BYAPHY 19

Marang Rawpaw Ccikuhpaw

11 Vaawlang tuh hungkuh zah marang rawpaw sa kheit kha ka muih. Tuh-e marang tungvaw a ccikuhpaw tuh Alungzipaw, Ahmepaw cite ko athua; aning tuh dingnaw te byapia zah rhaw a tuk.✝19.11: Eze 1.1; Sam 96.13; Isa 11.4 12 A mit tuh maeesoi te lokuh zah, a lu vawlan bawilukhung hae a khungkuh; a tungvaw kyakhe amaw laelan hum nynh san a ny leipaw min azeikuhpaw a hoi.✝19.12: Dan 10.6 13 Chii kya adungkuhpaw angkiccua kha kikuh zah, a min tuh Pachia Bya a cikuh. 14 Vaawlang e rhawkaw hae nynh arawpaw marang hae kha ccikute, raw zah athyaapaw nebaleihpaw boeining kha lawku biate amaw kha a zui hae. 15 Minphuin hae kha detah nawlan ahepaw thaloi tuh a khalang lungkhu te a pou. Aning nynh minmin kha sivaw hoitang te a uk cih hae; Athung huaccepaw Pachia thinrianaw te asekuhpaw bungpawnaw misu mianaw khu kha aning nynh a syde cih.✝19.15: Sam 2.9; Isa 63.3; Joe 3.13; Bya 14.20 16 A angkiccua vawlan te a phae vawlan khe, "Siapharan hae Siapharan, bawi hae Bawipaw," cite azeikuhpaw min kha a hoi.

Sarepaw te A Rhawkaw hae Shungnaw

17 Vaawpaw lu kheit nynh khuanin kya a thadynpaw kha ka muih, aning nynh vaawlang angaelung kya a zou hae paw pavaw hae balyn kha roi myarya accae lante ko hae zah, "Rang oh lah, alesaepaw Pachia kya-e loohdangkunaw kalan oun sueluakuh oh;✝19.17-18: Eze 39.17-20 18 siapharan hae ngesaw, rhawbawi hae ngesaw, a thawsaepaw ccungccaw hae ngesaw, marang hae te marang a ccikuh hae paw ngesaw, a luepaw te see, adihpaw te alepaw ccungccaw hae balyn ngesaw kha na ae ccaw oh oun sueluakuh oh," cite a sia. 19 Sarepaw te laephi siapharan hae te mih rhawkaw hae nynh marang tungvaw a ccikuhpaw te a rhawkaw hae kha rhawtuk khylan oun sueluaku hae paw kha ka muih. 20 Sarepaw kha phe a kyng hae; sarepaw kya-e syntawnaw a hoi hae paw te sarepaw azuh a beik hae paw kha ling hae zah sarepaw malang muihsahnaw a langsakuhpaw lingthya profeh kha mah amaw ryte a kyngbua hae. Hynh-e lu ning hae hynh parouhte a hiin hae pite, kemaee te a ruanaw maee tuili lungkhu lang a vua hae.✝19.20: Bya 13.1-18 21 Tuhlaepaw kha marang tungvaw a ccikuhpaw a khalang lungkhu te yn poupaw thaloi khate chia athua hae; te pavaw hae balyn nynh mih ngesaw kha phe byn lan a ae hae.