1 ಯೆಹೋವಾನೆ ಮೋಶೆನ ಜೋ಼ಡೆ ವಾತೆ ಬೋಲಿನ್, 2 "ಇಸ್ರಾಯೇಲ್‌ವಾಳಮ ಪೈದಾಹುಯಿರ‍್ಹುತೆ ಹರೇಕ್ ಪೈಲ್ಹೋಟ ಪರ್ಖ್ಹಾನ ಮಾರಖ್ಹಾಜೆ ಮ್ಹೇಲಿದೇವ್ಣು. ಅದ್ಮಿಮ ರ‍್ಹವೊ ಜಾನ್ವರ್‌ಮ ರ‍್ಹವೊ ಪೈದಾ ಹುವಾತೆ ಪಹಿಲು ಗರಬ್‌ನು ಫಲ್ ಮಾರು ಹುಯಿರ‍್ಹುಸ್" ಕರಿಬೋಲ್ಯೊ.

3 ಮೋಶೆ ಇಸ್ರಾಯೇಲ್‌ವಾಳನ, "ಗುಲಾಮ್‌ಗಿರಿಮ ರ‍್ಹೀನ್ ಈಜಿಪ್ಟ್ ದೇಖ್ಹ್‌ಥು ಛುಟ್ಕಾರ್ ಹುಯಿರ‍್ಹುತೆ ಆ ದನ್ನಾ ತುಮೆ ಯಾದ್ ರಾಖೊ. ಯೆಹೋವ ಇನಿಮೋಟಿ ಶಕಥ್ಥಿ ತುಮುನ ಯೊ ಝ಼ಗೋಥು ಛೋ಼ಡೈರಾಖ್ಯೊಸ್. ಆ ದನ್ಮ ತುಮೆ ಖಾಟು ಮಳಾಯುಹುಯು ನಾಖಾವ್ಣು. 4 ಚೇತ್ರಿನು ಮಹಿನಾನು ಆ ದನ್ಮಾಸ್ ತುಮೆ ಭಾರ್‌ ಐರ‍್ಹಾಸ್. 5 ಯೆಹೋವ ತುಮಾರ ಗುರುಗುರಬ್‍ಲ್ಯನ ಕೋಲ್‌ನಾಮ್‌ ಕರಿನ್ ಬೋಲಾನಿತರ, ತುಮುನಾಬಿ ದೂದ್‌ಬಿ ಅಜು಼ ಶೇತ್‌ಬಿ ವಹುಕರಾನು ದೇಖ್ಹ್‌ನ ಕತೊ ಕಾನಾನ್‌ವಾಳು, ಹಿತ್ತಿಯವಾಳು, ಅಮೋರಿಯವಾಳು, ಹಿವ್ವಿವಾಳು, ಯೆಬೂಸಿವಾಳು ಜಿವ್‌ಕರಾಸ್ತೆ ದೇಖ್ಹ್‌ನ ಬುಲೈಲೀನ್ ಐನ್ ಇನ ತುಮುನ ದಿದುತೊ ತದೆ ತುಮೆ ಆ ಮಹಿನಾಮ ಆ ಕಾಮ್ನ ಚ಼ಲಾವ್ಣು. 6 ಖ್ಹಾತ್ ದನ್ ತುಮೆ ಖಾಟುಕೊಂತೆ ರೋಟಾವ್ನ ಖಾಣು, ಖ್ಹಾತ್‌ನ ದನ್ಮ ಯೆಹೋವನಿ ಮರ‍್ಯಾದಿನಖ್ಹಾಜೆ ಆ ಪೂಜಾ಼ನ ಕರ‍್ನು. 