1 ಈಜಿಪ್ಟ್ ದೇಖ್ಹ್‌ಮ ಯೆಹೋವನೆ ಮೋಶೆ ಅಜು಼ ಆರೋನ್ನ ಜೋ಼ಡೆ ವಾತೆ ಬೋಲಿನ್ ಶಾತ್ ಬೋಲ್ಯೊಕತೊ, 2 "ಅಖ್ಖಾ ಮಹಿನಾಮ ಆಸ್ ತುಮುನ ಪಹಿಲೊ ಮಹಿನೊ ಹುಯಿರ‍್ಹೇಣು. ಆಸ್ ತುಮುನ ಹರೇಕ್ ವರಖ್ಹ್‌ನೊ ಪಹಿಲೊ ಮಹಿನೊ ಹುಯಿರ‍್ಹಿಷೆ. 3 ಅನಿ ಬಾರೇಮ ತುಮೆ ಇಸ್ರಾಯೇಲ್ನ ಟಾಂಡಾನಅಖ್ಖು ಅಮ್ ಹುಕುಮ್‌ ದೇವ್ಣು, ‘ಆ ಮಹಿನಾನ ದಖ್ಹ್‌ನ ದನ್‌ಮ ತುಮಾರು-ತುಮಾರು ಖಾನ್‌ಖೋಜ್ನು಼ ಹರೇಕ್ ಘರ್‌ವಾಳು ಏಕೇಕ್‌ ಮೇಂಢಾನು ಚೆಲ್ಕುರ‍್ಹವೊ, ಬೋಕ್ಡಾನು ಚೆಲ್ಕುರ‍್ಹವೊ ಲೀನ್ ಆವ್ಣು. 4 ಕುಟುಂಬ್‌ ನ್ಹಾನು ಹುಯಿರ‍್ಹಿತೊ ಎಕ್-ಎಕ್ ಮೇಂಢಾನ ಚೆಲ್ಕಾನ ಅಖ್ಖುಯೇಕ್ ಖಾವನ ನಾಹುಯುತೊ ಭೀಡೆನ ಘರ್‌ವಾಳಾನ ಜೋ಼ಡೆ ಮಳಿನ್, ಎಕ್-ಎಕ್ ಜ಼ಣೊ ಕೆತ್ರು-ಕೆತ್ರು ಖಾಷೆಕರಿ ಮಾಲುಮ್ ಕರಿನ್ ಅದ್ಮಿನ ಗಣ್ತಿನಿತರ ಬೋಕ್ಡಾನು ಚೆಲ್ಕು ಲಿಲಾವದೆ. 5 ಯೊ ಚೆಲ್ಕು ಶನುಬಿ ದೋಷ್‌ಕೊಂತೆ ಎಕ್ ವರಖ್ಹ್‌ನು ಬೋಕ್ಡೊ ಹುಯಿರ‍್ಹೇಣು ತುಮೆ ಮೇಂಢಾಥಿ ರ‍್ಹವೊ ಚೆರಾಳಿ ಬೋಕ್ಡೀಥಿ ರ‍್ಹವೊ ಇನ ಲಿಯೆಜಾ಼ಯ್. 6 ಆ ಮಹಿನಾನು ಚೌ಼ಧಾನೆ ದನ್‌ಲಗು ಇನಅಖ್ಖು ಮ್ಹೇಲಿರಾಖಿನ್, ಯೊ ದನ್ನಿ ಖ್ಹಾಂಜ಼್‌ನಿ ವಖ್ಹತ್‌ಮ ಇಸ್ರಾಯೇಲ್ನ ಟಾಂಡವಾಳು ಅಖ್ಖುಜ಼ಣು ಎಕ್ಟು ಮಳಿನ್ ಯೊ ಅಖ್ಖಾನ ಬಲಿದೇವ್ಣು. 7 ಇವ್ಣೆ ಯೊ ಅಖ್ಖಾನ ಲ್ಹೋಯಿಮ ಥೋಡು ಕಾಡಿನ್ ಇವ್ಣೆ ಖಾಯಿತೆ ಘರ್‌ನ ಬಾಕಲ್ನ ಬೇ ಹೊಸಲ್ನು ಪಟ್ಟಿನಾಬಿ, ಉಪ್ಪರ್‌ಲಿ ಪಟ್ಟಿನಾಬಿ ಲಗಾಡ್‌ಣು. 