1 Pou Israel hae, Bawipaw nynh

ae hopya oh paw bya hynh ngaetua oh.

2 Bawipaw nynh hynhte a ho:

Minphuin ccangpaw hae laanpi kha

ccangkuh nan oh, vaawlui e

muihsahnaw hae keiccu mah

siikuh nan oh;

minphuin ccangpaw hae tuh

tuh-e hae keiccu a siikuh hae.

3 Ccungccaw hae phungtho tuh kyh khyh:

ramkaw e thing kha nge hae zah,

a kuihhae hoypaw

ccungccaw nynh hae te a sue;

4 tuh-e tuh sui te ngun te ccaan hae zah,

ccanglang a nueku khyh ccaw cite

khynlyng te thingkhia a khiade hae.

5 Mih zohtuh hae tuh

zinae khokhu kya arih-avaw nynh

rih sah cite saepaw uccaw te

lokuh hae zah bya mah

hothya khyh hae;

a cciathya khyh keiccuze

phu te a phu hae.

Khah-e hae kha rih nan oh,

pawccecize hoyleinaw kha

rae kho khyh hae zah,

hoynaw kha mah rae kho khyh hae.

6 Pou Bawipaw , nang ae lopaw

humhung mah um khyh;

nang tuh na lesae zah,

na min mah thungnaw te a lesae.

7 Pou minphuin hae Siapharan,

nang ae rih leipaw hummou a um?✝

Pawccecize nang tuh

ri lan a ccanpaw nynh na thua;

minphuin kyaze

a hawhua hae paw kya thuasah,

mih peenaw balyn kya thuasah

nang ae lopaw lu kheit san um khyh.

8 Minmin tuh angaee-abupaw

nynh thua hae;

zohtuh kyate a mue hae paw

thuiheinaw tuh

thingtung laeze ahoy huanaw

um khyh!

9 Adeihkuhpaw ngun tuh

Tarshish ram kyate

a phu hae paw thua zah,

sui tuh Ufaz ram kyate

a phu hae paw nynh thua.

Khah-e hae tuh a kuihhae hoypaw te

suitheithyapaw nynh

a rae hae paw nynh thua;

mih boeining tuh meizong te

sephaphuhpaw nynh thua;

khah-e hae balyn tuh

ryalaw apuakuhpaw nynh

a rae hae paw nynh thua.

10 Thuasalama Bawipaw tuh

ahmepaw Pachia nynh thua;

aning tuh ahiinpaw Pachia,

zungzae Siapharan nynh thua.

A thinria vae ze laephi tuh ahy,

minphuin hae nynh

a thinrianaw kha

ngaesang kho khyh hae.

11 Minmin kha hynhte hopah oh: Vaaw te lae a rae leipaw pachia hae tuh laephi kyate thuasah, vaawlui zakaw kyate thuasah aroh cih hae.

12 Bawipaw nynh laephi kha

a huhan te a rae, laephipi kha

a hawnaw te tynsah zah,

vaawlui kha a thyanaw te

tharae a dawsaku.

13 A roi he a saw tuh,

vaawlui kya tui roi accae,

laephi adianaw kyate

maeking kha a kaethungsah.

Khuaa hanlan khozaw laesakuh zah,

a ccakhungnaw inn kyate

khisan kha a pousah.

14 Ccungccaw miakaw tuh

nynaw a hoi leipaw

mingaee cci nynh thua hae;

suilaeethya hae paw kha

mih zohtuh hae khate

maethyalaw athua hae;

pawccecize mih zohtuh hae tuh

hynpyakunaw thua hae zah,

minmin kya hy um khyh.

15 Khah-e hae tuh alakawpaw,

hynpaw ryalaw nynh thua hae;

minmin detahnaw ccyh kyakhe

minmin tuh aroh cih hae.

16 Jakob a hanpaw Bawipaw tuh

tuhcihawpaw hae te lokuh khyh,

aning tuh atyn-are a raetu thua zah,

Israel tuh amaw rho athuapaw

minphuin nynh thua;

a min tuh vaaw Bawipaw acikuh.

17 Pou rhaw nynh a koihlu hae paw nanning,

laephi kya-e nae sisua hae kha suelua oh!

18 Bawipaw nynh hynhte a ho:

Atumaw, ram lungkhu um hae paw hynh

ka deihnah vae cih hae,

riathaenaw kha a teing nawlan hae,

mih tungvaw ka thuasah cih.

19 Ka vaemaw keiccuze

ka tungvaw ngaethya lan kou um!

Ka vaemaw tuh myarya le.

Thuasalama, kae nynh,

"E ka teingpaw detahnaw hynh,

ka teing hahe cih," ka ci.

20 Ka bu tuh aroh vae,

ka bu heenawpaw

liarui balyn tuh apae vae;

ka ccaaw hae nynh

phe yn cciataw hae zah,

um vae khyh hae;

ka bu kha bua a daw lanpaw te

a zokhaw lanpaw

lu kheit san um vae khyh.

21 Pawccecize tuurin hae tuh

ngaee hae zah,

Bawipaw kha tuanaw

ngiakuh khyh hae;

tukeiccuze mih laan mih sui ua khyh,

mih tuuphu balyn tuh

phiariphiarae a phiakuh hae!

22 Siarisiaraepaw roi tuh ngaetua oh!

Oun ccia hae paw roi tuh ngaetua oh—

Judah khuapi hae kha rote

suizaw hae karung lang rae khylan,

thahlang ram kyate ngaluin-ngaluin

accaepaw roi pipi tuh yn naekuh vae.

23 Pou Bawipaw , ccungccaw nynh tuh

a zuipaw a laanpi kha

uk kho khyh zah, a ccia lyakhe

a laanccia kha mah

dosekuh thya khyh cipaw ka ny.

24 Pou Bawipaw , yn thuiheitua,

thuasalama thinriate thuihei leite

byading te yn thuiheitua;

tuhkhyhze tuh accakaepaw lang

nae tangsahsei cih.

25 Nang ae nyh leipaw

minphuin hae tungvaw te

na min ae ko leipaw

ccungccaw hae tungvaw khe

na thinrianaw kha ccawsah tua,

pawccecize minmin nynh

Jakob kha karyh ae hae zah

a maemih vae hae,

a umnaw kha mah a ropya vae hae.