ವಿಮೋಚನಕಾಂಡ 39

ಯಾಜಕವ್ನ ಚ಼ರ‍್ನಾನು ಪೇರ್ವಾಖ್ಹ್‌ ಕರಾಯುತೆ

1 ಯೆಹೋವನೆ ಮೋಶೆನ ಹುಕುಮ್‌ದಿದೊತೆ ತಿಮ್‌ ಯೊ ನೀಲಿ, ರಾಯ್‌ಜಾ಼ಮಣ್ಣು ರಂಗ್‌, ಲಲೇಲಾಲ್‌ ರಂಗ್ನು ಛಾ಼ತೆ ಧಾಗೇಖ್ಹು ದೇವ್ನ ಮಂದಿರ‍್ನ ಸೇವೆನ ಶನ್‌ಗಾರ್‌ನ ಪೇರ್ವಾಖ್ಹ್‌ನಬಿ ಪರಿಶುದ್ ಆರೋನನ ಪರಿಶುದ್ ಪೇರ್ವಾಖ್ಹ್‌ನಬಿ ಕರ‍್ಯು. 2 ಮಹಾಯಾಜಕನು ಏಫೋದ್‌ಕರಿ ಚ಼ರ‍್ನಾನ ವಾಟ್ಯುತೆ ಖ್ಹುತ್ತರ್‌ನು ಲುಂಗ್ಡೇಥಿಬಿ ಖ್ಹೊನ್ನಾನು ಧಾಗೇಥಿಬಿ ನೀಲಿ, ರಾಯ್‌ಜಾ಼ಮಣ್ಣು ರಂಗ್‌, ಲಲೇಲಾಲ್‌ ರಂಗ್ನು ಛಾ಼ತೆ ಧಾಗೇಥಿಬಿ ಕರ‍್ಯೊ. 3 ನೀಲಿ, ರಾಯ್‌ಜಾ಼ಮಣ್ಣು ರಂಗ್‌ನು, ಲಲೇಲಾಲ್‌ ರಂಗ್ನು ಧಾಗೇಥಿಬಿ ಖ್ಹುತ್ತರ್‌ನ ಲುಂಗ್ಡೇಥಿಬಿ ವಣ್‌ಖರ್‌ ಬಣಾವಟ್ನ ಕಾಮ್‍ಥೀಬಿ ಕಾಮ್‌ಕರಾವನ ಅಫುಟ್‌ ಖ್ಹೊನ್ನಾನ ಕೂಟೈನ್‌ ತಗ್‌ಡಾನ ಕರೈನ್‌ ನ್ಹಾನು-ನ್ಹಾನು ಪಧರ್‌ನಿಘೋಣಿ ಕತ್‌ರ‍್ಯು. 4 ಯೊ ಏಫೋದ್ನ ಭುಜ಼್‌ಪರ್ ಬೇ ಪಟ್ಟಿಯೆ ಕರಾಯೊ. ಇನ ಭೇ ಜೋಡ್‌ಶೈರ‍್ಹುಥು. 5 ಕವಚ್‌ನ ಉಪ್ಪರ್‌ಥೂತೆ ಶನ್‌ಗಾರ‍್ನು ವಣ್ಕರ್‌ಥೂತೆ ಕಂಬರ್‌ಪಟಾನ ಲಾಗಿರ‍್ಹಿನ್ ಖ್ಹುತ್ತರ್‌ನ ಲುಂಗ್ಡೇಥಿಬಿ, ಖ್ಹೊನ್ನಾನ ಧಾಗೇಥಿಬಿ ಅಜು಼ ನೀಲಿ, ರಾಯ್‌ಜಾ಼ಮಣ್ಣೊ ರಂಗ್, ಲಲೇಲಾಲ್ ರಂಗ್‌ನ ಧಾಗೇಥಿಬಿ ಬಣೈರ‍್ಹುಥು. ಯೆಹೋವನೆ ಮೋಶೆನ ಹುಕುಮ್‌ ಕರ‍್ಯೊತೆತಿಮ್‌ ಇನ ಕರ‍್ಯು. 