8 ಯೊ ರಾತ್‌ಮಾಸ್ ಯೊ ಬೋಟಿನ ಖೈಲೇವ್ಣು. ಇನ ಆಗ್‌ಮ ಬಾಳಿನ್ ಖಾಟುಕೊಂತೆ ರೋಟಾವ್ನ ಅಜು಼ ಕಡಿ ಭಾಜಿನ ಪಲ್ಲೆನ ಜೋ಼ಡೆ ಖಾಣು ಖಾವ್ಣು. 9 ಇನ ಕಚ್ಚು಼ಬೀಕಿ ಪಾಣಿಮ ರ‍್ಹಾಂದಿನ್‌ಬಿ ನಾಖಾವ್ಣು. ಇನು ಮುಡ್‌ಕ್ಯು, ಟಾಂಗ್, ಪೇಟ್, ಅನ ಖ್ಹಮೇದ್‌ ಆಗ್ಮಾಸ್ ಭುಂಜಿನ್ ಖಾವ್ಣು. 10 ಬಿಜೇಕ್ ದನ್ನಾ ವ್ಹಾಣಲಗು ಇನಾಮ ದರಾಖ್ಹುಬಿ ನಾ ಉಭ್‌ರ‍್ಹಾವ್ಣು, ವ್ಹಾಣಲಗು ಉಭ್ರಿರ‍್ಹೇಸ್‌ತೆ ಇನ ಆಗ್‌ಥಿ ಬಾಳಿನಾಕ್ಣು. 11 ಯೊ ಖಾವಾನ ಕರ‍್ನುತೆ ನಿಯಮ್ ಕಿಮ್‌ಕತೊ: ತುಮೆ ಒಗ್ಗಿಸ್‌ ಲಾಧಿಜ಼ಾವಾನಿಘೊಣಿ ಕಷ್‌ಬಂದ್ ಭಾಂದಿಲಿನ್ ಖೋಖ್ಹ್‌ಡಾನ ಘಾಲಿಲೀನ್‌, ಲಠ್ಠೊ ಧರೀನ್, ಒಗ್ಗಿ ಒಗ್ಗಿಸ್‌ಮ ಖಾವ್ಣು ಆಹೈರುತೆ ಯೆಹೋವನ ಕರಾನು ಪಸ್ಕನು ಪೂಜ಼ 12 ಯೊ ರಾತ್ಮ ಮೇ ಈಜಿಪ್ಟ್ ದೆಖ್ಹ್‌ಪರ್ ಚಾ಼ಲಿಜೈ಼ನ್ ಅದ್ಮಿಮ ರ‍್ಹವೊ ಜಾನ್ವರ್‌ಮ ರ‍್ಹವೊ ಪೈಲ್ಹೋಟು ರ‍್ಹವಾನು ಖ್ಹಾರಾನ ಮಾರಿನಾಖಿಷ್. ಈಜಿಪ್ಟ್ ದೇಖ್ಹ್‌ನು ಹರೇಕ್ ದೇವ್ತಿನಾಬಿ ನಿಶತ್ ದಿಶ್. ಮೇಸ್ ಯೆಹೋವ. 13 ಕತೋಬಿ ತುಮೆ ರ‍್ಹವಾನು ಅಖ್ಖಾಸ್ ಘರ್‌ನ ಬಾಕಲ್ನ ಲಗಾಡಿರಾಖ್ಯುತೆ ಲ್ಹೋಯಿ ಖ್ಹಣೇದ್ ಹುಯಿರ‍್ಹಿಷೆ. ಯೊ ಲ್ಹೋಯಿನ ಮೇ ದೇಖಾನಿವಖ್ಹ್‌ತೆ ತುಮುನ ಖಿವೂಬಿ ಲುಕ್ಷಾನ್ ಕರಿಶ್‌ಕೊಂತೆ ಅಗ್ಗಳ್ ಉಲಾಂಗಿ ಜೈ಼ಶ್. ಮೇ ಈಜಿಪ್ಟ್‌ವಾಳನ ಮಾರಾನಿವಖ್ಹ್‌ತೆ ತುಮುನ ಶನೀಬಿ ಲುಕ್ಷಾನ್‌ಬಿ ಕೊ ಉಷೇನಿ. 14 ಆ ದನ್ ತುಮುನ ಯಾದ್‌ನಖ್ಹಾಜೆ ರ‍್ಹಿಶೆ. ಯೆಹೋವನ ಮರ‍್ಯಾದಿನಖ್ಹಾಜೆ ಆ ಪೂಜಾ಼ನ ಮುಂಡಿನ್ ಮುಂಡೀಬಿ ಚ಼ಲಾವ್ಣು ಇನ ಹಮೇಶಾನು ನಿಯಮ್‌ ಕರಿ ಕದೆ ಕದೇಬಿ ಚ಼ಲಾವ್ಣು.

