1 Jeremiah kya yn thuapaw khuaakannaw te asekuhpaw Bawipaw bya tuh:

2 Judah ram tuh rawkhuite um zah,

a koikua hae tuh vawsaw a teing hae;

ngaethya te laephi kya

a huekuh hae,

Jerusalem a rawnaw roi tuh houhouh accae.

3 Bawi hae nynh mih ryalahtu hae kha

tui the lan a saw hae;

ryalahtu hae tuh tuisung kya a thua hae,

thuasalama tui kha muih khyh hae,

tui-ung ccakaete a ki hae.

Minmin tuh maethya lungrote

mih lu a bongkuh hae,

4 pawccecize laephi tuh phaephae apaw.

Ram kya khuaaraw khyh keiccuze

loopho hae tuh lungrote um hae zah,

mih lu kha a bongku hae.

5 Ramkaw e sazuh pinung nynh

lonua a um khyh keiccuze

ataw anopaw kha a cciataw.

6 Ramkaw e lann hae tuh

ahangnaw otung kya thadyn hae zah,

suizaw hae hawte khivae kha

thawte a sue hae;

lonua a um khyh keiccuze

mih mit tuh ngawmuih kho khyh.

7 Pou Bawipaw , kae hoyleinaw nynh

kaening kha rawsete

ccaekia a khan zemah,

na min keiccuze beih oun bawmtua;

kae lungzi leinaw tuh

myarya alung ccaccing,

na tungvaw kae sei vae.

8 Pou Israel nynh a ngaehoikupaw nang,

a vawsaw ccyh lya a khumtupaw,

pawccemou kae ram lungkhu kya

mikhia hawte thuasah,

zi kheit rya te yn thuapaw

khuaccongtu hawte thuasah na thua cih?

9 Pawccemou a lungmuapaw hawte thuasah,

bawmnaw a pya kho leipaw

rhawkawpaw a thungpaw

hawte thuasah na thua cih?

Pou Bawipaw , nang tuh

kaening laku na um zah,

kaening tuh na min te

ko athua hae paw nynh kae thua;

kaening hynh oun vua nan!

10 E ccungccaw hae te asekuh lante

Bawipaw nynh hynhte a ho:

Minmin nynh khiavuiku kha

myarya a ry hae,

mih ccu kha sungkuh khyh hae;

tukeiccuze Bawipaw tuh

minmin tungvaw a lungrythua khyh,

mih hoyleinaw kha a liathui cih zah,

mih seinaw kha de a tah cih hae.

11 Bawipaw nynh yn hopyapaw tuh: E ccungccaw hae hoynaw hanlan sawsangpah nan hae. 12 Looh-ae a sung hae zemah mih siaruanaw kha ka thaepah khyh hae, maee-ute silawnaw te ccathae silawnaw kha a rae hae zemah ka ccoupah khyh hae; thaloi, ccakannaw te shethya khate minmin kha ka maemih hae.

13 Tetuh kae nynh, "Pou Bawipaw PACHIA, profeh hae nynh minmin kha, ‘Thaloi rhaw na tung lan khyh oh, na ccakan lan khyh oh, e hmin kya atynpaw daenaw kha kae pya cih oh,’ cite a hopya hae," ka cipya. 14 Te Bawipaw nynh kae yn hopyapaw tuh: Profeh hae nynh ka min te hynbya kha a ho hae; minmin kha ka saw khyh hae, kaw ka pya khyh hae, ho mah ka hopah khyh hae. Minmin nynh nanning kha ahme leipaw vizin, ccungkia leipaw khozi bahkuhpaw bya, mimaw tuanaw te a hyn hae paw bya kha ae hopya oh. 15 Tukeiccuze Bawipaw nynh minmin kha a saw lei hae pite, "E ram kya thaloi rhaw te ccakannaw thua lan khyh," cite Bawipaw min te a ho hae paw profeh hae konglangte Bawipaw nynh hynhte a ho: Tuh-e profeh hae tuh thaloi rhaw te ccakannaw khate maemih athua cih hae. 16 Te minmin bya a ngaepaw ccungccaw hae tuh mimaw, mih zu hae, mih ccapaw hae te mih ccanung hae ryte ccakannaw te thaloi rhaw keiccuze Jerusalem laanpi hae kyakhe vua athua cih hae zah, minmin a uhtu lu kheit san um lan khyh. Pawccecize mih hoyleinaw kha mih tungvaw ka vuanua cih hae.

17 E bya hynh minmin kya

na hopah cih hae:

Khuazi khuadae ka mitphi tuh

kan leite lua sah,

pawccecize ka minphuin liaccady tuh

myarya ccih lan zia thua zah,

myarya ccihpaw vaemaw a mue.

18 Ramkaw lang he ka cceih tuh

thaloi te chia athua hae paw kha ka muih!

Khuapi lungkhu lang he ka tee tuh

ccakan keiccuze kanmaw te

a um hae paw kha ka muih!

Profeh hae te ranpibawi hae tuh

nythyanaw hoi leite

ram pynpi kya khuaccong bungthung hae.

19 Judah tuh na vua ccaccing vae tou?

Zion tungvaw na lua na aethua vae tou?

Kaening hynh dan kho lei lan ciate

pawccemou nae zia?

Daenaw kha kae ngaehoi salamah,

hoynaw kae mue khyh;

dannaw ccyh kha kae ngaehoi salamah,

rikawnaw kha nynh a um.

20 Pou Bawipaw , kae hoyleinaw te

kae minpaaw hae seinaw kha

kae phyku, pawccecize

na tungvaw phe kae sei vae.

21 Na min keiccuze kaening hynh

oun vua nan;

aphu-epaw na bawitungkhung kha

thethyasah nan;

liathui lah, kaening kya

na raepaw na byakinnaw kha roh nan.

22 Minphuin ccangpaw hae kya-e

zohtuh hae kya khuaa a rawsah

khopaw zohtuh a um zawtou?

Tuhkhyhze vaawlui nynh

khuaa a rawsah kho tou?

Pou Bawipaw kae Pachia,

a cyih khopaw tuh namaw

na thua khyh tou?

Kae ngaehoinaw kha

namaw kya kae nung,

pawccecize e hae balyn

a cyihtupaw tuh namaw nynh na thua.