6 ಮುದ್ರಾನ ಹೀರಾನ ಕೆತ್ತಾನಿ ಪರಕ್ಮ ಬೇ ಗೋಮೇಧಕ ಹೀರಾಮ ಇಸ್ರಾಯೇಲ್‌ವಾಳನು ಭಾರ ಖೂಮ್ನು ನಾಮ್ನ ಕೆತ್ತೈನ್‌ ಯೊ ಹೀರಾನ ಚ಼ಂಚಿಮ ಭಾಂದ್ಯು. 7 ಬೇ ಹೀರಾವ್ನ ಇಸ್ರಾಯೇಲ್‌ವಾಳಾನ ಖ್ಹಣೇದ್‍ನು ಹೀರಾ ರ‍್ಹವಾನಿಘೊಣಿ ಯೋಅಖ್ಖಾನ ಏಫೋದ್ನ ಖಾಂದಪರ್‌ ರ‍್ಹೆಯಿತೆ ಪಟ್ಟಿಮ ಜ಼ಡ್ಕಾಯೊ. ಯೆಹೋವನೆ ಮೋಶೆನ ಇಮ್ಮಸ್‌ ಹುಕುಮ್‌ಕರ‍್ಯೊ.

ಛಾ಼ತಿನ ಕವಚ್‌ನ ಕರ‍್ಯುತೆ

8 ಏಫೋದ್‌ನಿ ಘೊಣಿಸ್ ಖ್ಹೊನ್ನಾನ ಧಾಗೇಥಿಬಿ ನೀಲಿ ರಾಯಿಜಾ಼ಮಣ್ಣೊ ರಂಗ್, ಲಲೇಲಾಲ್ ರಂಗ್‌ರ‍್ಹವಾನು ಧಾಗೇಥಿಬಿ ಖ್ಹುತ್ತರ್‌ನಿ ವಣ್ಕರ್‌ನ ಲುಂಗ್ಡಾಮ ಕೋಥ್‌ಳಿನಿತರಾನು ಪದಕ್ನ ಕರಾಯೊ. 9 ಯೊ ಚಾರ್‌ಖೂಟಿ ಹುಯಿರ‍್ಹುಥು. ಯೊ ಕೋಥ್‌ಳಿನು ಪದಕ್‌ ಬೇ ಪಧರ್ನು ಹುಯಿರ‍್ಹುಥು. ಯೊ ಏಕ್‌ ಬಿಲೇಶ್‌ ಲಾಂಬುಬಿ ಏಕ್‌ ಬಿಲೇಶ್‌ ಚೌ಼ಡುಬಿ ಹುಯಿರ‍್ಹುಥು. 10 ಇನ ಖ್ಹಾಮ್ಣೆ ಚಾರ್‌ ಶಾಲ್‌ಥಿ ಹೀರಾವ್ನ ಲಗಾಡಿರಾಖ್ಯುಥು. ಪಹಿಲಿ ಶಾಲ್ಮ ಮಾಣಿಕ್ಯ ಪುಷ್ಯರಾಗ ಐರೊಖ್ಹಾರು, 11 ಬೇನ ಶಾಲ್ಮ ನೀಲಿಮಣ್‌ಕೊ ಅಜು಼ ವಜ್ರಖ್ಹಾರು. 12 ತೀನ್ನೆ ಶಾಲ್ಮ ಖ್ಹೊನ್ನಾನೊ ಹೀರೊ, ಸುಗಂಧಿ ಬೂದುಚಿಡ್ಯ. 13 ಚಾರ‍್ನಿ ಶಾಲ್ಮ ಗೋಮೇಧಕ, ಬೆರುಲ್ಲ ಅಜು಼ ವೈಢೂರ್ಯಮ ಖ್ಹೊನ್ನಾನ ಮಣ್ಕಾನ ಬೆಖ್ಹಾಡಿರಾಖ್ಯುಥು. 14 ಇಸ್ರಾಯೇಲ್‌ವಾಳಾನ ಖೂಮ್ಮ ಗಣ್ತಿನ ಪರಕ್ಮ ಭಾರ ಹೀರಾಥ; ಮುದ್ರಾನ ಹೀರಾಮ ಕೆತ್ತಾನಿ ಪರಕ್ಮ ಏಕೇಕ್‌ ಹೀರಾಮ ಏಕೇಕ್‌ ಖೂಮ್ಮ ನಾಮ್‌ ಟಕೈರ‍್ಹುಥು. 