15 ಖ್ಹಾತ್ ದನ್‌ಲಗು ತುಮೆ ಖಾಟುಕೊಂತೆ ರೋಟಾವ್ನ ಖಾವ್ಣು. ಪಹಿಲ ದನ್ಮಾಸ್ ಖಾಟ ಆಟಾನ ತುಮಾರ ಘರ್‌ಮಾಥು ಕಾಡಿನಾಕ್ಣು. ಶನಕತೊ ಪಹಿಲ ದನ್‌ಥು ಖ್ಹಾತ್ ದನ್‌ಲಗು ಖಾಟರೋಟಾನ ಖಾವವಾಳೊ ಇಸ್ರಾಯೇಲ್‌ವಾಳಮಾಥು ಕಾಡಿನಾಕ್ಣು. 16 ಪಹಿಲ ದನ್‌ಮ ಪರಿಶುದ್ಧ ದೇವ್ನಿ ಆರಾದನೆನಖ್ಹಾಜೆ ಸಬೆ ಮಳ್‌ಣು. ಆ ಬೇ ದನ್ಮ ಖಿವು ಕಾಮ್‌ಬಿ ನಾಕರ‍್ನು ಖಾಣನ ಹೋಣುತೆಯಿನ ಕರೆಜಾ಼ಯ್ ಪಣ್ಕಿ ಬಿಜು಼ ಖಿವೂಬಿ ಕಾಮ್ ನಾಕರ‍್ನು. 17 ತುಮೆ ಖಾಟುಕೊಂತೆ ರೋಟಾನಿ ಪೂಜಾ಼ನ ಚ಼ಲಾವ್ಣು ಶನಕತೊ ಆ ದನ್ಮಾಸ್ ಮೇ ತುಮುನ ಈಜಿಪ್ಟ್ ದೇಖ್ಹ್‌ಮಾಥು ಭಾರ್‌ ಬುಲೈಲಿನ್ ಆಯೋತೆ ಖ್ಹಾಜೆ ತುಮೇಬಿ, ತುಮಾರಿ ಪಿಳ್ಗೀಬಿ ಆ ದನ್ನ ಚ಼ಲಾವ್ಣು ಆ ಹಮೇಶಾನು ನಿಯಮ್‌ ಹುಯಿರ‍್ಹಿಸ್. 18 ಪಹಿಲ ಮಹಿನಾನು ಚೌ಼ಧಾನೆ ದನ್ನ ಖ್ಹಾಂಜ಼್‌ಥು ಧರೀನ್ ಯೋಸ್ ಮಹಿನಾನು ಎಕ್ ಉಪ್ಪರ್ ವೀಖ್ಹ್‌ನ ದನ್ನ ಖ್ಹಾಂಜ಼್‌ಲಗು ತುಮೆ ಖಾಟುಕೊಂತೆ ರೋಟಾವ್ನ ಖಾವ್ಣು. 19 ಯೊ ಖ್ಹಾತ್ ದನ್‌ಲಗು ತುಮಾರ ಘರೂಮ ಖಾಟೊ ಆಟೊ ನಾರ‍್ಹೇವ್ಣು. ಖಾಟು ಮಳಾಯ ಹುಯಾನ ಕೋಣ್ ಖಾಸ್ಕಿ ಯೊ ಪರ್‌ದೇಖ್ಹ್‌ವಾಳೊ ರ‍್ಹವಾದೆ, ಶೊಂತ್ ದೇಖ್ಹ್‌ವಾಳೊ ರ‍್ಹವೊ ಇಸ್ರಾಯೇಲ್ನ ಟಾಂಡಮಾಥು ಕಾಡಿನಾಖಿದೇವ್ಣು. 20 ತುಮೆ ತುಮಾರ ಘರ್‌ಮ ಖಾಟುಕೊಂತೆ ರೋಟೊ ಖಾವ್ಣು ಪಣ್ಕಿ ಖಾಟು ಕಲಾಯುಹುಯು ಖಿವೂಬಿ ನಾಖಾವ್ಣು" ಕರಿ ಹುಕುಮ್‌ ಕರ‍್ಯೊ.

