1 Irera’ e meybil rok Hannah:

"I SOMOL e ke suguy ngorongoreg ko felfelan’;

kari gu felfelan’ ko tin ke rin’.

Ku gu minmin ngak e pi to’ogor rog;

ku gu felfelan’ ya ke ayuwegneg Got.✝

2 "Dariy be’ nib thothup ni bod rogon SOMOL;

dariy be’ ni bod Ir,

dariy be’ nma yoror rodad ni bod e Got rodad.

3 Mu taleged e thin ni gimed be yog ni ba ga’ lammed ni gimed e soromed;

ngam th’abed gulungumed ndab ku mu weliyed e thin ko ufanthin.

Ya SOMOL e ba Got ni manang urngin ban’en,

me ir e ma thabthabelnag urngin e tin be rin’ e girdi’.

4 Gat’ing rok e pi salthaw ni yargel e go’ ke m’ing,

machane pi me’waer e yad be gel i yan.

5 Pi’in ni yugu yad ma par ni yad ba fos e kranod ni yad be man maruwel ni fan ko ggan,

machane pi’in ur m’ad ko bilig e kar pired ndakurir m’ad ko bilig.

Fare pin nda i diyen e nga medlip e bitir nike diyennag,

ma fare pin ni bo’or e bitir ni diyennag e ke par ni ta’reb ma dakuriy rok.

6 I SOMOL e ma thang e pogofan me ir e ma fulweg e pogofan;

ma pi’ e girdi’ ngranod ko fare fayleng ni bay e pi’in karm’ad riy,

me Ir e ku ma sulwegrad bayay.

7 Ir e ma gagiyegnag boch e girdi’ ngar gafgowgad ni dariy ban’en rorad mma fal’eg rogon boch e girdi’ nge yo’or ban’en rorad;

ma gagiyegnag boch e girdi’ ngar sobut’gad, me tolang bochi yad.

8 Ir e ma pug e pi’in gafgow u fithik’ e fiyath ngalang

ma chibiy e pi’in nib t’uf e ayuw rorad ngalang nge chuwegrad u fithik’ e gafgow rorad.

Ma gagiyeg nagrad ngar manged pi tafager rok pifak e pilung,

me tayrad ko yungi n’en nra un tay farad riy.

Pi def ko fayleng e ba mil suwon ngak SOMOL;

nu daken e ayliy e fayleng ngay.

9 "Girdi’ rok ni yad ba yul’yul’ ngak e ma ayuweg e pogofan rorad,

ma pi’in kireb e yad ma m’ay ngabang u fithik’ e lumor;

ya dabiyag ni nge gel be’ ko mael u gelngin.

10 Pi to’ogor rok SOMOL e bay ni thirifrad u but’;

bayi par u tharmiy nge non ngorad ni gowa dirra’.

I SOMOL e bayi pufthinnag e fayleng ni ga’ngin;

bayi pi’ gelngin fare pilung ni ir e turguy,

bayi gagiyegnag fare pilung ni mel’eg ngi i gel."

11 Ma aram me sul Elkanah nga tafen nga Ramah; me par fachi pagel ni fak u Shiloh, ngi i pigpig ngak SOMOL u tan pa’ Eli ni prist.

12 Fa gal pumo’on ni fak Eli e ri yow ba kireb; ya dariy fan SOMOL u wun’row 13 ara tin maruwel rok e pi prist ngak e girdi’. Ra ke pi’ be’ e maligach ni ka be ligil e ufin riy, me yib e tapigpig rok e prist nike fek ba fok ni dalip pa’ngin, 14 me yip’ fare fok rok ngalan fare th’ib, ma tin nra un ngay e ke mil suwon ngak e prist. Irera’ e n’en ni ur rin’ed ngak urngin piyu Israel ni urbad nga Shiloh ni ngar pi’ed e maligach. 15 Ra dawor ni fek e mam ko ufin ni nga ni urfiy, ma ku ma yib e tapigpig rok e prist nge ga’ar ngak e en ni be pi’ e maligach, "Mpi’ boch e ufin ngog nggu wan nggu urfiy nge longuy e prist; ya dabi fek e ufin ni kam lith, ya kemus ni ufin ni k’ak’ling e ra fek."

16 Ma fa’anra ga’ar fa’anem, "Som’on e nga ni urfiy e mam ni bay riy nge mu’ ma ga fek e tin ga ba’adag riy," mra yodorom me ga’ar fare tapigpig rok e prist, "Dangay! Mpi’ ngog e chiney! Ya ra dangay ma nggu fek u fithik’ e yargel!"

17 Re kireb nem ni be ngongliy fa gali pumo’on ni fak Eli e yan i par ni ban’en nrib kireb u p’eowchen SOMOL, ya yow be darifannag e pi maligach ni yibe pi’ ngak SOMOL.

