ಮಿವ್‌ನಾಬಿ ರೋಗ್‌ಥಿ ಮಾರಾನ ಹಾತ್‌ ಪಾಡ್ಯೊತೊ ತುಮೆ ಅಖ್ಖು ನಾಶ್‌ಹುಯಿಜ಼ಾಶು. 16 ಕತೋಬಿ ಮೇ ತಾರಾಮ ಮಾರಿ ಶಕತ್ನ ವತಾಳಿನ್ ಮಾರ ನಾಮ್ನ ಜಗತ್ಮಾಸ್ ಪ್ರಚಾರ್ ಕರ‍್ನುಕರಿ ಉದ್ದೇಶ್‌ಥೀಸ್ ತುನ ಜಿವ್ತೊ ರಾಖಿರಾಖ್ಯೋಸ್‌. 17 ಕತೋಬಿ ತೂ ಅಜೂ಼ಬಿ ಘಬ್ರಿಹುಯಿನ್‌ ಮಾರ ಅದ್ಮಿನ ಜ಼ಾವನ ಕೊ ಮ್ಹೇಲಾನಿ. 18 ಇಮ್‌ಕತೊ, ಕಾಲ್ ಅವ್ಡಿಸ್ ವಖ್ಹತ್‌ಮ ಜಾ಼ಖ್ಹತ್ ಗಾರ‍್ನೊ ಪಾಣಿ ಪಡಾನಿತರ ಕರಿಶ್. ಈಜಿಪ್ಟ್ ದನ್ ಶುರು ಹುಯುತಪ್‌ಥು ಹಮ್ಕೆಲಗುಬಿ ಎಥ್ರಾನೊ ಗಾರ‍್ನೊಪಾಣಿ ಪಡಿರ‍್ಹಿಷೆ ಕೊಯ್ನಿ. 19 ಇನಖ್ಹಾಜೆ ತೂ ಆಳ್‌ಖ್ಹಾರನ ಮೋಕ್ಲಿನ್ ತಾರ ಜಾನ್ವರ್‌ನಾಬಿ, ತುನ ಖೇತರ್‌ಮ ಛಾ಼ತೆ ಖ್ಹಾರೂಸ್ ಒಗ್ಗಿಸ್‌ಮ ಖ್ಹವಾರಿಲೆ ಘರ್‌ಮ ಪೇಶ್ಯುಕೊಂತೆ ಬಲ್ಡಾನಪರ್ ರ‍್ಹವಾಳು ಅಖ್ಖೂಸ್ ಅದ್ಮಿಖ್ಹಾರುಬಿ, ಜಾನ್ವರ್‌ಖ್ಹಾರು ಯೊ ಬಂಡಾನ ಪಾಣಿನ ಮಾರ್‌ಥಿ ಮರಿಜಾ಼ಷೆ" ಕರಿಬೋಲ್ಯೊ. 20 ತದೆ ಫರೋಹನ್ನ ಸೇವಕರ್‌ಮ ಕೋಣ್ ಕೋಣ್ ಯೆಹೋವನಿ ವಾತೆನ ಡರ‍್ಯೂಕಿ ಇವ್ಣೆ, ಇವ್ಣ ಆಳ್‌ನ ಜಾನ್ವರ್‌ನ ಒಗ್ಗೀಮ ಘರೆ ಬುಲೈಲಿದು. 21 ಕೋಣ್‌ ಯೆಹೋವನಿ ವಾತೆನ ಮಾನಕೊಯ್ನಿಕಿ, ಇವ್ಣೆ ಇವ್ಣ ಆಳ್‌ಖ್ಹಾರನ, ಜಾನ್ವರ್‌ಖ್ಹಾರನ ಖೇತರ್‌ಮಾಸ್ ಮ್ಹೇಲಿದಿದು. 