1 Hoirumnaw patae laeze

minhoynaw kha

poku lanpaw nynh thua,

maehoynaw tuh

sui te ngun laeze ahoyhua.

2 A hoirumpaw te a ryachipaw tuh

a laenaw hae um khyh:

Bawipaw tuh tuh-e hae balyn

a raetupaw nynh thua.

3 Mihawpaw nynh vawsawnaw kha

muih zah a retawku;

thuasalama tuanaw

a zyapaw nynh tuh po cceih zah,

tuh-e vawsawnaw kha a teing.

4 Zakawsangsahkunaw te

Bawipaw rawrinaw hanlan

muepaw lasung tuh

hoirumnaw, sawtuanaw te

hiinnaw nynh thua.

5 Ccungccaw hoyleipaw

laanpi kya tuh hinpaw te

kaang a um hae;

a raeringkuhpaw nynh tuh

tuh-e hae kyate a sihaeku.

6 Imua nynh a zui lanpaw

laan dingpaw kha ccangpah lah,

he yn piccan te, tuin kyate

cceihsei vae lan khyh.

7 Mihoipaw nynh ryachipaw kha a uk,

a koiitupaw tuh

a koiisakuhtupaw see nynh thua.

8 Ahme leipaw ccacii a vuapaw tuh

vawsawnaw looh kha a rue cih,

a thinrianaw ccungngue tuh

amaw tungvaw accah cih.

9 Hysahnaw thinlung hoi hae paw tuh

hythuapya athua cih hae,

pawccecize mih looh kha

ryachi hae a neethung hae.

10 Ccungccaw a saryapaw kha

po dee lah, byalungnaw mah

a toikuh cih; pekunaw te

theihryanaw mah adae cih.

11 Athyaapaw thinlung kha

ry zah a byaho a-epaw tuh

siapharan kha a ruiban lang

a hoi cih.

12 Bawipaw mit nynh

nynaw kha phang a rin,

thuasalama a hynhupaw

bya kha tuh a vua.

13 Thawnawpaw nynh,

"Inn atolang chindeih a um!

laanpi kya yn teisei cih!" a ci.

14 Nopi hoyleipaw khalang tuh

akhupaw hunghua nynh thua;

Bawipaw nynh a thinrianuapaw

ccungccaw tuh tuh-e hunghua

lungkhu lang a ccah cih.

15 Imuapaw thinlung kyakhe

ngaeenaw tuh phang a um,

thuasalama thuiheinawpaw

ccungngue nynh

tuh-e ngaeenaw kha ccaring a dee.

16 Amaw hoirum khylan

a ryachipaw kha a tuaa a sahpaw te

mihoipaw kha a pyapaw tuh

solei a ryachi cih.

17 Hawnaw bya:

Na nakaring kha tuakuh lah,

a haw hae paw bya kha ngaetua,

te na thinlung kha

ka ccangpyanaw kalan hin pyaku tua;

18 pawccecize khah-e hae kha

na lungkhu kya na ccykeku ze

lungtuanaw a um cih,

na mung kyakhe mah

phe a um vae cih.

19 Bawipaw kha na doliaku nawlan,

atunin hynh-e bya hae hynh

kae ccangpya.

20 Hawnaw te tuanaw pyakunaw bya

sung thum hynh na hanlan

phe ka zei vae khaw?

21 Tuh-e bya hae tuh

nang ae sawtupaw kalan khe

akyhpaw bya te

na khung kho nawlan hae,

adingpaw te akyhpaw

langsaku nawlan nynh thua.

22 Ryachi hae kha

mih rya a chi keiccuze

luade nan hae,

Riathae hae paw kha

koikua lungkhu kya

vawsaw pya nan hae;

23 pawccecize Bawipaw nynh

mih bya kha a pankhae cih hae zah

mih uccaw a luatu hae paw kya-e

hiinnaw kha a luaru cih hae.

24 Thinria a mangpaw te ruiban lang

la tang nan oh,

a thindynpaw te la mungkuh nan oh,

25 a laanpi kha na zuisei cih zah,

namaw te namaw

kaang na kaesakuh sei cih.

26 Milae laebah hanlan

aamahkhanpyaku lan

bya la kinpakuh bua nan.

27 Pya lanpaw na hoi khyh zetuh,

na ikhung kha

ae lawpah cih hae.

28 Na minpaaw hae nynh

la bing hae paw langmawlya e

syntawnaw lungbing kha

la nue nan.

29 Amaw ryalaw kya

athyapaw ccungccaw na muih tou?

aning tuh ccungccaw huataw hanlan

ryalawpya leite

siapharan hanlan rya a lawpah cih.