7 ಯೊ ಖ್ಹಾತ್ ದನ್‌ಬಿ ಖಾಟುಕೊಂತೆ ರೋಟಾವ್ನ ಖಾಣು. ಕಾಹೆತೆ ತುಮಾರಮ ಖಾಟು ಆಟೊ ದೆಖಾವ್ಣುನಾ, ನತರ್ ಖಾಟೊ ಆಟೊ ತುಮಾರ ಇಟಾರಮಸ್ ನಾದೆಖಾವ್ಣು. 8 ಯೊ ದನ್ಮ ತುಮೆ ತುಮಾರ ಲಡ್ಕಾವ್ನ, ಅಪ್ಣು ಅದ್ಮಿ ಈಜಿಪ್ಟ್ ದೆಖ್ಹ್‌ಥು ನಿಕ್ಳಿನ್ ಆವಖ್ಹತರ್ ಯೆಹೋವ ಅಪ್ಣಖ್ಹಾಜೆ ಕರ‍್ಯೊತೆ ಇನ ಯಾದ್ ಕರಿಲ್ಯವಾನಖ್ಹಾಜೆ ಅನ ಚ಼ಲಾವ್ಣು. 9 ಯೆಹೋವ ಇನಿ ಮೋಟಿ ಶಕಥ್ಥಿ ತುಮುನ ಈಜಿಪ್ಟ್ ದೇಖ್ಹ್‌ಥು ಛೋ಼ಡಾಯೊತೆಖ್ಹಾಜೆ ಇನ ನಿಯಮ್‌ನಿ ಬಾರೇಮ ತುಮೆ ಬೋಲ್ನು. ಆ ಆಚರಣೆನ ತುಮಾರ ಹಾತ್‌ಪರ್ ಖ್ಹಣೇದ್‌ಕರಿನ್‌ಬಿ, ತಾಳ್ವಪರ್ ಭಾಂದಿರಾಖನು ಯಾದ್‌ನಿ ಪಟ್ಟಿನಿತರಾಬಿ ರ‍್ಹೇವ್ಣು. 10 ಅಮ್ ಛಾ಼ತೆಖ್ಹಾಜೆ ವರಖ್ಹ್ ವರಖ್ಹ್‌ಬಿ ಬೋಲಿರಾಖ್ಯೊಸ್‌ತೆ ವಖ್ಹತ್‌ಮ ತುಮೆ ಆ ಪದತ್ತಿ ಕರ‍್ನು.

11 ಯೆಹೋವ ತುಮುನಾಬಿ ತುಮಾರ ಗುರುಗುರಬ್‌ಲ್ಯನಬಿ ಕೋಲ್‌ನಾಮ್‌ ಕರ‍್ಯುತೆ ಪರಕ್ಮ ತುಮುನ ಕಾನಾನ್‌ವಾಳನ ದೇಖ್ಹ್‌ನ ಬುಲೈನ್ ಯೊ ದೇಖ್ಹ್‌ನ ತುಮುನ ದ್ಯವಾನ ಬಾದ್ಮ, 12 ತುಮಾರಮಾಬಿ ತುಮಾರ ಜಾನ್ವರ್‌ಮಾಬಿ, ಪೈದಹುವಾಸ್ತೆ ಪಹಿಲು ಪರ್ಖ್ಹೊ ಹುಯಿರ‍್ಹುತೊ ಯೊ ಯೆಹೋವನೊ ಭಾಗ್‌ಕರಿ ಮಾಲುಮ್ ಕರಿನ್ ಇನ ಯೆಹೋವಾನ ಸಮರ್ಪಣ್‌ ಕರ‍್ನು. 