1 ಇನಕೆಡೇಥು ಯೆಹೋವಾನೆ ಮೋಶೆನಿ ಜೋ಼ಡ್ಮ ಇನ, "ತೂ ಫರೋಹಕನ ಜೈ಼ನ್, ‘ಯೆಹೋವ ಬೋಲ್ಯೊತೆ ತಿಮ್‌’ ಮನ ಆರಾದನೆ ಕರಾನಿತರ ಮಾರ ಅದ್ಮಿನ ಹುಕುಮ್‌ ದೇವ್ಣು ಕರಿ ಬೋಲ್ನು. 2 ತೂ ಜಾ಼ವಾನ ನಾ ಮ್ಹೇಲ್ಯೊತೊ, ಮೇ ತಾರ ದೇಖ್ಹ್‌ನಿ ಹರೇಕ್ ಬಾಜು಼ ಮೇಂಡುಕ್‌ಥಿ ಖ್ಹತೈಶ್. 3 ನೈಲ್ ನದ್ದೀಮ ಮೇಂಡುಕ್‌ಖ್ಹಾರು ಘಣು ಭರೈಜ಼ಾಶೆ, ಯೊ ನಿಕ್‌ಳಿ ಅಯಿನ್ ತಾರು ಮಹೇಲ್‌ಮಾಬಿ, ಖ್ಹುವಾನ ಕೋಣಾಮಾಬಿ, ಖಟಿಯಾನ ಉಪ್ಪರ್‌ಬಿ ಆವ್‌ಶೆ ಕಾಹೆತೆ ಅದಿಕಾರಿಯೇವ್‌ನ ಘರ್‌ಮಾಬಿ, ತಾರ ಅದ್ಮಿಯೇನ ಘರ್‌ಮಾಬಿ, ಛು಼ಲ್ಲಾಮಾಬಿ ಅಜು಼ ಖಾಣನ ರಾಛ಼ಾಮಾಥು ನಿಕ್‌ಳ್ಯು. 4 ತಾರಪರ್‌ಬಿ ತಾರ ಅದ್ಮಿಪರ್‌ಬಿ ಅಜು಼ ತಾರ ಪರಿವಾರ್‌ವಾಳ ಪರ್‌ಬಿ ಮೇಂಡುಕ್ ಕೂದ್‌ಶೆ" ಕರಿಬೋಲ್ಯೊ. 5 ಯೆಹೋವ ಮೋಶೆನಿ ಜೋ಼ಡ್ಮ ವಾತೆ ಬೋಲಿನ್, "ತೂ ಆರೋನನ, ತಾರೊ ಲಠ್ಠೊ ಧರಿಲಿನ್ ನದ್ದಿ, ವ್ಹೆಕ್‌ಳೊ, ತಲಾವ್, ಆ ಅಖ್ಖಾಪರ್ ಇನ ಧರಿಲಿನ್ ಹಾತ್‌ಕರ್. ತದೆ ಈಜಿಪ್ಟ್ ದೇಖ್ಹ್‌ನ ಉಪ್ಪರ್‌ ಮೇಂಡುಕ್‌ಖ್ಹಾರು ಫೈಲೈಜ಼ಾಶೆ" ಕರಿ ಬೋಲ್ನುಕರಿ ಬೊಲ್ಯೊ. 6 ತದೆ ಆರೋನನೆ ಈಜಿಪ್ಟ್‌ಮ ಪಾಣಿರ‍್ಹವಾನಿ ಹರೇಕ್ ಝ಼ಗೋಪರ್ ಇನ ಹಾತ್ ವತಾಳಖ್ಹತರ್‌ ಮೇಂಡುಕ್‌ಖ್ಹಾರು ನಿಕ್‌ಳಿ ಅಯಿನ್ ದೇಖ್ಹ್‌ ಅಖ್ಖೂಸ್ ಭರೈಗಯು. 7 ಕತೋಬಿ ಮಂತರ್‌ವಾದಿಖ್ಹಾರು ಇವ್ಣು ಮಂತರ್‌ಥಿ ಇಮ್ಮಸ್ ಕರಿನ್, ಈಜಿಪ್ಟ್ ದೇಖ್ಹ್‌ಪರ್ ಮೇಂಡುಕ್‌ಖ್ಹಾರು ಆವನಿತರ ಕರ‍್ಯು. 8 ತದೆ ಫರೋಹನೆ ಮೋಶೆ ಅಜು಼ ಆರೋನನ ಬುಲೈಮಂಗೈನ್‌, "ತುಮೆ ಯೆಹೋವನ ಪ್ರಾರ್ಥನೆ ಕರಿನ್ ಆ ಮೇಂಡುಕ್‌ಅಖ್ಖಾನ ಮಾರಕನಥೂಬಿ ಮಾರ ಅದ್ಮಿವ್‌ಕನಥೂಬಿ ಹಟೈನಾಖಿದೇವ್ಣು, ಇಮ್ ಕರ‍್ಯೊತೊ ತುಮಾರು ಅದ್ಮಿ ಯೆಹೋವನಖ್ಹಾಜೆ ಬಲಿದ್ಯವಾನ ಇವ್ಣುನ ಮೆ ಅಧಿಕಾರ್ ದೆವುಸ್‌" ಕರಿ ಬೊಲ್ಯೊ. 