22 ಯೆಹೋವ ಮೋಶೆನ, "ಆಬ್‌ಭಣಿ ತಾರು ಹಾತ್ನ ಪಾಡ್ ತದೆ ಈಜಿಪ್ಟ್ ಅಖ್ಖೂಸ್, ಅದ್ಮಿವ್‌ಪರ್‌ಬಿ ಜಾನ್ವರ್‌ಪರ್‌ಬಿ ಖೇತರ್‌ಮ ಛಾ಼ತೆ ಅಖ್ಖೀಸ್ ಶೋಶಿನಪರ್‌ಬಿ ಗಾರಾನೊ ಬಂಡಾನೊ ಪಾಣಿ ರಂಚಾ಼ವ್‌ಶೆ" ಕರಿ ಬೊಲ್ಯೊ. 23 ಮೋಶೆ ಇನ ಲಠ್ಠಾನ ಆಬ್‌ಭಣಿ ಪಾಡಖ್ಹತರ್ ಘಲಾರ್‌ಬಿ, ಗಾರ‍್ನೊ ಪಾಣಿನು ವರ್ಖ್ಹಾತ್ನ ಮೋಕ್‌ಲ್ಯೊ. ವಿಜ್ಳಿ ಜ಼ಮಿನ್‌ಪರ್ ಮಾರಿನ್ ಯೆಹೋವ ಈಜಿಪ್ಟ್ ದೇಖ್ಹ್‌ಪರ್ ಗಾರಾನೊ ಬಂಡಾನೊ ಪಾಣಿನ ವರ್ಖ್ಹಾಯೊ. 24 ಗಾರಾನೊ ಬಂಡಾನೊ ವರ್ಖ್ಹಾತ್ ಘಣು ಜೋ಼ರೆಖ್ಹು ಥು. ಇನಿ ಜೋ಼ಡ್ಮಾಸ್ ವಿಜ್ಳಿ ಖಡ್ಕುಕರ್ತಿಥಿ. ಈಜಿಪ್ಟ್ ದೇಖ್ಹ್‌ಮ ಹಮ್ಕೆಲಗೂಬಿ ಇಮ್ನು ಮೋಟೊ ಗಾರಾನೊ ಪಾಣಿ ಕೊಹುಯಿರ‍್ಹೊಥುನಿ. 25 ಯೊ ಬಂಡಾನೊ ಪಾಣಿ ಈಜಿಪ್ಟ್ ದೇಖ್ಹ್‌ನು ಅಖ್ಖೀಸ್ ಬಾಜು಼ಮ ಅದ್ಮಿವ್‌ನ ಜಾನ್ವರ್‌ನ ಲುಕ್ಷಾನ್ ಕರ‍್ಯು ಯೊ ಬಂಡಾನ ಪಾಣಿಥಿ ಖೇತರ್‌ಮ ಥೂತೆ ಅಖ್ಖು ಶೋಶಿ ಹಾಳ್‌ಹುಯಿಗು, ಝಾ಼ಡಿಮ ಥೂತೆ ಝಾ಼ಡು ಅಖ್ಖು ಟುಟಿ ಪಡಿಗಯು. 26 ಇಸ್ರಾಯೇಲ್‌ವಾಳು ಥೂತೆ ಗೋಷೆನ್ ತಬರ್‌ಖಾಮ ಗಾರಾನೊ ಬಂಡಾನೊ ಪಾಣಿ ಪಡ್ಯೊಕೊಯಿನಿ. 27 ತದೆ ಫರೋಹನೆ ಮೋಶೆನ ಆರೋನ್ನ ಬುಲೈನ್ ಇವ್ಣುನ, "ಮೇ ಅಪರಾದಿ ಕರಿ ಹಮ್ಕೆ ಮಾನಿಲೆವುಸ್‌; ಯೆಹೋವ ನೀತಿವಾಳೊ. ಮೇ ಮಾರು ಅದ್ಮಿಖ್ಹಾರು ದೋಷ್‌ವಾಳು. 28 ಆ ಖತರ್‌ನಾಕ್ ಘಲಾರನೊ ಬಂಡಾನೊ ವರ್ಖ್ಹಾತ್‌ಬಿ ಘಣು ಜಾ಼ಖ್ಹತ್ ಹುಯು. ಆ ಖ್ಹಾರು ಭೀರಾಖನಖ್ಹಾಜೆ ಯೆಹೋವನ ಪ್ರಾರ್ಥನೆ ಕರೊ. ಆ ದೇಖ್ಹ್‌ನ ಮ್ಹೇಲಿನ್ ಜಾ಼ವಾನ ತುಮುನ ಹುಕುಮ್ ದೆವುಸ್‌ ತುಮುನ ಅಡ್ಡಿ ಕರಿಶ್ ಕೊಯ್ನಿ" ಕರಿ ಬೊಲ್ಯೊ. 