15 ಪದಕ್ನ ಉಪ್ಪರ್‌ ಡೋರಿಯೆನಿ ಘೋಣಿನು ಅಫುಟ್‌ ಖ್ಹೊನ್ನಾನು ಖ್ಹಾಕ್‌ಳಿಯೆವ್ನ ವಣ್‌ಖರ್‌ ಕಾಮ್‍ಥಿ ಕರ‍್ಯು. 16 ಬೇ ಖ್ಹೊನ್ನಾನು ಮಣ್ಕಾನಾಬಿ ಕರಿನ್‌ ಯೊ ಅಂಗುಠಿಯೆವ್ನ ಛ಼ಾತಿನ ಪದಕ್ನು ಬೇ ಕೋಣಾನಾಬಿ ಅಟ್ಕಾಯು. 17 ವಣ್‌ಖರ್‌ ಕಾಮ್ನು ಯೊ ಭೇ ಖ್ಹೊನ್ನಾನು ಖ್ಹಾಕ್‌ಳಿಯೆವ್ನ ಪದಕ್ನ ಕೋಣಾಮ ಛಾ಼ತೆ ಅಂಗುಠಿಯೆವ್ನ ಅಟ್ಕಾಯು. 18 ವಣ್‌ಖರ್‌ನ ಕಾಮ್ನು ಯೊ ಖ್ಹಾಕ್‌ಳಿಯೆವ್ನ ಕೋಣಾನ ಏಫೋದ್ನ ಖಾಂದನಿ ಪಟ್ಟಿಮಛಾ಼ತೆ ಬೇ ಮಣ್ಕಾನ ಖ್ಹಾಮ್ಣೆ ಅಟ್ಕಾಯು. 19 ಆ ನಾಹುಯಿನ್ ಬೇ ಖ್ಹೊನ್ನಾನು ಅಂಗುಠಿನ ಕರಿನ್ ಯಾಜಕ್‌ನ ಪದಕ್ನು ಮಹಿನು ಕನಾರಿನ ಕೋಣಾವ್‌ಮ ಕವಚ್‌ನ ಖನ್ನೆಸ್‌ ಮ್ಹೇಲ್ಯು. 20 ಅಜು಼ ಅಲಕ್ ಬೇ ಖ್ಹೊನ್ನಾನು ಅಂಗುಠಿಯೆವ್ನ ಕರಿನ್ ಕವಚ್‌ನು ಭೇ ಖಾಂದಾವ್ನಿ ಪಟ್ಟಿಯೇವ್ನ ಖ್ಹಾಮ್ಣೆನ ಹೇಟ್, ಏಫೋದ್ನ ಮ್ಹೇಲಿರಾಖ್ಯುತೆ ಝ಼ಗೊನ ಖನ್ನೆ ಯೊ ವಿಚಿತ್ರನು ಕಂಬರ್‌ಪಟಾನ ಉಪ್ಪರ್‌ ಲಗಾಡ್ಯು. 21 ಪದಕ್‌ ವಿಚಿತ್ರಹುಯಿರ‍್ಹುತೆ ಕಂಬರ್‌ಪಟಾನಿ ಉಪ್ಲಿ ಬಾಜು಼ಮ ಘಟ್‌ರ‍್ಹವಾನಖ್ಹಾಜೆಬಿ ಚ಼ರ‍್ನೆಥಿ ಛು಼ಟಿನಾಪಡ್ನುತೆತಿಮ್‌ ಇನಿ ಅಂಗುಠಿಯೆಅಖ್ಖಾನ ಚ಼ರ‍್ನಾನ ಅಂಗುಠಿಯೇನ ನೀಲ ಧಾಗೇಥಿ ಭಾಂದ್ಯು. ಯೆಹೋವನೆ ಮೋಶೆನ ಇಮ್ಮಸ್‌ ಹುಕುಮ್‌ಕರ‍್ಯೊ.