9 ತದೆ ಮೋಶೆನೆ ಫರೋಹನ ಮನ ತುಮಾರಖ್ಹಾಜೆ ಪ್ರಾರ್ಥನೆಕರಾನ ಸಂತೋಖ್ಹ್‌ಹುವಸ್‌, ಮೇ ತುಮಾರಖ್ಹಾಜೆ, ತುಮಾರ ಅದಿಕಾರಿನಖ್ಹಾಜೆ ಅಜು಼ ತುಮಾರ ಅದ್ಮಿವೋನಖ್ಹಾಜೆ ಪ್ರಾರ್ಥನೆಕರಾನ ವೇಳ್ನ ಗೊತ್‌ಕರುಸ್‌. ತದೆ ತುಮೆ ಮೇಂಡುಕ್‌ಅಖ್ಖಾನ ಕಾಡಿನಾಕ್‌ಶು, ಅಜು಼ ನೈಲ್‌ನದ್ದಿನ ಮ್ಹೇಲ್ಯುತೊ ಶಾತ್‌ಬಿ ಕೋರ‍್ಹಿಶೇನಿ. 10 ಫರೋಹನೆ ಮೋಶೆನ, "ತಾರ ವಾತ್ನಿ ಪರಕಸ್ ಹುವಾದೆ, ಅನಖ್ಹಾಜೇಥಿ ಹಮಾರ ದೇವ್ ಹುಯಿರ‍್ಹೋತೆ ಯೆಹೋವನ ಸಮಾನ್ ಬಿಜು಼ ಕೋಣ್ಬಿಕೊಯ್ನಿಕರಿ ತು ಮಾಲುಮ್‌ ಕರಿಲಿಷ್. 11 ಮೇಂಡುಕ್ ತುನಾಬಿ, ತಾರ ಘರ್‌ಮಾಬಿ, ತಾರಿ ಪ್ರಜೇನಿ ಪರಿವಾರ‍್ನಬಿ ಮ್ಹೇಲಿನ್ ನೈಲ್ ನದ್ದೀಮ ಖಾಲಿ ರ‍್ಹಿಶೆ" ಕರಿ ಬೊಲ್ಯೊ. 12 ಮೋಶೆ ಅಜು಼ ಆರೋನ ಇವ್ಣೆ ಫರೋಹಕಂಥು ನಿಕ್ಳಿಗಯು. ತದೆ ಮೋಶೆ ಯೆಹೋವನ ತುನೆ ಫರೋಹಪರ್ ಲೈರಾಖ್ಯೊತೆ ಮೇಂಡುಕ್‌ಅಖ್ಖಾನ ನಖ್ಹಾಡಿದೇವ್ಣುಕರಿ ಬಿಂತಿಕರ‍್ಯೊ. 13 ಯೆಹೋವನೆ ಮೋಶೆನಿ ವಾತ್ನಿ ಪರಕ್ಮಾಸ್ ಕರ‍್ಯೊ ಘರ್‌ಮಾಬಿ, ಮಾಳ್‌ಮಾಥೂತೆ ಮೇಂಡುಕ್, ಜ಼ಮೀನ್‌ಮಥೂತೆ ಮೇಂಡುಕ್‌ಅಖ್ಖು ಮರಿಗಯು. 14 ಈಜಿಪ್ಟ್‌ವಾಳು ಯೊ ಅಖ್ಖಾನ ರಾಶೆ ರಾಶೆ ಎಕ್ಟುಕರ‍್ಯು, ದೇಖ್ಹ್‌ ಅಖ್ಖೂಸ್ ಖ್ಹಡಿವಾಖ್ಹ್‌ಥಿ ಭರೈಗಯು 15 ಕತೋಬಿ ಫರೋಹನೆ ಮೇಂಡುಕ್‌ನಿ ಖ್ಹತಾಪ್ಣಿ ಖತಮ್ ಹುಯಿಗುಕರಿ ಮಾಲುಮ್‌ ಹುವಾಖ್ಹತರ್ ಇನ ದಿಲ್ನ ಕಠಣ್ ಕರಿಲಿದೊ. ಯೆಹೋವನೆ ಬೋಲ್ಯೊತೆ ತಿಮ್ಮಸ್ ಇನೆ, ಮೋಶೆ ಅಜು಼ ಆರೋನ್ನಿ ವಾತ್ನ ಖ್ಹಂಜೊ ಕೊಯ್ನಿತೆ ಗಯೊ.

