Ester 9

20 E hae balyn hynh Mordekai nynh ccaw kya zei zah, Siapharan Ahasuerus pee balyn, anaenaw te asawnaw kya um hae paw Judah hae balyn kalan a ky hae, 21 kum takyhte Adar sawpaw nin haw lae pali nin te nin haw lae pangaw nin kha haeung nin lang mang lan a thaesah hae, 22 Judah hae nynh mih rhaw hae kuih kyate khynnaw a mue nin hae, ngaethyanaw kha lungtuanaw lang thuasah, rawkhuinaw kha haeungnaw lang thuasah rulaepaw sawpaw lang a mang hae; tuh-e nin hae tuh poi tua nin te lungtua nin, lu kheit te lu kheit aepaw lasung kyku nin te ryachi hae kha lasung pya nin lang mang lan a thaesah hae. 23 Tukeiccuze Judah hae nynh phung ccangkheit lante lawkuh takaw hae zah, Mordekai nynh minmin kalan ccaw a la ky hae thyhte a cyi hae.

24 Agag ccungccaw Hammedatha ccapaw Haman, Judah hae rhawpaw nynh Judah hae kha ro lan paccynkuh zah minmin maemih khylan te ro khylan Pur cikuhpaw ccungthydungnaw kha a la rae vae;✝9.24: Est 3.7 25 thuasalama Esther tuh siapharan malang he a thua te, Haman nynh Judah hae a la pheenaw hae paw ahoy leipaw paccynkunaw kha amaw lu vawlan ccawsah te, amaw te a ccapaw hae kha ccungccaw saenawpaw tung kya sae thua hae sah, cite ccaw zeite kaw a tho. 26 Tukeiccuze e nin hae hynh Pur cikuhpaw bya kha lah hae zah Purim a ci hae. Tuh-e ccaw kya zei athuapaw te e kong kya minmin nynh a tung hae paw balyn te mih tungvaw kya acyihkuhpaw balyn keiccuze, 27 Judah hae nynh mimaw te mih ciihan hae te minmin kya a kyngkuh bua hae paw ryte ccaw kya azeiku thyhte khyapaw accyh kyakhe tuh-e nin ning tuh kum takyhte apaekuh lei lan po sung lan phung ccangkheit lante mih nawccah zah a tynsah hae. 28 E nin hae hynh she takyh kya innbyn takyh, pee takyhte khua takyh kya liathui athua cih; e Purim nin hae hynh Judah hae laku kya zosah leite, e nin hae liathuinawpaw poi hynh mih ciihan hae kya dae lan khyh.

29 Te Abihail ccanung Siapharannung Esther te Judah ccungccaw Mordekai nynh Purim kong hynh-e ccangningnaw ccaw hynh tynsah khylan ccaw zeinaw kawhoinaw te a zei hae. 30 Ahasuerus a peenaw lungkhu e ram za kheit ccangkuin lae sari kalan khe, Judah hae balyn daenaw te khynnaw ccaw kha ky hae zah, 31 Judah ccungccaw Mordekai te Siapharannung Esther nynh Judah hae kha kaw a pya hae thyhte, te mih looh-aesungnaw te mih ngaethyanaw te asekuh lante mimaw te mih ciihan hae hanlan phung a hoi hae thyhte, Purim nin hae hynh accyh a khya nin hae kya sung lan kaw a pya hae. 32 Siapharannung Esther kawpyanaw nynh Purim poituanaw phung kha tynsah zah, tuh-e tuh ccaw kya zeite a ccy hae.