1 Bawipaw nynh hynhte a ho: Nang nynh Judah siapharan inn lang la cceih lah, e bya hynh la hopah hae: 2 Pou David bawitungkhung kya a haungpaw Judah Siapharan, nang, na ryalahtu hae te e koikua kya a tee hae paw na ccungccaw hae nynh Bawipaw bya hynh ngaetua oh. 3 Bawipaw nynh hynhte a ho: Byading te dingnaw khate ryalah oh lah, luadenaw a teingpaw kha tuaasahtu hae kuih kyate luesah oh. Te ramccang ccungccaw, ngawraw te nomae hae tungvaw cyihsei nan oh lah, puatho nan oh, e hmin kya seinaw a hoi leipaw chiise kha luasah nan oh. 4 Pawccecize nanning nynh e bya hynh na zui oh zetuh, David bawitungkhung kya a haung hae paw, marangle te marang hae kha a ccikuh hae paw siapharan hae nynh mimaw, mih ryalahtu hae te mih ccungccaw hae ryte e inn thuakaw hae kya a tee cih hae. 5 Thuasalama e bya hae hynh pawlang na ria khyh oh zetuh, e inn hynh ccungccaw phe adae cih, cite Bawipaw nynh kamaw min phyakute bya ka kinku, a ci.✝ 6 Judah siapharan inn te asekuh lante Bawipaw nynh hynhte a ho:

Nang tuh ka hanlan

Gilead hawte na thua zah,

Lebanon mua dung hawte nynh

na thua;

thuasalama laesia ram,

ccungccaw a um leinaw khuapi lang

kae rae cih, cite bya ka kinku.

7 Nang kha rawse khylan rohtu hae kha

mih zunghe balyn ryte ka paccyn cih hae;

ahoy huaccepaw na sidar ku hae kha

a nge cih hae zah,

maee lungkhu lang a phung cih hae.

8 Te minphuin patae nynh e khuapi pe a cceih cih hae zah, "Bawipaw nynh khuh-e myarya lepaw khuapi khuh pawccemou khuhte a cyi?" cite a hokuh cih hae. 9 "Minmin nynh Bawipaw mih Pachia byakinnaw kha vua hae zah, ccangpaw pachia hae kha beikte rya a lawpya hae keiccu nynh thua," cite a khungru cih hae.

10 A chihpaw Josiah Siapharan hanlan

ngaethya rawkhuite um nan oh;

tuhlaeze ccanglang ccaring

a cceihpaw hanlan kha rah oh,

pawccecize aning tuh

a puinaw ram kha muih khylan

kithui vae lan khyh.

11 A paaw Josiah rya kha ranoih lah zah, e hmin kyate ccanglang ccaring a cceihpaw, Judah Siapharan Josiah ccapaw Shallum te asekuh lante Bawipaw nynh hynhte a ho: Shallum tuh e ram lang kithui vae lan khyh,✝ 12 rhaw hae nynh kyng hae zah a cciakhaenaw hae ram kyakhe a chih cih zah, e ram hynh kharouh muihthui vae lan khyh.

13 A inn kha dingleinaw te sak zah,

a inn avawlan khaan kha

atazae leite a saktupaw aning hanlan

ngaethya lan kou um;

aning nynh a innpaw hae kha

alakawte ryalawsah hae zah,

mih ryalaw mee pya khyh hae;

14 aning nynh, "Akopaw avawlan

khaan a umpaw inn myarya lepaw kha

ka sakkuh cih," ci zah,

thanlan-aw kha uasah zah,

sidar thing te a rae koute

asepaw si kha a thuh.

15 Sidar thing te kou hoy lan

na sakku keiccu tou

siapharan lang na tang?

Na paaw tuh phe byn lan ae zah neih zah

byading te dingnaw te rya a lah khaw?

Tukeiccuze aning hanlan hoynaw a um.

16 Aning nynh ryachi hae te

anyaa hae paw byathan kha

hoyte bya a piapya hae;

tukeiccuze hoynaw a um.

Tuh-e tuh kae yn ny keiccu thua khyh tou?

cite Bawipaw nynh a ci.

17 Thuasalama na mit te na thinlung tuh

atazae leite muenaw kya rou khe um zah,

seinaw a hoi leipaw chiise luasahnaw,

tuaasahkunaw te puathonaw rou kha na tua.

18 Tukeiccuze Judah siapharan Josiah ccapaw Jehoiakim Siapharan te asekuh lante Bawipaw nynh hynhte a ho:

Ccungccaw hae nynh amaw kha,

"Ezou, ka upaw! Ezou ka ccianung!"✝

cite rawhui lan khyh hae.

Aning hanlan, "Ezou, bawipaw!

Ezou, a lesaenaw khalou!"

cite rah lan khyh hae.

19 Lann kha a uu hae hawte

aning kha a uh cih hae—

Jerusalem koikua khunglang

a sue cih hae zah a vua cih hae.

20 Lebanon langkhe kaethung oh lah,

siatua oh,

Bashan kyakhe nae roi kha sawtua oh;

Abarim kyate siatua oh,

pawccecize na ruiban hae balyn tuh

ro athua hae.

21 Na khosah a um lya kae hopya zemah,

"Ka ngae lan khyh," nae cipya.

E ozia hynh na di lya mawte na hoipaw

thua zah, ka bya na ngae khyh.

22 Nang ae do-oihpaw balyn kha

khisan nynh a mung cih hae,

na ruiban hae kha a kyng cih hae zah

a cciakhae cih hae;

tetuh na hoyleinaw balyn keiccuze

na maethah cih zah na lungroh cih.

23 Pou Lebanon kya a um hae paw,

Sidar ku hae laku kya

bu a sakkuh hae paw,

nopinung nynh neitangia a teing hawte,

ngesaw ccinaw kha he na teing oh te,

pawcih baban mou na hawkhaekuh cih oh!

24 Bawipaw nynh a hopaw tuh: Judah siapharan Jehoiakim ccapaw Koniah Siapharan tuh ka ranglang kuih kya-e tazeih kuihpu na thua zemah, kae tuh ka hiin thyhte nang kha thoh kae pae cih zah,✝ 25 nang kha chia ae ry hae paw kuih kalan, na ri hae paw kuih kalan, Nebukhadnezzar Siapharan te Khaldi hae kuih kalan kae pya cih hae. 26 Nang te na nung kha nae puinaw ram athua leipaw ramccang langkhe kae vua cih oh zah, tuin kya na chih cih oh. 27 Minmin nynh kithui a rynaw hae ram lang kithui lan khyh hae.

28 E ccungccapaw Koniah hynh

a dothatheih hae paw anglohpaekua,

humhung nynh mah a ry leipaw

uccaw khaw athua?

Amaw te a ciihan hae kha minmin nynh

a la ny boi lei hae paw ram langkhe

pawccemou dee thua hae zah

vua athua hae?

29 Pou ram, ram, ram,

Bawipaw nynh a hopaw hynh ngaetua!

30 Bawipaw nynh hynhte a ho:

E ccungccapaw hynh ccaawno

a hoi leipaw cite thuasah,

a she lungkhu a laan a sui

a ua cih leipaw cite thuasah zeitua;

pawccecize a ciihan hae nynh

David bawitungkhung kya

haung vae lan khyh hae zah,

Judah ram hynh ukthui vae lan khyh hae, a ci.