1 Minphuin hae konglangte Jeremiah kya yn thuapaw Bawipaw bya:

2 Josiah ccapaw Jehoiakim nynh Judah siapharan lang a tangnaw kum palinaw kum khe, Babilon siapharan Nebukhadnezzar nynh Zufrates vawkhu kin e Karkhemish khua kya a taepaw Izip siapharan Faro Neko a rhawkaw hae te asekuhpaw Bawipaw bya tuh:✝

3 Khawriaphua adihpaw te

alepaw kha paccyn oh lah,

rhawtuk lan malang cceih oh!

4 Marang hae kha ade de oh lah,

cciku tua oh!

Sivawlukhung kha khungkuh oh,

nae ccoi kha tawkuh oh lah,

sivaw angki kha kiku tua oh!

5 Pawkeiccumou a rih hae paw

minmin kha ka muih hae?

Minmin tuh nulang a ki hae;

mih rhawkaw hae tuh shung hae zah

thawte a ccue hae.

Nulang dohui khyh hae,

mih pepan balyn rinaw te phe abeih!

cite Bawipaw nynh a ci.

6 Myarya rang lan a ccue

kho hae paw mah lue kho khyh hae,

rhawkaw hae mah lue kho khyh hae;

Palung lang Zufrates vaw pe khe

thykuh hae zah a khuliakuh hae.

7 Nal vaw athopaw hawte thuasah,

tui alepaw vaw hawte thuasah

yn thokuhpaw tuh hummou athua?

8 Izip tuh Nal vaw hawte thuasah,

tui alepaw vaw hawte thuasah yn thokuh.

Ka le cih, laephi kha ka bong cih,

khuapi hae te tuin kya

um hae paw kha ka roh cih hae, a ci.

9 Pou marang hae, malang cceih oh,

pou marangle hae, thawte ccue oh!

Rhawkaw hae tuh malang cceih hae sah:

Ethiopia hae te khawriaphua

a ccyngkuh hae paw Put hae,

the te li kawthya hae paw Ludi hae tuh

malang cceih hae sah.

10 Tuin nin tuh vaaw PACHIA Bawipaw nin,

a rhaw hae kyate

thyaaccounaw mue khylan

liaru nin nynh thua.

Thaloi nynh a ae cih zah a byn cih,

mih chii kha phe byn lan a neih cih.

Pawccecize vaaw PACHIA, Bawipaw nynh

palung lang ram Zufrates vaw kin khe

silawnaw kha a rae cih.

11 Pou ccanung liaccady Izip,

Gilead lang cceihthung lah,

dannawpaw balm sii kha lawtua,

sii patae kha alakaw lan na mang vae,

dannaw na muelae khyh.

12 Na maethyanaw kha

minphuin hae nynh a thae vae hae,

na rawnaw tuh laephi pynpi kya

phe azeihkuh; rhawkaw lu kheit nynh

ccangpaw lu kheit kyakhe thykuh zah,

parouh mawte a khuliakuh hae, a ci.

13 Babilon siapharan Nebukhadnezzar nynh Izip ram kha tuk khylan yn ccianua lanpaw kong, profeh Jeremiah kya yn thuapaw Bawipaw bya tuh:✝

14 Izip ram kya ho oh lah, Migdol kya,

Memfis kya te Tahpanhes kyakhe,

"Umnaw dokute paccynkuh oh,

pawccecize nae pepan um hae paw kha

thaloi nynh a laang vae

cih hae," cite thaesah oh.

15 Pawccemou Apis tuh a ccue?

Pawccemou nae zohtuh tangnuapaw tuh

a thadyn khyh?

Bawipaw nynh tuu zah

a khulia keiccu nynh thua.

16 Nae ccungccaw hae tuh

thykuh hae zah a khuliakuh hae,

te lu kheit te lu kheit hokuh hae zah,

"Thoku tua, a rosah thyapaw thaloi keiccuze

ahmaw ccungccaw hae kalan,

ah puinaw ram lang ki oh sih," a ciku hae.

17 Izip siapharan Faro kha,

"Amaw ccyhhoy kha a liasah hanpaw,

a bya ccakaepaw," cite minphu oh.

18 A min vaaw Bawipaw a cikuhpaw

Siapharan nynh a hopaw tuh:

Kae tuh ka hiin thyhte, mua hae kyaze

Tabor mua hawte thuasah,

rili kin umpaw Karmel mua hawte thuasah

tuh-e siapharan tuh yn thua cih.

19 Pou ccanung Izip,

kyngkute ramccang lang

cciakhaeku khylan paccynkute umtua!

Pawccecize Memfis khua tuh

alakawpaw, arohpaw,

ccungccaw um leipaw lang a tang cih.

20 Izip tuh apuithyapaw

vaetua tohlaw nynh thua,

tuhzemah palung langte

kaekih nynh a thuanua vae.

21 A ram lungkhu e hohpaw

a ccungccaw hae heize

thobaleihpaw vaetuataw te nynh

a loku hae; minmin mah

maeleihkuh hae zah,

thadyn leite a ccuekheih hae;

pawccecize minmin ronaw nin,

detahnaw ccyh nynh a thuanua vae hae.

22 Izip tuh a ccuepaw hupaw hawte a roi a saw;

pawccecize a rhaw hae patae nynh

thing a nge hae paw hawte,

hae khate oun ccianua hae.

23 Minmin tuh tungkhipaw laeze

lung hae zah,

riatae a um khyh hae keiccuze

Izip a ramkaw tuh myarya azi zemah,

minmin nynh pong a nge cih hae.

cite Bawipaw nynh a ci.

24 Ccanung Izip tuh maethya a ccou cih;

thahlang e ccungccaw hae

kuih kalan ap athua cih.

25 Israel Pachia, vaaw Bawipaw nynh a hopaw tuh: Dotua, Thebes khua e Amon pachia tungvaw thuasah, Faro, Izip te a pachia hae te a siapharan hae, Faro te Faro a doliakuh hae paw tungvaw thuasah detahnaw ka thuasah cih. 26 Minmin chia a ry hae paw Babilon siapharan Nebukhadnezzar te a kuihkaw e bawi hae kuih kalan khe minmin kha ka ap cih hae. Tukoute Izip ram tuh langmawlya hawte ccungccaw bua a um cih, cite Bawipaw nynh a ci.

27 Pou ka ryalahtu Jakob, rih nan,✝

Pou Israel, na lungroh nan sah;

pawccecize nang kha

asawnaw kyate kae khum cih zah,

na ciihan hae kha

a kyngnaw hae ram kyate

ka khum cih hae.

Jakob tuh a kithui cih zah

thawdangte daebabi lan a um cih,

humhung nynh mah Jakob kha

risah lan khyh, cite Bawipaw nynh a ci.

28 Ka ryalahtu Jakob, rih nan,

pawccecize na kya ka um.

Nang kae denaw ram hae balyn kha

ka roh cih hae,

thuasalama nang tuh kae roh lan khyh!

Nang kha ahmete kae thuihei cih zah,

detah leite ruarua tetuh

kae luesah lan khyh,

cite Bawipaw nynh a ci.