ವಿಮೋಚನಕಾಂಡ 30

ಖ್ಹಾಲರ‍್ಯನ ಬಾಳನಿ ಢಾಕ್ಣಿ

1 ವಾನ ತೇಲ್‌ಥಿ ಢಪ್‌ಕಾರನಾಖನ ತುಮೆ ಬಾವಳ್ಯನ ಝಾ಼ಡ್‌ಥಿ ಎಕ್ ಢಾಕ್ಣಿನ ಕರಾವ್ಣು. 2 ಯೊ ಏಕ್‌ಹಾತ್ ಲಾಂಬುಬಿ ಏಕ್‌ಹಾತ್ ಚೌ಼ಡುಬಿ ರ‍್ಹೀನ್ ಚಾರ್‌ಖೂಟಿ ಹುಯಿರ‍್ಹೇಣು. ಇನು ಊಚು಼ ಬೇಹಾತ್ ಹುಯಿರ‍್ಹೇಣು. ಇನು ಶಿಂಗ್‌ಡು ಅಖ್ಖು ಇನೇಥಿಸ್‌ ಮಳಿರ‍್ಹೇಣು. 3 ಇನು ಉಪ್ಲಿ ಬಾಜು಼ನ, ಚಾರ್ ಆಡಿಮ ಅಜು಼ ಶಿಂಗ್‌ಡಾವ್ನ, ಅಫುಟ್ ಖ್ಹೊನ್ನಾನು ತಗ್‌ಡಾವ್ನ ಮೂಚ಼್‌ಣು. ಅಶ್‌ಪಿಶ್‌ಬಿ ಖ್ಹೊನ್ನಾನು ಪಟ್ಟಿಯೇನ ಭಂದಾವ್ಣು. 4 ಇನ ಹೇಟ್ ಢಾಕ್ಣಿನು ಭೇ ಬಾಜು಼ಮ ಬೆಬ್ಬೇ ಖ್ಹೊನ್ನಾನಿ ಕಾಕ್ಣಿನ ಕೋಣಮಾಸ್ ಘಲಾವ್ಣು. ಢಾಕ್ಣಿನ ಪಾಡನ ಲಠ್ಠಾವ್ನ ಇನಾಮ ಪೆಖ್ಹಾಡ್‌ಣು. 5 ಯೊ ಲಠ್ಠಾವ್ನ ಬಾವಳ್ಯನ ಝಾ಼ಡ್‌ಥಿ ಕರೈನ್ ಇನ ಖ್ಹೊನ್ನಾನ ತಗ್‌ಡಾವ್ನ ಮೂಚ಼್‌ಣು. 6 ಹುಕುಮ್‌ನ ಲಿಖ್ಯುರ‍್ಹವಾನ ಪಿಟಾರನು ಖ್ಹಾಮ್ಣೆನು ಪಡ್ದಾನ ಮ್ಹೋರೆ, ಕತೊ ಹುಕುಮ್‌ನು ಲೀಖ್ಯಾನು ಪಿಟಾರನ ಉಪ್‌ಲ್ಯು ಅಜು಼ ಮೆ ತುನ ದರ್ಶನ್ ದ್ಯವಾನು ಕೃಪಾಸನ್ನ ಖ್ಹಾಮ್ಣೆ ಇನ ಮ್ಹೇಲ್ನು. 7 "ಆರೋನ ಹರ್ ವಖ್ಹತ್ ವ್ಹಾಣ್‌ಖ್ಹತ್ರೆ ದೀವಾನ ಬರೊಬರ್‌ಕರಾನಿ ವಖ್ಹ್‌ತೆಬಿ 8 ಖ್ಹಾಂಜ಼್‌ನಿ ವಖ್ಹತ್‌ಮ ದೀವಾನ ಲಗಾಡನಿ ವಖ್ಹತ್‍ಬಿ ಇನಾಪರ್ ಅಛ್ಛಿವಾನ ತೇಲ್‌ಥಿ ಢಪ್ಕಾರ ನಾಕ್ಣು. ಅಮ್ ತುಮಾರಥೆಬಿ ತುಮಾರ ಪಿಳ್ಗಿವಾಳಥಿಬಿ ಯೆಹೋವನ ಖ್ಹಾಮ್ಣೆ ಲಗತ್ತರ್ ಢಪ್‌ಕಾರ್‌ನು ಅರ್ಪಣ್ ಚಾ಼ಲುಕರ‍್ನು. 9 ಯೊ ಢಾಕ್ಣಿನಪರ್ ಬಿಜು಼ ಖಿವು ಢಪ್‌ಕಾರ್‌ನಬಿ ನಾನಾಕ್ಣು. ಇನಪರ್ ಬಿಜು಼ಖ್ಹಾರು ಬಳಾನುರ‍್ಹವೊ, ಖಾಣುಪಾಣಿರ‍್ಹವೊ ಅಜು಼ ದ್ರಾಕ್ಷಿನ ರಖ್ಹ್‌ನ ರ‍್ಹವೊ ಅರ್ಪಣ್ ನಾಕರ‍್ನು. 10 ಆರೋನಬಿ ಇನು ಪಿಳ್ಗಿವಾಳುಬಿ ವರಖ್ಹ್‌ನ ಏಕ್‌ಹಲ್ಲ ಪಾಪ್ನ ಪರಿಹಾರ್‌ನ ಬಲಿನ ಜಾನ್ವರ್‌ನು ಲ್ಹೋಯಿನ ಯೊ ಢಾಕ್ಣಿನ ಶಿಂಗ್‌ಡಾವ್ನ ಲಗಾಡಿನ್ ಇನ ಬಾರೇಮ ದೋಷ್‌ನು ಪರಿಹಾರ್ ಕರ‍್ನು. ಯೊ ಯೆಹೋವನ ಘಣು ಪರಿಶುದ್ಧ್ ಹುಯಿರ‍್ಹುಸ್."

