GENESIS 35

Got ni fal’eg waathan Jakob u Bethel

1 Me ga’ar Got ngak Jakob, "Man nga Bethel ni kachine’, ngam par u rom. Ngam toy ba altar u rom ni fanag, gag fare Got ni gu m’ug ngom u nap’an ni ga be mil rok Esau ni walagem."

2 Ere yog Jakob ngak chon e tabinaw rok nge urngin e girdi’ ni yad be par rok ni ga’ar, "Ngam n’iged e tin be’er e got rok piyu bang ni bay romed; ngam machalbog niged gimed migmed yin’ e mad nib be’ech. 3 Ngad chuwgad u roy ngdarod nga Bethel, ko gin ni bay gu toy ba altar riy ni fen Got ni ir e ayuwegneg u nap’an ni yib e gafgow ngog me un ngog u gubin yang ni ug wan riy." 4 Ma aram miyad pi’ gubin fapi got rok piyu bang ngak Jakob nge talbuch u telrad, me k’eyag ni urngin nga tan bake gek’iy ni oak ni bay u charen yu Shekem.

5 Ma nap’an ni deg Jakob nge pifak ni ngranod, me yib e marus nib gel ko girdi’ nma par ko yochi binaw nib chuchugur ngaram, mdeyag ni ngar tulfedrad. 6 Me yib Jakob nge fapi girdi’ rok ni gubin nga Luz, ni chiney e aram yu Bethel, ni bay u lan e binaw nu Kanaan. 7 Me toy ba altar u rom me tunguy fithngan e re gin’em ni fen e Got rok yu Bethel, ni bochan e Got e m’ug ngak u rom u nap’an ni i mil rok walagen. 8 Yarif rok Rebekah ni Deborah e yim’ min k’eyag ngatan bake gek’iy ni oak ko yumuch u Bethel. Ma aram min tunguy fithngan ni "Oak ko miyor."

9 Nap’an ni sul Jakob u Mesopotamia, me yib i m’ug Got ngak bayay miki faleg wa’athan. 10 I ga’ar Got ngak, "Fithingam e Jakob, machane chiney i yan ngaram e Israel." Ma aram me tunguy Got fithingan ni Israel. 11 Miki ga’ar Got ngak, "I Gag Got ni Gubin Ma Rayag rog. Bayi pire’ pifakam. Girdi’en e pi nam e gur e bay rabad rom, ma gur e bay mmang chitamngin e pi pilung. 12 Bay gu pi’ ngom fare gi binaw ni gu pi’ ngak Abraham nge Isak, ma ir e bay kug pi’ ngak e pi’in owchem ni bay kurbad nga tomrem." 13 Ma aram me pag Got Jakob. 14 Mu rom, ko gin ni non Got riy ngak, e suweg Jakob reb e malang riy nib puguran me thothupnag ni pu’og e wayin nge gapgep ni olive nga daken. 15 Me tunguy fithingan e gin’em ni Bethel.

Yam ni tay Rachel

16 I Jakob nge chon e tabnaw rok ni rchuwgad u Bethel, nap’an ni kayad bay nga orel u Efrath, me taw nga nap’an ni nge gargel Rachel, ma be momaw’ rogon ni nge gargel. 17 Ma nap’an ni kari gel e amith ngak, me ga’ar fare bpin ni yarif rok ngak, "Rachel, dab kumrus ya ku reb e pagel." 18 Machane ngiyal’nem e be th’ab Rachel e fan rok, me tunguy fithingan fare pagel ni fak ni Benoni,*35:18 BENONI: Fan e re ngachal ney ni Hebrew e "fakag u fithik’ e gafgow rog." machane chitamngin fare tir e tunguy fithingan ni Benjamin.*35:18 BENJAMIN: Fan e re ngachal ney ni Hebrew e "fakag nra ga’ lungun."

19 Nap’an ni yim’ Rachel min k’eyag nib chuchugur ko kanawo’ ni sor nga Efrath, ni aram yu Bethlehem e chiney. 20 Me suweg Jakob reb e malang ngalang ni pugoran u rom, miki par ni pow ko malangne yam’ rok Rachel ke mada’ ko daba’. 21 Ma aram me ul ul Jakob ko melekag rok me yan i toy e tent rok nga barba’ e wilyang ni tafen e damit nu Eder.

Pi’in pagel ni fak Jakob

22 Ngiyal’ ni bay Jakob u rom ko re binaw nem, me moleg Ruben i Bilhah, ni reb fapi pin rok e chitmangin; ma fa’an ni rung’ag Jakob mri mus feni damumuw.

Jakob e ragag nge l’aruw e pagel ni fak. 23 Pi pagel ni fak Leah e Ruben (ni bin nganni’ i fak Jakob), Simeon, Levi, Judah, Issachar, nge Zebulun. 24 Ma pagel ni fak Rachel e Josef nge Benjamin. 25 Ma pagel ni fakrow Bilhah ni yarif rok Rachel e Dan nge Naftali. 26 Ma pagel ni fak Zilpah ni yarif rok Leah e Gad nge Asher. Pi pagel ney ni fak Jakob ni yad urngin e go’ ni gargalegrad u Mesopotamia.

Yam ni tay Isak

27 Me yan Jakob ngak Isak ni chitmangin nga Memre, u charen yu Hebron, ni aram e gin i par Abraham nge Isak riy. 28 I par Isak nib fos nge gaman e 180 e duw yangren. 29 Me yim’ ni kari labthir; ma gal pumo’on ni fak ni Esau nge Jakob e yow e ra k’eyaggew.