13 ಪಹಿಲೆ ಪೈದಹುಯುತೆ ಗಧೇಡಾನ ಪೈಲ್ಹೋಟ ಚೆಲ್ಕಾನ ಬದಲ್ ಮೇಂಢಾನ ಚೆಲ್ಕಾನ ಛೋ಼ಡೈಲಿಯೆಜಾ಼ಯ್. ಇಮ್ ನಾ ಛೋ಼ಡಾಯುತೊ ಇನು ಬೋಚಿ ತೋಡಿ ಮಾರಿನಾಕ್ಣು. ಅದ್ಮಿನ ಪೈಲ್ಹೋಟು ಪರ್ಖ್ಹಾನ ಯೆಹೋವನಖ್ಹಾಜೆ ಛೋ಼ಡೈಸ್‌ಲೇವ್ಣು. 14 ಖ್ಹಾಮ್ಣೆ ತುಮಾರ ಲಡ್ಕ, ‘ಅನಿ ಮತ್ಲಬ್ ಶಾತ್?’ ಕರಿ ತುಮುನ ಪುಛಾ಼ವನಿ ವಖ್ಹ್‌ತೆ ತುಮೆ ಇವ್ಣುನ, ‘ಹಮೆ ಗುಲಾಮ್‌ಗಿರಿ ಥಾತೆ ಈಜಿಪ್ಟ್ ದೇಖ್ಹ್‌ಥಿ ಯೆಹೋವನೆ ಇನಿ ಮೋಟಿ ಶಕಥ್ಥಿ ಹಮುನ ಛೋ಼ಡಾಯೊ. 15 ಫರೋಹನೆ ಹಟಧರಿನ್ ಹಮುನ ಮೋಕ್‌ಲ್ಯೊಕೊಂತೆ ರ‍್ಹವಾನಿ ವಖ್ಹ್‌ತೆ ಯೆಹೋವ ಈಜಿಪ್ಟ್ ದೇಖ್ಹ್‌ಮ ಅದ್ಮಿವ್‌ನ ಪೈಲ್ಹೊಟ ಲಡ್ಕಾವ್ನ, ಜಾನ್ವರ್‌ನ ಪೈಲ್ಹೊಟ ಚೆಲ್ಕಾವ್ನ ಇಮ್ಮಸ್ ಯೊ ದೇಖ್ಹ್‌ಮ ಪೈಲ್ಹೋಟು ಥೂತೆ ಅಖ್ಖಾಸ್ನ ಮಾರಿನಾಖಿದಿದೊ. ಇನಖ್ಹಾಜೆ ಪರ್ಖ್ಹೊ ಪೈದಾ ಹುವಾಸ್ತೆ ಪಹಿಲ ಗರಬ್ನ ಹಮೆ ಯೆಹೋವನ ಸಮರ್ಪಣ್‌ ಕರಿರಾಖ್ಯಸ್. ಅದ್ಮಿನ ಪೈದ ಹುಯೂತೆ ಪಹಿಲು ಗರಬ್ ತೋಬಿ ಬದಲ್‌ದೀನ್ ಛೋ಼ಡೈಯೆಸ್" ಕರಿಬೋಲ್ನು. 16 ಯೆಹೋವನೆ ಮೋಟಿ ಶಕಥ್ಥಿ ತುಮುನ ಈಜಿಪ್ಟ್ ದೇಖ್ಹ್‌ಥು ಛೋ಼ಡಾಯೊತೆ ಖಬರ್‌ನ ತುಮೆ ಖ್ಹಯಾಲ್ಮ ರಾಖಾನಿ ಖ್ಹಣೇದ್‌ನಖ್ಹಾಜೆ ಇನ ತುಮಾರ ಹಾತ್‌ಪರ್‌ಬಿ, ತಾಳ್ವಪರ್ ಯಾದ್‌ನಿ ಪಟ್ಟಿನಿತರಾಬಿ ರ‍್ಹೇವ್ಣು.

