1 Bawipaw bya tuh ka kya yn thua zah a hopaw tuh, 2 Cceih lah, Jerusalem nynh a thaenaw khe siatua: Bawipaw nynh hynhte a ho:

Na ngawphue lya-e na lungzinaw,

akaenung liaccanung hawte

nae sungsahnaw te paw sanmah

accouku leinaw ram,

ramkaw kya nae zuipaw kha

ka liathui.

3 Israel tuh Bawipaw hanlan thyaa zah,

looh a ruepaw kyaze

thaety nynh thua.

Tuh-e looh a aepaw balyn tuh

a sei hae; shethya nynh

a thuanua cih hae,

cite Bawipaw nynh a ci.

4 Pou Jakob ciihan hae te Israel ccaawno hae balyn, Bawipaw bya kha ngaetua oh. 5 Bawipaw nynh hynhte a ho:

Nae minpaaw hae tuh

ka tungvaw pawcihawpaw

seinaw muih hae zahte mou

ka kyate asawnaw lang

cceih hae zah,

ccungkia leipaw nulang khe

zuikute accakaepaw lang a tang hae?

6 Minmin nynh, "Izip ram kyate

oun cciakhae thung zah,

ramkaw, laesia ram te

hunghua alungnaw ram,

khuaakannaw ram te

marae zipingkuhpaw mohnaw ram,

lu kheit nynh sanmah

a ccia boi leinaw ram,

khuasahtu lu kheit san

a um leinaw ram kya

oun cciakhaetupaw Bawipaw kha

teimou a um?" cite ho khyh hae.

7 Ram hoypaw lungkhu te

apoupaw athae te uccaw hoypaw kha

ae khylan kae teekhae oh.

Thuasalama he na tee oh te

ka ram kha na thusah oh zah,

ka rho kha anungsikuhpaw lang na rae oh.

8 Ranpibawi hae nynh, "Bawipaw hynh

teimou a um?" cite ho khyh hae.

Phungbya a kyng hae paw nynh

kae kha yn nyh khyh hae;

uktu hae nynh ka tungvaw a sei vae hae;

profeh hae nynh Baal min te

profehbya ho hae zah,

athane leipaw uccaw hae

nulang a zuiku hae.

9 Tukeiccuze nanning kha

sei kae be cih oh zah,

nae ccaaw hae ccaaw hae kha

sei ka be cih hae,

cite Bawipaw nynh a ci.

10 Saipras tuikoih kalan

po zua oh lah, dotua oh,

Kedar ram lang ccungccaw saw oh lah,

akaw-aleih hoyte dosah tua oh.

Hynhcihawpaw uccaw hynh

acyihkuh boi tou cipaw tuatua oh.

11 Minphuin phuin kheit nynh

a pachia hae kha

pachia a la thua khyh hae zemah

a rulae boi zawtou?

Thuasalama ka ccungccaw hae nynh tuh

mih phu-enaw kha athane leipaw

uccaw lang a rulae vae hae.

12 Pou vaawlui hae, e konglang hynh

nae ngaeangthua sah lah,

thyngkute siiku tua oh,

cite Bawipaw nynh a ci.

13 Pawccecize ka ccungccaw hae nynh

hoyleinaw phuin ning kha a rae vae hae:

hiinnaw tuidy ka thuapaw kae kha

yn vua hae zah, tui a ynkuh kho leipaw,

azupaw tuikua kha a thaeku vae hae.

14 Israel tuh see tou athua?

Aning tuh innvaw a puipaw

ryalahtu tou athua?

Pawccemou aning kha a kyngde hae?

15 Chindeih hae nynh aning kha

sianua hae zah,

roi myarya ccae lante a hu a raw hae.

A ram kha accakaepaw lang a raepya hae;

a khuapi hae tuh roh zah

ccungccaw um khyh.

16 Tuhpiaze, Memfis hae te

Tahpanhes hae nynh

nae lu ae koi vae oh.

17 Bawipaw nae Pachia nynh

ae cciakhae lya oh khe,

amaw kha na vua oh keiccuze

e hynh naemaw toulou nynh

nae tungvaw na thuakhaeku oh paw

thua khyh tou?

18 Nal vawkhu e tui kha nia khylan

Izip ram lang na ccia oh liate

pawmou na mue oh?

Tuhkhyhze Zufrates vawkhu e

tui nia khylan Assiria lang

na ccia oh paw liate

pawmou na mue oh?

19 Nae hoyleinaw nynh naemaw kha

de ae tah cih oh zah,

nae lungzi leinaw nynh

nae seinaw kha ae phy cih oh.

Bawipaw nae Pachia na vua oh paw te

ka raw nae ri khyh oh paw hynh

naemaw hanlan ahoy leipaw te

akhahpaw nynh thua cipaw

nyh oh lah, muihtua oh,

cite Alesaepaw Bawipaw PACHIA nynh a ci.

