1 Israel phin hae balyn nynh Hebron khua umpaw David kalan pynkheihlan oun thua hae zah, "Dotua, kaening tuh na ru te na saw nynh kae thua. 2 Alia vae paw ccyh kya, Saul nynh siapharan lang oun tangpya lya heize, Israel rhawkaw hae kaw a pyatu tuh namaw nynh na thua. Bawipaw nynh nang kha ae hopah zah: Nang tuh ka ccungccaw Israel hae tuurin na thua cih zah, ka ccungccaw Israel hae uktu na thua cih, ae cipya," cite a hopya hae. 3 Tuhcite Israel piccan hae balyn tuh Hebron khua umpaw siapharan kalan a thua hae; David nynh Hebron khua Bawipaw malang khe minmin ryte byakinnaw a rae. Samuel kyate Bawipaw bya yn thua thyhte, David kha Israel siapharan lang chitui a thuh hae.

4 David te Israel hae balyn tuh Jerusalem khua lang a cceih hae, tuh-e khua tuh Jebus khua thua zah tuin ram kya um hae paw Jebus hae nynh tuin khua kya a um hae.✝ 5 Jebus khuaccaaw hae nynh David kha, "Hynhlang nae tee lan khyh," a cipya hae. Thuasalama atu David khua a ci hae paw Zion rhawlungrua kha David nynh a law. 6 David nynh, "Jebus ccungccaw hae kha masaty a tukpaw tuh rhawbawi lehuapaw athua cih," a ci. Zeruiah ccapaw Joab nynh masaty a ccia keiccuze aning tuh rhawbawi lehuapaw lang a tang. 7 David tuh rhawlungrua lungkhu a um keiccuze tuh-e tuh David khua a ci hae. 8 David nynh khua kha po voilu lan, Millo kyate tho zah marya akoihkuh lante a rae; khua kya-e tuhlaepaw kha tuh Joab nynh a raethui. 9 Vaaw Bawipaw tuh David kya a um keiccuze aning tuh houhouh a lesae.

10 E hae tuh David rhawkaw athung hae paw kya-e lupi hae nynh thua, Israel te asekuh lante Bawipaw bya thyhte, amaw kha siapharan lang khang khylan minmin nynh a peenaw kyakhe Israel hae balyn ryte pynkheihlan thawte a bawm hae. 11 E hynh David rhawkaw athung hae paw konglang nynh thua: Hakhmon ccapaw Jashobeam tuh Lu Thum hae kyaze lupi nynh thua; aning nynh a ccoi ccyngkute ccungccaw za thum kha vae kheit te a chia hae.

12 Te lu thum hae laku kya tuh-e paw koute he a zuipaw tuh Ahohi ccungccaw Dodo a ccapaw Eleazar nynh thua. 13 Filistin hae tuh rhawtuk khylan Pas-dammim kya a sueluaku lya hae ze, aning tuh David ryte a umkheih hae. Barli phe abeihpaw loo ccyngkheit a um. Ccungccaw hae tuh Filistin hae kyate a ccue hae, 14 thuasalama David te aning tuh loo ngaelung kya thadynnaw hmin lawkuh hae zah tuh-e hmin kyate Filistin hae kha a chia hae; Bawipaw nynh taenaw lepaw te a khum hae.

15 Cciakhaetu hae sung thum kya-e lu thum tuh Adullam lungkarung kya umpaw David kalan a cceih hae, tuh lyatuin Filistin rhawkaw hae tuh Refaim accya kya a rya hae. 16 David tuh rhawlungrua lungkhu um zah, Filistin hae rhawviatu rhawkaw hae tuh Bethlehem kya a um hae. 17 David nynh , "Lukhakheit nynh koikua pe umpaw Bethlehem tuisung kya-e tui kha nia lan yn pya ravo nyn!" cite lungdeite a ho. 18 Tetuh athungpaw lu thum hae nynh Filistin hae ryahmin kha roh hae zah koikua pe umpaw Bethlehem tuisung kya-e tui kha the hae zah David kalan a cciakhae hae. Thuasalama David nynh nia leite Bawipaw malang khe moh lae zah, 19 "E tui hynh ka nia khyh nawlan ka Pachia nynh yn khee vae sah. E ccungccaw hae chiise hynh ka neih kho cih zawtou? Pawccecize ka chi ze ka chih cite cceih hae zah, e tui hynh oun thuakhae hae," a ci. Tukeiccuze aning nynh neih khyh. Tuh-e rhawkaw hae lu thum nynh tuhcite rya a law hae.

