ACTS 28

U daken e donguch nu Malta

1 Nap’an ni gu thapgad nga arow, ma gamad nang nre donguch nem e kanog yu Malta ngay. 2 Me ayuwegmad e girdi’ riy. Ma aram me aw e n’uw me ri garbeb, miyad ko’reg ba nifiy miyad yog ngomad ni nggu chugurgad nga charen. 3 Me kunuy Paul ba thum i l’ud, ma nap’an ni be tay nga mit e nifiy me yib ba porchoyog nga tamilang, ni bochan gowelngin e nifiy, me yib i yabochboch nga pa’. 4 Me guy e girdi’ ko fare donguch e re porchoyog nem nike yabochboch nga pa’ Paul miyad yog rorad ni lungurad, "Re mo’on nem e dabisiy ni ir be’ nike thang e pogofan, yugu aray rogon nike thap nga arow nde yim’ u maday, machane taban e kireb nma pi’ e kan e dabkiyag ni nge thay riy, ya ke muturug ni nge yim’." 5 Machane me dengdang Paul fare porchoyog nga mit e nifiy nde buch ban’en rok Paul. 6 Miyad par ni yad be sonnag ni nge thow ara thig nga but’ ni kem’. Machane ba n’uw nap’an nra pired ma dar guyed ban’en ni rin’, miyad piliyeg lanin’rad nge lungurad, "Cha’nem e ba kan!"

7 Ma bay yungi milay’ ni fen Publius, ni ir e pilung ko re donguch nem, nde mal’af nga orel ko gin’em. Me fekmad nga tafen nggu pired rok ni dalip e rran, ma ri be ayuwegmad nrib fel’ rogon. 8 Ma bay e chitamngin Publius u bet nib m’ar, nib gel e gowel u daken ma ba thum’iyal. Me yan Paul ngak nga senggil, me meybil me tay pa’ nga daken nge golnag. 9 Fa’ani yodorom, ma urngin e tin nib m’ar e girdi’ u daken fare donguch nrabad ngak me gol nagrad. 10 Miyad pi’ e tow’ath ngomad ni bo’or, ma fa’ani pig ni nggu milekaggad u barkow miyad tay nga barkow e tin ni nge yag ngomad ko re milekag nem.

U Malta nga Roma

11 Ma dalip e pul ma gamad af nga reb e barkow ni yib u Alexandria ngaram, ni Kan ni Athlog fithingan, ni par ko re donguch nem u nap’an e garbeb. 12 Ma gamad taw ko binaw nu Syrakuse ma gamad par riy ndalip e rran. 13 Ma gamad un ko re barkow nem u rom nggu bad ko binaw nu Rhegium. Me reb e rran riy me thow e nifeng u lan e yimuch, ma l’agruw e rran ma gamad taw ko binaw nu Puteoli. 14 Ma gamad pir’eg boch e girdi’ u rom nib mich Jesus u wun’rad, miyad wenig ngomad ni nggu pired rorad ni reb e wik. Ma aram ma gamad yib nga Roma. 15 Ma pi walagdad ni girdi’en Kristus ni yad bay u Roma e rrung’aged murung’agmad miyad yib ngar tawgad nga Market ni Appius fithingan, ni tagil’ e mu’ulung ko binaw nge fare binaw ni Dalip Tafen e Milekag fithingan ni nggu mada’gad. Ma fa’ani guyrad Paul, me pining e magaer ngak Got ni bochrad, ma aram me athamgil laniyan’.

