1 Alatalaa falan ni ito ra, a naxa,

"Isirayila kaane,

xa ɛ xun xɛtɛ n ma,

xa ɛ xɛtɛ n ma,

xa ɛ ɛ suxurene ba n yɛtagi,

xa ɛ ba sigɛ na xun xɔn,

2 xa ɛ kɔlɔ n tan habadan Alatala yi,

ɲɔndin nun kiti kɛndɛn nun tinxinni,

nayi, siyane duban sɔtɔma nɛn n tan Ala ra,

e yi e kanba n yi."

3 Amasɔtɔ Alatala ito nan falaxi Yuda bɔnsɔnna muxune nun Yerusalɛn kaane xa, a naxa,

"Ɛ xɛ nɛnɛne sɛgɛ,

ɛ nama sansiin si ɲanle tagi.

4 Ɛ kafiri bɔɲɛne xa sariɲan

alo dɛnkɛlɛyataren na tubi Alatala ma,

a banxulan,

ɛ tan Yuda bɔnsɔnna muxune nun Yerusalɛn kaane,

ɛ tubi

alogo n ma xɔlɔn nama godo ɛ ma

ɛ kɛwali ɲaxine fe ra

alo tɛɛn naxan halagin tima

naxan mi nɔɛ ratuyɛ."

5 "Ɛ falani ito rali Yuda yamanani,

ɛ yi a rawanga Yerusalɛn taani,

ɛ naxa, ‘Ɛ xɔtaan fe yamanan birin yi!’

Ɛ a fala ɛ xuini texin na,

ɛ naxa, ‘Ɛ malan, en na en gi,

sa so taa makantanxine yi!’

6 Ɛ yɛngɛn taxamasenni te Siyon kaane xa!

Ɛ gi, ɛ nama ɛ ti de!

Bayo n gbalon nun halagi gbeen nafama nɛn

sa keli sogeteden kɔmɛnna ma."

7 Yatan bata mini a yinla ra!

Muxun naxan yamanane halagima,

na bata kiraan suxu.

A bata mini a konni,

a xa fa ɛ yamanan kala,

a ɛ taane raxɔri,

muxu yo mi fa lu e yi.

8 Nanara, ɛ kasa bɛnbɛli dugine so sununi,

ɛ wuga, ɛ gbelegbele,

bayo en mi tangama Alatalaa xɔlɔ gbeen ma.

9 Alatalaa falan ni ito ra, a naxa,

"Na lɔxɔni,

mangan nun kuntigine tunnaxɔlɔma e ma nɛn,

saraxaraline yi yigitɛgɛ.

Nabine yi kabɛ."

10 Nayi, n yi a fala, n naxa,

"Ee! Marigina, Alatala!

I bata yamani ito nun Yerusalɛn kaane mayenden,

i to a fala, i naxa,

‘Ɛ bɔɲɛ xunbenla sɔtɔma nɛn!’

Anu, silanfanna yitɔnxi

nxu kɔɛ raxaba xinla ma."

11 Na waxatini, Ala a falama nɛn yamani ito nun Yerusalɛn kaane xa, a naxa,

"Foye wolonna fama n ma yamaan ma

keli geyane ma tonbonni,

a mi fama se fintandeni,

a mi se yɛbama.

12 Foye gbeen nan a ra

naxan sa kelixi mɛnni n ma yamarin bun.

Iki, n tan nan kitin sama n ma yamaan xili ma."

13 Yamaan naxa, "A mato!

Yaxune nan itoe ra,

e tema alo kundana!

E yɛngɛ so wontorone fama

alo wuluwunla.

E soone xulun singbinna xa.

Gbalona en xa,

bayo en naxɔrimatɔɔn ni i ra!"

14 Ala naxa, "Yerusalɛn kaane,

ɛ fe ɲaxin ba ɛ bɔɲɛni,

alogo ɛ xa kisi!

Ɛ miriya ɲaxine ramarama ɛ yi

han waxatin mundun?

15 Bayo, falana nde fama

sa keli fɔ Dan yamanani,

a halagin nan ma fe ralima

sa keli Efirami geyane fari.

