1 Ka ccaaw, ka bya hynh ccykekuh lah,

ka kawbya hae hynh na kya ccykuh hae;

2 ka kawbya hae hynh zui lah hiintua,

ka ccangpyanaw hynh

na mitlungdy hawte phang rintua;

3 na kuihdung kyakhe heedekuh lah,

na thinlung lungphe vawlan khe zeiku tua.

4 Hawnaw kha, "Ka ccianung," ci lah,

nythyanaw kha ruiban hoypaw cite kotua.

5 tuh-e hae nynh nopi hoyleipaw kyate thuasah,

nawpali lan byahothyapaw

a ccouseikuhpaw zu kyate thuasah

ae thungkhaw cih.

6 Ka inn thanlan-aw kyate

ka do zah,

7 tuanaw a zya hae paw mino hae laku khe,

tuanaw a hoi leipaw ccangvaepaw

lu kheit kha ka muih,

8 aning tuh tuh-e ohhuanung a umnaw

laanpi atungkunaw pe langkhe po a cceih,

9 tuh lya tuh zetepakaw riryngmoh ccyh,

khuazi amoh ccyh nynh thua.

10 Tetuh ohhuanung hawte ccaankuh zah

thinlung ahynthyapaw

nopinung nynh amaw kha a cciadue.

11 Tuh-e nopinung tuh a roi ccae zah,

kawngae khyh;

innvaw um leite a khiavuikuh;

12 sosoh hin laanpi kya um zah,

sosoh hin kungkunaw kya a um,

te laanpi tungkunaw miakaw kyakhe

ngawdo zah a um.

13 Tuh-e ccangvaepaw kha kyng zah a myng,

te maethya leite tuh-e ccangvaepaw kha,

14 "Silawkunaw rae lanpaw ka hoi zah,

atunin ka byakinkunaw kha

ka ccingsah vae;

15 tukeiccuze nang kha tungku khylan

atu kae pou vae,

nang kha lungthote kae ccung zah

kae muih vae!

16 Ka ikhung kha Izip ram e

nebaleihpaw laaw te kuakuhpaw

iphae apuithyapaw khate ka ccaan vae;

17 amynkhuhpaw mura,

aloes te sinnamon khate

ka ikhung kha ka thuh vae.

18 Yn cceih, awkhualan awkhua cia

sungsakunaw te phe byn lan hoysah sih;

sungsakunaw khate hoysah sih.

19 Pawccecize ka vawpaw tuh

innvaw um khyh;

laansaw lang khua a ccong.

20 Phua kha zaw zung kheit te phukuh zah

sawpaw sahpynglyn cia

innvaw yn thua lan khyh," a cipya.

21 Soihnawpaw bya patae khate soih zah,

nawpalipaw a byaho khate a nangse.

22 Tangnuapaw nynh saw theihtupaw kalan

a ccia hawte thuasah,

the nynh aring-akua

a thuing mawlaezung

23 sazuh nynh kaang kalan

a ccia hawte thuasah

tuh-e ccangvaepaw nynh

tuh-e nopinung kha a zui.

Tuh-e ccangvaepaw tuh a hiinnaw

a zosah cih paw kaang kha ny leite

kaang lungkhu lang arangte

a teepaw pavaw te nynh aloku.

24 Te atu, ka ccaaw hae,

ka bya hynh ngae oh lah,

ka mung kya-e bya hynh hoyte ngae oh.

25 Tuh-e nopinung umnaw laanpi langkhe

nae thinlung kha maesakuh nan oh;

a laanpi langkhe zuisei nan oh.

26 Pawccecize tuh-e nopinung nynh

ccungccaw patae kha a khulia vae hae,

te a chia hae paw tuh myarya alung vae.

27 A inn tuh chinaw khaan lang rungbung zah,

michi khua lang a cceihpaw laanpi nynh thua.