20 Joab neitaw Zeruiah a ccapaw Abishai tuh Ccungccaw Sung Thum hae kyaze lupi nynh thua. A ccoi te ccungccaw za thum kha tuk hae zah a chia hae keiccuze Lu Thum hae kya a minthaanbua. 21 Aning tuh Ccungccaw Sung Thum hae kyaze a minthaan huaccepaw thua zah mih rhawbawipaw lang a tang; thuasalama Lu Thum hae hawte tuh a minthaan khyh.

22 Kabzeel khuapaw Jehoiada ccapaw Benaiah tuh arawthungpaw ccungccaw thua zah, ryalaw lepaw a lahpaw nynh thua; Moab ccungccaw Ariel ccapaw hae lu ning kha a chia hae. Vuiraw accaw nin khe cceih zah laekarung lungkhu umpaw chindeih kha a chia. 23 Izip ccungccaw dong pangaw ahangpaw, a pynrua hoypaw kha a chia. Izip paw tuh a kuih kya phaeccya cia acihpaw ccoi a hoi; thuasalama Benaiah nynh hoitang ccyngkute ccianua zah, Izip paw kuih kya-e ccoi kha a lua koute amaw ccoi toulou maw te a chia. 24 Jehoiada ccapaw Benaiah nynh tuhcite cyih zah athungpaw lu thum hae kya a minthaanbua. 25 Aning tuh ccungccaw Sung Thum hae kya a minthaanbua, thuasalama Lu Thum hae hawte tuh a minthaan khyh. David nynh amaw a rhawviatu hae lupi lang a nung.

26 Rhawkaw hae kyaze mih rawthung hae paw tuh, Joab neitaw Asahel, Bethlehem khuapaw Dodo ccapaw Elhanan, 27 Harod khuapaw Shammah, Pelon ccungccaw Helez, 28 Tekoa khuapaw Ikkesh a ccapaw Ira, Anathoth khuapaw Abeizer, 29 Hushath ccungccaw Sibbekai, Ahoh ccungccaw Ilai, 30 Netofah khuapaw Maharai, Netofah khuapaw Baanah ccapaw Heled, 31 Benjamin phin hae kya-e Gibeah khuapaw Ribai ccapaw Ithai, Pirathon ccungccaw Benaiah, 32 Gaash accya hae ccungccaw Hurai, Arbath ccungccaw Abiel, 33 Baharum ccungccaw Azmaveth, Shaalbon ccungccaw Eliahba, 34 Gizon ccungccaw Hashem, Harar ccungccaw Shagee ccapaw Jonathan, 35 Harar ccungccaw Sakhar ccapaw Ahiam, Ur ccapaw Elifal, 36 Mekherath ccungccaw Hefer, Pelon ccungccaw Ahijah, 37 Karmel ccungccaw Hezro, Ezbai ccapaw Naarai, 38 Nathan neitawpaw Joel, Hagri ccapaw Mibhar, 39 Ammon ccungccaw Zelek, Beeroth khuapaw Naharai, aning tuh Zeruiah ccapaw Joab kya-e rhawtuk-zunghe ccyngtu nynh thua, 40 Ithra ccungccaw Ira, Ithra ccungccaw Gareb, 41 Hit ccungccaw Uriah, Ahlai ccapaw Zabad, 42 Reuben phinpaw Shiza ccapaw Adina, aning tuh Reuben phin hae te amaw kya um hae paw sung thum hae cciakhaetu nynh thua, 43 Maakah ccapaw Hanan te Mithni ccungccaw Joshafat, 44 Ashterath ccungccaw Uzzia, Aroer ccungccaw Hotham ccapaw hae Shama te Jeiel, 45 Tiz ccungccaw Shimri ccapaw Jediael te a neitawpaw Joha, 46 Mahav ccungccaw Eliel, Elnaam ccapaw hae Jeribai te Joshaviah, Moab ccungccaw Ithmah, 47 Mezoba ccungccaw Eliel, Obed te Jaasiel nynh thua hae.