1 Alatala ito nan falaxi Amonine xili ma, a naxa,

"Dii mi fa Isirayila kaane yii sɔnɔn ba?

Kɛɛ tongo yo mi fa e xa sɔnɔn ba?

Nanfera nayi,

Amonine dɔxi Isirayila taane yi?

Nanfera Mɔlɔkɔ suxurena yamaan bata Gadi yamanan tongo?"

2 Nanara, Alatalaa falan ni ito ra,

a naxa, "Lɔxɔne fama,

n yɛngɛ so sɔnxɔ xuiin natema lɔxɔn naxanye yi

Amonine taan Rabaha xili ma,

a yi findi taa xɔnna ra,

a rabilinna taane yi gan.

Nayi, Isirayila kaane yi e kedi muxune kedi,"

Alatala naxa na kiini.

3 "Xɛsibɔn kaane, ɛ gbelegbele,

bayo Ayi taan bata kala!

Rabaha kaane ɛ sunu xuini te,

ɛ kasa bɛnbɛli dugine ragodo ɛ ma,

ɛ wuga.

Ɛ gi taan makantan yinna yiren birin yi

bayo yaxune bata fa ɛ suxuren Mɔlɔkɔ suxudeni,

e siga a ra konyiyani,

e nun a ki muxune nun a kuntigine.

4 Nanfera ɛ kanbama ɛ lanbanne nun ɛ xɛɛne yi,

e to rafexi bogise xaba daxine ra?

Ɛ tan Raba kaane,

yama murutɛxina,

ɛ tan naxanye ɛ yigi saxi ɛ nafunle yi

ɛ naxa, ‘Nde nɔɛ nxu yɛngɛ?’ "

5 Marigina, Alatala Sɛnbɛn Birin Kanna falan ni ito ra, a naxa,

"N fe magaxuxin nafama nɛn ɛ xili ma,

sa keli ɛ rabilinne birin yi,

ɛ birin yi kedi,

muxu yo mi muxu gixine xun lanɲɛ.

6 Koni na na dangu,

n mɔn Amonine muxu suxine raxɛtɛma nɛn,"

Alatalaa falan nan na ra.

7 Alatala Sɛnbɛn Birin Kanna ito nan falaxi Edɔn yamanan xili ma, a naxa,

"Fekolonne bata dasa Teman yamanani ba?

Maxadi tiine mi fa na xaxilimane yɛ ba?

E fe kolonna bata kala ba?

8 Ɛ xɛtɛ ɛ giyɛ,

ɛ luxun faran yinle ra,

ɛ tan Dedan kaane!

Bayo n gbalon nafama nɛn Esayu yixɛtɛne xili ma,

n na e kɛwanle saran e ra waxatin naxan yi."

9 "Xa muxune fa ɛ nakɔni ɛ manpa bogine muɲadeni,

e mi bogi dando xan gbansan luma na ba?

Xa muɲadene fa i konni kɔɛɛn na,

e mi e waxɔnna xan tongoma ba?

10 Nba, n tan Ala Esayu yixɛtɛne yii seene birin naxɔrima nɛn,

n yi e luxundene birin namini kɛnɛnni.

E mi fa nɔɛ e luxunɲɛ.

E bɔnsɔnna nun e ngaxakedenne

nun e dɔxɔ bodene birin halagima nɛn,

muxu yo mi lu Esayu bɔnsɔnni.

11 Ɛ ɛ kiridine lu na,

n na n yengi dɔxɛ e xɔn.

Ɛ kaɲa gilɛne xa e yigi sa n yi."

12 Bayo Alatala ito nan falaxi, a naxa, "N tan mi naxanye yalagixi kitini, xa ne karahan xɔlɔ igelengenna mindeni, ɛ tan yatɛ sɔntaren na nayi ba? Ɛn-ɛn de! Ɛ mi suxuma sɔntarene ra de! Ɛ a minma nɛn yati!" 13 Bayo Alatalaa falan ni ito ra, a naxa, "N bata n kɔlɔ n yɛtɛni, fa fala Bosara taan naxɔrima nɛn, a rayarabi, a danga, a halagi. A taane birin kalama nɛn habadan!"

14 N bata xɛrayana nde a fe mɛ fata Alatala ra,

xɛraan bata rasiga siyane ma,

a xa sa a fala, a naxa,

"Ɛ keli, ɛ sa Edɔn kaane yɛngɛ!

Ɛ keli ɛ sa yɛngɛn so!"

15 Ala naxa, "Edɔn kaane,

n na ɛ sɛnbɛn xurunma nɛn siyane birin xa.

Birin ɛ raɲaxuma nɛn.

16 Ɛ to muxune magaxuma,

wason naxan ɛ bɔɲɛni,

na bata ɛ ratantan

ɛ tan naxanye dɔxi faran yinle ra,

e nun geyane fari.

Hali ɛ ɛ tɛɛn sa kore alo singbinna,

n na ɛ ragodoma nɛn,"

Alatalaa falan nan na ra.

17 "Edɔn yamanan kalama nɛn, naxan yo na dangu a dɛxɔn ma, ne yigitɛgɛma nɛn, e kabɛ, e kolin a fitina feene ma." 18 Alatala yi a fala, a naxa, "Muxu yo mi fa luyɛ be. Adamadi yo mi dɔxɛ a yi alo Sodoma nun Gomora nun e rabilinna taane halagi kii naxan yi.

