1 Pou Benjamin phin hae, lue khylan

Jerusalem kyate ccue oh!

Tekoa kya mungkae tu oh lah,

Beth-hakkherem kya

alan kha saetua oh;

pawccecize ahoy leipaw

myarya lepaw ronaw tuh

thahlang te yn langkuh.

2 Puithya zah a ninccehoypaw

Zion ccanung kha

ka roh cih.

3 Tuurin hae te mih tuuphu hae nynh

aning kha a ccianua cih hae zah,

a pepan khe bu a saknuakuh cih hae;

minmin nynh mih umnaw raveih kyakhe

tuu hae kha rampaeesakuh cih hae.

4 "Aning kha dou khylan paccynkuh oh;

thokuh oh lah, ninthuccynglyn khe

rhawtuk oh sih!"

"Aening elang ngaethya lan kou um,

pawccecize taezaw vae,

khuazi bia vae!"

5 "Thokuh oh, khuazi khe

rhawtuk oh sih lah,

a siapharan inn hae kha ropah oh sih!"

6 Vaaw Bawipaw nynh hynhte a ho:

Jerusalem a thingku hae kha nge oh;

Jerusalem dou nawlan laephi kha

thae oh lah dohsah oh.

E khua tuh detah hahe lanpaw

khua nynh thua;

khua lungkhu kya tuaasahkunaw laelan

pawpaw mah um khyh.

7 Tuisung nynh tui thawpaw kha

palei a pousah hawte,

e khua nynh a hoyleinaw kha

palei a pousah;

khua lungkhu khe puathonaw te

ronaw the kha thae athua;

ccihawnaw te vaemaw hae kha

zungzae ka muih.

8 Pou Jerusalem, raeringkuh,

tuhkhyhze tuh na nungsiku keiccuze

kae maetawkuh cih,

nang kha kae roh cih zah

ccungccaw um leinaw

ram lang kae rae cih.

9 Vaaw Bawipaw nynh hynhte a ho:

Misu ku kya a laehypaw

athae kha lo hawte,

Israel hae a laehy hae paw kha

marya lo oh;

misu thae a lotu hawte na kuih kha

misu karan kalan khe bua dyngtua.

10 A thae ccaw hae cite

hum hae kha mou ka hopah cih hae zah,

raeringnaw ka pya cih hae?

Dotua, mih nakaring kha

hu thua zah, thae kho khyh hae.

Bawipaw bya tuh minmin hanlan

saryapaw uccaw nynh thua;

tuh-e bya kya mih lungrythua khyh.

11 Bawipaw thinrianaw tuh

ka tungvaw phe beih;

ka ngaesang kho vae khyh.

Tuh-e thinrianaw tuh laanpi kya

um hae paw imua hae te

a sueluakuh hae paw

ccangvae hae tungvaw khe ccawsah tua;

zu te vaw parouh mawte law athua cih hae zah,

kum tang vae hae paw te

myarya taw vae hae paw kha mah

law athua cih hae.

12 Mih inn mih loo hae te mih zu hae kha

milae kalan pya athua cih hae;

pawccecize tuin ram kya um hae paw kha

ka kuih ka hangnua cih hae,

cite Bawipaw nynh a ci.✝

13 Minmin tuh adih huapaw kyate

ale huapaw kyacia

ahme leipaw muenaw hanlan

mih balyn mawte a karankuh hae;

profeh kyate ranpibawi kyacia

mih balyn mawte a hyn a hu hae.

14 Daenaw a um vae khyh ze,

"Daenaw, daenaw," cite ho hae zah,

ka ccungccaw hae vaemaw kha

oihsah khyh hae.✝

15 Maethya lan umpaw kha cyih hae zah,

anungsikuhpaw rya kha a law hae;

tuhzemah mih maethah khyh,

maethya mah nyh khyh hae.

Tukeiccuze a khuliakuh hae paw kyakhe

a khuliakuh bua cih hae;

minmin kha de he ka tah hae te,

vua athua cih hae,

cite Bawipaw nynh a ci.