16 Ɛ siyane rakolon ito ma,

ɛ a fala Yerusalɛn kaane xa, ɛ naxa,

Sofa ganla fama sa keli yire makuyeni,

e xa fa fu taane ma.

E yɛngɛ so sɔnxɔni tema Yuda taane xili ma.

17 E Yerusalɛn taan nabilinma nɛn yɛngɛni

alo xɛ kantanne,

bayo a bata murutɛ n xili ma."

Alatalaa falan nan na ra.

18 Ɛ sigati kiin nun ɛ kɛwanle saren nan na ra.

Ɛ fe xɔlɛn ni ito ra,

a xɔlɔ mumɛ!

A soma nɛn fɔ ɛ bɔɲɛni.

19 N kuisanxi! N kuisanxi!

N kutunma tɔrɔyaan ma.

Kɔntɔfinla bata n bɔɲɛni li.

N bɔɲɛn dinma,

n mi nɔɛ n dundɛ!

Bayo n bata xɔtaan fe xuiin mɛ,

e nun yɛngɛ so sɔnxɔ xuine.

20 Fitina fena nde nɛma raliyɛ,

gbɛtɛ sa fama,

bayo halagin bata so yamanan birin yi.

N ma bubune birin bata kala,

e nun n ma banxine birin sanɲa ma kedenni.

21 N yɛngɛn taxamasenna toma singanxi

han waxatin mundun yi?

N xɔta xuiin mɛma

han waxatin mundun yi?

22 Ala naxa,

"Xaxilitarene nan n ma yamaan na,

e mi n kolon.

Dii kɔmɔne nan e ra,

xaxili yo mi e ma.

E fatan fe ɲaxin nan tun ligɛ,

e mi a kolon fe faɲin nabama kii naxan yi."

23 "N to n yɛɛn ti bɔxɔ xɔnna ra,

a yitɔntareyaan nun a yigenla yi lu.

N to n yɛɛn ti kore xɔnna ra,

kɛnɛnna yi ɲan a yi.

24 N to n yɛɛn ti geyane ra,

e yi xuruxurun

yire matexine birin yi yimaxa.

25 N to n yɛɛn ti e ra,

muxu yo mi fa lu na,

xɔline birin yi e gi.

26 N to n yɛɛn ti yamana sabatixin na,

a yi findi tonbonna ra,

a taane birin kalaxin yi lu

n tan Alatala fitinaxin yɛɛ ra

n ma xɔlɔna fe ra."

27 Bayo Alatala ito nan falaxi, a naxa,

"Yamanan birin kalama nɛn,

koni n mi ɛ raxɔrima.

28 Na ma, bɔxɔ xɔnna sunuma nɛn,

kore xɔnna fan yi yifɔrɔ,

bayo n na a fala nɛn,

n mi fa nimisama.

N bata a feen nagidi,

n mi fa xɛtɛma a fɔxɔ ra."

29 Taan muxune birin e gima nɛn

soo ragine nun xalimakuli wonle fa xuiin bun,

muxuna ndee yi sa e luxun ɲansanne yi,

ndee yi so gɛmɛ gbeene longonna ra,

taan nabeɲinxin yi lu a yɛtɛ ma.

Muxu yo mi fa luma a yi.

30 Ɛ tan naxan ma taa kalaxi,

ɛ fa nanse ligama?

Ɛ fa dugi mamiloxine ragodɛ ɛ ma ba,

ɛ yi xɛma maxidi seene so,

ɛ ɛ yɛtagine yitɔn?

Siyaan naxanye yi ɛ rakunfama

alo ɛ yangane,

ɛ mi fa rafan ne ma!

E waxi ɛ faxa feni.

31 Bayo, n gbelegbele xuina nde mɛma

alo ɲaxanla nɛma dii barini,

e nun kutun xuina

alo ɲaxanla nɛma a dii singen barɛ.

Siyon kaane nan xui ne ra,

e kutunma,

e yiine yibandunma,

e yi a fala, e naxa,

"Gbalona nxu xa!

Muxu faxane nxu niin bamatɔɔn ni i ra."