1 ಮೋಶೆ ಇನ ಮಾಮ, ಮಿದ್ಯಾನನೊ ಯಾಜಕ ಹುಯಿರ‍್ಹೋತೆ ಇತ್ರೋನನ ಮಂಧಾನ ಚ಼ರವ್‌ಕರಾನಿ ವಖ್ಹ್‌ತೆ ಯೊ ಮಂಧಾನ ಝಾ಼ಡಿನ ಬಿಜೇಕ್ ಭಾಗ್‌ಮ ಚ಼ಲೈನ್ ಜಾ಼ತೊಹುಯಿನ್, "ಹೋರೆಬ್" ಕರಿ ದೇವ್ನ ಪಹಾಡ್‌ಪರ್ ಆಯೊ. 2 ತದೆ ಯೆಹೋವನೊ ದೂತ ಕಾಟಾನಿ ಡಾಗ್‌ಮಾಥು ಬಳಾತೆ ಆಗ್‍ನಿ ಝ಼ಲ್‌ಪಟೇಮ ಇನ ದೆಖಾಯೊ. ಮೋಶೆ ಡೋಳಪಾಡಿನ್ ದೇಖಾನಿವಖ್ಹ್‌ತೆ ಯೊ ಕಾಟಾನಿ ಡಾಗ್ ಆಗ್‌ಥಿ ಖ್ಹಲ್‌ಗುಕರ್ತುಥು; ಕತೋಬಿ ಯೊ ಬಳಿರ‍್ಹೂಥು ಕೊಯ್ನಿ. 3 ತದೆ ಮೋಶೆ, "ಆ ಶನು ಆಶ್ಚರ್ಯ! ಡಾಗ್ ಬಳುಕರ ಕೊಯ್ನಿನಿ! ಅನ ಖನ್ನೆ ಜೈ಼ನ್ ದೇಖು ಕರಿ ಖ್ಹಯಾಲ್ ಕರ‍್ಯೊ. 4 ಯೊ ಇನ ದೇಖಾನ ಖನ್ನೆ ಆವಾನು ಯೆಹೋವಾನೆ ದೇಖ್ಯೊ. ತದೆ ದೇವ್ನೆ ಡಾಗ್‌ಮಾಥು "ಮೋಶೆ, ಮೋಶೆ" ಕರಿ ಇನ ಚಿಕ್‌ರ‍್ಯೊ. ಇನ ಮೋಶೆನೆ, "ದೇಕ್ ಛೂ಼" ಕರಿ ಬೊಲ್ಯೊ. 5 ದೇವ್ನೆ ಇನ, "ತೂ ಡಾಗ್ನ ಖನ್ನೆ ನಕೊ ಆವ್! ತಾರ ಗೋಡಾನ ಖೋಖ್ಹ್‌ಡಾವ್ನ ಕಾಡಿನಾಕ್, ಶನಕತೊ ತೂ ಭಿಯೋಸ್ತೆ ಝ಼ಗೊ ಪರಿಶುದ್ಧ ಝ಼ಗೊ ಹುಯಿರ‍್ಹುಸ್" ಕರಿ ಬೊಲ್ಯೊ. 6 ಆಸ್ ಕಾಹೆತೆ ದೇವ್ನೆ ಇನ, "ಮೇ ತಾರೊ ಬಾ ಹುಯಿರ‍್ಹೋತೆ, ಅಬ್ರಹಾಮ್‌ನೊ ದೇವ್, ಇಸಾಕ್‌ನೊ ದೇವ್, ಯಾಕೋಬನೊ ದೇವ್‌ಬಿ ಹುಯಿರ‍್ಹೋಸ್" ಕರಿಬೋಲ್ಯೊ. ಮೋಶೆನೆ ದೇವ್ನ ದೇಖಾನ ಡರಿನ್ ಮ್ಹೋಡಾನ ಮೂಚಿಲಿದೊ. 7 ತದೆ ಯೆಹೋವಾನೆ, "ಈಜಿಪ್ಟ್ ದೇಖ್ಹ್‌ಮ ಛಾ಼ತೆ ಮಾರ ಅದ್ಮಿನಿ ಖರಾಬ್ ಹಾಲತ್ನ ಮೇ ಡೋಳೇಖ್ಹು ದೇಖಿರಾಖ್ಯೋಸ್. ಚು಼ಪ್ಕೇನು ಕಾಮ್ ಕರಾವನು ಬಾರೇಮ ಇವ್ಣೆ ಕರ‍್ಯುತೆ ಬಿಂತಿ ಮನ ಖ್ಹಮಜ್‌ಪಡ್ಯು ಇವ್ಣಿ ದುಖ್‌ಖ್ಹಾರು ಮನ ಮಾಲುಮ್ ಛೆ. 