Juízes 11

1 I Jefthah e ba salthaw nib m’uth’an u Gilead, re mo’on ney e fak be’ ni bpin ni i pi’ ir nchuway’. Ma Gilead e chitamngin Jefthah 2 niki immoy boch e pumo’on ni fakrow le’engin, ma nap’an nra ilalgad miyad tuluf Jefthah ni nge chuw u tabnaw. Ra ga’argad ngak, "Dariy e gayog nrayag ngom ko chitamangimad; ya yug reb e bpin e fak gur." 3 Me mil Jefthah rok e pi pumo’on ni walagen nem nge yan i par ngalan fare nam nu Tob. Mu rom e bay ba ulung i pumo’on riy ndariy ban’en ni yad bfel’ ngay nra adaged daken ngu’ur uned ngak i yan.

4 Ma aram me munmun me yan piyu Ammon ni mael ngak yu Israel. 5 Nap’an ni buch e ren’ey, me yan e pi tayugang’ nu Gilead ko fare nam nu Tob ni ngar fulweged facha’ i Jefthah. 6 Me lungurad ngak, "Moy ngam gafaliymad, nge yag ni ngad chamgad ngak piyu Ammon."

7 Machane me fulweg Jefthah ni ga’ar, "Um fanenikayedgag nib gel kam tulfedgag ni nggu chuw u tafen e chitamag. Ere mangfan ni kafniyib e magawon ngomed ma kambad ngog?" 8 Me lungurad ngak Jefthah, "Kafni gu sulod ngom ni bochan e gamad ba’adag ni ngam un ngomad ngam cham ngak piyu Ammon mag gafaliy e girdi’ nu Gilead."

9 Me ga’ar Jefthah ngorad, "Fa’anra ngam fulwegedgag nga tafnag ni nggu cham ngak piyu Ammon me gel nageg SOMOL, ma bayi mang gag e gog e thin romed."

10 Miyad fulweg ni lungurad, "Bfel’ u wan’mad. I SOMOL e ir e mich ko thin rodad." 11 Ma aram me un Jefthah ngak fapi tayugang’ nu Gilead, me tay fapi girdi’ Jefthah ni ir e ngi i yog e thin rorad me ir e ngi i gafaliyrad. I weliy Jefthah e pi thin rok ney u Mizpah u p’eowchen SOMOL.

12 Ma aram me l’oeg Jefthah e pi tamal’og ngak e pilung nu Ammon ngar ga’argad ngak, "Mang e n’en ni ga be togopluwnag ngomad? Mangfan ni kam mael ko nam romad?"

13 Me fulweg e pilung nu Ammon ngak fapi tamal’og rok Jefthah ni ga’ar, "Nap’an ni yib yu Israel nga wuru’ yu Egypt miyad fek e nam rog ni tabab ko Lul’ ni Arnon nge mada’ ko Lul’ ni Jabbok nge fare Lul’ ni Jordan. Ere chiney e thingar mu fulweged ngog u fithik’ e gapas."

14 Miki l’oeg Jefthah e pi tamal’og ngar sulod ngak fare pilung nu Ammon 15 ni kar feked e thin rok i yan: "De rriyul’ ni fek yu Israel fare nam nu Moab nge fare nam nu Ammon. 16 Ba’aray e n’en ni buch: nap’an ni chuw yu Israel u Egypt, mranod u daken e ted ni desert ngranod ko fare Nguy ni Aqaba marbad riy nga Kadesh. 17 Miyad pi’ e pi tamal’og nge yan ko pilung nu Edom ni nge pi’ mat’awrad ni nge yag nranod u daken e nam rok nga barba’. Machane fare pilung nu Edom e de pagrad. Mu ku ra fithed e pilung nu Moab, ma ku de pagrad ngar th’abed e nam rok. Aram me par yu Israel u Kadesh. 18 Ma aram mranod u rom u daken e ted ngar liyegged fare nam nu Edom nge fare nam nu Moab ngar tawgad nga ba’ ni ngek yu Moab, ni bay nga ba’ nem fare Lul’ ni Arnon. Miyad par u rom, machane dar th’abed e Arnon ni bochan e ireram e mathil nu Moab. 19 Aram me pi’ yu Israel e pi tamal’og nge yan ngak Sihon, ni pilung ko Amor u Heshbon, ni ngar ninged ngak mat’awrad ni ngar th’abed e binaw rok ngranod ko birorad e nam. 20 Machane de pag Sihon yu Israel ni ngar rin’ed ni aram rogon. Me kunuy gubin e pi salthaw rok nga ta’bang, ngar pired u Jahaz, ngar m’aged e mael ngak yu Israel. 21 Machane SOMOL ni Got rok yu Israel, e gel nagrad ko mael ngak Sihon nge pi salthaw rok. Ma aram me yog yu Israel lungung urngin yang ni tafen yu Amor ni ur pired u lan e re nam nem. 22 Miyad par nga urngin e yungin ntafen piyu Amor ni tabab u Arnon u lan e yimuch nge taw nga Jabbok u lan e lel’och ngu daken e desert u ba’ ni ngek nge mada’ ko ba’ ni ngal e Jordan. 23 Ere SOMOL ni Got rok yu Israel e ir e tuluf piyu Amor ni fan ngak e tirok e girdi’, ni piyu Israel. 24 Ere gimed be guy rogon ni ngam fulwegned? Mu ted romed urngin e tin ke pi’ Kemosh ni got romed ngomed. Machane gamad e nge par romad gubin e tin ke pi’ SOMOL, ni Got romad ngomad. 25 Gimed be leamnag ni gimed ba cheag boch ngak Balak ni fare mo’on ni fak Zippor ni Pilung nu Moab? I ir e dariy bingyal’ nni tagenging nga Israel, fa bay? Ka’a yib bingyal’ ni mael ngomad? 26 Ke gaman e 300 e duw nike par yu Israel u Heshbon ngu Aroer, nge pi yuchi binaw nib liyeg, nge urngin e pi binaw u teal e Lul’ ni Arnon. Ere mangfan ni ka’aram n’umngin nap’an i yib mdawor mu sulweged e pi yungi binaw ney? 27 Danga’, dawor gu rin’ ban’en nib kireb ngom. I gur e ga be rin’ e kireb ni ga be m’ag e mael ngog. I SOMOL e ir e nge duwgiliy. Daba’ e bayi turguy ko piyu Israel fa piyu Ammon." 28 Machane fare pilung nu Ammon e de motoyil ko pi thin ney ni yib rok Jefthah.

