Rute 2

ರೂತ್ ಬೋವಜ್ ನ ಖೆತರ‍್ಮ ಕಮ್ ಕರಿತೆ

1 ನವೊಮಿ ನೊ ವ್ಹಾಗ್ರಿಹುಯಿರುತೆ ಎಲಿಮೆಲೆಕ್ ನ ಜಾತ್ ಮ ಮಳಿರ‍್ಹೊತೆ ಎಕ್ ಜಣು ಖನ್ನೆವಾಳೊ ಥೊ. ಯೊ ಧನ್‌ದಲವತ್‌ವಾಳೋ ಹುಯ್‌ರೊಥೊ; ಇನು ನಾಮ್ ಬೋವಜ್. 2 ಎಕ್ ದನ್ ಮೋವಾಬ್ ವಾಳಿ ರೂತ್ ನವೊಮಿ ನ: "ಮೆ ಖೆತರ್ ಮ ಬುಟ್ಟವ್ ನ ಚುಣನ ಜವ್ ನಾ? ಅನ ಕೊಣ್ ತೊಬಿ ಮನ ಗೋರ್‌ ಕರಾವಾಳು ಉಷೆ," ಕರಿ ಬೋಲಿ. ನವೊಮಿನೆ, "ಜೈನ್ ಆವ್ ಚ್ಹೊರಿ," ಕರಿ ಬೊಲಿ. 3 ರೂತ್ ವ್ಹಾಡವಾಳಾನ ಪೆಟೆ ಜಾತ್‍ಹುಯಿನ್ ಇಜ್ಜಾ ಹುಜ್ಜಾ ಪಡ್ಯುರುತೆ ಬುಟ್ಟವ್ ನ ಚುಣುಕರ್ ಥಿಥ್ಹಿ. ಯೊ ಎಲಿಮೆಲೆಕ್ ನ ಜತ್ ನೊ ಹುಯಿರೊತೆ ಬೋವಜ್ ನುಸ್ ಖೆತರ್‌ ಹುಯಿರು ಥು. 4 ತದೆ ಬೋವಜ್ ನೆ ಬೇತ್ಲೆಹೇಮ್ ಥು ಖೆತರ್ ಮ ಅಯಿನ್ ವ್ಹಾಡವಳವ್ ನ "ಯೆಹೋವ ದೇವ್ ತುಮಾರಿ ಜೋಡ್ಮ ರ‍್ಹಾವಾದೆ" ಕರಿ ಬೊಲ್ಯೊ. ತದೆ ಇವ್ಣೆ, "ಯೆಹೋವ ತುನಾಬಿ ಆಶೀರ್ವದ್ ಕರದೆ" ಕರಿ ಬೊಲ್ಯು. 5 ಬೋವಜ್ ನೆ ಕಾಮ್‌ಕರವಳು ಅವ್ಣ ಬುಲೈನ್, "ಆ ಕಿನ ಗರ್ ನಿ ತಯಡ?" ಕರಿ ಪುಚ್ಹಯು. 6 ಇನ ಯೊ ದೆಖಿಲೆವಳು "ಆ ಮೋವಾಬ್ ವಾಳಿ ನವೊಮಿ ನಿ ಜೋಡ್ಮ ಮೋವಾಬ್ ಮುಲುಕ್ ಥಿ ಪಾಛಿಫರಿನ್ ಅಯಿರಿಸ್ ಥೆ ತಯಡ. 7 ಅ ಬುಟ್ಟ "ವ್ಹಾಡವಾಳಾನ ಪ್ಹಿಟೆ ಜೈನ್ ಚೊಪ್ಪೊ ನಾ ಇಚ್ ಮ ಚುಣಿಲ್ಯಾವನ ಖ್ಹಾಜೆ ಹುಕುಮ್ ದೇನುಕರಿ ಬೋಲಿಲಿದಿ. ವ್ಹಾಣೆ ಅಯಿತೆ ಬುಜುಬಿ ಅಜ್ಗೊಸ್ ಛಾ. ಜರ ಛಾಳಾಸ್ ಮ ಆರಾಮ್‌ಕರುಕರಸ್," ಕರಿ ಜವಾಬ್ ದಿದು. 8 ತದೆ ಬೋವಜ್ ನೆ ರೂತ್ ನ, "ದೆಕ್ಲಿ ಬಾಯಿ, ಮರ ಖೆತರ್ ನ ಮ್ಹೆಂದಿನ್ ಬುಜು ಕಿಜ್ಜಾಬಿ ಬುಟ್ಟವ್ ನ ಚುಣನ ಜಾವನು ಕೊಯ್ನಿ, ಮಾರ ಕಾಮ್ಮಚ್ಹತೆ ತಯಡವ್ ನ ಜೋಡ್ಮಸ್ ರ‍್ಹಜೊ. 