16 ಇನವಾರ್ ಯೆಹೋವನೆ ಮೋಶೆನ ಜೋ಼ಡೆ ವಾತೆ ಬೋಲಿನ್ "ತು ಆರೋನ್ನ, ‘ತಾರೊ ಲಠ್ಠೊ ಪಾಡಿನ್ ಜ಼ಮಿನ್ನಿ ಧೂಳ್‌ನಪರ್ ಮಾರ್, ತದೆ ಈಜಿಪ್ಟ್‌ನಿ ಜ಼ಮೀನ್ನಿ ಧೂಳ್‌ಅಖ್ಖು ಮಛ಼್ಛರ್ ಉಷೆ" ಕರಿ ಬೊಲ್ಯೊ. 17 ಇವ್ಣೆ ಇಮ್ಮಸ್ ಕರ‍್ಯು. ಆರೋನ ಲಠ್ಠೊ ಪಾಡಿನ್ ಜ಼ಮಿನ್ನಿ ಧೂಳ್‌ನಪರ್ ಮಾರ‍್ಯೊತದೆ ಅದ್ಮಿಪರ್‌ಬಿ ಜಾನ್ವರ್‌ನಉಪ್ಪರ್ ಜು಼ಯ್ ಆಯು. ಈಜಿಪ್ಟ್ ದೇಖ್ಹ್‌ಪರ್ ಜ಼ಮಿನ್ನು ಧೂಳ್ ಜು಼ಯ್ಯೆ ಹುಯಿಗು. 18 ಕತೋಬಿ ಜಾ಼ದು ಕರಾವಳು ಇವ್ಣೆ ಇಮ್ಮಸ್ ಜು಼ಯ್ ಕರಾನ ಕೋಶಿಷ್ ಕರ‍್ಯುತೋಬಿ, ಯೊ ಕೊಹುಯುನಿ. ಯೊ ಜು಼ಯ್ಯೆ ಅದ್ಮಿಪರ್‌ಬಿ ಜಾನ್ವರ್‌ ಪರ್‌ಬಿ ಥೂ. 19 ತದೆ ಯೊ ಜಾ಼ದು ಕರಾವಳು ಫರೋಹನ, "ಅದ್ಮೇವ್ನ ಹಾತ್ನು ಕಾಮಸ್ ಬರೊಬ್ಬರ್" ಕರಿ ಬೋಲ್ಯು.ಕತೋಬಿ ಫರೋಹನೊ ದಿಲ್‌ ಕಠಣ್‌ಥು. ಯೆಹೋವ ಮೋಶೆನ ಅಗಾಡಿ ಖ್ಹಮ್‌ಜಾ಼ಡಿರಾಖ್ಯೊಥೋತೆ ತಿಮ್ಮಸ್ ಫರೋಹನೆ ಇವ್ಣಿ ವಾತೆನ ಖ್ಹಮ್‌ಜೊಕೊಂತೆ ಗಯೊ.

