1 SAMUEL 16

David nni gapgepnag ni nge mang pilung

1 Me ga’ar SOMOL ngak Samuel, "Uw n’umngin nap’an ni ngam par ni be kireban’um ngak Saul? Kug chuweg ko pilung ndab kimang pilung nu Israel. Mfek boch e gapgep ko olive, ya nggu l’ugem ngam man nga Bethlehem ngak be’ nib mo’on ni Jesse fithingan, ya kug turguy reb e pagel ni fak ni ir e nge mang pilung."

2 Me fith Samuel ni ga’ar, "Uw rogon ni nggu rin’ e binir? Ya ra rung’ag Saul me thang e fan rog."

Me fulweg SOMOL ni ga’ar, "Mfek ba pifak e garbaw nge un ngom ma gog ni ka mub ni ngam pi’ ba maligach ngak SOMOL. 3 Ma ga pi’ e thin nge yan ngak Jesse ni nge yib ko re maligach nem ni ngam pi’, ma bay gog ngom e n’en ni ngam rin’. Ma ga liyef e gapgep nga lolugen e en ni bay gog ngom ni ir e nge mang pilung."

4 Me rin’ Samuel e tin keyog SOMOL ngak ni nge rin’ me yan nga Bethlehem, me yib e pi’in yad ma yog e thin ko fare binaw ni yad be t’on ko marus, miyad fith ngak ni lungurad, "Re wub ney ni ka mu tay, gapas e ka mubnag?"

5 Me fulweg ni ga’ar, "Er rogon. Ku gub ni nggu pi’ ba maligach ngak SOMOL. Mmachalbog niged gimed mi gimed un ngog ngdarod." Ma ku er rogon Jesse nge fapi pumo’on ni pifak ni yog ngorad ni ngar machalbog niged yad, miyad yib ko maligach ni nge pi’.

6 Fa’anra tawgad, me guy Samuel Eliab ni ba pagel ni fak Jesse me ga’ar u wan’, "Re mo’on ney nib sak’iy u roy u p’eowchen SOMOL e mmudugil ni irera’ e cha’ nike duwgiliy." 7 Machane me ga’ar SOMOL ngak, "Dabi mit owchem nga n’umngin nge feni pichoay. Gathi ir e cha’ ni kug mel’eg, gag e dagur ma turguy ban’en nrogon nma turguy e girdi’ ban’en. Girdi’ e yad ma guy be’ u wuru’ i downgin, mi Gag e gu ma changar ko gum’ircha’."

8 Me pining Jesse Abinadab nib mo’on ni fak nge yib ngak Samuel. Machane me ga’ar Samuel, "Dangay, ku gathi er e cha’ nike turguy SOMOL." 9 Ma aram me fek Jesse Shammah i yib. Me ga’ar Samuel, "Dangay, ku gathi er e cha’ nike turguy SOMOL." 10 Irera’ kanawo’en ni fek Jesse fa medlip i pumo’on ni fak i yib ngak Samuel. Me ga’ar Samuel ngak, "Danga’, SOMOL e dariy bagayad e pi cha’ney nike turguy." 11 Me fith Samuel ngak ni ga’ar, "Kabay boch e pumo’on ni fakam ngabang fa dakuriy?"

Me fulweg Jesse ngak ni ga’ar, "Kabay e bin th’abi bitir, machane bay u bang ni be gafaliy e saf."

Me ga’ar Samuel, "Mpi’ e thin nge yan ngak nge yib ngaray. Ya fin ra taw ma gadad pi’ e maligach." 12 Me pi’ Jesse e thin nge yan ngak. Ir ba pagel nib picho’ay ma ba fel’fel’ rogon, ma bfel’ e tir u marwan. Me ga’ar SOMOL ngak Samuel, "Ireyer fa’anem, mu gapgepnag!" 13 Me fek Samuel fare gapgep ni olive nge gapgepnag David u p’eowchen fapi pumo’on ni walagen. Me yib fare gelngin SOMOL i ying ngak David ngi i gagiyegnag e rofen nem i yan nga m’on. Me sul Samuel nga Ramah.

David ni i musiknag Saul ko harp

14 Fare gelngin SOMOL e chuw rok Saul, me pi’ SOMOL ba kan nib kireb nge yib i ying ngak Saul ngi i gafgownag. 15 Me ga’ar e tapigpig rok ngak, "Kug nanged nike pi’ SOMOL ba kan nib kireb ke ying ngom be gafgow nigem. 16 Ere mog ngomad nggu warod gu gayed be’ ni manang rogon i chubeg e harp. Ma nap’an nra yib i ying e re kan nem nib kireb ngom ma rayag ni nge chubeg e re mo’on nem e harp rok ma ga sul nga rogom bayay."

17 Me ga’ar Saul ngorad, "Mu gayed be’ nib mo’on ni ba salap i chubeg e harp ngam feked i yib ngog."

18 Me ga’ar reb e tapigpig rok ngak, "I Jesse, ni be’ ko binaw nu Bethlehem e ba’ ba pagel ni fak nib salap ko musik. Ma ku ir be’ nder ma rus, ma bfel’ ko salthaw, ma be’ nib salap ko welthin, ma ba picho’ay. Mi SOMOL e bay rok."

19 Ere l’oeg Saul e pi mol’og rok ngak Jesse ni be ga’ar, "Mpi’ fare pagel ni fakam i David nge yib ngog, ni fa’anem nma ayuweg e saf." 20 Me pi’ Jesse David nge yib ngak Saul nike fek ba pifak e kaming, nge ba dongki ni kan suguy daken keru’ ko flowa, nge ba tutuw ni keru’ e gamanman nib sug ko wayin. 21 Me yib David ngak Saul ni nge un ko pigpig ngak. Me yan i par nrib adag Saul daken me tay ni ir e ngi i fek talin e cham rok. 22 Ma aram me pi’ Saul e thin nge yan ngak Jesse ni ga’ar, "Gu ba’adag daken David. Mpag nge par u roy ngi i pigpig rog." 23 Re ngiyal’ i n’em i yan nga m’on e nap’an ni yugu ra yib fare kan nib kireb i ying ngak Saul ni Got e gagiyegnag nge yib, me fek David e harp rok nge chubeg. Me chuw fare kan nib kireb nge yan, me fel’ e tafinay rok Saul ngki sul nga rogon bayay.