17 ಫರೋಹನೆ ಇಸ್ರಾಯೇಲ್‌ವಾಳನ ಜಾ಼ವಾನ ಹುಕುಮ್ ದ್ಯವಾಖ್ಹತರ್, ಫಿಲಿಷ್ಟಿವಾಳನು ದೇಖ್ಹ್‌ನು ಮಾರಗ್ ಖನ್ನೆ ರ‍್ಹಿಯುತೋಬಿ ದೇವ್ ಯೊ ವಾಟ್ಮ ಇವ್ಣುನ ಮೋಕ್‌ಲ್ಯೊ ಕೊಯ್ನಿ. ಶನಕತೊ, "ದೇವ್, ಅದ್ಮಿ ಜಂಗ್‌ನ ದೇಖಿನ್ ಘಬ್‌ರೈನ್ ಮನ್ ಫರೈಲಿನ್ ಈಜಿಪ್ಟ್‌ನ ಫಾಚು಼ ಚ಼ಲಿಗಯೂತೊ ಚ಼ಲ್ಯುಜಾಷೆ" ಕರಿ ಬೊಲ್ಯೊ. 18 ಅಮ್ ಛಾ಼ತೆ ಖ್ಹಾಜೇಥಿ ಯೆಹೋವನೆ ಅದ್ಮಿವ್‌ನ ಲಾಲ್ ದರ‍್ಯಾವ್ನ ಖನ್ನೆಛಾ಼ತೆ ಜ಼ಂಗಳ್‌ಪರ್ ಕರಿ ಪಡೀನ್ ಜಾ಼ವನಿತರ ಕರ‍್ಯೊ. ಕತೋಬಿ ಇಸ್ರಾಯೇಲ್‌ವಾಳು ಜಂಗ್‌ಭೀಡವಾಳ ಹುಯಿನಸ್ ಈಜಿಪ್ಟ್ ದೇಖ್ಹ್‌ಮಾಥು ನಿಕ್ಳಿನ್ ಆಯು. 19 ಆಸ್ ಕಾಹೆತೆ ಯೋಸೇಫನೆ ಇಸ್ರಾಯೇಲ್‌ವಾಳನ, "ದೇವ್ನೆ ಸಂಕೋಚ್‌ಕೊಂತೆ ತುಮುನ ಬಚಾ಼ಡಿನ್ ಇನ ವಾಗ್ದಾನ್ನ ಚ಼ಲಾವವಾಳು ಹುಯೂತೆಖ್ಹಾಜೆ ತುಮೆ ಜಾ಼ವಾನಿ ವಖ್ಹ್‌ತೆ ಮಾರ ಮುರ‍್ದಾನ ತುಮಾರ ಜೋ಼ಡ್ಮ ಲೀನ್ ಜಾ಼ವ್ಣು" ಕರಿ ಬೋಲಿನ್ ಖ್ಹಚೆಂಬಿ, ಕೋಲ್‌ನಾಮ್ ಕರಾಯೋತೆ ಖ್ಹಾಜೆ ಮೋಶೆನೆ ಯೋಸೆಫನ ಪಿಂಜ಼ರ್‌ನ ಇನಿ ಜೋ಼ಡ್ಮ ಲೀನ್ ಗಯೊ. 20 ಇವ್ಣೆ ಸುಕ್ಕೋತಿಥು ಚಾ಼ಲಿನ್ ರೇತ್ನ ಬಲ್ಡಾನ ಕನಾರಿಮ ಛಾ಼ತೆ ಏತಾಮಿಮ ಟೋಳ್‌ಮ ರ‍್ಹಿಯ. 21 ಯೆಹೋವನೆ ವ್ಹಾಣಾನಿ ವಖ್ಹತ್‌ಮ ವಾಟ್‌ವತಾಳನ ಖ್ಹಾಜೆ ವಾದ್ಳಾನು ಖಂಬಾಮಾಬಿ, ರಾತ್‌ನಿ ವಖ್ಹತ್‌ಮ ಉಜಾ಼ಳು ದ್ಯವಾನಖ್ಹಾಜೆ ಆಗ್ನು ಖಂಬು ಹುಯಿರ‍್ಹಿನ್ ಯೊ ಚ಼ಲವ್‌ಕರ್ತೊಥೊ. ಆ ಪರಕ್ಮ ಇವ್ಣೆ ರಾತ್ನು ವ್ಹಾಣಾನು ಚಾ಼ಲಿನ್ ಗಯು. 22 ವ್ಹಾಣಾನು ವಾದ್ಳಾನು ಖಂಬುಹುಯಿನ್, ರಾತ್ಮ ಆಗ್ನು ಖಂಬುಹುಯಿನ್ ಅದ್ಮಿನ ಮ್ಹೇಲಿನ್ ನಾ ಜೈ಼ನ್ ಹಿಜ್ಜಾ಼ಸ್ ರ‍್ಹೇತೊಥೊ.