1 Xili faɲiyaan fisa nafulu gbeen xa,

hinanna fisa gbetin nun xɛmaan xa.

2 Nafulu kanna nun yiigelitɔɔn birin lan,

bayo Alatala nan e birin daxi.

3 Xaxilimaan na gbalon to fɛ,

a luxunden fenma nɛn,

koni fe kolontarene dangun nɛn tun,

ɲaxankatan yi e sɔtɔ.

4 Nafunla nun binyen nun siimayaan sɔtɔma

yɛtɛ magodon nun Alatala yɛɛragaxun nan xɔn.

5 Ɲanle nun luti ratixine nan muxu ɲaxine kiraan xɔn,

koni naxan waxi a niin nakantan feni,

na a masigama a ra nɛn.

6 Dii ɲɔrɛn ti kiraan xɔn naxan lanɲɛ a ma,

nayi hali a findi fonna ra, a mi kelɛ a xɔn.

7 Nafulu kanna yiigelitɔɔn yamarima,

doli kanna konyin nan doli tongon na.

8 Naxan na seen si tinxintareyani,

na tɔrɔn sɔtɔma nɛn se xaba waxatini,

amasɔtɔ a nɔ sɔtɔ dunganna kalama nɛn.

9 Muxu ɲɛnige faɲin barakan sɔtɔma nɛn,

amasɔtɔ a baloni taxunma e nun sɛbɛtaren tagi.

10 Magele tiin kedi,

sɔnxɔ sɔnxɔn fan ɲanma nɛn,

e nun yɛngɛn nun konbina.

11 Bɔɲɛ faɲin naxan ma,

fala faɲina a dɛ,

mangan xɔyin nan na ra.

12 Fe kolonna Alatala nan yii,

koni a yanfantenna falani fuma nɛn.

13 Muxu narixina falama nɛn, a naxa,

"Yatan tandeni, a n faxama nɛn kira yi!"

14 Yalunde ɲaxanle fala xuine findixi yili tilinxin nan na,

Alatala xɔlɔxi naxanye ma, ne sinma nɛn na ra.

15 Xaxilitareyaan dii ɲɔrɛn bɔɲɛni,

koni a na xuru bosaan na,

na a masigama a ra nɛn.

16 Naxan na sɛnbɛtaren nawali

alogo a xa nafunla sɔtɔ,

e nun naxan na nafulu kanna ki,

ne e yɛtɛ yiigelima nɛn.

17 I tuli mati, i fekolonne falane ramɛ,

i xaxili lu n ma xaranna xɔn.

18 Amasɔtɔ a lan i yi e ramara i sɔndɔmɛni,

e nama ba i dɛ mumɛ,

19 alogo i xa i yigin sa Alatala yi.

N waxi i tan yɛtɛɛn xaran fe yi to.

20 N mi maxadi fala tonge saxan xan sɛbɛxi i xa ba,

maxadine nun fe kolonna falane,

21 alogo i xa fe kɛndɛne nun ɲɔndi falane kolon,

i yi i xɛ muxun yabi ɲɔndi falane ra?

22 I nama sɛnbɛtaren nawali,

fanga to mi a ra,

i nama yiigelitɔɔn ɲaxankata kitisadeni.

23 Amasɔtɔ Alatala e xun mayɛngɛn soma nɛn,

a yi e yiigelitɔne niin ba.

24 I nama bɔɲɛ gbee kanna findi i xɔyin na,

i nama bira yɛngɛ gidin fɔxɔ ra

25 alogo i nama a sigati kiin tongo,

i yi suxu luti ratixin na.

26 I nama dɛ xuiin tongo muxu gbɛtɛna donla fe ra,

i yɛtɛ dɔxɔ tolimani na ma.

27 Xa se mi i yii i naxan fiyɛ,

e fa i tan nan ma sade bama i bun.

28 I nama bɔxɔn danna taxamaseri gɛmɛne ba e funfuni

i benbane naxanye dɔxi xabu to mi na ra.

29 Muxun naxan fatan a wanla ra

na walima mangane nan fɛma,

a mi luyɛ muxudine yɛ.