ವಿಮೋಚನಕಾಂಡ 36

1 "ಬೆಚಲೇಲಬಿ ಅಜು಼ ಒಹೋಲೀಯಾಬ ಅಜು಼ ಅಲಕ್‌ ಅಕ್ಲಿಖ್ಹಾರು ಕತೊ ಯೆಹೋವಥಿ ಗ್ಯಾನ್ ಅಕ್ಕಲ್ನಲೀನ್‌ ಪವಿತ್ರ ದೇವ್ನಿ ಮಂದಿರ‍್ನ ತಯಾರ್ ಕರಾನ ಕಾಮ್ನ ಹೋಣುತೆ ಹರೇಕ್‌ಥರಾನು ರಾಛಾ಼ನ ಕರಾನ ತರಿಕಾನ ಮಾಲುಮ್‌ಕರವಾಳು, ಯೆಹೋವನೆ ಹುಕುಮ್‌ಕರ‍್ಯೊತೆ ಪರಕ್ಮಾಸ್ ಅಖ್ಖಾನಾಬಿ ಕರಸ್" ಕರಿಬೋಲ್ಯೊ.

ಅದ್ಮಿಖ್ಹಾರು ದಿಲ್‌ಛೋ಼ಡಿನ್‌ ಕಾಣ್ಕೆನ ದಿದೂತೆ

2 ಬೆಚಲೇಲಬಿ ಒಹೋಲೀಯಾಬಬಿ ಅಜು಼ ಕಿನ ದಿಲ್ಮ ಯೆಹೋವನೆ ಗ್ಯಾನ್ನ ದೀರಾಖ್ಯೊಸ್ಕಿ, ಕಿನಕಿನಾಬಿ ಆ ಕಾಮ್‌ಕರಾನ ದಿಲ್ಮ ಹುವಾಸ್ಕಿ ಎಥ್ರಾನವಾಳನ ಅಕ್ಲಿನಅಖ್ಖಾನ ಮೋಶೆನೆ ಇನ ಖನ್ನೆ ಬುಲಾಯೊ. 3 ಇವ್ಣೆ ದೇವ್ನಿ ಮಂದಿರ‍್ನ ತಯಾರ‍್ನ ಕಾಮ್ನ ಇಸ್ರಾಯೇಲ್‌ವಾಳು ಲಾಯುತೆ ಕಾಣ್ಕೆಅಖ್ಖು ಮೋಶೆಥಿ ಲೀಲಿದು. ಇಸ್ರಾಯೇಲ್‌ವಾಳು ಹರೇಕ್‌ದನ್ ವ್ಹಾಣವೇಳಿ ಮೋಶೆಕನ ಆಯಿನ್‌ ಕಾಣ್ಕೆನ ಶುದ್‍ ದಿಲ್‌ಥಿ ದೇತುಥು. 4 ತದೆ ದೇವ್ನ ಮಂದಿರ‍್ನ ಕಾಮ್ನ ಕರ್ತುಥೂತೆ ಯೊ ಗ್ಯಾನಿಖ್ಹಾರು,ಇವ್ಣ ಇವ್ಣ ಕಾಮ್ನ ಮ್ಹೇಲಿನ್‌, 5 ಮೋಶೆಕನ ಆಯಿನ್‌ ಇನ, "ಯೆಹೋವನೆ ಹುಕುಮ್‌ಕರ‍್ಯೊತೆ ಕಾಮ್ನ ಹೋಣುತೆ ಇಂಥಿಬಿ ಘಣು ಅದ್ಮಿಖ್ಹಾರು ಕಾಣ್ಕೆನ ಲ್ಯಾವ್ತುಥು ಕರಿ" ಬೋಲ್ಯು.

6 ತದೆ ಮೋಶೆನೆ ಇನ ದೇಖಿನ್, "ದೇವ್ನಿ ಮಂದಿರ‍್ನ ಕಾಮ್ನಖ್ಹಾಜೆ ಖಿವು ಪರ್ಖ್ಹೊರ‍್ಹೇವೊ ತಯೇಡರ‍್ಹೇವೊ ಇನಪಾರ್‌ ಕಾಮ್ನ ನಾಕರ‍್ನು" ಕರಿ ಹುಕುಮ್‌ಕರಿನ್‌ ಇನ ಟಾಂಡಾಮ ಫೈಲಾಯೊ. ಅದ್ಮಿಖ್ಹಾರು ಕಾಣ್ಕೆಅಖ್ಖಾನ ಲ್ಯಾವಾನು ಭೀರಾಖಿದಿದು. 7 ಶನಕತೊ ಕಾಮ್ನಅಖ್ಖು ಕರಾನ ಹೋಣುತೆ ಎತ್ರೆಥೀಬಿ ಘಣು ರಾಛು಼ರ‍್ಹೇತುಥು.