8 ಇನಖ್ಹಾಜೆ ಇವ್ಣುನ ಈಜಿಪ್ಟ್‌ವಾಳನ ಹಾತ್‌ಮಾಥು ಛೋ಼ಡಾವನಬಿ ಯೊ ದೇಖ್ಹ್‌ಥು ಇವ್ಣುನ ದೂದ್ ಅಜು಼ ಶೇತ್‌ ವ್ಹವಾನು ಫರ್‌ಖ್ಹಾತ್ ರ‍್ಹವಾನು ಅಛ್ಛೊ಼ ದೇಖ್ಹ್‌ ಕತೊ ಕಾನಾನ್‌ವಾಳು, ಹಿತ್ತಿಯವಾಳು,ಅಮೋರಿಯವಾಳು, ಪೆರಿಜೀವಾಳು, ಹಿವ್ವಿವಾಳು, ಯೆಬೂಸಿವಾಳು ಜಿವ್ಣುಕರುಕರಾತೆ ದೇಖ್ಹ್‌ನ ಚ಼ಲೈಲಿನ್ ಜಾ಼ವನಬಿ ಉತ್ರಿ ಐರ‍್ಹೋಸ್. 9 ಹಮ್ಕೆ ಇಸ್ರಾಯೇಲ್‌ವಾಳನು ಚಿಕ್ರಾಣ್ ಮನ ಛಿಮೈರ‍್ಹಿಸ್. ಈಜಿಪ್ಟ್‌ವಾಳು ಇವ್ಣುನ ದ್ಯವಾನಿ ಖ್ಹತಾಪ್ಣಿನ ಮೇ ದೇಖಿರಾಖ್ಯೊಸ್. 10 ಇನಖ್ಹಾಜೆ ಹಮ್ಕೆ ಆವ್, ಮಾರು ಅದ್ಮಿ ಹುಯಿರ‍್ಹುತೆ ಇಸ್ರಾಯೇಲ್‌ವಾಳನ ಈಜಿಪ್ಟ್ ದೇಖ್ಹ್‌ಥು ಭಾರ್‌ ಕಡೈಲಿನ್ ಆವಾನ ತುನ ಫರೋಹ ರಾಜ಼ಕನ ಮೋಕ್ಲುಸ್" ಕರಿ ಬೊಲ್ಯೊ. 11 ತದೆ ಮೋಶೆನೆ ದೇವ್ನ, "ಫರೋಹಕನ ಜಾ಼ವನಬಿ ಅಜು಼ ಇಸ್ರಾಯೇಲ್‌ವಾಳನ ಈಜಿಪ್ಟ್‌ಥು ಬುಲೈಲಿನ್ ಆವಾನಬಿ ಮೇ ಕೋಣ್?" ಕರಿ ಬೊಲ್ಯೊ. 12 ಇನ ದೇವ್ನೆ, "ಖ್ಹಚೆಂಬಿ ಮೇ ತಾರ ಜೋ಼ಡೆಸ್ ರ‍್ಹೀಶ್. ತೂ ಮಾರ ಅದ್ಮಿನ ಈಜಿಪ್ಟ್‌ಥು ಭಾರ್‌ಲೀನ್ ಆಯಾತೊ ತುಮೆ ಪಹಾಡ್‌ಮಾಸ್ ಮನ ಆರಾದನೆ ಕರ್ಶು. ಅಜು಼ ತುನ ಮೋಕ್‌ಲ್ಯೊತೆ ಮೇಸ್ ಕರಿ ಬೋಲಾನ ಆ ತುನ ಖ್ಹಣೇದ್ ಹುಯಿರ‍್ಹಿಷೆ" ಕರಿ ಬೊಲ್ಯೊ. 