19 N luma nɛn alo yatan

naxan xaɲɛxin minima fɔtɔnni Yurudɛn baan dɛ,

a siga sube fendeni yire faɲini.

N Edɔn kaane kedima nɛn e yamanani sanɲa ma kedenni,

n naxan sugandixi,

n sa na dɔxɔ na yi.

Bayo, nde maliga n tan na?

Nde n yamarɛ?

Xuruse rabaan mundun n yɛɛ ratiyɛ?"

20 Nanara, ɛ tuli mati Alatalaa fe ragidixin na lan Edɔn kaane ma,

e nun a feen naxanye yitɔnxi Teman kaane xili ma!

E luma nɛn

alo xuruse diin naxanye suxuma e xali,

e dɔxɔden yi yigeli yati!

21 E kala xuiin bɔxɔni maxama nɛn,

e gbelegbele xuiin yi siga han Gbala Baana.

22 A luma nɛn alo singbinna nan tema a sa sin e ma, a yi a gabutɛne yifulun Bosara taan xun ma. Na lɔxɔni Edɔn sofane bɔɲɛn luma nɛn alo ɲaxanla naxan dii barini.

23 Falana lan Damasi taan ma:

"Xamata kaane nun Arapada kaane bata yagi,

bayo e bata xibaru ɲaxina fe mɛ.

E bata kɔntɔfili,

e yimaxa alo baan na walanɲɛ ayi.

24 Damasi kaane sɛnbɛn bata ɲan,

e bata e xun xanbi so,

e waxi e gi feni.

Gaxun nun kuisanna nun xɔlɛn bata e suxu,

alo ɲaxanla naxan dii barini.

25 Taa xili kanni ito fa rabeɲinxi di,

n ma sɛwa taana?"

26 "A banxulanne birama nɛn taan xun xɔn yati! A sofane birin yi faxa na lɔxɔni," Alatala Sɛnbɛn Birin Kanna falan nan na ra. 27 "N tɛɛn soma nɛn Damasi taan makantan yinne ra, a yi Ben-Hadada manga banxin gan."

28 Alatala ito nan falaxi Kedari bɔnsɔnna nun Xasori mangayane xili ma Babilɔn mangan Nebukadanesari naxanye yɛngɛ a yi e nɔ, a naxa,

"Ɛ keli, ɛ Kedari bɔnsɔnna yɛngɛ!

Ɛ sogeteden yamanan muxune halagi!

29 Ɛ e xuruse kurune nun e kidi bubune tongo e yii,

e nun e yigiyadene nun e goronne nun e ɲɔgɔmɛne birin.

Muxune sɔnxɔn natema nɛn e ma,

e naxa, ‘Gaxun yiren birin yi!’ "

30 Alatalaa falan ni ito ra, a naxa,

"Ɛ tan Xasori kaane,

ɛ gi mafurɛn!

Ɛ sa ɛ luxun faran yinle ra!

Bayo Babilɔn mangan Nebukadanesari bata yɛngɛni tɔn ɛ xili ma.

31 Ɛ keli, ɛ fu siyani ito ma

naxan dɔxi bɔɲɛ xunbenli.

A taane so dɛɛne mi nɔɛ balanɲɛ,

e mi sɔxɔnxi,

e dɔxi e danna nɛn,"

Alatalaa falan nan na ra.

32 "Yaxune e ɲɔgɔmɛne tongoma nɛn yɛngɛni,

e nun e xuruse kuru wuyaxine.

Naxanye e xunne dɛxɔn bima,

n ne raxuyama ayi nɛn foyeni,

n gbalon nafa e ma

keli yiren birin yi,"

Alatalaa falan nan na ra.

33 Xasori taan findima nɛn kankone kuruden na,

yire rabeɲinxina han habadan.

Muxu yo mi dɔxɛ a yi,

adamadi yo mi luyɛ na.

34 Alatala yi falan ti Nabi Yeremi xa lan Elan yamanan ma Yuda mangan Sedeki a mangayaan fɔlɔ waxatini, a naxa,

35 Alatala Sɛnbɛn Birin Kanna ito nan falaxi, a naxa,

"N Elan yamanana xanli girama nɛn,

naxan findixi e sɛnbɛn binla ra.

36 N foye naanin nafama nɛn Elan xili ma

keli kore xɔnna tongon naaninne ma,

n yi e raxuya ayi foyeni.

Yamana yo mi luyɛ

Elan muxu gixine mi sigan dɛnaxan yi.

37 N Elan kaane rayarabima nɛn e yaxune yɛɛ ra

naxanye waxi e faxa feni.

N gbalon nafama nɛn e ma n ma xɔlɔ gbeeni,

n yi yɛngɛn bira e fɔxɔ ra,

han n yi e raɲan."

Alatalaa falan nan na ra.

38 "N Elan mangan nun a kuntigine halagima nɛn,

n yi n ma manga gbɛdɛn dɔxɔ na,"

Alatalaa falan nan na ra.

39 "Koni waxati famatɔni,

n fama nɛn Elan muxu suxine ra,"

Alatalaa falan nan na ra.