ಯಾಜಕರ‍್ನು ಉಭ್‌ರ‍್ಯುತೆ ಪೆರ್ವಾಖ್ಹ್‌ನಿ ತಯಾರಿ

22 ಏಫೋದ್‌ನಿ ಜೋ಼ಡ್ಮ ಫೇರಾನ ಝ಼ಗ್ಗಾನ ನೀಲಿ ರಂಗ್‌ನ ಲುಂಗ್ಡೇಥಿಸ್ ವಣ್‌ಖರ್‌ನ ಕಾಮ್‍ಥಿ ಕರ‍್ಯೊ. 23 ಮುಡ್‌ಕ್ಯು ಘಾಲನಖ್ಹಾಜೆ ಖೀಂಡ್‌ಕರಿನ್‌ ಯೊ ಫಾಟ್ಣುನಾತೆ ಜಂಗ್‌ನ ಝ಼ಗ್ಗಾನಿಮತ್‌ ಯೊ ಖೀಂಡ್‌ನು ಗಿರ್ಕಿನ ವಣಿನ್‌ ವಣ್‌ಖರ್‌ ಕರಾಯೊ. 24 ಝ಼ಗ್ಗಾನು ಕನಾರಿನ ಅಶ್‌ಪಿಶ್‌ಬಿ ನೀಲಿ ರಾಯ್‌ಜಾ಼ಮಣ್ಣು ರಂಗ್‌, ಲಲೇಲಾಲ್‌ ಧಾಗೇಥಿ ಢಾಡಮ್‌ನಿಘೋಣಿ ಚೆಂಡುಲ್ನ ಕರ‍್ಯು. 25 ಅಜು಼ ಅಫುಟ್‌ ಖ್ಹೊನ್ನೇಥಿ ಘುಗ್ರಾನ ಕರಿನ್‌ ಝ಼ಗ್ಗಾನ ಕನಾರಿನ ಢಾಡಮ್‌ನ ಚಂಡುಲ್ನಿ ಜೋಡ್ಮ ಚಿಕಾಯು. 26 ಖ್ಹೊನ್ನಾನು ಘುಗ್ರೊಬಿ ಢಾಡಮ್‌ನಿಘೋಣಿ ಛಾ಼ತೆ ಚಂಡುಲ್ ಏಕ್‌ಥಿಏಕ್‌ ದೇವ್ನ ಸೇವೆನಖ್ಹಾಜೆ ಯೊ ಉಪ್‌ಲ್ಯ ಝ಼ಗ್ಗಾನ ಕನಾರಿನ ಅಶ್‌ಪಿಶ್‌ಬಿ ಥೂ. ಯೆಹೋವನೆ ಮೋಶೆನ ಹುಕುಮ್‌ಕರ‍್ಯೊತೆತಿಮ್‌ ಇನ ಕರ‍್ಯೊ. 27 ಆರೋನನಾಬಿ ಇನ ಛಿಯ್ಯವ್‌ನಾಬಿ ಕವ್‌ಳ ಖ್ಹುತ್ತರ್‌ನ ಧಾಗೇಥಿ ವಣ್‌ಖರ್‌ನ ಕಾಮ್ನಿ ಪರಕ್ಮ ಝ಼ಗ್ಗಾವ್‌ನಬಿ 28 ಖ್ಹುತ್ತರ್‌ನ ಲುಂಗ್ಡೇಥಿ ಮಹಾಯಾಜಕನ ರುಂಬಾಲ್‌ನಾಬಿ ಇನು ಶನ್‌ಗಾರ‍್ನು ರುಂಬಾಲ್‌ನಾಬಿ ಅಛ್ಛಾ಼ ಖ್ಹುತ್ತರ್‌ನಿ ಮಹಿ ಫೇರಾನು ಲುಂಗ್ಡು 29 ಅಛ್ಛಾ಼ ಖ್ಹುತ್ತರ್‌ನ ಲುಂಗ್ಡೇಥಿ ನೀಲಿ ರಾಯ್‌ಜಾ಼ಮಣ್ಣು ರಂಗ್‌ನು ಅಜು಼ ಲಲೇಲಾಲ್‌ ರಂಗ್ನು ಧಾಗೇಥಿಬಿ ವಣ್‌ಖರ್‌ನ ಕಾಮ್ನಿ ಪರಕ್ಮ ಕಂಬರ್‌ನ ಕಷ್‌ಬಂದ್‌ನಾಬಿ ಕರ‍್ಯು. ಯೆಹೋವನೆ ಮೋಶೆನ ಹುಕುಮ್‌ಕರ‍್ಯೊತೆತಿಮ್‌ ಇನ ಕರ‍್ಯು. 