1 Jeremiah kya yn thuapaw Bawipaw bya: 2 Bawipaw , Israel Pachia nynh hynhte a ho: Nang kae hopyapaw bya balyn hynh ccauh kya zeitua. 3 Bawipaw nynh a hopaw tuh: Ka ccungccaw Israel hae te Judah hae kha hiin hoynaw ka pya hae ccyh tuh yn thua ccaccing cih, mih minpaaw hae ka pya hae paw ram lang ka kikhae cih hae zah, tuh-e ram tuh a ccou cih hae, cite Bawipaw nynh a ci.

4 E bya hae hynh Bawipaw nynh Israel te Judah konglang a hopaw nynh thua:

5 Bawipaw nynh hynhte a ho:

Siikunaw roi te rinaw roi kha ka thae,

daenaw um khyh.

6 Pise nynh ccaaw a poi kho tou? cite

khiatua oh lah, dotua oh.

Athua lanze, neitangia ccihpaw nopi hawte,

pise miakaw nynh mih tae vawlan

mih kuih a khang hae paw kha

pawccemou ka muih?

Mih balynte mih mae tuh

pawccemou dawkadae lan a um hae?

7 Ezou! Tuh-e nin tuh myarya ri lan um zah,

touse ruapaw um khyh;

Jakob phin hanlan lungriathae ccyh nynh thua;

tuhzemah tuh-e kyate a lue cih hae.

8 Vaaw Bawipaw nynh a hopaw tuh: Tuin nin vae tuh, a nging kya-e lua kha ka khyapah cih zah, a khiinaw hae paw arui kha ka paepah cih, ramccang hae nynh ryalawsah vae lan khyh hae. 9 Minmin nynh Bawipaw mih Pachia rya te minmin hanlan ka langsakuh cih paw mih siapharan David rya kha a lawpah cih hae.

10 Bawipaw nynh a hopaw tuh: Ka ryalahtu Jakob, rih nan.✝

Pou Israel, na bungzou nan sah;

pawccecize asawnaw langte

nang kha kae khum cih zah,

na ciihan hae kha

minmin a kyngnaw hae ram kyate

ka khum cih hae.

Jakob tuh a kithui cih zah

ngaengan lungdaete a um cih,

humhung nynh mah

rikawnaw pya vae lan khyh.

11 Pawccecize Bawipaw nynh

a hopaw tuh: Nang kha khum khylan

kae umkhae cih; phiariphiarae

kae nungnaw oh ram balyn kha

ka thangsah cih hae,

thuasalama nang tuh

kae thangsah lan khyh;

detah leite papin kae nung lan khyh,

accan thyhte kae thuihei cih.

12 Bawipaw nynh hynhte a ho:

Na vaemaw tuh hoy kho vae lan khyh,

na teingpaw vaemaw tuh

myarya accih.

13 Nang ae do-oih lanpaw

lu kheit san um khyh,

na vaemaw hanlan sii um khyh,

na hanlan dannaw um khyh.

14 Nang ae sungsah hae paw balyn nynh

ae ning vae hae;

nang kha pawlang ae ria vae khyh hae;

rhaw hae kha thong hawte,

nang kha kae thong vae,

na cyiseinaw myarya le zah,

na seinaw tuh myarya alung keiccuze,

thawcci leite de kae tah vae.

15 Pawccemou na vaemaw keiccuze na raw?

Na vaemaw tuh hoy kho vae lan khyh.

Na cyiseinaw tuh myarya le zah,

na seinaw tuh myarya alung keiccuze

e uccaw hae hynh na tungvaw ka cyi hae.

16 Tukeiccuze nang ae laang hae paw kha

laangru athua cih hae zah,

na rhaw hae balyn tuh

kyng athua cih hae;

nang ae luade hae paw tuh

luade athua cih hae zah,

nang ae tei hae paw kha

ka teisahru cih hae.

17 Na rhaw hae nynh nang kha

vua athuapaw ccungccaw ae ci hae,

"Humhung nynh mah

pawlang a ria leipaw Zion!" cite

ae ci vae hae keiccuze

ngedannaw kae pyathui cih zah,

na vaemaw kha kae dansah cih,

cite Bawipaw nynh a ci.

18 Bawipaw nynh hynhte a ho:

Jakob ciihan hae kha

ka kikhae cih hae zah,

mih umnaw kha

ngaethya ka ungsah cih;

khuapi kha a sangpyng vawlan khe

raethui athua cih zah,

khualungrua tuh

a ummaenaw khe a umthui cih.

19 Minmin nynh thehoysahnaw roi te

lungpawnaw roi kha a saw cih hae.

Minmin kha ka pungzaesah cih hae zah,

zya lan khyh hae;

sawtuanaw ka ccousah cih hae zah,

dothatheihpaw thua lan khyh hae.

20 Mih ccaaw hae tuh

langmawlya hawte athua cih hae zah,

ccungccaw zapi hae tuh

ka malang tynsah athua cih hae;

minmin a tuaa a sahtu hae balyn kha

de ka tah cih hae.

21 Mih bawipaw tuh

mimaw minphuin lungkhu e

athua cih zah,

mih uktu bawi tuh

mimaw laku kyate yn langkuh cih;

tuh-e bawi tuh ka kalan

ka naesakuh cih zah yn naekuh cih,

tuhkhyhze hum nynh mou

ka kalan a naekuh ngan cih?

cite Bawipaw nynh a ci.

22 Te nanning tuh ka ccungccaw hae

na thua cih oh zah,

kae tuh nae Pachia ka thua cih.

23 Bawipaw khise khuh dotua!

Thinrianaw tuh apou,

athawsaepaw khiccung thua zah,

ccungccaw hoylei hae paw

mih lu vawlan khe thawte a khia cih.

24 Bawipaw nynh a tuapaw a paccynnaw kha

a ccingsah mawlaezung

a thinrianaw tuh dae lan khyh.

Nyalang ccyh kya nanning nynh

e hynh nae thaethya cih oh.