1 Immoy be’ nib mo’on u lan yu Cesarea ni Kornelius fithingan, ni ir ba pilungen baraba’ i salthaw nu Roma ni kan tunguy fithingan ni "Baraba’ i Salthaw nu Italy." 2 Ir be’ nma liyor ngak Got u wan’; me ir nge urngin e girdi’ nu tabinaw rok e yad ma meybil ngak Got. Ma ayuweg piyu Israel ni pi’in gafgow, ma yugu ma meybil ngak Got. 3 Gonap’an e dalip e kolok ni mithig yal’ mi ni piliyeg e changar rok, nge guy ba engel rok Got nike yib nga naun nge yib i ga’ar ngak, "Kornelius!"

4 Me lik’ath ngak fare engel nike tamdag me ga’ar, "Be mang?"

Me fulweg fare engel ni ga’ar, "Got e bfel’ u wan’ e meybil rom nge maruwel ni kam tay ni ga be ayuweg e pi’in gafgow, ma be leam nigem. 5 Ere mol’oeg boch e pumo’on nga Joppa ngranod ra pininged be’ nib mo’on ni Simon fithingan, ni ku yima pining Peter ngak. 6 Ya ir ba milekag ni be par u tafen be’ nma fal’eg rogon keru’ e gamanman ni Simon fithingan, ni bay e tabinaw rok u to’oben e day." 7 Ma aram me yan fare engel ni yib i non ngak, me pining Kornelius l’agruw i tapigpig rok nge ba salthaw, ni be’ nma liyor ngak Got u wan’ ni ir bagayad fa pi’in yad ma pigpig ngak Kornelius. 8 Me weliy ngorad e n’en nike guy nge tin ke rung’ag me l’oegrad ngranod nga Joppa.

9 Me reb e rran riy, ni aram e kranod ni kar chugurgad i yan nga Joppa, me yan Peter nga daken e chigiy ko fare naun nike misiw’ ni fan e nge meybil. 10 Me yib e bilig ngak, me finey ni manga yigi abich; ma nap’an ni yibe ngongliy rogon e ggan mi ni piliyeg e changar rok. 11 I guy e tharmiy nike mab me guy ban’en ni be yib nga but’ ni bod ya’an bangi mad ni ba ga’ yang ni kan nguchuruy nga but’ u aningeg i tabthungen. 12 Ma urngin mit e gamanman u daken e binaw ni bay u lan, nge gamanman nma sirgig u but’ i yan, nge arche’ ni malboch. 13 Me ga’ar ba lam ngak, "Peter, mu sak’iy; ngam li’ ngam longuy!"

14 Machane me ga’ar Peter, "Somol, dabiyag ni nggu rin’! Ya dawor gu longuy ban’en nib tagan ni ngan longuy ara de be’ech nrogon ni bay ko Motochiyel."

15 Miki non fare lam ngak bayay ni ga’ar, "Dariy ban’en ni ngam leamnag nde be’ech ni fa’anra keyog Got nike be’ech." 16 Ren’em e yodorom ni dalip yay; ma aram mi ni fulweg fare n’em nga tharmiy.

17 Me par Peter ngi i leamnag fan e ren’em ni kan piliyeg e changar rok ke guy. Ma aram e fapi pumo’on ni l’oegrad Kornelius e kar nanged e gin ni bay e naun rok Simon riy, ni aram e kar sak’iygad nga langan e garog riy. 18 Miyad pong ngar fithed ni lungurad, "Bay be’ nib milekag u roy ni Simon Peter fithingan?"

19 Ka be guy Peter rogon ni nge nang fan e ren’em ni kan piliyeg e changar rok ke guy me ga’ar fare Kan Nthothup ngak, "Mu tiyilim! Ke taw dalip i pumo’on ngaray ni yad be guyem." 20 Ere mfal’eg rogom ngam man nga but’, ma dab mmaruwar ko ngam un ngorad fa danga’, ya gag e kug l’oegrad." 21 Ma aram me yan Peter nga but’ me ga’ar ngak fapi pumo’on, "I gag fare mo’on ni gimed be gay. Mang ni kambad?"

22 Me lungurad, "I kapten Kornelius e ke l’oegmad. I ir be’ ni bfel’ nma meybil ngak Got mma tay urngin e girdi’ nu Israel fan. Keyog ba engel rok Got ngak ni nge non ngom ngam man nga tabinaw rok, nge yag ni rung’ag e tin bay ni ngamog ngak." 23 Me yog Peter ngorad ni ngarbad nga naun, miyad par u rom e neap’ nem.

