1 SAMUEL 11

Saul ni gel ngak e pi Ammonite

1 Gonap’an e reb e pul nga tomuren me girengiy Nahash nu Ammon e mael ko binaw nu Jabesh, ni bay ko nug nu Gilead. Me yib e salthaw rok i longobiy e re binaw nem, me ga’ar e pumo’on nu Jabesh ngak Nahash, "Ngam fal’eg ba tha’ u thildad, me m’ag u wan’mad ni nge mang gur e mu gagiyeg nagmad."

2 Me fulweg Nahash ni ga’ar, "Gu ra fal’eg e tha’ u thildad ni fa’an yira rin’ e ren’en ni ba’aray: Gu ra luf e ba’ ni mat’aw i lan mit gubin e girdi’, nggu darifannag urngin e girdi’ nu Israel."

3 Pi’in pi’lal u Jabesh e lungurad ngak, "Mpi’ medlip i rran ngomad nggu l’uged e girdi’ ngranod u ga’ngin yu Israel. Ma fa’anra dabi yib be’ i ayuwegmad, ma gamad pi’mad nga pa’am."

4 Me taw fapi mol’og nga Gibeah ko gin be par Saul riy, ma nap’an nra weliyed e thin ni kanog ngorad ni ngrogned, me yor e girdi’ nib gel. 5 Ma ka fini sul Saul u milay’ ni yad e garbaw rok, me fith ni ga’ar, "Mang e ke buch? Mangfan ni gubin e girdi’ ni be yor?" Miyad weliy ngak e thin nike yib i yog e pi mol’og nu Jabesh. 6 Fa’ani rung’ag Saul e tin karogned me yib fare gelngin Got i ying ngak, me yib e damumuw ngak nib gel. 7 Me fek l’agruw i garbaw ni pumo’on nge th’eth’abrow ni nochiyang, me pi’ ngak e pi mol’og ngar feked i yan u gubin yang u lan e nam nu Israel ni be lungurad, "En ndabi un ngak Saul nge Samuel ngranod ko mael e irera’ e n’en ni yira rin’ ko garbaw rok!"

Me rus piyu Israel ko n’en nrichey me rin’ SOMOL, miyad yib ni yad gubin nike ta’reban’rad. 8 Me kunuyrad Saul nga Bezek, ma 300,000 e yib u Israel ma 30,000 e yib u Judah. 9 Me lungurad ko pi mol’og nrabad u Jabesh, "Mogned ngak e tiromed e girdi’ ni gabul ndawori misiw’ e yira ayuwegrad." Ba gel e felfelan’ ni tay piyu Jabesh nnap’an ni taw e re bugithin ney ngorad, 10 me lungurad ngak Nahash, "Gabul e bay gu pi’ed gamad nga pa’am, nge mang gur e mu guy e tin ni ngam rin’ ngomad."

11 Ma reb e rran riy ni kadbul me kuweg Saul e salthaw rok nge dalip raba’, ma nap’an ni be puf e woch miyad og ngak e pi Ammonite ko gin ba’aram ni karbad ra pired ngay. Ma fa’ani misiw’ ma kar li’ed yad. Ma tin ni magey e ra wearweargad, ra be’ ma gin ni mil ngay.

12 Me ga’ar e girdi’ nu Israel ngak Samuel, "I mini’ fapi girdi’ ni lungurad e dabi mang Saul e pilung rodad? Mpi’rad nga pa’mad nggu li’ed yad!"

13 Machane me ga’ar Saul, "Dariy be’ ni ngan thang e pogofan rok e daba’, ya daba’ e irera’ e re rran ni ayuweg SOMOL yu Israel." 14 Me ga’ar Samuel ngorad, "Ngdarod nga Gilgal nga dogned bayay ni Saul e kemang pilung rodad nge nang e girdi’." 15 Ma aram miyad yan nga Gilgal ni yad gubin, mu rom ko fa gin’em nib thothup e rogned riy ni Saul e kemang pilung. Miyad pi’ e pi maligach nma gapaseg thilin Got nge girdi’, me madnomnag Saul nge urngin e girdi’ nu Israel e re bugithin nem.