16 Bawipaw nynh hynhte a ho:

Laanpi atungkunaw khe

thadyn oh lah dotua oh,

langmawlya e laanpi,

laanpi hoypaw tuh

teimou a um cite khiakuh oh lah

zui oh, nae hiinnaw hanlan

haeungnaw kha muihkuh oh.

Thuasalama minmin nynh,

"Tuh-e laanpi kha

kae zui lan khyh," a ci hae.

17 Nanning hanlan rhawviatu

kae nungpya oh:

"Mungkae roi kha hoyte

ngae oh!" ka cipya hae.

Thuasalama minmin nynh,

"Pawlang kae ria lan khyh," a ci hae.

18 Tukeiccuze, pou minphuin hae,

ngaetua oh.

Pou zapi hae, minmin tungvaw

yn cyihkuh cih paw kha nytua oh.

19 Pou laephi, ngaetua;

e ccungccaw hae tungvaw kya

mih khuakhannaw athae athuapaw

ronaw kha ka thuasah cih,

pawccecize ka bya kha

pawlangria vae khyh hae;

ka ccangpyanaw kha a vua vae hae.

20 Sheba ram kyate yn thuapaw

amynkhuhpaw frankinsen te

laansaw langte yn thuapaw

ccazung epaw kha ka hanlan

pawmou a ccungkia?

Nae kya-e maee-ute silawnaw hae kha

ccoupya thua lan khyh,

nae kya-e silawnaw hae kha mah

ka lungrythua khyh.

21 Tukeiccuze Bawipaw nynh hynhte a ho:

Dotua, a thy a pawku nawlan hae paw kha

e ccungccaw hae malang khe

ka nungkhaw cih hae;

nungpaaw hae te ccaaw hae,

innpaw hae te ruiban hae tuh

pynkheihlan aroh cih hae.

22 Bawipaw nynh hynhte a ho:

Dotua, thahlang e ram kyate

minphuin phuin kheit yn thua cih,

myarya lepaw minphuin tuh

laephi adianaw kyate paccynkute a um.

23 Minmin nynh li te

ccoi kha a ccyngku hae,

mih rysawthah zah

thawccinaw hoi khyh hae,

mih roi tuh rili roi te nynh aloku.

Pou Zion ccanung, minmin tuh

marang kha ccikuh hae zah

rhaw a tuk cih paw rhawkawpaw hawte

nang kha zunghe ae ccyngnuakuh hae!

24 "Minmin konglang kae thae zah,

kae thawzung phe ting;

lungriathaenaw nynh oun thuanua,

neitangia ccihpaw nopi hawte kae teing.

25 Ramkaw lang cceih nan oh,

laanpi kya cceih nan oh;

pawccecize rhaw tuh thaloi a hoi,

pawpaw kya balyn ri lan phe um."

26 Pou aryachipaw ka ccungccaw hae,

buriboei kha zingkuh oh lah,

buhhaw kya toukuh oh;

lu kheit kyalyapaw ccaaw chih zah

raw hawkhate, thawmawte rah oh,

pawccecize rohtu tuh vaekheihmawte

aening tungvaw yn thua cih.

27 Pou Jeremiah, ka ccungccaw hae

mih hiinzia kha ny khylan

na syntawtua ccaw hae cite,

nang kha syntawtuanawpaw uccaw lang te

minmin thyaasahnawpaw lang kae rae vae.

28 Mih balyn mawte lungkhungte

rawse a mang hae paw,

ccungccaw lawtyte

a khiavuikuh hae paw nynh thua hae;

minmin tuh sohin te

sivaw thua hae zah,

mih balyn mawte ro a mang hae.

29 Sosuhnawpaw maee tuh

thawte rua zah,

kuee mah maee nynh pong u vae,

paw sanmah thanenaw um khyh,

pawccecize sivaw-ia tuh

thyaa kho lae khyh.

30 Minmin kha "vua athuapaw ngun"

cite ko athua cih hae,

pawccecize Bawipaw nynh

minmin kha a vua vae hae.