ಯೆಹೋವನಿ ಝ಼ಗೋಮ ಡೇರಾನಿ ಶುಂಕ

11 ಯೆಹೋವನೆ ಮೋಶೆನ ಶಾತ್‌ಬೋಲ್ಯೊ ಕತೊ, 12 "ತೂ ಇಸ್ರಾಯೇಲ್‌ವಾಳನು ಅದ್ಮಿನು ಗಣ್ತಿ ಕರೈನ್ ಇವ್ಣುನ ಗಣ್ತಿಕರಾನಿ ವಖ್ಹ್‌ತೆ ಇವ್ಣುನ ಖ್ಹತಾಪ್ಣಿ ಹುಯಿನ್ ರೋಗ್ ನಾ ಆವ್ಣುತೆ ತಿಮ್ ಹರೇಕ್ ಜ಼ಣೊಬಿ ಇನು ಇನು ಜಾನ್ನಖ್ಹಾಜೆ ಯೆಹೋವನ ಕಪ್ಪಕಾಣ್ಕೆ ದೇವ್ಣು. 13 ಗಣ್ತಿ ಹುಯಿರ‍್ಹವಾಳಮ ಹರೇಕ್ ಜ಼ಣೊಬಿ ಸೇವೆನ ದೇವ್ಣುಕರಿ ಹುಯಿರ‍್ಹುತೆ ವೀಖ್ಹ್‌ ‘ಗೇರಾ’ ತೋಲ್‌ನು ರಪ್ಯಾನಿ ಗಣ್ತಿನಿ ಘೋಣಿ ಆಧು ಶೆಕೆಲ್ ಕಾಣ್ಕೆ ದೇವ್ಣು. ಆ ಆಧುಶೆಕೆಲ್ ಯೆಹೋವನ ಪವಿತ್ರ ಕಾಣ್ಕೆ ಹುಯಿರ‍್ಹುಸ್. 14 ಗಣ್ತಿ ಕರ‍್ಯಹುಯಾಮ ವೀಖ್ಹ್‌ ವರಖ್ಹ್‌ವಾಳುಬಿ ಅಜು಼ ಇನ ಉಪ್ಪರ್‌ಲಿ ಉಂಬರ್‌ವಾಳುಬಿ ಯೊ ಕಾಣ್ಕೆನ ಹರೇಕ್‌ಜ಼ಣು ಯೆಹೋವನ ದೇವ್ಣು. 15 ಜಾನ್ನ ಬಚಾ಼ಡನು ಆ ಕಾಣ್ಕೆನ ಯೆಹೋವನ ದ್ಯವಾಮ ಶೌಕಾರ್‌ ರ‍್ಹಯುತೋಬಿ ಆಧ ರಪ್ಯಾಥಿ ಜಾ಼ಖ್ಹತ್ ನಾದೇವ್ಣು. ಗರೀಬ್ ಕಮ್ ನಾದೇವ್ಣು. 16 ತೂ ಜಾನ್ನ ಬಚಾ಼ಡನ ಆ ಪೈಶಾನ ಇಸ್ರಾಯೇಲ್‌ವಾಳಥಿ ಲೀನ್ ಇನ ದೇವ್ನ ದರ್ಶನ್ನ ಡೇರಾನ ಘರ್‌ನಿ ಸೇವೆನ ಉಪಯೋಗ್‌ಕರ‍್ನು. ಇಸ್ರಾಯೇಲ್‌ವಾಳನ ಜಾನ್ನ ಬಚಾ಼ಡ್‌ಣುಕರಿ ಬೋಲಿನ್ ಆ ಕಾಣ್ಕೆನ ಯೆಹೋವ ಹುಯಿರ‍್ಹೋತೆ ಮಾರಿ ಖ್ಹಾಮೆ ಯಾದ್ ಹುಯಿರ‍್ಹಿಷೆ."