21 ತದೆ ಮೋಶೆ ಇಸ್ರಾಯೇಲ್ನ ಶಾಣಾವ್ನ ಬುಲೈನ್ ಇವ್ಣುನ, "ತುಮೆ ತುಮಾರ ಕುಟುಂಬ್‌ನಖ್ಹಾಜೆ ಮಂಧಾತು ಚೆಲ್ಕಾನ ಚೂ಼ಣಿಲಿನ್ ಪಸ್ಕ ಪೂಜಾ಼ನ ವ್ಹಾಡೊ. 22 ಹಿಸ್ಸೋಪ್ ಝಾ಼ಡಾನಿ ಕಟ್ಟೀನ ಲೀನ್ ಕಟೋರಮಾನು ಲ್ಹೋಯಿಮ ಇನ ಡುಬೈನ್ ಬಾಕಲ್ನ ಉಪ್ಲಿ ಆಡಿ ಪಟ್ಟೀನಬಿ, ಇನ ಭೀಡೆನ ಭೇ ಬಾಕಲ್ನ ಪಟ್ಟಿನಾಬಿ ಲಗಾಡ್‌ಣು. ಇನಕೇಡೆಥು ತುಮಾರಮ ಏಕ್‌ಜ಼ಣುಬಿ ವ್ಹಾಣು ಹುವಾಲಗು ಘರ್‌ನ ಬಾಕಲ್ ಮ್ಹೇಲಿನ್ ಭಾರ್ ನಾಜಾ಼ವ್ಣು. 23 ಯೆಹೋವ ಈಜಿಪ್ಟ್‌ವಾಳನ ಮಾರಿನಾಖನಖ್ಹಾಜೆ ದೇಖ್ಹ್‌ಮಾಕರಿ ಚಾ಼ಲಿಜಾಶೆ. ತದೆ ತುಮಾರು-ತುಮಾರು ಘರ್‌ನ ಬಾಕಲ್‌ನಿ ಉಪ್ಲಿ ಪಟ್ಟಿಮಾಬಿ ಭೇ ಚೌಕಟ್ನ ಪಟ್ಟಿಮಾಬಿ ಯೊ ಲ್ಹೋಯಿನ ದೇಖಿನ್ ಅಗ್ಗಳ್ ಉಲಾಂಗಿನ್ ಜಾಷೆ. ತುಮಾರ ಜಾನ್ನ ಕಾಡವಾಳೊ ಮರಣ್ಣೊದೂತ ತುಮಾರ ಘರ್‌ಮ ಆವ್‌ಶೇಸ್ ಕೊಯ್ನಿ. 24 ಆ ತುಮುನಾಬಿ ತುಮಾರಿ ಪಿಳ್ಗಿನಾಬಿ ಹಮೇಶಾನು ನಿಯಮ್ ಕರಿ ಚ಼ಲಾವ್ಣು. 25 ಯೆಹೋವ ಇನಿ ವಾತ್ನಿ ಘೋಣಿ ತುಮುನ ದಿಶೇತೆ ವಾಗ್ದಾನ್ನ ದೇಖ್ಹ್‌ನ ತುಮೆ ಆಯಾತೊ, ಯೊ ನಿಯಮ್ನ ಕರ‍್ನುಸ್‌ಪಡ್ಯು. 