Rute 1

ಎಲಿಮೆಲೆಕ್ ಬುಜು ಇನಿ ಕುಟಂ ಮೋವಾಬ್ ದೆಖ್ಹ್ ನ ಗಯುತೆ

1 ನ್ಯಾಯಂ ಕರವಳು ಚಲವ್ ಕರ್ ತುತೆ ತ್ತದೆ ದೆಖ್ಹ್ ಮ ಬರಕಾಲಂ ಅವಮ ಯೆಹೂದ ಟಬರ್ ಕೊಮ ಬೇತ್ಲೆಹೇಮ್ ವಳು ಎಕ್ ಜಣನಿ ಬಯಿಕೊ ಬೇ ಚ್ಹಿಯ್ಯಾ ಅವ್ ಣ ಜೊಡ್ಮ ಮೋವಾಬ್ ದೇಖ್ಹ್ ಮ ರ‍್ಹವನಕಜೆ ಚ್ಹಲಿಗಯು. 2 ಯೊ ಅದ್ಮಿನ ಎಲೀಮೆಲೆಕ್ ಕರಿ ಇನಿ ಬಯಿಕೊ ನವೊಮಿ ಕರಿ. ಬೇ ಲಡ್ಕವ್ ನ ಮಹ್ಲೋನ್, ಕಿಲ್ಯೋನ್ ಕರಿ ನಾಮ್. ಯೆಹೂದ ದೇಖ್ಹ್ ನ ಮಳ್ಯುರುತೆ ಎಫ್ರಾತಮ್ಮ ಕರಿ ಚ್ಹತೆ ಬೇತ್ಲೆಹೇಮ್ ಮ ರ‍್ಹಾವಳು ಅವ್ ಣೆ ಅಯಿನ್ ಮೋವಾಬ್ ದೇಖ್ಹ್ ಮ ರ‍್ಹವಮ. 3 ನವೊಮಿ ನೋ ವ್ಹಾಗ್ರಿ ಹುಯಿರೊತೆ ಎಲೀಮೆಲೆಕ್ ಮರಿಗಯೊ. ಯೊ ತಯಡ ಬೇ ಪರ್ಖ್ಹಾ ಲಡ್ಕನಿ ಜೊಡ್ಮ ಇಜ್ಗೊಸ್ ರ‍್ಹೈಗಿ. 4 ಯೊ ಲಡ್ಕ ಒರ್ಫಾ,ರೂತ್ ಕರಿ ನಾಮ್ ಚ್ಹಾತೆ ಬೆ ಮೋವಾಬ್ ನಿ ತಯಡವ್ ನ ವ್ಯಾಹಕರಿಲಿನ್ ಕಮ್ ಶೆ ಕಮ್ ದಖ್ಹ್‌ ವರಖ್ಹ್ ಇಜ್ಗೊಸ್ ರೈನ್ ಇನಪರ್ ಬೆ ಜಣಬಿ ಮರಿಗಯು. 5 ಅಮ್ಮಸ್ ನವೊಮಿ ಇನ ವ್ಹಾಗ್ರಿನಾಬಿ ಬ್ಹೇಜಣ ಚ್ಹಿಯ್ಯೊ ಮಹ್ಲೋನ್ ಬುಜು ಕಿಲ್ಯೋನ್ ನಾಬಿ ಗಮೈಲಿನ್ ಎಕ್ಕಸ್ ಜಣಿ ರ‍್ಹೈಗಿ.