29 Ma aram me yib gelngin SOMOL nga daken Jefthah. Me yan nge th’ab daken yu Gilead ngu Manasseh me sul nga Mizpah u lan yu Gilead me yan riy nga Ammon. 30 Me micheg Jefthah ngak SOMOL ni ga’ar: "Fa’an ga ra gel nageg ko mael ngak e piyu Ammon, 31 Ma bay gu urfiy ni maligach e cha’ nth’abi som’on nra yib u lan e naun rog nga wean ni nge mada’ nigeg, u nap’an ni gu ra sul ko mael ni kug gel. Gu ra pi’ e cha’nem ngom nib maligach."

32 Ma aram me th’ab Jefthah e lul’ ni nge cham ngak piyu Ammon, me SOMOL e gelnag. 33 Me cham ngorad u Aroer ngar mada’gad ko fa gin’en nib liyeg yu Minnith, rliw’ e binaw u gubin, me yan nge taw nga Abil Keramim. Ri bo’or e girdi’ nli’rad ngarm’ad, me gel piyu Israel ngak piyu Ammon.

Be’ ni bpin ni fak Jefthah

34 Nap’an ni sul Jefthah nga tafen u Mizpah, me yib be’ ni bpin ni fak nga wean ni nge mada’nag, ni be churu’ ma be chubeg e tambourine. Chipin nem e karimus fak aram. 35 Ma nap’an ni guy fa chipin, me guchthuy e mad rok ni gelngin e kireban’ rok me ga’ar, "Ah, fakag! Karim kirebnag lanin’ug! Mangfan nri gur e ngam k’aring e amith nga lanin’ug? Kug ngongliy ba m’ag ni kug micheg ngak SOMOL, ni dabkiyag ni nggu sulweg!"

36 Me ga’ar fa chipin ngak, "Fa’anra kam ngongliy ba michmich ngak SOMOL, ma ga rin’ e tin kamog ni ngam rin’ ngog, ya ke ayuwegnem SOMOL ke pi’ e pi to’ogor rom nga pa’am, ni piyu Ammon." 37 Machane me ning ngak e chitamngin ni ga’ar, "Mu rin’ e ta’abney ni fan ngog. Mu pageg nge yan rogog ngog ni l’agruw e pul, ya nge yag ni nggu’un ko pi tafger rog ngu’ug warod u fithik’ e burey ma gamad be yor nigeg ni thingar gum’ ni dawor gu nang e pumo’on." 38 Me yog e chitamngin ngak ni nge yan ni l’agruw e pul. Me yan fachi pin nge pi tafger rok ngar forthoggad nga fithik’ e burey ngu’ur yorgad ni bochan e fachi pin e nge yim’ ni dawri mabgol ma dawori fakay e bitir. 39 Tomuren fa gal pul me sul ngak e chitamngin. Me rin’ e chitamngin e n’en nike micheg ngak SOMOL, me yim’ fachi pin ni dawori nang e pumo’on.

Ma aram me par nike mang ba yalen u lan yu Israel 40 nma yan e pi’in ppin nu Israel nga daken e ted ni aningeg e rran u reb e duw ngu’ur yor niged fare pin ni fak Jefthah nu Gilead.