30 ಅಜು಼ ಅಫುಟ್‌ ಖ್ಹೊನ್ನೇಥಿ ಪರಿಶುದ್ದ ಕಿರೀಟ್ನ ಪಟ್ಟಿನ ಕರಿನ್‌ ಮುದ್ರಾನ ಟಕಾವನಿ ಪರಕ್ಮ ಇನಾಮ "ಯೆಹೋವನ ಖ್ಹಾಜೇಥಿ ಪರಿಶುದ್ದ" ಕರಿ ಲೀಖ್ಯಾಮ ಲೀಖಾಯು. 31 ಇನ ರುಂಬಾಲ್ನ ಭಾಂದನಖ್ಹಾಜೆ ನೀಲ ಧಾಗಾನ ಭಾಂದ್ಯು. ಯೆಹೋವನೆ ಮೋಶೆನ ಹುಕುಮ್‌ ಕರ‍್ಯೊತೆತಿಮ್‌ ಇನ ಕರ‍್ಯು.

ಕಾಮ್ನು ಖ್ಹರ್ತಿ

32 ಆ ಪರಕ್ಮ ದೇವ್ನ ದರ್ಶನ್ನು ಡೇರಾನು ಕಾಮ್‌ಅಖ್ಖು ಖ್ಹರ್ತಿಹುಯು. ಯೆಹೋವನೆ ಮೋಶೆನ ಹುಕುಮ್‌ಕರ‍್ಯೊತೆತಿಮ್‌ ಇಸ್ರಾಯೇಲ್‌ವಾಳು ಇನ ಕರ‍್ಯು. 33 ತದೆ ಇವ್ಣೆ ಯೊ ಡೇರಾನ ಮೋಶೆನ ಖನ್ನೆ ಲಾಯು. ಡೇರನಾಬಿ ಇನ ಲಾಗ್ಯುತೆ ಅಖ್ಖಾನಾಬಿ ಕತೊ ಇನು ಅಖೂಟೊ, ಚೌಕಟ್‌, ಕಡಿಯೇ ಖಮ್‌, ಹುದಿನೊ ಬಂಡೊ ಅಖ್ಖಾನಾಬಿ; 34 ಹದಕರಿಹುಯು ಲಾಲ್‌ರಂಗ್ನು ಮೇಂಢಾನು ಚ಼ಾಂಬ್ಡೇಥಿ ಹುಯುತೆ ಪರ್ಖೊಂಡು, ದರ‍್ಯಾವ್ನ ಜಾನ್ವರ್ನು ಚ಼ಾಂಬ್ಡೇಥಿ ಹುಯುತೆ ಪರ್ಖೊಂಡು, ಮಹಾ ಪವಿತ್ರ ಝ಼ಗೋನ ಓಠೊಕರಾನು ಪಡ್ದೊಬಿ; 35 ಹುಕುಮ್ನ ನಿಯಮ್ನು ಪಿಟಾರನ, ಇನ ಲಠ್ಠಅಖ್ಖು ಕೃಪಾಸನ ಅಖ್ಖನಾಬಿ; 36 ಮೇಜ್‌, ಇನು ಅಖ್ಖು ರಾಛು಼ಖ್ಹಾರು, ಪರಿಶುದ್ ರೋಟೊ ಅಖ್ಖಾನಾಬಿ; 