1 Manga Lemuyɛli a sandane. A nga a xaran waliyiya falan naxanye ma.

2 N ma diina,

n nanse falama i xa?

N nanse falama i xa,

n diin naxan barixi,

n naxan sɔtɔxi Ala barakani?

3 I nama i sɛnbɛ lu ɲaxanle yii.

I fangan nama ɲan ne fɔxɔ ra

naxanye mangane ralɔma ayi.

4 I tan Lemuyɛli,

a mi daxa mangane xa,

a mi daxa mangane yi manpaan min,

kuntigine mi lan e bira dɔlɔn fɔxɔ ra

5 alogo e minxin nama ɲinan tɔnne xɔn,

e fa muxu ɲaxankataxine yanfa kitini.

6 Ɛ dɔlɔn lu na muxune xa

naxanye halagima,

naxanye niin nafexi xɔlɛn na,

ɛ manpaan lu ne xa.

7 Ne na e min,

e ɲinanma e yiigelitɔyaan xɔn nɛn,

e tɔrɔyaan mi fa rabirama e ma.

8 Dɛtarene xun mafala,

i muxu nɔxine birin mali e kitine yi.

9 I falan ti, i kitin sa tinxinni,

i yiigelitɔne nun tɔrɔ muxune xun mayɛngɛ kitini.

10 Nde nɔɛ ɲaxalan faɲin sɔtɛ?

A tɔnɔn dangu bɔxɔ bun nafunle ra.

11 A xɛmɛn xaxili tixi a tan nan na,

a munanfanna mi ɲanɲɛ mumɛ!

12 A fe faɲin nan ligama a xa,

a ɲaxin mi a ra,

a siin sogen birin yi.

13 A yɛxɛɛ xabe garin nun gɛsɛ futu garin nan fenma

a e rafala dugin na sɛwani.

14 A faan balon na nɛn sa keli wulani

alo yulaya kunkine.

15 A kurunma nɛn subaxa,

a kudin so a denbayaan xa,

a fa a walikɛ ɲaxanle ti e wanle ra.

16 A na miri xɛɛna nde ma, a yi a sɔtɔ,

a nakɔɔn sa a tɔnɔ sɔtɔxine gbetin na.

17 A wanle dɛ suxuma tunnafanna nin.

A wali a yiin na sɛnbɛni.

18 A a kolon a feene sɔnɔyama nɛn,

a lɛnpun mi tuma kɔɛɛn na.

19 A gɛsɛn wurundun a yiin na,

a gɛsɛn sɔxɔn dugin na.

20 A yiine dɔxɔn yiigelitɔne bun.

A yiin ti tɔrɔ muxune xa.

21 A mi gaxun xunbenla fe ra a denbayaan xa,

amasɔtɔ e birin marabɛri baxi dugi faɲin nan na.

22 A bitinganne rafalama,

a marabɛri baxi taa dugine nun dugi mamiloxine nan na.

23 A xɛmɛn yatɛxi fonne malanni,

a dɔxɔma taan fonne yɛ.

24 A taa dugi domane rafalama,

a e mati,

a tagi xidine rafala yulane xa.

25 Sɛnbɛn nun binyena a ma

alo domana.

A na a miri waxati famatɔne ma,

a gele.

26 A falan tima fe kolonna nin,

a muxune xaran hinan falane ma.

27 A yengi dɔxi a denbayana feene xɔn,

a mi narin kolon.

28 A diine kelima nɛn,

e a fala a ma a dubadena.

A xɛmɛn fan yi keli,

a yi a tantun,

29 a naxa, "Kɛwali faɲin ɲaxalan wuyaxi yi,

koni i tan, i dangu e birin na."

30 Marayabun yanfan tima,

tofanna danguma,

koni ɲaxanla naxan gaxuma Alatala yɛɛ ra

na nan lan a tantun.

31 Ɛ saranna so a yii,

a wanle xa findi a tantun xunna ra taani.