26 ಅಗ್ಗಳ್ ತುಮಾರ ಲಡ್ಕ, ‘ತುಮೆ ಕರಾನಿ ಆ ಪದತ್ತಿನ ದೇಖಿನ್ ಅನಿ ಅರ್ಥಶಾತ್? ಕರಿ ತುಮುನ ಬೋಲಾನಿವಖ್ಹ್‌ತೆ, 27 ತುಮೆ ಇವ್ಣುನ, ‘ಯೆಹೋವ ಈಜಿಪ್ಟ್‌ವಾಳನ ಮಾರಿನಾಖನಿ ವಖ್ಹ್‌ತೆ ಈಜಿಪ್ಟ್ ದೇಖ್ಹ್‌ಮಥೂತೆ ಇಸ್ರಾಯೇಲ್‌ವಾಳನ ಘರ್‌ಮ ಪೇಖ್ಹ್‌ಯೊ ಕೊಂತೆ ಅಗ್ಗಳ್ ಉಲಾಂಗಿನ್ ಅಪ್ಣ ಘರ್‌ವಾಳಾನ ಬಚಾ಼ಯೊತೆಖ್ಹಾಜೆ ಅಪ್ಣೆ ಯೆಹೋವನ ಪಸ್ಕಕರಿ ಆ ಬಲಿನ ಚ಼ಲಾವ್ಣುಕರಿ ಬೋಲ್ನು" ಕರಿ ಬೊಲ್ಯೊ. ತದೆ ಅದ್ಮಿಖ್ಹಾರು ಢುಕ್ಣಿಮಾಂಡಿನ್‌ ಯೆಹೋವನ ಅರಾದನೆ ಕರ‍್ಯು. 28 ಇಸ್ರಾಯೇಲ್‌ವಾಳು ಹಿಜ್ಜಾ಼ಥು ನಿಕ್ಳಿನ್ ಯೆಹೋವನೆ ಮೋಶೆ ಆರೋನ್ನ ಹುಕುಮ್ ದಿದೋತೆ ಪರಕ್ಮಾಸ್ ಕರ‍್ಯು.

29 ಅಧಿರಾತ್‌ಮ ಯೆಹೋವನೆ ಸಿಂಹಾಸನ್‌ಮ ಥಾತೆ ಫರೋಹನ ಪೈಲ್ಹೋಟ ಛಿಯ್ಯಾಥಿ ಧರಿನ್ ಜೇಲ್ಮಥೂತೆ ಖೈದಿನ ಪೈಲ್ಹೊಟ ಛಿಯ್ಯಾಲಗುಬಿ, ಈಜಿಪ್ಟ್ ದೇಖ್ಹ್‌ಮ ಥೂತೆ ಅಖ್ಖೂಸ್ ಪೈಲ್ಹೋಟ ಲಡ್ಕಾನ ಮಾರಿನಾಖ್ಯೊ. ಜಾನ್ವರ್‌ನು ಪೈಲ್ಹೋಟ ಚೆಲ್ಕಾವ್‌ನಬಿ ಮಾರಿನಾಖ್ಯೊ. 30 ಯೊ ರಾತ್ಮ ಫರೋಹಾನೆಬಿ, ಇನ ಅದಿಕಾರಿವಾಳುಬಿ ಈಜಿಪ್ಟ್‌ವಾಳು ಉಠಿನ್ ದೇಖಾಖ್ಹತರ್ ಮರಣ್ ಕೊಯ್ನಿತೆ ಘರ್ ಏಕ್‌ಬಿ ಕೋಥುನಿ. ಈಜಿಪ್ಟ್ ದೇಖ್ಹ್‌ಮ ಮೋಟಿ ರದನ್ಯ ಹುಯು. 