1 SAMUEL 31

Yam’ ni tay Saul nge fapi pumo’on ni fak

1 Me m’ag piyu Filistia e mael ngak piyu Israel ko burey ni Gilboa. Pire’ piyu Israel nra m’ad u rom, ma tin ni magey e mil. 2 Me lol’oeg e pi Filistine Saul nge fapi pumo’on ni fak ngar koled yad, miyad li’ pifak ni pumo’on ni aram Jonathan nge Abinadab nge Malkishua. 3 I achangiy e mael u charen Saul, me kaen u gan e gat’ing ko to’ogor nge maad’ad nib gel. 4 Me ga’ar ngak fare pagel ni be fek talin e cham rok, "Mu girengiy e saydon rom u tafen ngam li’eg nggum’, ya nge dabyag ni moning nigeg e pi Filistine ney ndar nanged Got miyad thang e fan rog." Machane fare pagel e ka yigi gel e marus ngak nde yag ni rin’. Ma aram me girengiy Saul e birok e saydon u tafen nge pag ir nga taban. 5 Me guy fare pagel nike yim’ Saul, ma aram miki pag ir nga taban e birok e saydon nge un ngak Saul ko yam’. 6 Aram rogon ni yim’ Saul, nge fa dalip i pumo’on ni fak, nge fare pagel; urngin e salthaw rok Saul ni yim’ e rofen nem. 7 Nap’an ni guy piyu Israel ni yad bay u ba’nem e loway u Jezreel ko ngek ko lul’ ni Jordan nike mil e salthaw nu Israel ma kan li’ Saul nge fapi pumo’on ni pifak, miyad n’ag e pi binaw rorad ngar milgad. Ma aram me yib e pi Filistine ngarbad ra pired ngalan fapi binaw.

8 Reb e rran nga tomuren fare mael me yan piyu Filistia ni ngar lufed madan e mael u downgin e ldow, miyad pir’eg Saul nge fa dalip i pumo’on ni fak ni yad bay ko burey ni Gilboa ni karm’ad. 9 Miyad th’ab e k’ong rok Saul ngar lufed lolugen, miyad fek talin e cham rok, miyad l’oeg e pi mal’og ni karfeked e pin’em ngranod u ga’ngin yang yu Filistia ngar weliyed e re thin ni bfel’ ney ngak e pi liyos rorad nge ngak e girdi’ rorad. 10 Ma aram mranod ra ted talin e cham rok ngalan e tempel rok fare got ni Astarte, miyad richibiy downgin Saul ko rungrung ko yoror ko binaw nu Beth Shan. 11 Fa’ani rung’ag e girdi’ nu Jabesh ni bay u lan yu Gilead e n’en ke rin’ e pi Filistine ngak Saul, 12 me yan e tin th’abi falu’ e pumo’on nib polo’ e nep’ nga Beth Shan. Ngarbad ra lufed downgin Saul nge fapi pumo’on ni fak ko rungrung, ngar fulweged nga Jabesh ngar urfiyed u rom. 13 Miyad fek e yil rorad ngar k’eyged nga tan ba ke gek’iy ni tamarisk u Jebesh, miyad pag e abich ni medlip e rran.