ನವೊಮಿ ಬುಜು ರೂತ್ ಬೇತ್ಲೆಹೇಮ್ಮ ಪಾಛಿ ಫರಿನ್ ಆಯಿತೆ

6 ಯೆಹೋವ ದೇವ್ ನು ಅನುಗ್ರಹಥಿ ಇನು ಮುಲಕ್ ಮ ಅಚ್ಚು ಪಣಿ ಅನಜ್ ಹುಂಕರಸ್ ಕರಿ ವಾತೆ ಮೋವಾಬ್ ಮುಲಕ್ ಮ ನವೊಮಿನ ಮಾಲಂ ಹುಯು. ಯೊ ಇನಿ ವ್ಹಾವೆ ಬಿ ಪಚ್ಹುಪರಿನ್ ಮೋವಾಬ್ ದೆಖ್ಹ್ ಥಿ ಯೆಹೂದ ದೆಖ್ಹ್ ನ ಜನುಕರಿ. 7 ಯೊ ಇನಿ ಬೆ ಜಣಿ ವ್ಹಾವೆನಿ ಜೊಡ್ಮ ಯೊ ಥಿತೆ ಜ್ಹಗೊಮತು ಯೆಹೂದ್ಯ ದೆಖ್ಹ್ ನ ಜವನಿ ವಟ್‍ಮ. 8 ನವೊಮಿ ಇನಿ ವ್ಹಾವೆನ "ತುಮೆ ಭೆಜಣಿ ತುಮಾರಿ ಆಯ ಬಾನ ಘರೆ ಚಲಿಜಾವೋ. ಮನಾಬಿ ಮರಿಗಯತೆ ಮಾರ ಲಡ್ಕವ್ನಬಿ ತುಮೆ ಅಛ್ಛು ಸ್‌ ಕರ್ಯ, ಯೆಹೋವ ದೇವ್ ತುಮ್ನಾಬಿ ಇಮ್ಮಸ್ ಅಛ್ಛು ಕರದೆ. 9 ತುಮೆ ಬೇ ಜಣಿ ಪಾಛಿ ವ್ಯಾಹಕರೀಲಿನ್ ಅಚ್ಚಿನಿತರ ರ‍್ಹವೊಕರಿ ಯೆಹೋವ ದೇವ್ ನು ಅನುಗ್ರಹ ಹುವಾದೆ!" ಕರಿ ಆಶ್ರೀವಾದಂ ಕರೀನ್ ಇವ್ಣ ಮ್ಹೆಲಿದಿನ್ ಬುಚ್ಚದಿದಿ. ಜಾ ಕರಿ ಬೊಲಮ ತದೆ ಇವ್ಣೆ ಜೊರೆಖ್ಹು ರೋವಲಗಿ. 10 ರೈತೊಬಿ ಇವ್ಣೆ, "ಕೊಯ್ನಿಲಿ ಆಯ ತುನ ಮ್ಹೆಂದಿನ್ ಕೊ ಜೈಯಿಸ್ ನಿ. ಹಾಮೆಬಿ ತುಮಾರಿ ಜೋಡ್ಮಾಸ್ ತುಮಾರ ಮಯಾಮಾತ್ರಕನಾಸ್ ಅಯೇಸ್." 11 ತದೆ ನವೊಮಿ, "ಮಾರಿ ಭಯಿ, ತುಮೆ ಪಾಛು ಫರೀನ್ ಜಾವೊ. ಮಾರಿ ಜೋಡ್ಮ ಶನ ಆವ್ಣುಕರಿ ಛಾ? ತುಮೆ ಪಾಛು ವ್ಯಾಹ ಹುವಾನ ಮರಕನ ಬುಜಾ ಲಡ್ಕ ಚ್ಹಾ ನಾ? 12 ಲಡ್ಕ ತುಮೆ ಪಾಚ್ಹು ಪ್ಹರಿನ್ ಜಾವೋ. ಪಾಛು ವ್ಯಾಹಕರಾನಿ ವೈಶ್ ‌ಮನ ಕೊಯ್ನಿ. ಎಕ್ ವಳಿ ಕಾಯಿತೋಬಿ ಲಡ್ಕನಿ ಭರಖ್ಹೊ ತಿ ಹಂಕ್ಕೆ ವ್ಯಾಹ ಹುಯಿನ್ ಲಡ್ಕ ಜಣಿತೋಬಿ 13 ಇವ್ಣೆ ಮೊಟಹೂವಾಲಗೂ ತುಮೆ ರ‍್ಹವನ ಉಶೆ ನಾ? ನಕೊ,ಬುಜು ವ್ಹಾಗ್ರಿಯೆ ಕೊಯಿನ್ತೆ ರ‍್ಹವನ ಉಶೆ ನಾ? ಲಡ್ಕ ಯೆಹೋವನೆ ಮಾರೊ ಹಾತ್ ಮ್ಹೆಲಿರಾಖ್ಯೊಸ್ ತುಮಾರಖ್ಹಾಜೆ ಮನ ಘಣು ದುಃಖಂಹುವಸ್, ಕರಿ ಸಮಾಧಾನಂ ಬೋಲಿ. 14 ಇವ್ಣೆ ಅನ ಖ್ಹಂಜೀನ್ ಉಜೂಬಿ ಜೊರೆಥಿ ರೋಯು. ಯೊ ಹುಯಿಜವದಿನ್ ಒರ್ಫಾ ಇನಿ ಪ್ಹುಯಿ ನಾ ಬುಚ್ಚಾದಿನ್ ಇನು ಆಯ ಬಾ ನ ಘರೆ ಪಾಛಿ ಫರೀನ್ ಚಲಿಗಯಿ. ರೂತ್ ಮತ್ರ ಪ್ಹುಯಿನ ಮ್ಹೆಂದಿನ್ ಕೋ ಗೈನಿ. 