U lan yu Roma

16 Fa’an ni gu tawgad nga Roma, minog ngak Paul nrayag ni nge par u bang ni yow reb e salthaw ni matanagen.

17 Dalip e rran nga tomuren me ulunguy Paul e pi’in yad be yog e thin rok piyu Israel u rom. Fa’anra mu’ulunggad me ga’ar ngorad, "Pi walageg! Yugu aram rogon nda gu rin’ ban’en nib togopluw ngak e girdi’ rodad ara pi yalen ni af rok e pi chitamangidad ngodad, min kalbusnigeg u Jerusalem nge mu’ min pi’eg nga pa’ piyu Roma. 18 Miyad fitheg nge mu’ miyad leamnag ni ngar paged gag, ya ra pir’eged ndariy ban’en ni kug ngongliy nike yib tapgin riy ni ngan thang e fan rog. 19 Ma fa’ani togopluw piyu Israel ko re bugithin nem, me yan i aw ni kemus ni Emperor nu Roma e ir e kabay ni gu ra wenignigeg ngak, mu gu rin’, ni yugu aram rogon ndariy ban’en ni gog nib togopluw ngak e girdi’ ko nam rog. 20 Aram fan ni kug wenignag ni ngug guymed nge yag ni gu non ngomed; ya ka nin’ e re chen ney ngog ni bochan fa’anem ni ir e be pagan’ yu Israel ngak."

21 Me lungurad ngak, "Dawori yib bangi babyor u Judea ngomad ni murung’agem, ara ke yib reb i walagdad u rom nike fek bbugithin nib be’ech i yib, ara ke yib i yog ban’en nib kireb ni murung’agem. 22 Machane gamad ba’adag ni nggu rung’aged rom e tin ni ir e ga be leamnag, ya gamad manang ni urngin yang ma be non e girdi’ riy nib togopluw ko re raba’ i girdi’ nem ni gab mu’un ngay."

23 Ma aram miyad yog Paul reb e yar, me yib bo’or i yad ko chirofen nem ko gin ni be par Paul riy. Kadbul nge yan i mada’ ko neap’ ni machibnag ngorad murung’agen e gagiyeg rok Got ma be pithig fan u wun’rad. Me guy rogon ni nge mich murung’agen Jesus u wun’rad ni be yog ngorad e tin nike yog e babyor nib thothup ni murung’agen ko gin ni ba’aram ni bay e Motochiyel rok Moses riy nge tin ni yoloy e pi profet. 24 Ma bay boch i yad ni mich e thin nike yog u wun’rad, ma boch i yad e de mich u wun’rad e thin nike yog. 25 Ma aram miyad yan ndakir ta’reb lanin’rad u fithik’rad u tomuren nike yog Paul e re bugithin ni ba’aray ni ga’ar, "Rib fel’ rogon ni welthin fare Kan Nthothup u l’ugun fare profet ni Isaiah ni welthin ngak e pi chitamangimed! 26 Ya fa’ani ga’ar,

Mman ngamog ngak e girdi’ ko re nam ney ni nge lungum:

Bay mmotoyil mmotoyilgad, ma dab mu nanged fan;

ma bay mu changar mu changargad, ma dab mu guyed.

27 Ya laniyan’ e pi girdi’ ney e ke man;

ma kar ninged lan telrad,

ma kar uchumiyed lan owcherad.

Ya fa’an mang e n’en ma ke guy lan owcherad ban’en,

ma ke rung’ag lan telrad ban’en,

ma ke tamilangan’rad,

ma ke yag nra pigichealgad ngog

ngug gol nagrad.’ Ara — rogon ni yog Got."

28 Me ul ul Paul ngay nge ga’ar, "Ere ngam nanged ni thin rok Got ni murung’agen rogon min thap ngak Got e kan pi’ ke yan ngak e pi’in gathi yad piyu Israel. Ma bay ra motoyilgad ngay!"

29 Fa’ani mu’ i yog e re bugithin ney rok Paul, me yan fa picha’ nu Israel, ni yad be tugthin u fithik’rad nib el merin.

30 L’agruw e duw ni par Paul u rom u ba naun ni ir e be pi’ puluwon, ma urngin e girdi’ nra yib ni nge guy ma be felfelan’ ngorad ni karbad. 31 Mi i machibnag murung’agen e gagiyeg rok Got ma be machibnag murung’agen fa’anem i Somol Jesus Kristus, ni be welthin nder tamdag, tuntun ara magagawon.