Me reb e rran riy me fal’eg rogon nge un ngorad; ma boch pi walagrad ni girdi’en Jesus u rom u Joppa e ra uned ngorad ngranod. 24 Me yan i reb e rran riy me taw nga Cesarea, ni aram e gin bay Kornelius riy ni be sonnag, ni yad pi girdi’en nge pi’in yad ba pach ni yog ngorad ni ngarbad. 25 Ma nap’an nike yan Peter ni nge chuw nga naun, me yib Kornelius ngak, me yib i pag ir nga but’ u p’eowchen u to’oben e rifrif u ay me siro’ ngak. 26 Machane me sak’iynag Peter Kornelius. Me ga’ar ngak, "Mu sak’iy, ya gag e kemus ni gub girdi’." 27 Be non Peter ngak Kornelius ma be yan i yan ngalan e naun, me pir’eg e girdi’ ni pire’ ni kar mu’ulunggad ngaram. 28 Me ga’ar ngorad, "Gimed manang faram ni be’ u Israel e de mat’aw ko ba’ rok e taliw ni nge yan i guy ara i cheag ngak be’ ni gathi be’ u Israel. Machane Got e ke dag ngog nthingari dab ku ug leamnag be’ ni de be’ech ara ba alit ni rogon ni bay ko Motochiyel. 29 Aram fan ni taw e thin rom ngog ni nggub, mu gub nda gu siyeg. Ere nggu fithmed ko mangfan ni mol’oeged e thin nge yib ngog ni nggub."

30 Me ga’ar Kornelius, "Gonap’an e re ngiyal’ i n’ey fopringan ni gu be meybil u lan e naun rog ko dalip e kolok ni mithig yal’. Mi yigi yib i sak’iy be’ nib mo’on nga p’eowcheg nike yin’ e mad ni be galgal ram’en 31 me ga’ar, Kornelius! Ke rung’ag Got e meybil rom, ma manang e maruwel ni kam tay ni ga be ayuweg e pi’in gafgow. 32 Mol’oeg be’ nge yan nga Joppa nge pining be’ nib mo’on ni Simon fithingan, ma ku yima pining Peter ngak. Ir ba milekag ni be par u tafen Simon ni be’ nma fal’eg rogon keru’ e gamanman, ni bay e tabinaw rok u to’oben e day. 33 Ere ka chingiyal’ nem mu gol’oeg e thin nge yib ngom, ere kam magaer ni ka mub. Chiney e gamad gubin ni gamad ba’aray u p’eowchen Got, ni gamad be son ni nggu rung’aged e tin ke yog Somol ngom ni ngam weliy."

34 Me tabab Peter ko welthin ni ga’ar, "Ka fin gu nang e chiney nriyul’ ni gubin e girdi’ ma ta’reb rogorad u wan’ Got. 35 En ni bay madgun Got u wan’ ma be rin’ e tin nib mat’aw e ra i par ni bfel’ u wan’ Got ndemturug ko be’ u kun nam. 36 Gimed manang e thin ni pi’ nge yib ngak e girdi’ nu Israel, ni be weliy fare Thin Ni Bfel’ ni murung’agen e gapas nrayag ngodad u daken Jesus Kristus, ni ir e Somol rok urngin e girdi’. 37 Gimed manang e n’en ni ka fin nrin’ u Judea ni ga’ngin, ni tabab u Galile nga tomuren e tawfe ni i machibnag John. 38 Gimed manang murung’agen Jesus nu Nazareth, ngarogon ni pi’ Got fare Kan Nthothup nge gelngin ngak. Me yan nga gubin yang, ni be rin’ e tin ni bfel’ ma be golnag urngin e pi’in yad bay u tan gelngin e mo’onyan’, ni bochan e bay Got rok. 39 Gamad e mich u urngin e tin ni rin’ u lan e nam rok piyu Israel ngu lan yu Jerusalem. Ra li’ed ngem’ ni rrichibiyed ko kuruth. 40 Machane me faseg Got ko yam’ ko chirofen ni gaman e dalip ngay, nge muruwliy nge yib i m’ug. 41 Gathi urngin e girdi’ ni guy, ya kemus ni gamad e pi’in ke turguymad Got ni nggu manged mich riy. Gu uned ngak Jesus ko abich nge garbod u tomuren nike faseg Got Jesus ko yam’. 42 Me ning chiylen ngomad ni nggu machib niged ngak e girdi’ fare Thin Ni Bfel’, ma nggu weliyed ni ir fa’anem nike turguy Got ni nge pufthinnag e pi’in kabfos nge pi’in ni karm’ad. 43 Urngin e pi profet nra weliyed murung’agen, ni i lungurad e urngin e pi’in nra mich Jesus u wun’rad e ra bagayad mra n’ag Got fan e denen rok u daken gelngin fithingan Jesus."

44 Ka be non Peter, me yib fare Kan Nthothup nga daken urngin fa pi’inem ni yad be motoyil ko fare thin ni be weliy. 45 Ma piyu Israel nib mich Jesus u wun’rad ni karbad u Joppa ni yad Peter e ra gin gad ngay ni ku errogon e pi’in gathi yad piyu Israel nike pu’og Got e tow’ath rok nga dakenrad, ni aram fare Kan Nthothup. 46 Ya rrung’aged fa pi’inem ni yad be welthin nthin nu bang ma yad be pining e magaer ngak Got nga feni sorok. Me non Peter ni ga’ar, 47 "Pi girdi’ ney e ke pi’ Got fare Kan Nthothup ngorad ni ku bod rogon ni pi’ ngodad. Ere mini’ e ra siyegrad ni nge dab ntawfe nagrad ko ran?" 48 Me yog ni ngan tawfe nagrad nga fithingan Jesus Kristus. Ma aram miyad wenig ngak Peter ni nge par rorad ni in e rran.