15 ತದೆ ನವೊಮಿ ರೂತ್ ನ; ಹಂದೇಕ್, ತಾರಿ ಜ್ಹೆಟಣಿ*1:15 ಅರ್ತಂ ಭೈನಿ ಬಯಿಕೊ ಇನ ಆದ್ಮಿವ್ ಕನಬಿ ಇನು ಖ್ಹರು ದೇವ್ ಕನಬಿ ಪಾಚ್ಹು ಪರಿನ್ ಚಲೀಗಿ. ತೂಬಿ ಇನಿನ್ತರಸ್ ತರ ಆದ್ಮಿವ್ ಕನ ಚಲೀಜಾ, ಕರಿ ಬೊಲಿ. 16 ತದೆ ರೂತ್ ನೆ; "ತುನ ಮ್ಹೆಂದಿನ್ ಜಾವಾನಿತರ ಒತ್ತಾಯಂನಕೊಕರ್. ತೂ ಕಿಜ್ಜಾ ಗೈತೋಬಿ ಮೇ ಇಜ್ಜಾಸ್ ಅಯಿಶ್. ತೂ ಕಿಜ್ಜಾ ರ‍್ಹೈಶ್ ಕಿ ಮೇ ಇಜ್ಜಸ್ ರ‍್ಹೈಶ್. ತಾರು ಅದ್ಮಿಸ್ ಮಾರು ಅದ್ಮಿ; ತಾರು ದೇವಸ್ ಮಾರು ದೇವ್; 17 ತೂ ಕಿಜ್ಜಾಮರಸ್‌ಕಿ ಇಜ್ಜಾಸ್ ಮೆಬಿ ಮರಿಶ್; ಇಜ್ಜಾಸ್ ಮಾರಿ ಮಟಿ ಹುವಾದೆ. ಮರಣ್ಮಾಬಿ ಮೆ ತುನ ಮ್ಹೆಂದಿನ್ ಕೊ ರ‍್ಹೈಶ್‌ನಿ. ಕೊಯ್ನಿಕತೊ ಯೆಹೋವ ಮನ ದೇನುತೆ ಶಿಕ್ಷೆ ದೆವಾದ!" ಕರಿ ಮಾಂಗಿಲಿದಿ. 18 ರೂತ್ ಮಾರ ಜೋಡ್ಮ ಆವ್ ನುಸ್ ಕರಿ ತಿರ್ಮಾನ್‌ಕರಿ ರಕಿಶ್ ಕರಿ ಮಾಲಂ ಕರಿಲಿನ್ ನವೊಮಿ ಶೊಪೊಸ್ ರೈಗಿ. 19 ಇಮ್ಮಸ್ ಚಾಲ್‌ತಿ ಹುಯಿನ್ ಇವ್ಣೆ ಬೇ ಜಣಿ ಬೇತ್ಲೆಹೇಮ್ ಮ ಗಯು. ಇವ್ಣೆ ಗಾಮ್ಮ ಪಾಚ್ಹು ಪ್ಹರಿನ್ ಅಯುತೆ ವಾತೆ ಅದ್ಮಿವ್ ಮ ಅಶ್ಚರ್ಯಂ ಹುಯು. ಗಾಮ್ ನಿ ತಯಡ ಖ್ಹಾರು, "ಆ ನವೊಮಿ ಖಾಯೆ ನಾ?" ಕರಿ ವತೆ ಬೊಲಲಗ್ಯು. 20 ಇನಕಾಜೆ ಯೊ, "ಮನ ನವೊಮಿ" ಕರಿ ನಕೊಬುಲಾವೊ, ‘ಮಾರಾ’*1:20 ಅರ್ತಂ 'ಕಡು,’ ಕರಿ ಬುಲಾವೊ. ಶನಾಕತೊ ಯೆಹೋವ ದೇವ್ ಮನ ಜ್ಹಖ್ಹಾತ್ ದುಃಖಂ ದಿರಕ್ಯೊಸ್. 21 ಮೇ ಧನ್ ದೌಲತ್‌ವಾಳಿ ಹುಯಿನ್ ಅಜ್ಗೊಥು ಗೈಥಿ, ಶತಸ್ ಕೊಯಿನಿತರ ಯೆಹೋವ ನೆ ಮನ ಪಾಛೋ ಬುಲೈಲೀನ್ ಆಯೊ. ಅಮ್ ಯೆಹೋವ ದೇವ್ ಮನ ವಿರೋಧಂಖ್ಹೂ ಮನ ಖ್ಹಾತೈನಾಖಿದಿದೋ ತುಮೆ ಮನ ನವೊಮಿ ಕರಿ ಬುಲಾವಾನು ಬರೋಬರ್‌ ನಾ? ‘ಕರಿ ಜವಾಬ್ ದಿದಿ. 22 ಅಮ್ ನವೊಮಿ ಇನಿ ಮೋವಾಬ್ ನಿ ವ್ಹಾವ್ ಹುಯಿರಿತೆ ರೂತ್ ನಿ ಜೋಡ್ಮ ಬೇತ್ಲೆಹೇಮ್ ನ ಆಯಿ; ತದೆ ಬರಿಕ್‍ಗ್ಹವ್ ನು ಕಾಲಂ ಆಯು.