Gênesis 38

Judah nge Tamar

1 Bangiyal’ ko ngiyal’nem me chuw Judah rok pi walagen ni pumo’on nge yan i par ngak be’ nib mo’on ni Hirah fithingan, ni be’ ko binaw nu Adullam. 2 U rom e mda’nag Judah bochi pin nu Kanaan riy ni chitamngin e Shua. Me leengiy fachi pin, 3 me diyannag fare pin bochi pagel ni fak, me tunguy Judah fithingan ni Er. 4 Miki diyen fare pin bayay me gargeleg ku reb e pagel min tunguy Onan ngak. 5 Miki fakay reb e pagel bayay min tunguy Shelah ngak. Nap’an nni gargeleg e re pagel nem ma bay Judah u Achzib.

6 I Judah e fek reb e bpin ni Tamar fithingan nge le’engiy Er ni bin nganni’ i fak. 7 Ngongolen Er e de mat’aw, ni de m’ag u wan’ SOMOL, ma aram me thang SOMOL e fan rok. 8 Ere ga’ar Judah ngak Onan ni walagen Er, "Man ngam munfangich rok fare pagel ni walagem nike yim’, ngam pirew fare pin rok, ya nge yag ni for owchen walagem." 9 Machane manang Onan ni re tir nra yib e dabi milsuwon ngak. Ere nap’an nra pirew fare pin me guy rogon ni nge dabi diyen fare pin, ya nge dabi for owchen walagen. 10 Ran’em ni rin’ e de mat’aw u p’eowchen SOMOL, ma aram miki thang SOMOL e fan rok. 11 Aram me ga’ar Judah ngak Tamar ni le’engin fak, "Mu sul nga tafen e chitmam ngam par ni gab muchugbil nge taw ko ngiyal’ nike ilal Shelah ni fakag." Keyog ni ara’ rogon ni bochan e ke rusnag nri kun thang e fan rok Shelah, ni bod rogon fa gal pumo’on ni walagen, ma aram me sul Tamar nga tafen.

12 Me munmun me yim’ le’engin Judah. Nap’an ni mu’ ko mowaw, miyow yan Hirah ni fager rok ni be’ nu Adullem nga Timnah, ni gin ni yima th’ab bunu’en e saf rok riy. 13 Me yog be’ ngak Tamar nike yib facha’ ni chitamngin fare pumo’on rok ni nge yan nga Timnah ni nge th’ab bunu’en e saf rok. 14 Me thilyeg Tamar e mad rok nge chuweg fare mad u daken ni i chuw ngay ni mad ko ppin nike yim’ figirngin, me upnguy bang i mad nga owchen. Me yan i par nga langan e garog nga Enaim, ni kanawo’ nga Timnah. Ya manang rok, ni ngiyal’nem e fa’anem i Shelah ni wen u fak Judah e ke pumo’on, ma dawor ni pithig e thin ngorow ni ngar mabgolgow.

15 Ma nap’an ni sap Judah ni guy fare pin, me leamnag ni be’ ni bpin nma pi’ ir ni chuway’, ni bochan e ke upnguy owchen. 16 Me sor i yan ngak fare pin nga barba’ e kanawo’ me ga’ar ngak, "A mog, uw urngin puluwom ni ga ma fek?" (Denang ni aram fare bpin rok fak.)

Me ga’ar fare bpin, "Mang e gara pi ngog?"

17 Me fulweg ni ga’ar, "Bay gu fek reb i fak e kaming u fithik’ e gamanman rog nggu pi’ ngom."

Me ga’ar fare bpin, "Ra fel’ ni fa’an gara pi’ bochi ban’en ngog ni nggu cha’riy ni mich ko thin rodow nge taw ko ngiyal’ ni kam pi’ e kaming."

18 Me fith fare pumo’on, "Mang e nggu pi’ ngom ni mich ko thin rodow?"

Me fulweg fare bpin ni ga’ar, "Ngam pi e hang rom nib mu’un gufan ngay nge re sog ni be’er u pa’am ni ga be fek." Me pi’ fa pin’em ngak. Aram miyow par, me yib i diyen Tamar. 19 Me sul Tamar nga tabnaw, me luf fagi mad ni i upnguy nga owchen, me yin’ madan e ppin ni keyim figirngirad nga daken bayay.

20 Me l’oeg Judah i Hirah ni fager rok ni nge fek e kaming nge yan i pi’ ko fare bpin me fulweg fa pin’em ni pi’ ni mich ko thin rorow, machane de pir’eg Hirah fare bpin. 21 Me fith boch e pumo’on nu Enaim ni ga’ar, "Bu uw fare bpin nma pi’ ir ni chuway’ ni immoy u roy u charen e kanawo’?"

Miyad ga’ar, "Dariy reb e bpin u roy nma pi’ ir ni chuway."

22 Me sul ngak Judah me ga’ar ngak, "Dag pir’eg fare bpin. Ma pumo’on u rom e yad be yog ni dariy reb e bpin u rom nma pi’ ir ni chuway’."

23 Me ga’ar Judah, "Ngan pag fa pin’em nge par rok. Ya dubdow nra minmin e girdi’ ngodow. Ya kug guy rogon ni ngan pi’ puluwon, ma be’er nida mu pir’eg."

24 Gonap’an dalip e pul nga tomuren me ga’ar be’ ngak Judah, "Fare bpin i Tamar ni i le’engiy fakam e ki i ngongol ni bod e bpin nib gathar, ya chiney e ke diyan u muchugbil."

Me pi’ Judah e thin nge yan ni be ga’ar, "Ngan fek e re bpin nir nga wuru’ e binaw ngan orfeg nge yim."

25 Ma nap’an e yibe fek i yib, me pi’ fare bpin e thin nge yan ko fare pumo’on ni chitmangin figirngin ni be ga’ar: "I gag e kug diyan rok be’ nib pumo’on nib milfan e pin’ey ngak. Ere mu changar ngay ngam guy ko mini’ e fen ere hang ney ni bay gafan nge re sog ney."

26 Me poy Judah fa pin’en me ga’ar, "Ir e bfel’ e rok. I gag e dag yul’yul’ ko tin gu micheg ngak ni nggu pi’ fare pagel ni fakag i Shelah nge figirngiy." Ma aram e daki moleg Judah bayay fare bpin.

27 Fa’ani taw ko ngiyal’ ni nge gargel fare bpin, min pir’eg nra gargel ma athlog. 28 Ma nap’an ni be fal amith fare bpin me yib pa’ reb fa gali bitir nga wean; me kol e yarif rok pa’ fare tir, nge m’ag boch yil’ i gaf ngay nib row nge m’ag, me ga’ar, "Irera’ e cha’ ni som’on ni aw." 29 Machane me girengiy fare tir pa’ nge fulweg, me mang en ni ba’aram ni walagen e ir e aw ni som’on. Ma aram me ga’ar fare yarif, "Ara’ rogon ni kam for nga tamilang!" Me’ere ntunguy fithingan fachi pagel ni Perez.*38:29 PEREZ: Fan e re ngachal ney ni Hebrew e "For nga wean." 30 Mfini aw fabin ba’aram e pagel ni walagen ni bay e gaf u pa’ nib row, min tunguy fithingan ni Zerah.*38:30 ZERAH: Re ngachal ney e gowa fare bugithin ni "woch ni puf nib row ra’en."