1 Pachia thingkua kha cciakhae hae zah David nynh a sakpyapaw bu lungkhu khe a nung hae; te Pachia malang khe maee-ute silawnaw te ccawkunaw silawnaw kha a rae hae. 2 David nynh maee-ute silawnaw te ccawkunaw silawnaw kha he a rae koute Bawipaw min te ccungccaw hae kha hythua a pya hae; 3 Israel ccungccaw miakaw—nopi te pise phe lokuh lante—sanlou phe kheit, saw nge kheit te misu thae aroupaw aphe phe kheit cci kha ccarou a nee hae.

4 Levi phin hae abang kha Bawipaw thingkua malang ryalahtu lang, Bawipaw , Israel Pachia kalan sawsang khylan, lungtuabya ho khylan te thehoysah khylan a khang hae. 5 Lupi tuh Asaf, amaw koute lu ningnaw Zekhariah, Jeiel, Shemiramoth, Jehiel, Mattithiah, Eliab, Benaiah, Obed-edom te Jeie; minmin tuh tintang te tintang dihpaw a khua cih hae paw nynh thua; Asaf tuh lanchi a khua cih paw thua zah, 6 ranpibawi Benaiah te Jahaziel tuh Bawipaw byakin thingkua malang mungkae tyty a tu cih hae paw nynh thua.

7 Te tuin nin khe David nynh Bawipaw kalan thehoysahnaw hlawsah khylan Asaf te a puizia hae kha a khang hae.

8 Bawipaw kalan lungtuabya

ho oh, a min kha ko oh lah,

a cyipaw kha ccungccaw hae

nysah oh.

9 Amaw kalan hlawsah oh,

thehoysahnaw hlawsah oh;

ngaeangthua lan umpaw

a ryalaw balyn kha ho oh.

10 A min thyaapaw kha phu-esah oh;

Bawipaw a ccung hae paw

thinlung tuh a lungtua sah.

11 Bawipaw te a thawzung kha

ccungtua; a mitmae kha

ccung zungzae oh.

12,13 Pou a ryalahtu Abraham ciihan,

a popaw Jakob ccaaw hae,

ngaeang lan umpaw a la cyipaw,

ngaeang lan umpaw a ryalaw hae te

a hopaw byapianaw kha liathui oh.

14 Aning tuh Bawipaw

ah Pachia nynh thua;

a byapianaw tuh laephi pynpi

hanlan nynh thua.

15 A byakinnaw kha zungzae a liathui,

kaw a pyapaw kha

she thong kheit cia a liathui,

16 Abraham kya a raepaw byakinnaw,✝

Isak kya a kinpyakupaw a byakinnaw,

17 Jakob kya phungbya lante

tynsah zah,✝

Israel kya zungzae tynpaw

byakinnaw lante a tynsah,

18 "Kanaan ram hynh rho lang

kae pya cih,"

a la cipaw kha a liathui.

19 Minmin tuh milu beihtaraw

kyalya cih hae zah,

ramccang ccungccaw lang tangte

20 ram kheit kyate ram kheit kalan,

pee kheit kyate ccangpaw

pee kheit kalan

he a khiavuikuh hae tuh,

21 minmin tungvaw tuaasahnaw

rae lan, aning nynh

humhung sanmah ua khyh;✝

minmin keiccuze siapharan hae kha

pe hae zah,

22 "Chitui ka thuh hae paw kha

ty nan oh;

ka profeh hae kha vawsawnaw

pya nan oh," a cipya hae.

23 Laephi ccungccaw balyn,

Bawipaw kalan hlawsah oh.

a khumnaw thehoypaw kha

nin takyhte ho oh.

24 Minphuin hae kalan

a phu-enaw kha siakhae oh lah,

ccungccaw balyn kalan

ngaeangthua lan umpaw

a ryalaw kha ho oh.

25 Bawipaw tuh lesae zah,

thawmawte thehoysah lanpaw

nynh thua;

ccangpaw pachia hae balyn laeze

sawtuahua lanpaw nynh thua.

26 Minphuin ccangpaw hae kya-e

pachia hae tuh zohtuh hae nynh thua,

thuasalama Bawipaw nynh

vaawlui kha a rae.

27 Sawtuanaw te lesaenaw tuh

amaw malang a um;

thawzung te lungpawnaw tuh

amaw a umnaw hmin kya a um.

28 Pou minphuin hae balyn,

Bawipaw kha thehoysah oh,

Bawipaw a phu-enaw te

a thungnaw kha thehoysah oh.

29 A phu-epaw Bawipaw min kha

thehoysah oh;

silawnawpaw kha ccyngkute

amaw malang cceih oh.

Alesaepaw thyaanaw khate

Bawipaw kha beik oh;

30 laephi ccungccaw balyn,

amaw malang rawrite um oh.

Laephi tuh tynkaring lan a thadyn;

nuekuh boi lan khyh.

31 Vaawlui hae tuh mih lungpaw sah lah,

laephi tuh a lungtua sah.

"Bawipaw tuh siapharan nynh

thua!" cite minphuin hae kya

ho hae sah;

32 Rili te a lungkhu

um hae paw tuh sia hae sah;

loo te a lungkhu umpaw

atyn-are balyn tuh

mih lungtua sah.

33 Te ramkaw e thingku balyn tuh

Bawipaw malang lungtuate

hlaw a sah cih hae;

pawccecize Bawipaw tuh

laephi kha byapia khylan yn thua.

34 Bawipaw tuh hoy zah

atynpaw a sungsahnaw tuh

zungzae atyn keiccuze

amaw kalan lungtuabya ho oh.✝

35 "Pou kaening oun khumtu Pachia,

athyaapaw na min kha kae luung zah

namaw thehoysahnaw kyakhe

phu kae esah nawlan,

minphuin hae laku kyate

kaening hynh khumte

oun suelua lah, oun luesah tua.

36 Bawipaw , Israel Pachia tuh

zungzae te zungzae cia thehoysah

thua vae sah,"

cite ho oh. Ccungccaw balyn nynh, "Amen!" ci hae zah, Bawipaw kha the a hoysah hae.

37 David nynh Asaf te a uno hae kha Bawipaw byakin thingkua malang khe nin takyhte ahoboupaw rya kha tyty law khylan a nungsya hae, 38 Obed-edom te a puizia hae sung taruh lu tarya kha mah a khang hae; Jeduthun ccapaw Obed-edom te Hosah tuh thuakaw ngawtu nynh athua hae. 39 Te ranpibawi Zadok te a uno hae ranpibawi hae kha Gibeon khua ahangpaw hmin kya umpaw Bawipaw beikbu malang khe a nungsya hae, 40 Bawipaw nynh Israel hae kaw a pya hae paw a kawbya kya azeikuhpaw balyn thyhte, minmin nynh awkhua te zete ccyh kya maee-ute silawnawpaw silawhang vawlan khe Bawipaw kalan maee-ute silawnaw kha tyty a rae cih hae. 41 Bawipaw sungsahnaw tuh zungzae atyn keiccuze amaw kalan lungtuanaw byaho khylan Heman te Jeduthun thuasah, popaw te min ccazing law athua hae paw mingccang hae thuasah minmin kya a umbua hae. 42 Heman te Jeduthun nynh hlawsahnaw hanlan mungkae te lanchi hae kha hoi hae zah hlaw thyaapaw hanlan khuakupaw uccaw hae kha a hoi hae. Jeduthun ccapaw hae kha thuakaw ngawtu lang a nung hae.

43 Te ccungccaw balyn tuh mih inn raveih lang ki hae zah David tuh a innbyn hae kha hythuapya khylan a inn lang a cceih.✝