31 ಫರೋಹಾನೆ ಯೊ ರಾತ್‌ಮಾಸ್ ಮೋಶೆ ಅಜು಼ ಆರೋನ ಇವ್ಣುನ ಬುಲೈನ್ ಮಂಗೈನ್ ಇವ್ಣುನ, "ತುಮೆ ಉಠಿನ್ ಮಾರ ಅದ್ಮಿನ ಬೀಚ್ಮಾಥು ನಿಕ್ಳಿಜಾ಼ವೊ. ತುಮೆ ಬೋಲಿಲಿದಾತೆ ತಿಮ್ಮಸ್ ಯೆಹೋವನ ಆರಾದನೆ ಕರಾನ ತುಮೆ ಅಜು಼ ಇಸ್ರಾಯೇಲ್‌ವಾಳು ನಿಕ್ಳಿಜಾ಼ವೊ. 32 ತುಮೆ ಬೋಲಿಲಿದಾತೆ ತಿಮ್ಮಸ್ ತುಮಾರು ಮೇಂಢು, ಢಾಂಡ ಬೋಕ್ಡಾನ ಮಂಧಾನ ಲೀನ್ ಜಾ಼ವೊ. ಎತ್ರೇಸ್ ಕಾಹೆತೆ ಮನಾಬಿ ಜಿನು ಆಶೀರ್ವಾದ್‌ ಕರೊ" ಕರಿ ಬೊಲ್ಯೊ. 33 ಈಜಿಪ್ಟ್‌ವಾಳು, "ಹಮೆ ಅಖ್ಖು ಮರಿಜಾ಼ಶು" ಕರಿ ಬೋಲಿನ್ ಇಸ್ರಾಯೇಲ್‌ವಾಳನ ಇವ್ಣ ದೇಖ್ಹ್‌ಥು ಒಗ್ಗಿಸ್ ಮೋಕ್ಲಿದ್ಯವಾನ ಖ್ಹಯಾಲ್ ಕರಿನ್ ಇವ್ಣುನ ಜು಼ಲಮ್‌ ಕರ‍್ಯು. 34 ಇನಖ್ಹಾಜೆ ಇಸ್ರಾಯೇಲ್‌ವಾಳು ಅದ್ಮಿ ಆಟಾಮ ಖಾಟುನಾಖನ ವಖ್ಹತ್ ಕೋಥಿನಿ. ಇವ್ಣೆ ಖಾಣುಕರಾನ ರಾಛಾ಼ಮ ಆಟಾನ ಮುದ್ದಾನ ಲುಂಗ್ಡಾಮ ಲಪೇಟಿಲೀನ್ ಭುಜ಼್‌ಪರ್ ನಾಖಿಲಿನ್ ಗಯು. 35 ಇಸ್ರಾಯೇಲ್‌ವಾಳು ಮೋಶೆನಿ ವಾತ್ನಿ ಪರಕ್ಮಾಸ್ ಈಜಿಪ್ಟ್‌ವಾಳಥಿ ಖ್ಹೊನ್ನು ರೂಪು ಲುಂಗ್ಡಾವ್ನ ಬೋಲಿಲಿದು. 36 ಯೆಹೋವಾನೆ ಇವ್ಣಪರ್ ಈಜಿಪ್ಟ್‌ವಾಳನ ಗೋರ್‌ ಆವನಿತರ ಕರ‍್ಯೊತೆ ದೇಖಿನ್ ಇವ್ಣೆ ಬೋಲಿಲಿದೂತೆ ಇನ ದಿದು. ಅಮ್ ಇಸ್ರಾಯೇಲ್‌ವಾಳು ಈಜಿಪ್ಟ್‌ವಾಳನಿ ಶೊತ್‌ನ ಖ್ಹಮೇಟಿಲಿದು.