37 ಅಫುಟ್‌ ಖ್ಹೊನ್ನಾನು ದೀವಾನುಖಂಬುಬಿ, ಇನ ಉಪ್ಪರ್‌ ಮ್ಹೇಲ್ನುಥುತೆ ದಿವಳ್ಗಿಅಖ್ಖು, ಇನು ಜಿನಖ್ಹ್‌ಖ್ಹಾರು, ದೀವಾನ ಹೋಣುತೆ ತೇಲ್‌ ಯೊ ಅಖ್ಖುಬಿ; 38 ಖ್ಹೊನ್ನಾನು ಢಾಕ್ಣಿಬಿ, ಅಭಿಷೇಕನು ತೇಲ್‌, ವಾಖ್ಹ್‌ನು ಖ್ಹಾಲರ‍್ಯೊಬಿ; ಡೇರಾನು ದರ್ವಾಜ಼ನು ಪಡ್ದೊಬಿ; 39 ತಾಂಬಾನು ಚಾ಼ಚ಼ರ್‌ಬಿ, ಇನು ತಾಂಬಾನು ಖಾಂಜ್ರಿಬಿ, ಇನು ಲಠ್ಠಅಖ್ಖು, ಜಿನಖ್ಹ್‌ಖ್ಹಾರು, ಧೊವಾನು ಕುಂಡುಬಿ, ಇನಿ ಝ಼ಗ್ಲಿಬಿ; 40 ಬಲ್ಡಾನಿ ಪಡ್ದಖ್ಹಾರು, ಖಮ್‌ಅಖ್ಖು, ಹುದಿನೊ ಬಂಡೊಅಖ್ಖು; ಖ್ಹಾಮ್ಣೆನ ಝ಼ಗೋನು ದರ್ವಾಜ಼ನು ಪಡ್ದೊ, ಇನು ಶಿಂದ್ರು, ಖಿಲ್ಲಾಬಿ; ದೇವ್ನ ದರ್ಶನ್ನು ಡೇರಾನ ಸೇವೆನ ಹೋಣುತೆ ಅಖ್ಖು ಜಿನಖ್ಹ್‌ಖ್ಹಾರುಬಿ; 41 ಪವಿತ್ರ ಝ಼ಗೋಮ ಚಾ಼ಲಾತೆ ಸೇವೆನಖ್ಹಾಜೆ ಹೋಣುತೆ ಶನ್‌ಗಾರ‍್ನು ರಾಛು಼ ಕತೊ ಆರೋನನ ಹೋಣುತೆ ಪವಿತ್ರ ಪೆರ್ವಾಖ್ಹ್‌, ಯಾಜಕ್‌ನು ಸೇವೆಕರವಾಳೊ ಹುಯಿರೋತೆ ಇನ ಛಿಯ್ಯವ್‌ನ ಹೋಣುತೆ ಪೆರ್ವಾಖ್ಹ್‌ ಅಖ್ಖಾನಾಬಿ ಲಾಯು. 42 ಯೆಹೋವನೆ ಮೋಶೆನ ಹುಕುಮ್‌ ಕರ‍್ಯೊತೆತಿಮ್‌ ಇಸ್ರಾಯೇಲ್‌ವಾಳು ಯೊ ಕಾಮ್ನಅಖ್ಖು ಕರ‍್ಯು. 43 ಇವ್ಣೆ ಕರ‍್ಯುತೆ ಕಾಮ್ನ ಮೋಶೆ ತರೀಪ್ಷಕರಾಮ ಯೆಹೋವನ ಹುಕುಮ್ನಿಮತ್ ಇವ್ಣೆ ಅಖ್ಖು ಕರಿರಾಖ್ಯುಸ್‌ಕರಿ ಮಾಲುಮ್‌ಕರ್ಲಿನ್‌ ಇವ್ಣುನ ಆಶೀರ್ವಾದ್‌ ಕರ‍್ಯೊ.