ತಾಂಬಾನಿ ಬಾನೆ

17 ಯೆಹೋವನೆ ಮೋಶೆನ ಶಾತ್ ಬೋಲ್ಯೊಕತೊ, 18 "ಪಾಣಿ ನ್ಹೊವ್ವಾನಖ್ಹಾಜೆ ಎಕ್ ತಾಂಬಾನು ಬಾನೆನಬಿ ಇನ ತಾಂಬಾನ ಝ಼ಗ್ಲಿನ ಕರೈನ್ ದೇವ್ನ ದರ್ಶನ್ನು ಘರ್‌ನಾಬಿ ಚಾ಼ಚ಼ರ್‌ನ ಬೀಚ್ಮ ಮ್ಹೇಲಿನ್ ಇನಾಮ ಪಾಣಿ ಭರಾವ್ಣು. 19 ಆರೋನಬಿ ಇನ ಛಿಯ್ಯಾವ್‌ಬಿ ಇನೇಥಿ ಹಾತ್ ಗೋಡವ್ನ ಧೊಯಿಲೇವ್ಣು. 20 ಇವ್ಣೆ ದೇವ್ನ ದರ್ಶನ್ನ ಡೇರಾನ ಘರ್‌ನ ಮಹಿ ಜಾ಼ವನಿವಖ್ಹ್‌ತೆ ಅಜು಼ ದೇವ್ನಿ ಸೇವೆನ ಕರಾವಳಹುಯಿನ್ ಯೆಹೋವನ ಬಲಿ ಛ಼ಡಾವನಖ್ಹಾಜೆ ಚಾ಼ಚ಼ರ್‌ಕನ ಆವನಿವಖ್ಹ್‌ತೆ ಜಿವ್ತೊ ರ‍್ಹವಾನಖ್ಹಾಜೆ ಹಾತ್‌ಗೋಡಾವ್ನ ಧೊಯಿಲಿನ್ ಆವ್ಣು. 21 ನಾ ಧೊಯಿನ್ ಆಯುತೊ ಮರಣ್ಣಿ ನಿಶತ್ ಉಷೆ. ಆ ಇನಾಬಿ ಅಜು಼ ಇನಿ ಪಿಳ್ಗಿವಾಳನಬಿ ಹಮೇಶಾನಿ ನಿಯಮ್‌ ಹುಯಿರ‍್ಹೇಣು."