20 Langmawlya na puihnawpaw

ccong kha na khya,

nang ae khiipaw arui kha na paekuh zah,

"Rya kae lawpah vae lan khyh!" na ci.

Ahangpaw mua vawlan miakaw te

hinlalyhpaw thingku kaw miakaw khe

na ih zah na ohhuaku.

21 Nang kha acii ahoy huapaw kyate lawpaw

misu ku ahoy huaccepaw lante kae linku.

Tuhzemah pawccemou phe na roh zah,

ramkaw e misu ku lang poh na tang?

22 Saepia te na singkuh zah,

saepia kha patae na mang zemah

na seinaw athupaw tuh

ka malang phang a um mamin,

cite Bawipaw PACHIA nynh a ci.

23 "Kae tuh ka nungsikuh khyh,

Baal nulang ka zuikuh khyh," cite

pawtemou na ho kho?

Accya kya-e na laanpi khuh dotua;

na cyisahnaw kha nyku tua,

rangtareih lan a ccue bungthungpaw

kalauh nopi akiakuh leipaw nynh na lo.

24 Ramkaw kya kheccungte

khiavuikuh zah, sahpaw a ry keiccuze

amyn a suethungpaw

lann apuapaw nynh na lo!

A ry ccyh a thua vae ze,

hum nynh mou a khee kho cih?

Aning a ccungtu hae nynh

thawbangsakute ccung lan ccan khyh;

amaw accyh yn zaw te a muih cih hae.

25 Na phanah kha paesah nan lah,

tui hawsakuh nan.

Thuasalama nang nynh tuh,

"Ngaehoinaw um khyh,

pawccecize ramccang hae pachia kha

ka sungsah vae zah,

mih nulang ka zuikuh vae cih," na ci.

26 Miruh kha kyng vae ze,

a maethya hawte

Israel hae tuh mih maethah cih—

mimaw, mih siapharan hae,

mih bawi hae, mih ranpibawi hae te

mih profeh hae tuh mih maethah cih,

27 thingku kha, "Nang tuh ka paaw nynh

na thua," cipah hae zah,

lung kha, "Nang nynh kae hynh

nae saahkuh," a cipya hae.

Kae kha mih nulang yn sangsah hae zah,

mih mae kha ka kalan hawi khyh hae.

Thuasalama mih vawsaw ccyh lyakhe,

"Oun cceih lah, kaening hynh

oun khumtua!" a ci hae.

28 Na raeku oh paw nae pachia hae tuh

teimou a um hae?

Nae vawsaw ccyh lya ae khum kho oh ze,

oun cceih hae sah.

Pou Judah, khua patae na hoi zeihte

pachia patae kha na hoi.

29 Pawccemou nae bonua oh?

Nae balyn mawte nae dou oh,

cite Bawipaw nynh a ci.

30 Nae ccaaw hae kha

alakaw lan ka zia vae hae;

minmin nynh thuiheinaw kha

lawkuh khyh hae.

A kanmawpaw chindeih hawte,

nae thaloi toulou nynh

nae profeh hae kha a tei hae.

31 E she kya-e ccungccaw hae,

Bawipaw bya hynh ngaetua oh!

Kae tuh Israel hae hanlan

ramkaw khyhze

marae mohpaw ram hawte

ka thua boi zawtou?

Pawccemou ka ccungccaw hae nynh,

"Kaening tuh kae lue vae, na kalan

kae cceih vae lan khyh," a ci hae?

32 Liaccanung nynh a ccaankunawpaw kha

a ning kho zawtou?

Akaenung liaccanung nynh

a boeining kha a ning kho zawtou?

Tuhzemah ka ccungccaw hae nynh tuh

ninsaw riatae lei yn ning vae hae.

33 Na rypaw kha ccung nawlan

na paccynkupaw laanpi tuh

pawcih baban mou ahoy!

Nopi hoyleinung kha heize

na laanpi kha phe na ccangpya vae.

34 Seinaw a hoi leipaw ryachi hae kya-e

hiinnaw chiise kha

na boeining dung kya muih athua,

tuh-e chiise tuh ae teenua hae zah

na kyngbia hae paw chiise thua khyh.

Tuhcite e hae balyn hynh mang na cyih pite,

35 nang nynh, "Kae tuh

a sei leipaw nynh ka thua;

Pachia thinrianaw tuh

ka tungvaw um ccaccing vae khyh," na ci.

"Ka sei khyh," na ci keiccuze

byapianaw lang atu kae cciakhae cih.

36 Na laanpi kha rulaekute

pawccemou na khiavuiku?

Assiria nynh maethya ae law hawte,

Izip nynh mah maethya ae lah cih.

37 Na lu vawlan na kuih khangkute

Izip ram kyate mah na ki cih;

pawccecize na doliakuh hae paw kha

Bawipaw nynh vua vae hae zah,

minmin liate na laan na sui ualae lan khyh.