ಯೆಹೋವನಿ ಸನ್ನಿದಿಮ ಡೇರಾನ ಕರ‍್ಯುತೆ

8 ಯೊ ಕಾಮ್‌ ಕರುಕರ್ತುಥುತೆ ಗ್ಯಾನಿಖ್ಹಾರು ವಾಟ್ಯುಹುಯು ಖ್ಹುತ್ತರ್‌ನು ದಖ್ಹ್‌ ಪಡ್ದೇಥಿ ಡೇರಾನ ಕರಿನ್‌ ಯೊ ಪಡ್ದಾಮ ನೀಲಿ, ರಾಯ್‌ಜಾ಼ಮಣ್ಣೊ ರಂಗ್ ಅಜು಼ ಲಲೇಲಾಲ್ ರಂಗ್‌ನ ಧಾಗೇಥಿ ವಣಾವಾಳನಿಘೋಣಿ ಕೆರೂಬಿಯೇವ್ನ ಕರಿನ್‌ ಇನ ಪುರ್ಗುಲ್‌ಥಿ ಶಿವಿನ್‌ ಬಣಾವಟ್‌ಕರ‍್ಯು. 9 ಹರೇಕ್ ಪಡ್ದೊಬಿ ಆಟ್ ಉಪ್ಪರ್ ವೀಖ್ಹ್‌ ಹಾತ್ ಲಾಂಬುಬಿ ಚಾರ್ ಹಾತ್ ಚೌ಼ಡುಬಿ ಥು. ಅಖ್ಖುಸ್ ಪಡ್‌ದೊಖ್ಹಾರು ಶಮ ಆಳ್ತಿಮಥು. 10 ಪಾಚ಼್-ಪಾಚ಼್ ಪಡ್‌ದಾವ್ನ ಏಕೇಕ್‌ ಕರಿನ್‌ ಎಕ್ಟುಕರ‍್ಯು. 11 ಆ ಬೇ ಬಿಡ್ಕಿಮ ಏಕೇಕ್‌ನ ಕೋಣಾನ ಪಡ್ದಾನಿ ನೋಕ್‌ಮ, ನೀಲಿ ಧಾಗೇಥಿ ಫುಂದೊಕರ‍್ಯು. 12 ಯೊ ಫುಂದಾವ್ನ ಅಢೈಖ್ಹ್‌ ಅಢೈಖ್ಹ್‌ನಿ ಪರಕ್ಮ ಏಕ್‌ಥಿಏಕ್‌ ಆಮೆಖ್ಹಾಮೆ ಮ್ಹೇಲ್ಯು. 13 ಆಸ್ ಕಾಹೆತೆ ಅಢೈಖ್ಹ್ ಖ್ಹೊನ್ನಾನು ಅಖುಟಾವ್ನ ಕರೈನ್ ಯೊ ಪಡ್‌ದಾವ್ನ ಏಕ್‌ಥಿಏಕ್‌ ಬಿಡ್ಕಿಕರ‍್ಯು; ಅಮ್‌ ಯೊ ಎಕ್ಕಸ್ ಡೇರೊ ಹುಯು.