ಅಬಿಷೇಕ್‌ನು ತೇಲ್‌

22 ಆ ನಾಹುಯಿನ್ ಯೆಹೋವನೆ ಮೋಶೆನ ಪಾಛೊ಼ ಶಾತ್‌ ಬೋಲ್ಯೊಕತೊ, 23 "ತೂ ಅಛ್ಛಿವಾನು ತೈಲಾಮ ದೇವ್ನಿ ಸೇವೆನ ನೇಮಕ್‌ನು ತೋಲ್‌ನಿ ಘೋಣಿ ಛೊ಼ ಕಿಲೊ ಅಫುಟ್ ರಕ್ತಬೋಳ್, ತೀನ್ ಕಿಲೊ ಶ್ರೇಷ್ಟ್ ಲವಂಗಚಕ್ಕೆ, ತೀನ್ ಕಿಲೊ ಅಛ್ಛು಼ ವಾಖ್ಹ್‌ರ‍್ಹವಾನು ವಚ಼್‌ ಅಜು಼ ಛೊ಼ ಕಿಲೊ ದಾಲ್‌ಚಿನ್ನಿನ ಲೇವ್ಣು. 24 ಇನ ಅಖ್ಖಾನ ಪಾಡಿಲಿನ್ ಛೋ಼ ಲೀಟರ್ ಅಫುಟ್‌ ಒಲಿವ್ ತೇಲ್ನ ಲೀನ್, 25 ವಾನು ತೇಲ್‌ ಕರವಾಳನಿ ಪದತ್ತಿನಿಘೋಣಿ ಮಿಲಾವಟ್‌ಕರಿನ್ ಪರಿಶುದ್ ಅಭಿಷೇಕ್ ತೇಲ್ನ ಕರಾವ್ಣು. ಆ ಅಬಿಷೇಕ್‌ನು ತೇಲ್‌ಹುಯಿರ‍್ಹುಸ್. 26 ಇನಖ್ಹಾಜೆ ದೇವ್ನ ದರ್ಶನ್ನು ಡೇರಾನು ಘರ್, ಹುಕುಮ್‌ನು ಪಲ್ಗಾನೊ ಪಿಟಾರೊ, ಅಬಿಷೇಕ್‌ಕರಾನಖ್ಹಾಜೆ ಯೊ ತೇಲ್ನ ಉಪಯೋಗ್‌ ಕರ‍್ನು. 27 ಖುಡ್‌ಷಿ, ಖುಡ್‌ಷಿನು ಜಿನಖ್ಹ್‌ಅಖ್ಖು. ದೀವಾನುಖಂಬು, ದೀವಾನುಖಂಬ್‌ನು ಜಿನಖ್ಹ್‌ಅಖ್ಖು, ಢಾಕ್ಣಿ, ಚಾ಼ಚ಼ರ್‌, ಚಾ಼ಚ಼ರ್‌ನು ಜಿನಖ್ಹ್‌ಅಖ್ಖು 28 ಅಜು಼ ಪಾಣಿನಿ ಬಾನೆ ಇನ ಝ಼ಗ್ಲಿ ಅನಅಖ್ಖು ಅಬಿಷೇಕ್‌ಕರ‍್ನು. 29 ಯೊಅಖ್ಖು ಘಣು ಪರಿಶುದ್ಧ್ ಹುವಾನಿತರ ಯೋಅಖ್ಖಾನ ಪಾಕ್‌ಕರ‍್ನು. ಯೋಅಖ್ಖಾನ ಛೀಮವಾಳುಖ್ಹಾರುಬಿ ಪರಿಶುದ್ಧ್ ಹುಯಿರ‍್ಹೇಣು. 30 ಯೋಸ್‌ ಕಾಹೆತೆ ಆರೋನಬಿ ಇನ ಛಿಯ್ಯಾವ್‌ಬಿ ಮನ ಯಾಜಕ ಹುವಾನಿತರ ಇವ್ಣುನ ಅಬಿಷೇಕ್‌ಕರಿನ್ ಶುದ್ದಕರ‍್ನು." 31 ತೂ ಇಸ್ರಾಯೇಲ್‌ವಾಳನ ಹುಕುಮ್ ದ್ಯವಾನಿತರಾನು ಶಾತ್‌ಕತೊ, "ತುಮೇಬಿ ತುಮಾರು ಪಿಳ್ಗಿವಾಳುಬಿ ಆ ತೇಲ್ನ ಮಾರಿ ಸೇವೆನ ನೇಮಕ್‌ನು ಪರಿಶುದ್ಧ್ ಅಬಿಷೇಕ್‌ನು ತೇಲ್‌ಕರಿ ಮಾಲುಮ್ ಕರಿಲೇವ್ಣು. 32 ಅದ್ಮಿಖ್ಹಾರು ಆಂಗ್‌ತನ್ನ ಲಗಾಡನ ಅನ ನಾ ಉಪಯೋಗ್ ಕರ‍್ನು. ಆ ತರೀಖಾನ ಲೀನ್ ಬಿಜು಼ ಖಿವುಬಿ ಕಾಮ್ನಖ್ಹಾಜೆ ತೇಲ್ನ ನಾಸ್‌ ಬಣಾವ್ಣು. ಆ ದೇವ್ನ ನೇಮಕ್‌ಹುಯಿರ‍್ಹುತೆ ಜಿನಖ್ಹ್‌. ಆ ಹೈರುತೆ ಪರಿಶುದ್ಧ್ ಕರಿ ತುಮೆ ಮಾಲುಮ್ ಕರಿಲೇವ್ಣು. 33 ಅನಿನಿಘೋಣಿ ತೇಲ್ನ ಕರವಾಳೊರ‍್ಹವೊ ಅನ ಯಾಜಕಕೊಂತೆ ಇನಾಪರ್ ಲಗಾಡವಾಳೊ ಇನ ಖೂಮ್‌ಥು ನಿಕ್‌ಳಿ ಜಾ಼ವ್ಣು."