37 ಇಸ್ರಾಯೇಲ್‌ವಾಳು ರಾಮ್ಸೇಸ್ ಖ್ಹಯೇರ್‌ಥಿ ನಿಕ್ಳಿನ್ ಸುಕ್ಕೋತಿನ ಆಯು. ತಯೇಡಸ್ ಲಡ್ಕಾಸ್ ಕಾಹೆತೆ ಪರ್ಖ್ಹಾಸ್ ಖ್ಹುಮಾರ್ ಛೊ಼ ಲಾಕ್ ಜ಼ಣು ಥು. 38 ಇವ್ಣ ಜೋ಼ಡೆ ಕೈಯೇಕ್ ಜ಼ಣು ಅಲ್ಹಾವಸ್ ನಿಕ್ಳಿನ್ ಐರ‍್ಹುಥು. ಢಾಂಡ ಬೋಕ್ಡ ಮೇಂಢಾನು ಮಂಧು ಜಾನ್ವರ್‌ ಇವ್ಣ ಜೋ಼ಡೆ ನಿಕ್ಳಿಗಯು. 39 ಇವ್ಣೆ ಈಜಿಪ್ಟ್ ದೇಖ್ಹ್‌ಥು ಲೀನ್ ಆಯೂತೆ ಇವ್ಣೆ ಘೂಂದ್ಯೊಹುಯೊ ಆಟೇಥಿ ಖಾಟುಕೊಂತೆ ರೋಟಾವ್ನ ಕರಿಲಿದು. ಇವ್ಣೆ ಈಜಿಪ್ಟ್ ದೇಖ್ಹ್‌ಥು ನಿಕ್ಳಿನ್ ದರಾಖ್ಹುಬಿ ವಖ್ಹತ್ ಮಳ್ಯುಕೊಂತೆ ಇನಖ್ಹಾಜೆ ಇವ್ಣೆ ಜಾ಼ವಾನ ಖ್ಹಾಜೆ ವಿಶೇಷ್ ಖಾಣಾನ ತಯಾರ್ ಕರಾನ ಕೊಹುಯುನಿ. 40 ಇಸ್ರಾಯೇಲ್‌ವಾಳು ಈಜಿಪ್ಟ್ ದೇಖ್ಹ್‌ಮ ಖ್ಹುಮಾರ್ ಚಾರ್‌ಖ್ಹೊ ಡೋಡಿಖ್ಹ್‌ ವರಖ್ಹ್‌ಲಗು ಜಿವಿರ‍್ಹೂಥು. 41 ಚಾರ್‌ಖ್ಹೊ ಡೋಡಿಖ್ಹ್‌ ವರಖ್ಹ್ ನಿಕ್ಳಾನ ಬಾದ್ಮ ಯೊ ದನ್ಮಾಸ್ ಯೆಹೋವನು ಅದ್ಮಿಖ್ಹಾರು ಅಜು಼ ಖೂಮ್‌ಖ್ಹಾರು ಈಜಿಪ್ಟ್ ದೇಖ್ಹ್‌ ಮ್ಹೇಲಿನ್ ನಿಕ್ಳಿಗಯು. 42 ಯೆಹೋವ ಯೊ ರಾತ್‌ಮಾಸ್ ಇವ್ಣುನ ಈಜಿಪ್ಟ್ ದೇಖ್ಹ್‌ಥು ಭಾರ್‌ ಬುಲೈಲೀನ್ ಆಯೋತೆಖ್ಹಾಜೆ ಇವ್ಣೆ ರಾತ್ಮ ಇನ ಮರ‍್ಯಾದಿನಖ್ಹಾಜೆ ಜಾಗರಣೆ ಕರ‍್ಯು. ಇಸ್ರಾಯೇಲ್‌ವಾಳು ಖ್ಹಾರು ಮುಂಡಿನ್ ಮುಂಡಿಮಾಬಿ ಯೆಹೋವಾನ ಜಾಗರಣೆ ಚ಼ಲಾವನಿ ರಾತ್ ಆಸ್ ಹುಯಿರ‍್ಹಿಸ್.

