Hebreus 8

6 Nambo sambano Che Yesu apochele masengo ga umbopesi gagali gambone kupunda ga ŵanyawo, pakuŵa lilangano lya kwilanya lyaŵisile pasikati ja Akunnungu ni ŵandu lili lyambone kupunda, pakuŵa lijimi pa lilangano lyambone nnope lya Akunnungu.

7 Naga lilangano lyaandanda likaliji lyangali chileŵo ngalikasachilwe lilangano line. 8 Nambo Akunnungu ŵakuweni kuleŵa kwao paŵatite,

"Nlole gakwika moŵa, Ambuje akuti

gatinjitaŵa lilangano lyasambano pasikati ja ŵandu ŵa ku Isilaeli ni ŵandu ŵa ku Yuda.

9 Lilangano li ngaliŵa yalumo ni lilangano linataŵile ni achambuje ŵao

pa lyuŵa linaalongwesye kwa kwakamula makono gao akopoche mu chilambo cha Misili.

Pakuŵa nganakulupilichika mu lilangano lyangu

noneji naalesile kwagosa, akuti Ambuje.

10 Sambano alili ni lilangano lichingataŵe ni ŵandu ŵa ku Isilaeli,

pa moŵa go, akuti Ambuje.

Chingagaŵiche malajisyo gangu mu nganisyo syao

ni kugalemba mmitima jao.

Uneji chime Akunnungu ŵao,

ni ŵanyawo chaŵe ŵandu ŵangu.

11 Ngapagwa juchanjiganye njakwe

namose kunsalila mpwakwe kuti

‘Mwamanyilile Ambuje.’

Pakuŵa wose chachiimanyilila une

chitandile jwannandi mpaka jwankulungwa jwakwe.

12 Chinaalechelesye chigongomalo chao, ni sambi syao

ngangumbuchila sooni."

13 Kwa kusala lilangano lili "Lyasambano," Akunnungu alitesile lilangano lyaandanda liŵe lya kuwisala. Ni chindu chose chachichekulwipe ni kuwisala chichisoŵe pangakaŵa.