BYAPHY 7

Israel hae 144,000 Tazeihkhia Thua hae

1 Tukoute laephi ki kipali kya a thadyn hae paw vaaw hae lu pali nynh laephi vawlan, rili vawlan te thingku hae kha khisan nynh mung nan sah cite laephi san pali kya-e khisan hae phang a kyng hae paw kha ka muih.✝7.1: Jer 49.36; Dan 7.2; Zek 6.5 2 Ahiinpaw Pachia kya-e tazeih a hoipaw, nithua langte yn kaethungpaw, ccangpaw vaawpaw kha ka muih; tuh-e paw nynh laephi te rili kha vawsaw pya khylan kaw a mue hae paw vaaw hae lu pali kalan khe thawte sia zah, 3 "Ah Pachia see hae kha mih terui kya tazeih ah khia mawlaezung oh, laephi thuasah, rili thuasah, thingku hae thuasah vawsaw pya nan oh," a cipya hae.✝7.3: Eze 9.4, 6 4 Tukoute tazeihkhia athua hae paw milu ccazing kha ka thae; Israel ccungccaw hae kya-e phin balyn kyate thong za kheit sung pali thong pali kha tazeihkhia athua hae.

5 Judah phin kyate thong haw lae ning kha tazeihkhia athua hae,

Reuben phin kyate thong haw lae ning,

Gad phin kyate thong haw lae ning,

6 Asher phin kyate thong haw lae ning,

Naftali phin kyate thong haw lae ning,

Manasseh phin kyate thong haw lae ning,

7 Simeon phin kyate thong haw lae ning,

Levi phin kyate thong haw lae ning,

Issakhar phin kyate thong haw lae ning,

8 Zebulun phin kyate thong haw lae ning,

Josef phin kyate thong haw lae ning,

Benjamin phin kyate thong haw lae ning

kha tazeihkhia athua hae.