ACTS 23

1 Me changar Paul ngak girdi’en fare ulung me ga’ar, "Pi walageg! Rogon e ngongol rog u p’eowchen Got ke mada’ ko bin daba’ e rran e dariy ban’en riy ni be magawonnag lanin’ug." 2 Me non Ananias, ni ir fare Prist ni Th’abi Ga’ ngak e pi’in yad ba sak’iy u to’oben Paul ni ngar bat niged l’ugun Paul. 3 Me ga’ar Paul ngak, "I Got e rib muduwgil ni bayi bat nigem — i gur e gi rungrung nir ni kan achey ko wech! Kam par nga but’ u wur ni ngam pufthin nigeg nrogon ko Motochiyel, machane kam th’ab e Motochiyel ya kamog ngorad ni ngar bat niged gag!"

4 Ma fapi pumo’on ni yad ba chugur ngak Paul e lungurad ngak, "Ga be yog e thin nib tagan ngak fare Prist ni Th’abi Ga’ ni prist rok Got!"

5 Me fulweg Paul ni ga’ar, "Pi walageg, da gu nang ni ir e Prist ni Th’abi Ga’; ya gu manang nike ga’ar e babyor nib thothup, ‘Thingar dabmog ban’en nib kireb ngak be’ ni ir e be tay murung’agen e girdi’ ko nam rom.’ "

6 Ma fa’ani guy Paul ni boch i yad e re ulung nem e Sadduse ma boch i yad e Farise, me welthin u lan fare ulung ni ga’ar, "Pi walageg! I gag reb e Farise, ni gag be’ ni fak e Farise gag. Ma ngan pufthin nigeg u roy ni bochan e be l’agan’ug ngay ni yira faseg e yam’."

7 Ma nap’an ni yog e re bugithin ney, me tabab e pi Farise nge pi Sadduse ko malu’ag thin, me ruw raba’ fare ulung. ( 8 Ni fan e be ga’ar e pi Sadduse e dab ni faseg e girdi’ ko yam’, ma dariy e pi engel ara pi kan — machane pi Farise e mmich u wun’rad e dalip i n’em ni gubin.) 9 Ma aram me yan lamrad ngalang, ma boch e pi tamchib ko Motochiyel ni girdi’en e ba’ rok e pi Farise e ra sak’iygad ngalang ngar nonod nib gel nib togopluw ngak e pi Sadduse ni be lungurad, "Dawor gu pir’eged ban’en nike bucheg e re mo’on ney! Sana riyul’ nike non ba kan fa ba engel ngak!"

10 Me ri elmerin e malu’ag thin ni yad be tay me rusnag fare pilungen e salthaw Paul ni bay ra popfed. Me yog ngak e salthaw rok ni ngranod ngalan fare ulung ngar feked Paul ngar chuweged rorad, miyad fek nga tafen e salthaw.

11 Me reb e neap’ riy me sak’iy Somol nga to’oben Paul me ga’ar, "Dab mu rus! Kam weliy murung’ageg u roy u Jerusalem, ma thingar kum rin’ u Roma ni aray rogon."

I Paul nni makathnag ni ngan thang e fan rok

12 Me reb e rran riy ni kakadbul me mu’ulung piyu Israel ngar turguyed e n’en ni ngar rin’ed. Miyad ognag u mit Got ndab ra ked ban’en ara ra garbodgad nge mada’ ko ngiyal’ ni kar thanged e fan rok Paul. 13 Ma pi’in nra puruy’ niged e re bugithin ney e yad ba pag e aningeg i ragag. 14 Ma aram miyad yan ngak e pi tolang ko prist nge pi’in pi’ilal ko galesiya me lungurad, "Kug og niged u mit Got ndab gu wed ban’en nge mada’ ko ngiyal’ ni gamad ra thang e fan rok Paul riy. 15 Ere gimed nge girdi’en e mu’ulung e nga mol’iged e thin nge yan ngak fare pilungen e salthaw nu Roma nge fek Paul i yib ngomed nga pe’ning, ni susun e gimed be guy rogon ni ngar mu nanged e tin riyul’ ni murung’agen. Machane bay gu fal’eged rogomad ni nggu thanged e pogofan rok ndawori taw ngaray."