13 ಇನ ಮೋಶೆನೆ ದೇವ್ನ, "ಮೇ ಇಸ್ರಾಯೇಲ್‌ವಾಳಕನ ಜೈ಼ನ್, ‘ತುಮಾರ ಗುರುಗುರಬ್‌ಲ್ಯನೊ ದೇವ್ ಮನ ತುಮಾರಕನ ಮೋಕ್ಲಿರಾಖ್ಯೊಸ್’ ಕರಿ ಬೋಲಾನು ವಖ್ಹ್‌ತೆ, ಮನ ಎಕ್ ವಖ್ಹತ್ ಇವ್ಣೆ ಇನು ನಾಮ್ ಶಾತ್? ಕರಿ ಬೋಲ್ಯೂತೊ ಮೇ ಶಾತ್ ಜವಾಬ್ ದೇವ್ಣು?" ಕರಿಬೋಲ್ಯೊ. 14 ತದೆ ದೇವ್ ಮೋಶೆನ, "ರ‍್ಹವವಾಳೊ ಹುಯಿರ‍್ಹೋಸ್" ಕರಿಬೋಲ್ಯೊ. ಅಜು಼ "ತೂ ಇಸ್ರಾಯೇಲ್‌ವಾಳನ ರ‍್ಹವವಾಳೊ ಕರಿ ಬೋಲಾವಾಳೊ ಮನ ತುಮಾರಕನ ಮೋಕ್ಲಿರಾಖ್ಯೊಸ್ ಕರಿ ಬೋಲ್ನು" ಕರಿಬೋಲ್ಯೊ. 15 ದೇವ್ ಪಾಛು಼ ಮೋಶೆನ ಬೊಲ್ಯೊ ಶಾತ್‌ಕತೊ, "ತೂ ಇಸ್ರಾಯೇಲ್‌ವಾಳನ, ತುಮಾರ ಗುರುಗುರುಬ್‌ಲ್ಯಾವ್ ಹುಯಿರ‍್ಹಾತೆ ಅಬ್ರಹಾಮ್, ಇಸಾಕ್, ಯಾಕೋಬನೊ ದೇವ್ ಯೆಹೋವನೆ ಮನ ತುಮಾರಕನ ಮೋಕ್ಲಿರಾಖ್ಯೊಸ್" ಕರಿಬೋಲ್ನು. ಆ ಕದೇಬಿ ರ‍್ಹವಾನು ಮಾರು ನಾಮ್. ಆ ಮುಂಡಿಮುಂಡಿಬಿ ಮನ ಆರಾದನೆ ಕರ‍್ನುತೆ ನಾಮ್. 16 ಇನೆ ತೂ ಜೈ಼ನ್ ಇಸ್ರಾಯೇಲ್‌ವಾಳ ಶಾಣವ್ನ ಎಕ್ಟು ಮಳೈನ್ ಇವ್ಣುನ, "ತುಮಾರ ಗುರುಗುರುಬ್‌ಲ್ಯನೊ ದೇವ್ ಕತೊ ಅಬ್ರಹಾಮ್, ಇಸಾಕ್, ಯಾಕೋಬನೊ, ದೇವ್ ಹುಯಿರ‍್ಹೋತೆ ಯೆಹೋವನೆ ಮನ ದರ್ಶನದೀನ್ ತುಮುನ ಕೃಪೆಕರಿನ್ ಈಜಿಪ್ಟ್ ದೇಖ್ಹ್‌ಮ ತುಮುನ ಹುಯೂತೆ ಖ್ಹತಾಪ್ಣಿನ ಖ್ಹಚೆಂಬಿ ಮೇ ದೇಖಿರಾಖ್ಯೊಸ್. 17 ಈಜಿಪ್ಟ್ ದೇಖ್ಹ್‌ಮ ತುಮುನ ಹುಯುತೆ ಖರಾಬ್ ಹಾಲಥ್ಥಿ ತುಮುನ ಛೋ಼ಡೈನ್, ದೂದ್ ಅಜು಼ ಶೇತ್‌ ವವ್ಹಾನೊ ದೇಖ್ಹ್‌ನ ಕತೊ ಕಾನಾನ್‌ವಾಳು, ಹಿತ್ತಿಯವಾಳು, ಅಮೋರಿಯವಾಳು, ಪೆರಿಜೀವಾಳು, ಹಿವ್ವಿವಾಳು, ಯೆಬೂಸಿವಾಳು, ಜಿವ್ಣುಕರಾನ ದೇಖ್ಹ್‌ಮ ಬುಲೈಲಿನ್ ಆವ್ಣುಕರಿ ತೀರ್ಮಾನ್ ಕರಿರಾಖ್ಯೊಸ್" ಕರಿ ಇವ್ಣುನ ಬೋಲ್. 