1 Bawipaw kyate Jeremiah kya yn thuapaw bya tuh: 2 "Thokuh lah, ang raetu inn lang cciatua, tuin kya ka bya kha kae thaesah cih," a ci. 3 Tukeiccuze ang raetu inn lang ka cceih zah, ang raenawpaw a leccu te rya a lah cciamangpaw kha ka muih. 4 Anglae te a raepaw ang tuh ang raetu kuih kya phe aro ze, tuh-e maw tuh a ry hawte ccangpaw ang lang bua a rae.

5 Tetuh Bawipaw bya tuh ka kya yn thua zah, 6 Bawipaw nynh a hopaw tuh: Pou Israel phin hae, e ang raetu nynh a rae hawte nanning kha kae rae kho khyh oh tou? Pou Israel phin hae, anglae tuh ang raetu kuih kya a um hawte nanning tuh ka kuih kya nynh na um oh. 7 Ccyh sosoh kya, minphuin phuin kheit khyhze ram ramkheit kha poh ka khaee lanpaw, ka koi lanpaw te ka ro lanpaw kong kha ka ho cih, 8 thuasalama ka honuathepaw tuh-e minphuin nynh a hoyleinaw kyate a maeku zetuh, tuh-e minphuin tungvaw thuakhae lan ka paccynpaw ronaw kong kha ka thinlung ka paleih cih. 9 Te ccangpaw sosoh ccyh kya, minphuin phuin kheit khyhze ram ramkheit ka rae lanpaw te ka lin lanpaw kong kha ka ho cih, 10 thuasalama ka bya ngae leite, ka muihnaw kya hoyleinaw kha a rae zetuh, tuh-e ram tungvaw raepya lan ka paccynpaw hoynaw kong kha ka thinlung ka paleih cih. 11 Tukeiccuze, atu, Judah ccungccaw hae te Jerusalem a um hae paw kalan khe hopah hae: Bawipaw nynh hynhte a ho: Dotua, kae tuh nanning kha hoyleinaw raenua te ae paccynnuakuhpaw ang raetu nynh ka thua. Nanning balyn nynh ahoy leipaw nae laanpi kyate maeleihkuh oh lah, nae hiinzia te nae cyisahnaw kha raekuh thui oh.

12 Thuasalama minmin nynh, "Ccungkianaw um khyh! Aening nynh ah paccynku oh paw kha ah zui cih oh zah, aening lu kheit cci nynh ahoy leipaw te alungkhungpaw ah rynaw thyhte ah cyih cih oh," a ci hae.

13 Tukeiccuze Bawipaw nynh hynhte a ho:

Minphuin hae kha la khiatua oh:

Hynhcihawpaw hynh hummou a thae boi?

Liaccady Israel nynh myaryamaw

anungsikuhpaw uccaw kha

a cyi vae.

14 Lebanon mua e lungpi hae kha

Lebanon vuiraw nynh

a vuasya boi hae zawtou?

Tuh-e mua vawlan e tui,

kyaakakin lan aluapaw

vawkhutui hae tuh akan boi zawtou?

15 Thuasalama ka ccungccaw hae nynh

kae kha yn ning vae hae,

accakaepaw lingkunaw kalan khe

mynkhuhpaw kha a upya hae;

langmawlya a zuimae hae paw

mih laanpi kyakhe thykuh hae zah,

laanluepi kha zui leite

sah leipaw laanpi kha a zui hae,

16 mih ram kha ri lan umpaw,

zungzae a sarya hae paw lang a tangsah hae.

A pepan a cceihpaw balyn tuh

siikuh hae zah, mih lu a he hae.

17 Nithua lang e khisan hawte,

minmin kha rhaw hae malang khe

phiariphiarae ka nung cih hae.

Shethya ccyh lyakhe minmin kha

ka mae langsahpyaku leite,

ka ke kha ka langsapakuh cih hae, a ci.

18 Tetuh minmin nynh, "Rang oh, Jeremiah kha rawsete khuakhankuh oh sih; ccangpahtu lang ranpibawi hae, tuanaw pyatu lang mihaw hae te Pachia bya a hotu lang profeh hae tuh a um mamin cih hae. Rang oh, Jeremiah kha bya ccungpah oh sih lah, a bya kha pawlangria nan oh sih," a ciku hae.

19 Pou Bawipaw ,

kae hynh pe yn kitua lah,

ka rhaw hae nynh pawmou

a ho hae cipaw kha beih ngaetua!

20 Hoynaw hynh hoyleinaw tetou

liaru athua cih?

Minmin nynh ka hiinnaw kha

uu nawlan laekarung a thae vae hae.

Minmin tungvaw na thinrianaw kha

adae nawlan te

minmin hanlan hoynaw byaho khylan

na malang ka thadynpaw kha liathuitua.

21 Tukeiccuze mih ccaaw hae kha

ccakannaw kalan ap hae;

minmin kha thaloi rhaw kalan vua hae,

mih zu hae tuh ccaawno hoi leite

um hae sah lah, nomae lang tang hae sah.

mih vawpaw hae tuh shethya keiccu

chinaw tung hae sah,

mih ccangvae hae tuh rhawtuknaw kya

thaloi te chih hae sah.

22 Luadetu hae kha minmin kya

vaekheihmawte he na thuakhae hae te,

mih inn kya-e siaruanaw kha thae thua sah!

Pawccecize minmin nynh kae kha

kyng nawlan laekarung thae hae zah,

ka ccu kaesahnaw lanpaw kaang kha

yn syakhaw vae hae.

23 Tuhzemah, pou Bawipaw ,

kae kha chia lan cite

a paccynkunaw hae balyn kha phe na ny.

Mih hoyleinaw kha ngaethya nan hae,

na muihnaw kyate

mih seinaw kha zosah nan.

Na malang khe khuliakuh hae sah;

na thinria lyakhe minmin kha cyih hae.