1 Moab ram konglangte,

Israel Pachia, vaaw Bawipaw nynh hynhte a ho:✝

Nebo khua hanlan

ngaethya lan kou um, phe roh vae!

Kiriathaim tuh law thua vae zah,

maethyanaw a mue vae;

rhawlungrua kha tingbung thua zah,

maethyanaw a mue vae;

2 Moab minthaannaw tuh um vae khyh.

Rhaw hae nynh Moab kha rawsete

Heshbon khe hoyleinaw

khuakhankuh hae zah,

"Rang oh, minphuin phuin kheit

athuanaw kyate vua oh sih!" a ciku hae.

Pou Madmen khua, nang mah ro na thua cih;

thaloi nynh nang kha ae deehui cih.

3 Horonaim khua e siaruanaw roi tuh

ngaetua oh!

"Ccungccaw kharouh daenaw te

myarya lepaw ronaw!" a ci hae.

4 "Moab ram tuh aroh vae!"

Moab ram e imua hae tuh a siarua hae.

5 Luhith lang kaethungnaw khe

ccihtaci lan rawkhuite a kaethung hae;

Horonaim lang rungbungnaw khe

lungriathae thinphangnaw roi kha a thae hae.

6 Ccue oh! Na lue oh ccaw ccue oh!

Laesia ram e lann hawte ccue oh!

7 Thanccingte, na thawzung te

na sisua kha na doliaku keiccuze

nang mah ae lah cih hae;

na pachia Khemosh tuh a ranpibawi hae te

a ryalahtu hae ryte kyngte

ramccang lang a cciakhae cih hae.

8 Rohtu hae tuh khua takyh

a thua cih hae zah,

aluepaw khua um lan khyh;

Bawipaw nynh a ho vae hawte,

accya tuh azo cih zah, bialae tuh

aroh cih.

9 Moab hanlan shawkulung bingpah oh,

pawccecize aning tuh solei a khulia vae cih;

a khua hae tuh ccungccaw a um leinaw,

adaepaw khua lang a tang vae cih.

10 Bawipaw ryalaw kya a sawphahkuhpaw tuh thyalawnaw tung sah; chiise luasah nawlan a thaloi a mang ry leipaw tuh thyalawnaw tung sah.

11 Moab tuh misu ahaaw vawlan e atui hawte,

a zawthaw lya mawte ngaengante a um,

aning tuh ang angkheit kyate

angkheit kalan lia boi khyh hae,

kyngte ramccang lang cciakhae boi khyh hae;

tukeiccuze misutui tuh athuanaw zo khyh zah,

amynkhuhnaw mah zo khyh.

12 Tukeiccuze Bawipaw nynh a hopaw tuh: Minmin kha misutui hawte lia khylan a liatu hae kha ka sawnuanaw ccyh tuh solei yn thua cih; minmin nynh Moab ang hae kha khaleih a lae cih hae zah, a lungre hae kha palae tui lan a koi cih hae. 13 Tetuh Israel phin tuh a doliakupaw Bethel pachia keiccu maethyanaw a mue hawte, Moab tuh Khemosh pachia keiccu maethya a ccou cih.

14 "Aening tuh rawhoy hae paw te

athawsaepaw rhawkaw hae nynh ah thua oh,"

cite pawtemou na ho kho oh?

15 Moab te a khua hae a rohtu tuh

yn cceihthung vae hae,

a po hae paw ccangvae hae tuh

chiakunaw teing khylan

a cceihbung vae hae, cite

a min vaaw Bawipaw

acihkuhpaw Siapharan nynh a ci.

16 Moab hanlan shethya tuh anae vae,

a ronaw tuh arangte yn naekuh vae.

17 Moab pepan um hae paw balyn te

a min a nyh hae paw balyn tuh

Moab hanlan rah oh lah,

"Athungpaw ccoi, aphu-epaw hoitang tuh

phe khya vae rei!" cite ho oh.

18 Ccanung Dibon khua e

bawitungkhung kya a haung hae paw,

phu-enaw kyate rungbung oh lah,

laerou vawlan haungtua oh!

Moab a rohtu nynh nang kha

ae ccianua thung vae;

na rhawlungrua kha a ro vae.

19 Pou Aroer khuaccaaw hae,

laanpi pe khe thadyn oh lah, dotua oh!

A ccuepaw pisepaw te a luepaw nopinung kha,

"Pawmou acyihkuh?" cite khiatua oh.

20 Moab tuh aro vae keiccuze

maethyanaw a mue vae;

rawkhuite a siarua vae!

Moab tuh phe roh vae, cite

Arnon vaw pe khe ho oh.

21 Mua vaw bialae e khua hae, Holon, Jahzah, Mefath, 22 Dibon, Nebo, Beth-diblathaim, 23 Kiriathaim, Beth-gamul, Beth-meon, 24 Kerioth te Bozrah khua hae kya thuasah, asawnaw te anaenaw umpaw Moab ram e khua hae balyn kya byapianaw a thua vae. 25 Moab ki kha moi thua vae zah, a kuihbaw kha khya athua vae, cite Bawipaw nynh a ci.