20 ಇನವಾರ್ ಯೆಹೋವ ಮೋಶೆನ, "ತೂ ವ್ಹಾಣೆ ಉಠಿನ್ ಫರೋಹನ ಖ್ಹಾಮ್ಣೆ ಭೀರೆ. ಯೊ ನದ್ದಿಕನ ಆವ್‌ಶೆ ತು ಇನ ಅಮ್ ಬೋಲ್, ‘ಯೆಹೋವ ಹುಕುಮ್‌ದೇಸ್ ಶಾತ್‌ಕತೊ, ಮನ ಆರಾದನೆ ಕರಾನ ಮಾರ ಅದ್ಮಿನ ಮೋಕಲ್ನು. 21 ಕತೋಬಿ ತೂ, ಮಾರ ಅದ್ಮಿನ ಜಾ಼ವಾನ ನಾ ಮ್ಹೇಲ್ಯೊತೊ ಮೆ ತುನಾಬಿ, ತಾರ ಪರಿವಾರ್‌ವಾಳನಬಿ ತಾರ ಘರ್‌ಮಾಬಿ ಖ್ಹತಾಪ್ಣಿ ಹುವಾನಿತರ ಕರೀಶ್. ಈಜಿಪ್ಟ್‌ವಾಳು ಘರ್‌ಮಾಬಿ ಇವ್ಣು ಅಖ್ಖೂಸ್ ಜ಼ಮಿನ್‌ಮಾಬಿ ಯೊ ಮಾಖೋಳೊ ಭರೈಜಾಷೆಕರಿ ಝೇತವ್‌ಕರುಸ್‌. 22 ಕತೋಬಿ ಯೊ ದನ್ಮ ಮೇಸ್, ಧರ್ತಿಪರ್ ಯೆಹೋವಕರಿ ತು ಮಾಲುಮ್‌ ಕರಿಲ್ಯವಾನಿತರ ಮಾರು ಅದ್ಮಿ ಜಿವ್ಣುಕರುಕರಾತೆ ಗೋಷೆನ್ ತಬರ್‌ಖಾನ ಖಿವೂಬಿ ಮಾಖೋಳಾನಿ ಖ್ಹತಾಪ್ಣಿಥಿ ಬಚಾ಼ಡಿಶ್‌. 23 ಅಮ್ ಮಾರ ಅದ್ಮಿನಾಬಿ ತಾರ ಅದ್ಮಿನ ಬೀಚ್ಮ ಫರಕ್ ಹುವಾನಿತರ ಕರಿಶ್. ಕಾಲೆಸ್ ಆ ಮಹಾನ್ ಕಾಮ್ ಉಷೆಕರಿ ಬೋಲ್ನು" ಕರಿ ಬೊಲ್ಯೊ. 24 ಯೆಹೋವ ಇಮ್ಮಸ್ ಕರ‍್ಯೊ. ಮೋಟ ಮಾಖೋಳಾನ ಫರೋಹನ ಮಹೇಲ್‌ಮಾಬಿ ಇನ ಅದಿಕಾರಿಯೇವ್‌ನ ಘರ್‌ಮಾಬಿ ಮೋಕ್‌ಲ್ಯೊ, ಹಿಡಿ ಈಜಿಪ್ಟ್ ದೇಖ್ಹಸ್‌ ಮಾಖೋಳೇಥಿ ನಾಶ್‌ಹುಯಿಗು. 25 ತದೆ ಫರೋಹನೆ ಮೋಶೆ ಅಜು಼ ಆರೋನ್ನ ಬುಲೈ ಮಂಗೈನ್ ಇವ್ಣುನ, "ತುಮೆ ಜೈ಼ನ್ ಆ ದೇಖ್ಹ್‌ಮಾಸ್ ತುಮಾರ ದೇವ್ನ ಬಲಿಸಮರ್ಪಣ್ ಕರೊ" ಕರಿಬೋಲ್ಯೊ. 