9 ಇವ್ಣೆ ಕಿಜ್ಜಾ ಬುಟ್ಟವ್ ನ ವ್ಹಾಡ್‌ಶೆಕಿ ಇನ ಪ್ಹಿಟೆ ಜೈನ್ ಬುಟ್ಟವ್ ನ ಚುಣಿಲ. ತುನ ಕೋಣ್‌ಬಿ ನಾ ಚಿಮ್ನು ನು ಕರಿ ಮಾರ ಕಮ್ ಕರವಳ ಪರ್ಖ್ಹನ ಜ್ಹತಯಿರಕ್ಯೊಸ್. ತುನ ತರಖ್ಹ್‌ಲಾಗಿತೊ ಜೈನ್ ಮಾರು ಕಮ್ ಕರವಳು ಖ್ಹಾರು ಭರಿರಾಕ್ಯುಸ್ ತೆ ಪಾಣಿನು ಹಂಡವ್ ಮ ಪೀಜೊ." ಕರಿ ಬೊಲ್ಯೊ. 10 ತದೆ ರೂತ್ ಇನ ಮುಡ್ಕ್ಯುಜ್ಹುಕಯಿನ್ ಖ್ಹಲಾಂ ಕರಿ," ಅಲದ ದೆಖ್ಹ್ ವಳಿ ಹುಯಿರಿತೆ ಮನ ತು ಅತ್ರೆ ಗೋರ್‌ ಒತಾಳುಕರಾತೆ ಷನಾ?" ಕರಿ ಬೋಲಿ. 11 ಇನ ಬೋವಜ್ ನೆ, "ತಾರೊ ವ್ಹಾಗ್ರಿ ಮರಿಗಯೋತೆ ಇಜ್ಗೊತು ತು ಖ್ಹಾಖ್ಹುನಖ್ಹಾಜೆ ಕರಿತೆ ಅಖ್ಖಿ ಬಾರೇಮ ಖ್ಹಂಜಿರಾಖ್ಯೊಸ್. ತೂ ಕಿಮ್ ತಾರ ಆಯಾಬಾನ ಬುಜು ತರು ಸ್ವಂತ್ ಮುಲಕ್‌ ನ ಮ್ಹೆಂದಿನ್, ಕೋಣ್ ಬಿ ಮಾಲಂಮಸ್ ಕೊಯಿನಿತೆ ಅದ್ಮಿನಿ ಜೊಡ್ಮ ಜಿವನಾಕಜೆ ಆಯಿರಿಸ್ ಕರಿಬಿ ಮನ ಮಾಲಂ ಛಾ. 12 ತು ಕರಿತೆ ಅಕ್ಕುಸ್ ಕಮ್ ನ ದೇವ್ ತುನ ಬರೊಬರ್‌ನಿ ಪ್ರತಿಫಲಂ ದೆವದ, ಇಸ್ರಾಯೇಲ್‌ ನೊ ದೇವ್‌ಹುಯ್‌ರ‍್ಹೊತೆ ಯೆಹೋವ ನಿ ಅಶ್ರಯಂ ಖ್ಹು ಅಯಿರಿಸ್. ಇವ್ಣೆ ತುನ ಬೊಲನ ಹೊಯಿಕೊಯಿನ್ತೆ ಆಶ್ರೀವಾದಂ ದೆವದ!" ಕರಿ ಬೊಲ್ಯೊ. 13 ತದೆ ರೂತ್ ನೆ, "ಯಜಮಾನ್ ತು ದಾಸಿಹುಯಿರೀತೆ ಮನ ಮೊಟು ಉಪಕಾರ್ ಕರಿರಾಖ್ಯಸ್. ಮೆ ತುಮಾರಿ ದಾಸಿ ಬೊಲೈಲ್ಯಾವನಾಬಿ ಯೋಗ್ಯತಂ ನಾ ರೈತೊಬಿ ಮನ ಗೋರ್‌ಕರೀನ್ ಲಾಡ್ ಖ್ಹು ವಾತೆ‌ಬೋಲಿರಕ್ಯೊಸ್," ಕರಿ ಬೋಲಿ. 14 ಖಾಣಾನಿ ವಖ್ಹತ್ ಮ ಬೋವಜ್ ನೆ ರೂತ್ ನ ಬುಲೈನ್, "ಅಜ್ಜಾ ಆವ್, ರೋಟಾನ ಪಾಡಿಲೀನ್ ದ್ರಾಕ್ಷಿನು ಖಠು ರಖ್ಹ್‌ಮ ಡುಬಯಿನ್ ಖಾ", ಕರಿ ಬೊಲ್ಯೊ. ಯೊ ತಯಡ ವ್ಹಾಡವಾಳಾನಿ ಜೋಡ್ಮ ಬೇಶಿಗಿ. ಅಖಯೆತಿಮ್ ಬೋವಜ್ ನೆ ಇನ ಬುಂಜ್ಯುಹುಯು ಬುಟ್ಟವ್ ನ ದಿದೊ. ಯೊ ಪೆಟ್ ಭರಿನ್ ಖಾಣುಖೈನ್ ಬುಜುಬಿ ಬಚಯಿಲಿದಿ. 