26 Moab kha ruisah oh, pawccecize aning nynh Bawipaw kha rawse zah a pooku; Moab tuh amaw a lua kyakhe kalouhkuh sah lah, nuinsepaw lang tang sah. 27 Israel tuh miruh hae ryte kyngkheihpaw athua lei pite, nang nynh na sarya; aning kong na ho takyhte sarisarya na nung!

28 Pou Moab kya um hae paw,

khua hae kha cciataw oh lah,

lungkarung kya um oh!

Lungkarung arae kya a bu a luakuhpaw

vahu te lokuh oh.

29 Moab nynh a lysakunaw kha

phe kae thae vae—

aning tuh myarya a lysakuh—

a tansakunaw, a lysakunaw,

a lungkhungnaw te

a thinlung a hangsahkunaw kha

phe kae thae vae.

30 Kamaw ccaccei nynh a lysakunaw kha

ka ny vae, a pookunaw tuh

accakaepaw thua zah, a cyisahnaw mah

accakaepaw nynh thua, cite

Bawipaw nynh a ci.

31 Tukeiccuze Moab hanlan

rawkhuite ka um;

Moab hae balyn hanlan ka rah;

Kir-heres ccungccaw hae hanlan

ka rah ka khui.

32 Pou Sibmah misu ku,

Jazer khua hanlan laeze

nang na hanlan ka rahhua!

Na misu akaran hae tuh

rili po khung hae zah,

Jazer cia phe thua hae;

hawnin e na thingthae hae te

na misu thae hae kha

rohtu hae nynh a ro vae hae.

33 Moab ram hoypaw kyate

lungtuanaw te lungpawnaw kha

law athua vae;

misu mianaw khu kyate

misutui kha ka kansah vae;

lungtua siaruate misu thae a nonpaw

lu kheit san um vae khyh;

siaruanaw tuh lungtua

siaruanaw thua vae khyh.

34 Heshbon khua te Elealeh khua tuh rah hae zah, mih rawnaw roi tuh Jahaz cia athan, Zoar khua te mah thae hae zah, Horonaim te Eglath-shelishiyah kyacia athan. Pawccecize Nimrim vaw taraw heize phe akan. 35 Te Moab ram e ahangnaw hmin kya silawnaw a rae hae paw te mih pachia hae kalan a pyatu hae kha ka zosah cih hae, cite Bawipaw nynh a ci. 36 Tukeiccuze ka thinlung tuh Moab hanlan phyly hawte a khui, te ka thinlung tuh Kir-heres ccungccaw hae hanlan phyly hawte a khui; pawccecize a mue hae paw mih hoirumnaw tuh phe roh vae. 37 Ccungccaw miakaw mih lu a okuh hae, mih khawming a ngokuh hae, mih kuih awkuh hae zah, mih tae kya buriboei a voiku hae. 38 Moab ram e innccukaly miakaw kya te khualae e laanpi hae kyakhe rawkhuinaw rou nynh a um; pawccecize humhung nynh mah a ry lei vae paw ang hawte, Moab kha ka koi vae, cite Bawipaw nynh a ci. 39 Moab tuh phe koi vae ccarei! Rawkhuite a um vae rei! Moab tuh maethyate nulang a sihkuh vae rei! Tukeiccuze Moab tuh a sarya hae paw lang tang vae zah, a pepan e ram balyn nynh a ri hae paw lang a tang vae.

40 Bawipaw nynh hynhte a ho:

Dotua, aning nynh mosi hawte

Moab kha a uingnuakuh cih zah,

a sake a dawnua cih.

41 Khua hae te rhawlungrua hae kha

a lah cih hae. Tuin nin vae tuh,

Moab rhawkaw hae thinlung tuh

neitangia accihpaw

nopinung thinlung te alokuh cih.

42 Moab nynh Bawipaw kha

rawse zah a pooku keiccuze

aroh cih zah minphuin

phuin kheit thua vae lan khyh.

43 Pou Moab ram um hae paw,

rinaw, hunghua te kaang hae tuh

nae malang phang um hae! cite

Bawipaw nynh a ci.

44 Rinaw kyate a ccue hae paw tuh

hunghua lungkhu lang accah cih hae,

te hunghua lungkhu kyate

a lue hae paw miakaw tuh

kaang kya a kae cih hae.

Detahnaw a mue kum hae khe,

e uccaw hae hynh

Moab tungvaw ka thuasah cih,

cite Bawipaw nynh a ho.

45 Rhaw kyate oun lue hae paw tuh

mih thawbang keiccuze

Heshbon mynlyh kya a haeung hae;

Heshbon khua kya-e

Sihon siapharan inn kyate

maeesoi apou keiccuze

Moab ramri hae te rhawdou

a ry hae paw kya-e

mua ahang hae paw kha

tuh-e maee nynh a u vae.

46 Pou Moab, na hanlan

ngaethya lan kou um!

Khemosh pachia

a beik hae paw tuh a roh vae hae,

nae ccanung hae te

nae ccapaw hae kha

kyng hae zah a cciakhae vae hae.

47 Tuhzemah Moab hae kha

nyalang ccyh kya bua ka kikhae cih hae,

cite Bawipaw nynh a ci.

E kyacia hynh Moab tungvaw

byapianaw nynh thua.