1 Me mil David u Nayoth ni bay u lan yu Ramah, nge yan ngak Jonathan nge yan i ga’ar ngak, "Ba mang e kug rin’? Ba mang e ren’en nib kireb ni kug ngongliy? Mang e kug bucheg rok e chitamam ni er fan nike leamnag ni nge li’eg nggum’?"

2 Me fulweg Jonathan ni ga’ar, "Danga’, ri dab mum’! Chitamag e gubin ban’en nma rin’ mma weliy ngog, ndemturug ko ban’en ni ba ga’ fan fa dangay, ma dabiyag ni nge mithag rog e bug nir e thin. Ere gathi er rogon!"

3 Me fulweg David ni ga’ar, "Ri manang e chitamam gelngin ni gub t’uf rom, ere ke turguy ndabi weliy ngom e tin ke leamnag ni nge rin’, ya ra kireban’um. Nggu micheg ngom u fithingan SOMOL ni be par nib fos, ni gag e gu be yan u thathren e riya’!"

4 Me ga’ar Jonathan, "Ri gu ra rin’ e tin ga be finey."

5 Me ga’ar David, "Gabul e Madnom ko M’ug e Pul ni susun e nggu un ngak Saul ko abich. Machane fa’anra fel’ u wun’um mu gu wan gu mith nga daken e ted nge yan i mada’ ko langilath nnep’. 6 Fa’anra guy e chitamam nda gu moy ko tebel, ma gog ngak ni kug wenig ngom ni nggu wan nga tafnag nga Bethlehem nib gur, ya ke taw nga nap’an e maligach nma pi’ girdi’en e tabinaw rog ni ta’ab yay u reb e duw. 7 Ma fa’anra ga’ar e kefel’, ma aram e dabki buch ban’en rog; ma fa’anra damumuw, ma kamnang nike leamnag ban’en nib kireb ni nge rin’ ngog. 8 Wenig ngom, mu ayuwegneg ko re bugithin ney, ma ga tay nga tagil’ fare bugithin ni mog ngog ni mmicheg u p’eowchen SOMOL. Ma fa’anra gag e kug bucheg ban’en, me gur e ngam li’eg nggum’! Ya dariy fan ni ngam pi’eg nga pa’ e chitamam nge mang ir e li’eg."

9 Me ga’ar Jonathan, "Dab mu leamnag e tinir! Ya fa’an mang e kug nang nike duwgiliy e chitamag u wan’ ni nge li’em, ma rib mudugil ni gu ra weliy ngom."

10 Me fith David ni ga’ar, "Fa’anra fulweg e chitamam lungum ni kari damumuw, me mini’ e ra guy rogon nggu nang?"

11 Me ga’ar Jonathan, "Darow nga daken e ted." Miyow yan, 12 me ga’ar Jonathan ngak David, "I SOMOL ni Got rok piyu Israel e nge mang mich rodow! Ngiyal’ney gabul nge langlath e bay ug fith e chitamag. Ma fa’anra dariy ban’en u wan’ ngom, ma bay gu pi’ e thin nge yib ngom. 13 Ma fa’anra be leamnag ni nge li’em, ma SOMOL e nge thang e fan rog ni fa’anra dab guy rogon ngam nang, nge yag ni mu guy rogom nga bang ni dabi buch ban’en rom riy. Mang e yigi par SOMOL rom ni bod ni i un ngak e chitamag. 14 Ra dab gum’, ma ga tay u tagil’ e tin ni kam micheg ngog u fithingan SOMOL ma ga par ni gab yul’yul’ ngog; mra chey ni gum’, 15 ma ngam gol ngak girdi’en e tabinaw rog ndariy n’umngin nap’an ni bod rogom ngog e chiney. Ma nap’an nra thirif SOMOL urngin e pi to’ogor rom u but’, 16 ma ngi i par e re thin rodow ney ni kad michegew ngodow ndabi math. Ma fa’anra math, mi SOMOL e bayi gechig nigem ni bochan."

17 Ku irera’ bayay ni wenig Jonathan ngak David ni nge micheg ngak ni ngi i par David nib t’uf Jonathan rok, ni bochan e Jonathan e ba t’uf David rok ni bod feni t’uf ir rok. 18 Me ga’ar Jonathan ngak David, "Gabul e yira madnomnag e Madnom ko M’ug e Pul, ma fa’anra da mmoy u rom ma yira nang. 19 Ma ra langilath ma aram e kari nnang nda mmoy; ere mman ko fa gin’en ni mman mmith ngay fa yanem, ma ga mith nga fon fare ulung i malang ni bay u rom. 20 Ma bay gu pag dalip i gan e gat’ing ngay, ni susun e ban’en ni kan tay ni ngan fol mun ngay. 21 Ma bay gog ngak e tapigpig rog ni nge yan i fek. Ma fa’anra lungug ngak, ‘Mu sap, fapi gan e gat’ing e be’er nga baraba’ i charem; mfek,’ ma aram e nga mub mm’ug, ya dabi buch ban’en rom. Kug micheg u fithingan SOMOL ndariy ban’en nra buch rom. 22 Machane fa’anra lungug ngak, ‘Fapi gan e gat’ing e be’er nga m’on rom, ma aram e ngam chuw, ya SOMOL e ke l’ugem ni ngam man. 23 Ma thin ni kad michegew ngodow, e SOMOL e bayi guy rogon ngad tew u gil’ ndariy n’umngin nap’an."