15 ಯೊ ಪಾಛಿ ಚುಣನ ಉಟದಿನ್ ಬೋವಜ್ ನೆ ಇನ ಕಮ್ ಕರವಳಿ ನ, "ಚೊಪ್ಪೊ ನ ಇಚ್ಮ ಯೊ ಬುಟ್ಟವ್ ನ ಚುಣಿಲ್ಯಾವಾದೆ, ಅಡೆನಕೊ ಹುಯೊ. 16 ಚೊಪ್ಪೊಮಥು ಬುಟ್ಟವ್ ನ ತೋಡಿನ್ ನಾಕೊ. ಯೊ ಜೊಡ್ ಕರಿಲೆವದೆ, ಕೊಣ್ ಬಿ ಇನ ಡರಾವ್ ಶು ನಕೊ" ಕರಿ ಬೊಲ್ಯೊ. 17 ಇಮ್ಮಸ್ ರೂತ್ ಖ್ಹಾಂಜ್ ಲಗೂ ಬಿ ಬುಟ್ಟವ್ ನ ಚುಣಿತೆ ಇನ ಕೂಟಮ ಕಮ್ ಶೆ ಕಮ್ ದೊಡಿಖ್ಹ್ ಶೇರ್ ಏತ್ರು ಬರಿಕ್‍ಗ್ಹವ್ ಮಳ್ಯೂ. 18 ಇನ ಪಳ್ಳಿನ್ ಗಾಮ್ಮ ಜೈನ್ ಇನಿ ಖ್ಹಾಖ್ಹುನ ಓತಾಳಿ. ಇಮ್ಮಸ್ ಇನ ಖಾಣಮಾಥು ಬಚೈರಕಿತೆ ಇನಿ ಖ್ಹಾಖ್ಹುನ ದಿದಿ. 19 ಇನ ದೇಖಿನ್ ನವೊಮಿ, "ತೂ ಆ ದನ್ನೆ ಕಿಜ್ಗತು ಚುಣಿಲಯಿ? ಕಿನ ಖೆತರ‍್ಮ ಕಾಮ್ ಕರಿ? ತುನ ಗೋರ್‌ ಕರ್ಯುತೆ ಇನ ಆಶೀರ್ವದ್ ಹುವದ!" ಕರಿ ಬೋಲಿ. ಇನ ರೂತ್ ನೆ, "ಮೇ ಬುಟ್ಟವ್ನ ಚುಣಿತೆ ಖೆತರ್‌ ಬೋವಜ್ ನು," ಕರಿ ಬೋಲಿ. 20 ಅನ ಖ್ಹಮ್‍ಜಿತೆ ನವೊಮಿ ಘಬ್ರಯಿನ್, "ಜಾನ್‌ರ‍್ಹಾವಳಾನಾಬಿ ಮರವಾಳನಾಬಿ ಕರ‍್ಯೊತೆ ವಾಗ್ದಾನಂಖ್ಹಾರು ಕರಿವತಳವಳೊ ಯೆಹೋವ ದೇವ್ ಇನ ಆಶೀರ್ವದ್ ಕರಾದೆ!" ಕರಿ ಚಿಕ್ರಿನ್, "ಯೊ ಅದ್ಮಿ ಅಪ್ಣ ಖನ್ನೆವಾಳೊ, ಅಪ್ಣ ಅಛ್ಛು ಪಾಳವಾಳೋ," ಕರಿ ಬೊಲಿದಿದಿ." 21 ತದೆ ಮೋವಾಬ್ ವಳಿ ರೂತ್, "ಅನಜ್ ನು ಕಾಲಂ ಜವತೊಡಿ ಮಾರ ಕಮ್ ಕರವಳಿನಿ ಜೋಡ್ಮಾಸ್ ರ‍್ಹವಜೈ ಕರಿ ಬೊಲಿರಾಖ್ಯೋಸ್," ಕರಿ ಬೋಲಿ. 22 ನವೊಮಿ ಇನಿ ವ್ಹಾವ್ ಹುಯಿರಿತೆ ರೂತ್ ನ, "ಓಹೊ, ಚ್ಹೊರಿ ತೂ ಇನಿ ಕಮ್ ಕರವಳಿ ತಯಡನಿ ಜೋಡ್ಮ ರ‍್ಹಾವಾನೂಸ್ ಅಛ್ಛು; ಅಲದನು ಖೆತರ‍್ಮ ತುನ ತೊಂದರೆ ಹುವಜೈ," ಕರಿ ಬೊಲಿ. 23 ಇಮ್ಮಸ್ ರೂತ್ ನೆ ಖ್ಹಾಖ್ಹುನ ಜೊಡ್ ಮ ರ‍್ಹೈನ್ ಬರಿಕ್‍ಗ್ಹವ್ ಬುಜು ಘ್ಹವ್ ನ ಕಾಲಂ ಹುವತೊಡಿ ಬೋವಜ್ ನ ಕಮ್ ಕರವಳಿ ತಯಡನಿ ಜೋಡ್ಮಸ್ ಜೈನ್ ಚುಣುಕರ್ ಥಿಥ್ಹಿ.