26 ಕತೋಬಿ ಮೋಶೆ "ಇಮ್ ಕರಾನು ಬರೋಬರ್‌ಕಾಹೆ ಹಮಾರ ದೇವ್ ಹುಯಿರ‍್ಹೋತೆ ಯೆಹೋವಾನ ಹಮೆ ಬಲಿ ಸಮರ್ಪಣ್‌ ಕರಾನು ಈಜಿಪ್ಟ್‌ವಾಳನ ಗಲೀಜ಼್ ಹುಯಿರ‍್ಹುಸ್. ಈಜಿಪ್ಟ್‌ವಾಳನ ಗಲೀಜ಼್‌ನಿತರನು ಇವ್ಣ ಡೋಳಾನ ಖ್ಹಾಮ್ಣೆ ಬಲಿಸಮರ್ಪಣ್ ಕರ‍್ಯಾತೊ ಇವ್ಣೆ ಹಮುನ ಬಂಡಫೇಕಿ ಮಾರಿನಾಕ್ಷೇನಿ? 27 ಹಮೆ ಜ಼ಂಗಳ್‌ಮ ತೀನ್ ದನ್ ಚಾ಼ಲಿಜೈ಼ನ್ ಹಮಾರ ದೇವ್ ಹುಯಿರ‍್ಹೋತೆ ಯೆಹೋವ ಹುಕುಮ್‌ ದ್ಯವಾನಿ ಪರಕ್ಮ ಬಲಿ ಸಮರ್ಪಣ್‌ ಕರ‍್ನು" ಕರಿ ಬೊಲ್ಯೊ. 28 ಇನ ಫರೋಹನೆ ಇವ್ಣುನ, "ತುಮಾರ ದೇವ್ ಯೆಹೋವನ ಜ಼ಂಗಳ್‌ಮ ಬಲಿಸಮರ್ಪಣ್ ಕರಾನಿತರ ಮೇ ತುಮುನ ಹುಕುಮ್‌ ದೆವುಸ್‌. ಕತೋಬಿ ಘಣು ದೂರ್ ನಾಜಾ಼ವ್ಣು, ಮಾರಖ್ಹಾಜೆ ಪ್ರಾರ್ಥನೆ ಕರ‍್ನು" ಕರಿ ಬೊಲ್ಯೊ. 29 ಇನ ಮೋಶೆನೆ, "ಮೇ ತಾರಕಂಥು ನಿಕಳ್‌ತ ತದೇಸ್‌, ಫರೋಹ ಹುಯಿರ‍್ಹೋತೆ ತುನಾಬಿ, ತಾರಿ ಅದಿಕಾರಿಯೇವ್‌ನ ಮಾಖೋಳಾಥಿ ಖ್ಹತಾಪ್ಣಿ ನಾ ರ‍್ಹೇವ್ಣುಕರಿ ಮೇ ಯೆಹೋವನ ಗಿಂಗೈಲೇವುಸ್‌, ಕತೋಬಿ ಯೆಹೋವನ ಬಲಿಸಮರ್ಪಣ್ ಕರಾನ ತೂ ಮಾರ ಅದ್ಮಿನ ಹುಕುಮ್ ಕೊಯ್ನಿತೆ ಅನೇಥಿ ಖ್ಹಾಮ್ಣೆ ಠಗಾವ್ಣುನಾ" ಕರಿಬೋಲ್ಯೊ. 30 ಮೋಶೆ ಫರೋಹಕಂಥು ನಿಕ್ಳಿನ್ ಜೈ಼ನ್ ಯೆಹೋವನ ಪ್ರಾರ್ಥನೆ ಕರ‍್ಯೊ. 31 ಮೋಶೆ ಪ್ರಾರ್ಥನೆ ಕರ‍್ಯೊತೆ ತಿಮ್ಮಸ್ ಯೆಹೋವನೆ ಕರ‍್ಯೊ. ಯೊ ಮಾಖೋಳೊ ಫರೋಹಕಂಥುಬಿ, ಇನು ಅದಿಕಾರಿಯೇವ್‌ಥೂಬಿ ಅಜ಼ ಇನ ಅದ್ಮಿವ್‌ಥುಬಿ ಹಟಿಗಯು. ಏಕ್‌ಬಿ ರ‍್ಹಯುಕೊಯ್ನಿ. 32 ಕತೋಬಿ ಫರೋಹನೆ ಇನ ಹಮ್ಕೇಬಿ ದಿಲ್ನ ಹಟಕರಿಲಿನ್ ಅದ್ಮಿನ ಜಾ಼ವನ ಕೋ ಮ್ಹೇಲ್ಯೊನಿ.