Romanos 14

ಬಿಜೇಕ್‍ಜ಼ಣಾನ ತೀರ್ಪ್‌ನಕೊ ಕರೊ.

1 ವಿಶ್ವಾಸ್‌ಮ ಕಮ್‍ಜೋ಼ರಿ ರ‍್ಹವಳಾನ ತುಮಾರಿ ಝೂ಼ಂಡ್‌ಮ ಮಳೈಲೇವೊ. ಕತೋಬಿ ಇವ್ಣಿ ಶೊಂತ್‍ ಖ್ಹೂಜ಼್‌ನಿ ಬಾರೇಮ ಅಬ್ಬಾಜ಼ಬ್ಬಿ ನಕೊ ಕರೊ. 2 ಅಜು಼ ಏಕ್‍ಜ಼ಣಾನಿ ವಿಶ್ವಾಸ್ ಖ್ಹಾರುಸ್ ಥರಾನು ಖಾಣುಖಾವಾನಿತರ ಕರಸ್. ಕತೋಬಿ ವಿಶ್ವಾಸ್‌ಮ ಕಮ್‍ಜೋ಼ರಿ ರ‍್ಹವಾಳು ಭಾಜಿಪಾಲೊ ಖಾವಾಳೋಸ್ ಹುಯಿರ‍್ಹೇಸ್. 3 ಇನಖ್ಹಾಜೆ ಬೋಟಿ ಖಾವವಾಳೊ ಖಾಯಿಕೊಂತೆ ಇನ ನಕ್ಲೆ ನಕೊ ಕರಾದೆ. ಭಾಜಿಪಾಲೊ ಖಾವಾಳೊ ಬೋಟಿ ಖಾವವಾಳನ ತೀರ್ಪ್‌ನಕೊಕರಾದೆ. ಶನಕತೊ ದೇವ್ ಇವ್ಣ ಭೇಜ಼ಣಾನ ಮಳೈರಾಖ್ಯೊಸ್. 4 ಬಿಜೇಕ್‍ಜ಼ಣ ಸೇವಕ್‌ನ ತೀರ್ಪ್‌ಕರಾನ ತೂ ಕೋಣ್? ಯೋ ಘಟ್‍ಥಿ ಭಿಯೋತೋಬಿ ರಡ್‍ಕ್ಯೊತೋಬಿ ಯೋ ಇನ ಯಜಮಾನ್ನ ಶೇರಾಸ್. ಶನಕತೊ ಇನ ಘಟ್ ಭೀರಾವಾನಿತರ ಕರಾನ ಪ್ರಭು ಶಕತ್‌ವಾಳೊ ಹುಯಿರೋಸ್.