18 Me par fare pagel i Samuel ngi i pigpig ngak SOMOL, ma chuw ngalan ba mad nib wech nrogon e prist. 19 Mra taw nga reb e duw, me ngongliy e chitiningin bochi reb e mad nib n’uw ngranow e pumo’on rok ngaram ni ngar pi’ew e maligach ni yow ma pi’ ko yu duw, me pi’ ngak. 20 Ma aram me yibilay Eli Elkanah nge le’engin me ga’ar ngak Elkanah, "Mang e yigi pi’ SOMOL boch e bitir ngom ni re pin ney e nge diyen nagrad ngranod nga luwan e bin ni kam pi’ew ngak."

Me mu’ ma aram miyow sul nga tabnaw.

21 Me ayuweg SOMOL Hannah ngki diyennag dalip e pagel nge l’agruw e buliyel. Me ilal Samuel ni be pigpig ngak SOMOL.

22 Re ngiyal’ i n’em e kari pilibthir Eli, ma ka be rung’ag urngin ban’en ni be ngongliy fa gali pumo’on ni fak ngak piyu Israel, ni mus ngak e ppin ni yad ma maruwel u langan e garog ko fare Tent u p’eowchen SOMOL ni yow be moleg. 23 Ma aram me ga’ar ngorow, "Mangfan ni gimew be rin’ e pi n’ir? Gubin e girdi’ ni yad be yog ngog murung’agen e pi kireb ni gimew be ngongliy. 24 Gal fakag, ngam talegew e tinir e pa’! Ya pi n’ir ni be weliy e girdi’ rok SOMOL murung’agen e bogi n’en nrib kireb! 25 Fa’anra ngongliy be’ e kireb ngak be’, mi Got e rayag rok ni nge fal’eg thilrow, machane mini’ e rayag rok ni nge fal’eg thilin Got nge be’ nike ngongliy e kireb nib togopluw ngak SOMOL?"

Machane dar motoyilgow ko tin be yog e chitamangirow, ya ke turguy SOMOL ni nge thang e pogofan rorow.

26 Mi i ilal fare pagel i Samuel ni be’ ni bfel’ u wan’ SOMOL ngu wan’ e girdi’.

27 Me yib ba profet ngak Eli nike fek e thin rok SOMOL i yib ngak ni be ga’ar, "Fa ngiyal’nem ni i par Aron ni ga’ rom nge girdi’ ko tabinaw rok u Egypt ni yad e sib rok Farao, e gu gagiyegnag Aron nge guy gelngig. 28 Gu mel’eg girdi’en e tabinaw rok u fithik’ urngin e pi ganong nu Israel ni ngar manged prist rog, ni nge mang yad e ur pigpiggad u altar, miyad e ngu’ur urfiyed e incense, mayad e ngu’ur ron’ed nga dakenrad fare mad ni efod u p’eowcheg ni ngar fithed lanin’ug. Mu gu pi’ mat’awrad nike mil suwon reb e f’oth ngorad ko pi maligach ni yibe urfiy u daken e altar. 29 Ere mangfan ni gimed be chogownag e pi maligach nge pin’en ni yibe pi’ ngog ni gag e gog ni nga ni pi’? Eli, mangfan ni kam m’oneg fa gal pumo’on ni fakam rog kam pagrow kar sugsuggow ko yu ngin nth’abi fel’ ko pi maligach ni be pi’ e girdi’ rog ngog? 30 I gag, fare SOMOL ni Got rok piyu Israel, e gu micheg kakrom ni girdi’ nu tabinaw rom nge kerom e girdi’ e bay ur pigpiggad ngog ni prist ni gubin ngiyal’. Ere chiney e gu be yog ni dabki par riy ni aram rogon! Bay gu tay fan e pi’in yad be tay fag, ma bay gu darifannag e pi’in yad bfananikeg. 31 Mu sap, bay ba ngiyal’ ni bayi taw ngay mu gu thang e pogofan rok urngin e pagel ni bay u lan e tabinaw rom nge kerom e girdi’, ni fan e nge dakuriy be’ nib mo’on u lan e tabinaw rom nra par nge pilibthir. 32 Bay mu gafgow, mi i awan’um nga urngin e fel’ rogon ni bay gu pi’ ngak piyu Israel, ma dakuriy be’ u lan e tabinaw rom ni bayi par nge pilibthir. 33 Machane bay gu tay reb i owchem ni dab gu thang e fan rok, ma aram e bay i par ngi i pigpig ngog nrogon e prist. Ma bayi malmit nge chuwan’ ko urngin; ma urngin e pi’in owchen ni kayad bay e bay un li’rad ko saydon. 34 Ma rofen nra yim’ fa gali pumo’on ni fakam ni Hofni nge Finehas, e aram e bay mu nang ni tin kugog ngom e bay i yib i m’ug nib riyul’. 35 Bay gu mel’eg ba prist nra yul’yul’ ngog nge rin’ gubin e tin gu ba’adag ni nge rin’. Bay gu pi’ ngak e pi’in owchen, ni gubin ngiyal’ ni bay ur pigpiggad u p’eowchen e re pilung ni gag e kug duwgiliy. 36 Ma pi’in owchem nra fos e bay u ranod ko fare prist ngu’ur man salpiygad nge ggan, ma yad be wenig ngak ni nge pagrad ngar ayuweged e prist, ni nge yag ban’en ngorad ni ngar ked."