29 ಇನ ಮೋಶೆ, "ಮೆ ಖ್ಹಯೇರ್ನ ಭಾರ್‌ಜಾ಼ತ ತದೇಸ್‌ ಹಾತ್ ಪಾಡಿನ್ ಯೆಹೋವನ ಪ್ರಾರ್ಥನೆ ಕರುಸ್; ತದೆ ಘಲಾರನೊ ಅಜು಼ ಗಾರ‍್ನೊ ವರ್ಖ್ಹಾತ್ ಭೀರಿಜಾಷೆ. ಅನೇಥಿ ಹರೇಕ್ ಧರ್ತೀನು ಲೋಕ್ ಯೆಹೋವನಿ ಕಬ್‌ಜಾ಼ಮ ಮಹಿ ಛಾ಼ಕರಿ ತೂ ಮಾಲುಮ್ ಕರಿಲಿಷ್. 30 ಕತೋಬಿ ತೂ ರ‍್ಹವೊ ತಾರ ಅದಿಕಾರಿನರ‍್ಹವೊ ದೇವ್ ಹುಯಿರ‍್ಹೋತೆ ಯೆಹೋವನ ತದೇಬಿ ಡರ್‌ಶು ಕೊಯ್ನಿಕರಿ ಮಾಲುಮ್ ಛಾ಼ಕರಿ ಬೊಲ್ಯೊ. 31 ಬಾಜ಼್‌ರೊ ಅಜು಼ ಅಗಸೆದಾಣನಿ ಪಿಕಾವ್ಣಿ ಅಖ್ಖು ನಾಶ್‌ಹುಯಿಗು. ಶನಕತೊ ಬರಿಕ್‍ಗ್ಹವ್ ನಿಕ್‌ಳಿರ‍್ಹಿಥು ಅಗಸೆದಾಣನಿ ಮೊಗ್ ಮಿಛಾ಼ಣ್ಯುಥು. 32 ಘವ್‌ಬಿ ಚ಼ಣ ಫಾಚ಼್‌ಲ್ಯು ಬೆಳೆಹುಯಿರ‍್ಹುಥೂತೆ ಇನಖ್ಹಾಜೆ ಇನ ಲುಕ್ಷಾನ್ ಕೋ ಹುಯುನಿ 33 ಮೋಶೆ ಫರೋಹಕಂಥೊ ಖ್ಹಯೇರ್ನ ಭಾರ್‌ಆಯಿನ್ ಹಾತ್ ಪಾಡಿನ್ ಯೆಹೋವನ ಪ್ರಾರ್ಥನೆ ಕರ‍್ಯೊ. ಘಲಾರನೊ ಅಜು಼ ಗಾರಾನೊ ವರ್ಖ್ಹಾತ್‌ ಭೀರಿಗಯು. 34 ಕತೋಬಿ ಯೊ ಮೋಟೊ ಗಾರ‍್ನೊಪಾಣಿ ಘಲಾರನು ಭೀರಿಗಯೂತೆ ಇನ ಫರೋಹ ದೇಖಖ್ಹತರ್ ಯೋಬಿ ಇನು ಅದಿಕಾರಿಖ್ಹಾರು ಬಿಜೂ಼ಬಿ ಪಾಪಿ ಹುಯಿನ್ ಇವ್ಣೆ ಹಟ ಕರಿಲಿದು. 35 ಯೆಹೋವ ಮೋಶೆಥಿ ಬೋಲಾವನಿತರಾಸ್ ಹುಯು; ಫರೋಹನೊ ದಿಲ್‌ ಮೊಂಡ್‌ ಹುಯಿಗು. ಯೊ ಇಸ್ರಾಯೇಲ್‌ವಾಳನ ಜಾ಼ವಕೋದಿದೋನಿ.