16 Machane me rung’ag ba pagel ni fak be’ ni bpin ni walagen Paul e re makath nem; ma aram me yan nga tafen e salthaw nge weliy ngak Paul. 17 Me pining Paul reb fapi tolang ko salthaw me ga’ar ngak, "Mu fek e re pagel ney i yan ngak e en ni pilungen e salthaw; ya bay ban’en ni nge weliy ngak." 18 Me fek fa’anem nib tolang ko salthaw fare pagel i yan ngak fare pilungen e salthaw me ga’ar ngak, "Fare kalbus i Paul e ke piningeg ke wenig ngog ni nggu fek e re pagel ney i yib ngom, ya bay ban’en ni nge weliy ngom."

19 Me kol fare pilungen e salthaw pa’ nge fek i yan nga orel me fith ngak ni ga’ar, "Be mang e ngamog ngog?"

20 Me ga’ar, "Piyu Israel e kar turguyed ni ngar weniggad ngom gabul ngam fek Paul i yan ngalan e mu’ulung rorad, nsusun e yad be guy rogon ni ngar nanged e tin nib riyul’ ni murung’agen Paul. 21 Machane dab mu telim ngorad, ya ba pag e aningeg i ragag e pumo’on ni bay ra mithgad ngu’ur son niged, ya kar og niged u mit Got ndab ra ked ban’en ara ra garbodgad nge mada’ ko ngiyal’ ni kar thanged e fan rok riy. Chiney e kar fal’eged rogorad ni ngar rin’ed, ma yad be sonnag e n’en ni bay mu turguy."

22 Me ga’ar fare pilungen e salthaw, "Dabmog ngak be’ ni kamog e re bugithin nir ngog." Ma aram me yog ngak fare pagel ni nge sul.

Paul nni pi’ nge yan ngak Felix ni Governor

23 Me pining fare pilungen e salthaw l’agruw ni’ ni yow ba tolang ko salthaw rok me ga’ar ngorow, "Mu fal’egew rogon l’agruw mir’ay e salthaw ni ngranod nga Cesarea, nge medlip i ragag e salthaw ni girdi’en e os nge l’agruw mir’ay girdi’en e mun sarey, mi gimed fal’eg rogomed nge mereb e kolok e neap’ ney mi gimed yan. 24 Mi gimed pi’ in e os ngak Paul nge af nga daken, mi gimed guy rogon nge thap ngak Felix ni Governor ni dabi buch ban’en rok." 25 Ma aram me yoloy fare pilungen e salthaw bangi babyor ni ba’aray rogon e thin riy: 26 "Pi’ Klaudius Lysias ni nge yan ngak Felix ni Governor. 27 Piyu Israel e ra koled e re mo’on ney ngranod ni ngar li’ed ngem’. Ma kug pir’eg ni ir be’ u Roma, ma aram mu gu un ngak e salthaw rog nggu warod gu feked u pa’rad. 28 Gub adag ni nggu nang e n’en ni karogned nike rin’ nib kireb, ma aram mu gu fek i yan nga p’ening ngalan e mu’ulung rorad. 29 Mu gu pir’eg ndawori ngongliy ban’en ni gomanga ke yib tapgin riy ni ngan li’ ngem’ ara ntay nga kalbus; ya n’en nib togopluw ngak e bay murung’agen ko motochiyel rorad. 30 Ma nap’an nnib nog ngog nike ngongliy piyu Israel e makath nib togopluw ngak, mu gu turguy ni nggu pi’ ngeb ngom. Ma kugog ngak e pi’in yad be togopluw ngak ni ngarbad nga p’eowchem ngrogned e tin ke kirebnag."

31 Me rin’ fapi salthaw e tin ni kanog ngorad. Miyad fek Paul i yan e re neap’ i n’em ngar mada’gad nga Antipatris. 32 Me reb e rran riy me sul e tin ba’aram e salthaw ni yad be yan u but’ ko fa gin bay tafen e salthaw riy, miyad pag e salthaw nma yan u os ni ngar uned ngak Paul ngranod. 33 Miyad fek Paul i yan nga Cesarea, miyad pi’ fa gi babyor ngak fare governor miyad pi’ Paul nga pa’. 34 Me be’eg fare governor fa gi babyor me fith ngak Paul e re gi nug ni be’ riy. Ma fa’ani pir’eg ni yib u Cilicia, 35 me ga’ar, "Bay gu rung’ag e tin ngamog ko ngiyal’ ni bayi taw e pi’in ngar togopluwgad ngom." Ma aram me yog e thin ni ngan matnagiy Paul u tafen Herod ni Pilung.