14 ಬೇಚಲೇಲನೆ ಡೇರಾನ ಉಪ್ಪರ್‌ ಢಾಪನಖ್ಹಾಜೆ ರುಯ್‌ನು ಗ್ಯಾರ‍್ಹ ಪಡ್ದೇಥಿ ಯೊ ಡೇರಾನ ಉಪ್‌ಲ್ಯ ಡೇರಾನ ಕರ‍್ಯು. 15 ಏಕೇಕ್‌ ಪಡ್ದೊಬಿ ಡೋಡಿಖ್ಹ್‌ಹಾತ್‌ ಲಾಂಬುಬಿ ಚಾ಼ರ್‌ಹಾತ್‌ ಚೌ಼ಡುಬಿ ಥು; ಅಖ್ಖು ಪಡ್ದೊಬಿ ಎಕ್ಕಸ್‌ ಆಳ್ತಿನು ಥು. 16 ಪಾಚ಼್ ಪಡ್‌ದಾವ್ನ ಎಕ್ಟು ಜೋ಼ಡ್‌ಕರಿನ್ ಉಭ್‌ರ‍್ಯುತೆ ಛೋ಼ ಪಡ್ದಾನಾಬಿ ಏಕೇಕ್‌ ಕರಿನ್‌ ಬಿಡ್ಕಿಕರ‍್ಯು. 17 ಏಕೇಕ್‌ನ ಖ್ಹರ್ತಿನ ಪಡ್ದಾನ ಕೋಣಾನ ಅಢೈಖ್ಹ್‌ ಅಢೈಖ್ಹ್‌ ಫುಂದಾವ್ನ ಕರ‍್ಯು. 18 ಎಕ್ಕಸ್‌ ಡೇರೊಹುವಾನಿಘೊಣಿ ಯೋಅಖ್ಖಾನ ಢೇರಿಕರಾನಖ್ಹಾಜೆ ತಾಂಬಾನಿ ಅಢೈಖ್ಹ್ ಅಖುಟಾವ್ನ ಕರ‍್ಯು. 19 ಯೋಸ್ ಕಾಹೆತೆ ಹದಕರಿಹುಯು ಮೇಂಢಾನು ಚಾ಼ಂಬ್ಡಾವ್‌ಥಿ ಏಕ್‌ ಪರ್‌ಖೊಂಡನಾಬಿ ದರ‍್ಯಾವ್ನ ಜಾನ್ವರ್‌ನ ಚಾ಼ಂಬ್ಡಾವ್‌ಥಿ ಬಿಜೇಕ್‌ ಪರ್‌ಖೊಂಡನಾಬಿ ಕರ‍್ಯು. 20 ಡೇರಾನ ಚೌಕಟ್ನ ಬಾವಳ್ಯನ ಝಾ಼ಡ್‌ಥಿ ಕರ‍್ಯು. 21 ಹರೇಕ್ ಚೌಕಟ್‌ ದಖ್ಹ್‌ಹಾತ್‌ ಲಾಂಬುಬಿ ಡೋಡ್‌ಹಾತ್‌ ಚೌ಼ಡುಬಿ ಹುಯಿರ‍್ಹುಥು; 22 ಹರೇಕ್ ಚೌಕಟ್‌ಬಿ ಆಡುಪಟ್ಟೀಥಿ ಮಳಿರ‍್ಹಯುಹುಯು ಬೇ ಭೀರಾಖನಿ ಪಟ್ಟಿಥಿ ಹುಯಿರ‍್ಹುಥು; ಅಜು಼ ಡೇರಾನು ಅಖ್ಖು ಚೌಕಟ್‌ಬಿ ಇಮ್ಮಸ್‌ ಕರಿರಾಖ್ಯುಥು. 23 ಡೇರಾನಿ ದಕ್ಷಿಣ್‌ ದಿಕ್ಮ ವೀಖ್ಹ್‌ ಚೌಕಟ್ನ ಕರ‍್ಯು; 24 ಚಾ಼ಳಿಖ್ಹ್ ರೂಪಾನು ಹುದಿನೊ ಬಂಡೊ ಕರಿನ್‌ ಯೊ ವೀಖ್ಹ್‌ ಚೌಕಟ್ನ ಹೇಟ್ ಮ್ಹೇಲ್ಯು; ಏಕೇಕ್‌ ಚೌಕಟ್‌ಮ ಛಾ಼ತೆ ಬೇ ಭೀರ‍್ಯವಾನಿ ಪಟ್ಟಿನ ಹೇಟ್‌ ಏಕೇಕ್‌ ಹುದಿನ ಬಂಡಾನ ಮ್ಹೇಲ್ಯು. 25 ಇಮ್ಮಸ್‌ ಡೇರಾನ ಉತ್ತರ್ ದಿಕ್ಮ ವೀಖ್ಹ್‌ ಚೌಕಟ್‌ನಾಬಿ, 26 ಅಜು಼ ಹರೇಕ್ ಚೌಕಟ್ನ ಬೆಬ್ಬೆ ಹುದಿನ ಬಂಡಾನಿ ಪರಕ್ಮ ಚಾ಼ಳಿಖ್ಹ್ ರೂಪಾನ ಹುದಿನ ಬಂಡಾನಅಖ್ಖು ಕರ‍್ಯು. 27 ಡೇರಾನ ಪಚ್‌ಕೊಡೆ ಕತೊ ಪಶ್ಚಿಮ್‌ದಿಕ್‌ಮ ಛೋ಼ ಚೌಕಟ್ನಅಖ್ಖು ಕರ‍್ಯು. 28 ಡೇರಾನಿ ಪೀಠೆನು ಬೇ ಕೋಣಾವ್ನ ಅಲಕ್‌ ಬೇ ಚೌಕಟ್ನಅಖ್ಖು ಕರ‍್ಯು. 29 ಯೊ ಖ್ಹಾರು ಜ಼ಡ್‌ಥುಧರೀನ್‌ ಆಣಿಲಗು ಕತೊ ಫೈಲಿ ಕಾಕ್ಣಿಲಗು ಜೋ಼ಡ್‌ಶೈರ‍್ಹುಥು, ಇಮ್ಮಸ್‌ ಬೇ ಕೋಣನಾಬಿ ಕರ‍್ಯು, 30 ಅಮ್ಮಸ್‌ ಆಟ್ ಚೌಕಟ್‌ಬಿ ಅಜು಼ ಹರೇಕ್ ಚೌಕಟ್ನ ಬೆಬ್ಬೆ ರೂಪಾನೊ ಹುದಿನೊ ಬಂಡೋಬಿ ಒಟ್‌ ಖ್ಹೋಳ ಹುದಿನೊ ಬಂಡೊಖ್ಹಾರು ಥು, 31 ಬಾವಳ್ಯನ ಝಾ಼ಡ್‌ಥಿ ಗಡಖ್ಹಾರು ಕರ‍್ಯು, 32 ಡೇರಾನ ಘರ್‌ನು ಭೇಬಾಜುನು ಚೌಕಟ್‌ನಾಬಿ ಇನ ಪೀಠೆನು ಕತೊ ಪಶ್ಚಿಮ್‌ ದಿಕ್‌ಭಣಿನು ಖ್ಹಾರು ಚೌಕಟ್ನಾಬಿ ಪಾಚ಼್‌ಪಾಚ಼್ ಗಡಾವ್ನ ಕರ‍್ಯು, 33 ಚೌಕಟ್ನು ಅಧಿ ಇಚ಼್‌ಮಾನು ಗಡಾ ಏಕ್‌ ನೋಕ್‌ಥು ಬಿಜೇಕ್‌ ನೋಕ್‌ಲಗುಬಿ ಛೀಮಾವಖ್ಹರ್ಕು ಕರ‍್ಯು, 34 ಯೊ ಖ್ಹಾರ ಚೌಕಟ್ನ ಖ್ಹೊನ್ನಾನು ತಗ್‌ಡು ಲಗಾಡಿನ್ ಇನಾಮ ಯೊ ಗಡಾನಖ್ಹಾಜೆ ಖ್ಹೊನ್ನಾನು ಕಾಕ್ಣಿಯೇವ್ನ ಬಣಾಯು, ಯೊ ಗಡಾವ್ನಬಿ ಖ್ಹೊನ್ನಾನು ತಗ್‌ಡು ಲಗಾಡ್ಯು,