24 Ma aram me yan i mith David nga daken fagi flang. Fa’ani taw ko Madnom ko M’ug e Pul me yib Saul ni Pilung ko re abich nem, 25 me yib i par ko gin ntagil’ u to’oben e rungrung. Me yib i par Abner nga but’ ni ir e mmigid ngak, me par Jonathan u puluwon nga baraba’ e tebel. Ma tagil’ David e dariy be’ riy, 26 machane de yog Saul ban’en e rofen nem, ya leamnag u wan’ ni bay ban’en nike buch rok ke yan i par nde machalbog nrogon ko yalen. 27 Me reb e rran riy nga tomuren fare Madnom ko M’ug e Pul, ma ku de moy David u tagil’, me fith Saul ngak Jonathan ni ga’ar, "Mangfan nde yib David ko abich fowap nge daba’?"

28 Me fulweg Jonathan ni ga’ar, "Ke wenig ngog ni nggu pag nge yan nga Bethlehem, 29 ni ga’ar, ‘Wenig ngom ngam pageg nggu wan, ya girdi’ nu tabinaw rog e ngar pi’ed e maligach u lan binaw, ma ke pi’ walageg ni pumo’on e thin ke yib ngog ni nggu wan ngaram. Ere fa’anra gur e fager rog, me ere mu guy rogon nggu wan gguy pi girdi’eg.’ Aram fan nde moy u tagil’ ko tebel rom."

30 Me ri damumuw Saul ngak Jonathan me ga’ar ngak, "Gab fak e moro’ro’! Kug nang e chiney ni kam fol ngak David, kam darifan nigem nge fa’anem ni chitinam! 31 N’umngin nap’an ni be par David nib fos e dariy e n’en nra rin’ ma ga mang pilung ko re nam ney. Mman mu pining ngam bow ngaray, ya thangri yim’!"

32 Me ga’ar Jonathan, "Mangfan nthingari yim’? Be mang e ke bucheg?"

33 Me pag Saul e sarey rok ngak Jonathan nike finey ni nge li’ ngem’, me nang Jonathan nike turguy e chitamngin u wan’ ni nge thang e pogofan rok David. 34 Me sak’iy Jonathan u tebel ngalang ni kari damumuw ma daki kay ban’en e re rran nem, ma ireram e bin l’agruw e rran ko Madnom ko M’ug e Pul. Me ri kireban’ Jonathan ni bochan David, ya keyog Saul e thin nib kireb ni fan ngak David. 35 Ma reb e rran riy ni kadbul me yan Jonathan nga daken yungi flang ni nge guy David, ni bod rogon ni karognew. Me fek be’ nib pagel nge un ngak, 36 me ga’ar ngak, "Nggu pag gan e gat’ing ma ga mil ngam man mfek." Me mil fare pagel me pag Jonathan ba gan e gat’ing nge yan nge m’on rok. 37 Fa’ani taw fare pagel ko fa gin’en nike yan i aw fare gan e gat’ing ngay, me tolul Jonathan ni ga’ar, "Ka bay fare gan e gat’ing nga m’on rom! 38 Dab mu sak’iy u wur ngam par! Mu gur nigem!" Me fek fare pagel fare gan e gat’ing nge sul ngak e masta rok, 39 nder nang fan e pin’em; ma kemus ni Jonathan nge David e yow manang fan. 40 Me pi’ Jonathan talin e cham rok ngak fare pagel me yog ngak ni nge fek nge sul ngalan binaw.

41 Ma nap’an ni yan fare pagel, me yib David u fon fare ulung i manang, me yib i paraw u p’eowchen Jonathan nga but’ nge siro’ ngak ni dalip yay. Miyow faray owcherow ni yow be yor; ni kab gel e kireban’ rok David ngak Jonathan. 42 Me ga’ar Jonathan ngak David, "Got e nge un ngom. I SOMOL e bayi gagiyegnag ni gur nge gag nge pi’in owchadow e bay ra ted u gil’ fare bugithin ni kad michegew ngodow u p’eowchen SOMOL." Ma aram me yan David, me sul Jonathan ngalan binaw.