1 Pou Bawipaw , nang kha

rawsete bya he ka hotua tuh,

nang tuh a dingpaw nynh na thua;

thuasalama ka byathan hynh

na kalan beih kae thuakhae sah.

Pawccemou ccungccaw

hoylei hae paw tuh

mih laan mih sui a ua?

Pawccemou mihyn hae balyn tuh

a hoirum hae?

2 Nang nynh minmin kha

na lin hae zah, mih tharui asaw;

lethung hae zah athae a thae hae;

nang tuh mih munglae te na naekuh,

tuhzemah mih thinlung te tuh

na sawkuh.

3 Thuasalama, pou Bawipaw ,

kae tuh phe nae ny;

ka thinlung tuh na kya a umpaw kha

na muih zah nae syntawtua.

Chia lanpaw tuu hae hawte

minmin kha ccaring sue hae lah,

chia nin hanlan taetynte nung hae.

4 Kae ram hynh hohseciamou

rawkhuite a um cih zah,

ram pynpi e lonua hae tuh

hohseciamou arou cih?

Ram lungkhu e ccungccaw hae

hoyleinaw keiccu thuasah,

ccungccaw hae nynh "Ah cyi oh paw hynh

Pachia nynh muih lan khyh,"

cite a ho hae keiccu thuasah

sarangpaw hae te pavaw hae tuh

phe mih hae.

5 Nang tuh ccungccaw te

na ccuesuekuh oh zah na bang lanze,

pawtemou marang hae ryte

na taekuh kho cih?

Akhynnaw ram kya na khuliaku lanze,

thabu alungnaw Jordan vaw kin kya

pawmou na cyih kho cih?

6 Na uno te na innbyn hae nynh heize,

na tungvaw mih lungzi vae khyh;

na nulang te thawte ae sianua vae hae;

minmin nynh nawnekute

bya ae hopya hae zemah

zyn nan hae.

7 Ka inn kha ka vua vae,

ka rho kha ka cciataw vae.

Ka thinlung te myarya ka sungsahpaw kha

a rhaw hae kuih kalan ka pya vae.

8 Ka rho tuh ka hanlan

ramkaw e chindeih hawte nynh athua vae;

kae kha thawte yn sianua keiccuze

aning kha ka hua.

9 Ka rho hynh kae ka hanlan tuh

sawhepaw a aepaw

pavaw apyaapaw te nynh aloku.

Sawhepaw a aepaw pavaw hae nynh

aning kha phang a koihlu hae.

Rang oh, loramsaw balyn,

nae balynte sueluakuh oh;

aning kha tei khylan

loramsaw hae kha oun ko oh.

10 Tuurin hae patae nynh

ka misu khokhu kha a ro vae hae,

minmin nynh ka hanpaw kha

a syde vae hae,

ka lungrythuakhaekuhpaw

ka hanpaw kha ccungccaw a um leinaw

ramkaw lang a rae vae hae.

11 Minmin nynh ram rohpaw lang a rae hae;

ram tuh aro keiccuze

ka kalan yn rawnua.

Ram pynpi mawte phe roh vae,

thuasalama humhung nynh mah

pawlangria khyh.

12 Ramkaw ahangnaw hmin balyn kyakhe

luadetu hae a thua vae hae;

Bawipaw thaloi nynh

ram voikheit langte voikheit lang cia

a ro vae hae;

lu kheit sanmah khyn lan khyh hae.

13 Minmin nynh chanvuih kha

ccou hae zah, hinpaw kha a rue hae,

mimaw toulou kha

myarya a bangsakuh hae zemah

athanenaw um khyh.

Bawipaw tuh myaryamaw

a thinria keiccuze

minmin nynh a mue hae paw khate

mih maethyakhaekuh cih.

14 Bawipaw nynh hynhte a ho: Ka ccungccaw Israel hae nynh rho lang ccou hae sah cite ka pya hae paw ka rho kha a rohtu hae, ahoy leipaw ka innpaw hae balyn kha mih ram kyate poh ka khoi cih hae, te minmin laku kyate Judah phin kha poh ka khoi cih. 15 Minmin kha poh ka khoi kou hae te, mih tungvaw ngaethya ka umsah thui cih hae zah, mih balynte mih rho athuapaw mih ram langkhe bua ka cciakhae cih hae. 16 Ka ccungccaw hae kha Baal pachia min te byakinku lan a ccangpya hae hawte, "Bawipaw tuh a hiin," cite ka min phyate byakinku khylan, minmin nynh ka ccungccaw hae beiknaw phung kha zuakute a ccangku hae zetuh, ka ccungccaw hae laku ka tynsah cih hae. 17 Thuasalama bya a ngae leipaw minphuin miakaw tuh abalyn mawte poh ka khaee cih hae zah ka roh cih hae, cite Bawipaw nynh a ci.