43 ಯೆಹೋವನೆ ಮೋಶೆ ಅಜು಼ ಆರೋನ ಇವ್ಣುನ ಬೊಲ್ಯೊ ಶಾತ್‌ಕತೊ, "ಪಸ್ಕನ ಚ಼ಲಾವನು ನಿಯಮ್ ಕಿಮ್‌ಕತೊ, ಅಲ್ಹಾವ್ ಎಕ್ ಜ಼ಣೂಬಿ ಆ ಪಸ್ಕನು ಖಾಣು ನಾಖಾವ್ಣು. 44 ಕತೋಬಿ ತುಮೆ ಮೋಲ್ ಲೆವೈಗಯಹುಯ ಹರೇಕ್ ಗುಲಾಮ್ ಖ್ಹತ್ನಕರೈಲ್ಯವಾನ ಬಾದ್ಮ ಇನ ಖಾಯೆಜಾ಼ಯ್. 45 ಅಲ್ಹಾವ್ ದೇಖ್ಹ್‌ವಾಳುಬಿ, ಥೋಡದನ್ನಿ ಕೂಲಿವಾಳೊಬಿ ಇನ ನಾಖಾವ್ಣು. 46 ಇವ್ಣ ಇವ್ಣ ಘರ್‌ಮಾಸ್ ಇನ ಖಾವ್ಣು ಇನಾಮ ದರಾಖ್ಹು ಬೋಟಿನಾಬಿ ಘರ್‌ನ ಭಾರ್ ಲೀನ್ ನಾಜಾ಼ವ್ಣು. ಯೊ ಜಾನ್ವರ್‌ನ ಎಕ್ ಪಾಖ್ಹ್‌ಳಿನಾಬಿ ನಾ ತೋಡ್ನು. 47 ಇಸ್ರಾಯೇಲ್ನ ಟೋಳ್‌ವಾಳು ಆ ಪೂಜಾ಼ನ ಚ಼ಲಾವ್ಣು. 48 ತುಮಾರಕನ ಜಿವ್‌ಕರಾತೆ ಪರ್‌ದೇಖ್ಹ್‌ವಾಳೊ ಯೆಹೋವಾನ ಪಸ್ಕಾನ ಪೂಜ಼ನ ಚ಼ಲಾವ್ಣುಕರಿ ಖ್ಹಯಾಲ್ ಕರ‍್ಯೊತೊ ಯೋಬಿ ಇನ ಮಳಿಹುಯು ಪರ್ಖ್ಹಾ ಖ್ಹಾರುಬಿ ಖ್ಹತ್ನಕರಾವ್ಣು. ಇನವಾರ್ ಯೊ ಆ ಪೂಜಾ಼ನ ಚ಼ಲಾವನ ಖನ್ನೆ ಆವಾದೆ. ಎಥ್ರಾನವಾಳೊ ಶೊಂತ್ ದೇಖ್ಹ್‌ವಾಳನಿತರಸ್ ರ‍್ಹಿಶೆ. ಕತೋಬಿ ಖ್ಹತ್ನ ನಾಕರೈರಾಖವಾಳೊ ಆ ಖಾಣನ ನಾ ಖಾವ್ಣು. 49 ಇಸ್ರಾಯೇಲ್‌ವಾಳನಾಬಿ, ತುಮಾರಮ ಜಿವ್ಣುಕರುಕರಾತೆ ಪರ್‌ದೇಖ್ಹ್‌ವಾಳನಬಿ ಎಕ್ಕಸ್ ನಿಯಮ್ ರ‍್ಹೇಣು" ಕರಿ ಬೊಲ್ಯೊ. 50 ಯೆಹೋವನೆ ಮೋಶೆ ಅಜು಼ ಆರೋನ್ನ ಹುಕುಮ್ ದಿದೋತೆ ಪರಕ್ಮಾಸ್ ಇಸ್ರಾಯೇಲ್‌ವಾಳು ಕರ‍್ಯು. 51 ಯೋಸ್ ದನ್ಮ ಯೆಹೋವ ಇಸ್ರಾಯೇಲ್‌ವಾಳನ ಇವ್ಣ ಇವ್ಣ ಖೂಮ್‌ ಪರಕ್‌ನಿತರಾಸ್ ಈಜಿಪ್ಟ್ ದೇಖ್ಹ್‌ಥು ಭಾರ್‌ಲಾಯೊ.