ಮಹಿಕಾವನು ತೇಲ್‌

34 ಆಸ್ ಕಾಹೆತೆ ಯೆಹೋವನೆ ಮೋಶೆನ ಶಾತ್ ಹುಕುಮ್ ದಿದೊಕತೊ, "ತೂ ದೂದ್ನಿಮಲ್ಹಯಿ, ಗುಗ್ಗುಲ ಅಜು಼ ಚ಼ಂದಣ್ಣಿಛಾ಼ಲ್‌ ಕರಿ ಮಹಿಕಾವನು ತೇಲ್ನ ಸಮಾಥಿ ಲೀನ್, 35 ಮಹಿಕಾವನು ತೇಲ್ನ ತಯಾರ್ ಕರವಾಳನಿ ಪಢಂತ್‌ನಿ ಘೋಣಿ ಕಲೈನ್ ಮೀಟ್ ನಾಖಿನ್ ದೇವ್ನಿ ಸೇವೆನ ಪರಿಶುದ್‍ ಢಪ್‌ಕಾರ‍್ನ ಕರಾವ್ಣು. 36 ಇನಾಮ ಥೋಡಾನ ಪುಡಿಕರೈನ್ ದೇವ್ನ ದರ್ಶನ್ನು ಡೇರಾನ ಘರ್‌ಮ ಹುಕುಮ್‌ನು ಲಿಖ್ಯಾವ್‌ನು ಪಿಟಾರನ ಖ್ಹಾಮೆಕರಿ ಮೇ ತುನ ದರ್ಶನ್ ದ್ಯವಾನಿ ಝ಼ಗೋಮ ಮ್ಹೇಲ್ನು. ಯೊ ಘಣು ಪರಿಶುದ್ಧ್‌ನು ಕರಿ ತುಮೆ ಮಾಲುಮ್‌ ಕರಿಲೇವ್ಣು. 37 ತುಮೆ ಯೊ ಮಹಿಕಾವನ ತೇಲ್ನಿ ಪರಕ್‌ನಿಘೋಣಿ ತುಮಾರು ಶೊಂತ್ ಉಪಯೋಗ್‌ನಖ್ಹಾಜೆ ಢಪ್‌ಕಾರ‍್ನ ತೇಲ್ನ ನಾ ಕರಾವ್ಣು. ಯೊ ಯೆಹೋವನಿ ಸೇವೆನ ಖಲಿ ಉಪಯೋಗ್‌ಕರಾನ ಛಾ಼ತೆ ಪವಿತ್ರ ರಾಛು಼ಕರಿ ಮಾಲುಮ್ ರ‍್ಹೇಣು. 38 ಅಛ್ಛಿ ವಾನಖ್ಹಾಜೆ ಎಥ್ರಾನು ಶೊಂತ್‌ನಖ್ಹಾಜೆ ಕರಿಲ್ಯವಾಳೊ ಇನಿ ಖೂಮ್‌ಥು ಕಡೈಜಾ಼ವಳೊ ಹುಯಿರ‍್ಹೊಸ್."