35 ವಾಟ್ಯುಹುಯು ಖ್ಹುತ್ತರ್‌ನಿ ಡೋರಿನ ಲುಂಗ್ಡಾಮ ನೀಲಿ, ರಾಯ್‌ಜಾ಼ಮಣ್ಣು ರಂಗ್‌ನು, ಲಲೇಲಾಲ್‌ ರಂಗ್‌ನ ರುಯ್‌ನ ಧಾಗೇಥಿ ಕೆರೂಬಿನು ಶನ್‌ಗಾರ‍್ನು ನಕ್ಷಾನ ಶಿವಿನ್‌ ಏಕ್‌ ಪಡ್ದೊ ಬಣಾಯು, 36 ಇನ ಬಾವಳ್ಯನ ಝಾ಼ಡ್‌ಥಿ ಚಾರ್‌ ಖಂಬ ಬಣೈನ್ ಖ್ಹೊನ್ನಾನು ತಗ್‌ಡು ಲಗಾಡ್ಯು; ಯೊ ಖ್ಹಾರಾನ ಖ್ಹೊನ್ನಾನ ಅಖೂಟ ಬಣೈನ್. ಚಾರ್‌ ರೂಪಾನು ಹುದಿನ ಬಂಡಾನ ಘಡಾಯು. 37 ಡೇರಾನು ದರ್ವಾಜ಼ನ ವಾಟ್ಯುಹುಯು ಖ್ಹುತ್ತರ್‌ನ ವಣ್‌ಖರ‍್ನ ಲುಂಗ್ಡಾಮ ನೀಲಿ. ರಾಯ್‌ಜಾ಼ಮಣ್ಣೊ ರಂಗ್‌ ಅಜು಼ ಲಲೇಲಾಲ್‌ ರಂಗ್‌ನ ಧಾಗೇಥಿ ಶನ್‌ಗಾರ‍್ನು ನಕ್ಷ ಶಿವಿನ್‌ ಪಡ್ದೊ ಬಣಾಯು. 38 ಯೊ ಪಡ್ದೊ ಠಂಗಾವನ ಪಾಚ಼್ ಖಂಬಾಬಿ ಇನು ಅಖುಟಾವ್ನ ಬಣೈನ್, ಇನ ಅಶ್‌ಪಿಶ್‌ನು ಖಿಡ್ಕಿಯೆವ್ನಾಬಿ, ಚೌಕಟ್‌ನಾಬಿ ಖ್ಹೊನ್ನಾನು ತಗ್‌ಡು ಲಗಾಡ್ಯು. ಇನ ಪಾಚ಼್ ಹುದಿನ ಬಂಡಾನ ತಾಂಬಾಥಿ ಬಣಾಯು,