18 ಇವ್ಣೆ ತಾರಿ ವಾತ್ನ ಖ್ಹಮಜ಼್‌ಶೆ. ತೂ ಅಜು಼ ಇಸ್ರಾಯೇಲ್ನು ಶಾಣುಖ್ಹಾರು ಈಜಿಪ್ಟ್ ದೇಖ್ಹ್‌ನ ರಾಜ಼ಕನ ಇನ, "ಇಬ್ರಿಯವಾಳನು ದೇವ್ ಹುಯಿರ‍್ಹೋತೆ ಯೆಹೋವ ಮನ ದೆಖಾಯೊ; ಇನಖ್ಹಾಜೆ ಹಮೆ ಜ಼ಂಗಳ್‌ಮ ತೀನ್ ದನ್‌ಲಗು ಚಾ಼ಲಯೆತ್ರೆ ದೂರ್ ಜೈ಼ನ್ ಅಪ್ಣೊ ದೇವ್ ಹುಯಿರ‍್ಹೋತೆ ಯೆಹೋವನಖ್ಹಾಜೆ ಬಲಿದೇವ್ಣು, ಇನಖ್ಹಾಜೆ ಹುಕುಮ್‌ ಹೋಣುಕರಿ ಬೋಲಿಲೇವ್ಣು. 19 ಕತೋಬಿ ಯೊ ಈಜಿಪ್ಟ್‌ನೊ ರಾಜ಼ ತುಮೆ ಕೆತ್ರೆ ಜು಼ಲಮ್‌ ಕರ‍್ಯಾತೋಬಿ ಮ್ಹೇಲ್‌ಶೆ ಕೊಯ್ನಿಕರಿ ಮನ ಮಾಲುಮ್. 20 ಇನಖ್ಹಾಜೆ ಮೆ ಮಾರ ಹಾತ್ನಿ ಶಕತ್ ಕೆತ್ರೆಕರಿ ಈಜಿಪ್ಟ್ ದೇಖ್ಹ್‌ನ ಬೀಚ್ಮ ಮಹಾನ್ ಕಾಮ್ ಕರೀನ್ ಇನ ಅಲಕ್ ಅಲಕ್ ಥರಾಮ ಖ್ಹತೈಷ್. ಇನವಾರ್ ರಾಜ಼ ತುಮುನ ಮೋಕ್ಲಿದಿಶೆ. 21 "ಆಸ್ ಕಾಹೆತೆ ಆ ಮಾರ ಅದ್ಮಿವ್‌ಪರ್ ಈಜಿಪ್ಟ್‌ವಾಳನ ಗೋರ್‌ ಆವನಿತರ ಕರೀಶ್. ಇನಖ್ಹಾಜೆ ತುಮೆ ಜಾ಼ವಾನಿವಖ್ಹ್‌ತೆ ಖಾಲಿ ಹಾತೆ ಜಾ಼ಶು ಕೊಯ್ನಿ. 22 ತುಮಾರಮಾನಿ ಹರೇಕ್ ತಯೇಡಾಬಿ ಆಗೆ ಪೀಛೆನ ತಯೇಡಾಥೀಬಿ ಇವ್ಣ ಘರ್‌ಮ ಛಾ಼ತೆ ತಯೇಡಾಥಿ ರೂಪು ಖ್ಹೊನ್ನುಖ್ಹರಪ್ ಲುಂಗ್ಡ ಬೋಲಿಲ್ಯವಾದೆ ತುಮೆ ಯೊ ಅಖ್ಖಾನ ತುಮಾರ ಪರ್ಖ್ಹಾ ತಯೇಡ ಛೋ಼ಕ್ರಾವ್ನ ಫೇರಾವೊ. ಅಮ್ ಈಜಿಪ್ಟ್‌ವಾಳಕಂಥು ಛಿನೈನ್ ನಿಕಳ್‌ಷು" ಕರಿಬೋಲ್ಯೊ.