1 E hae hynh Judah siapharan Hezekiah

a ccungccaw hae nynh

a zei pathy hae paw

Solomon phungtangbya nynh thua.

2 Pachia phu-enaw tuh

uccaw hae thuruhpaw hynh nynh thua,

thuasalama siapharan phu-enaw tuh

uccaw hae a langsakunaw hynh nynh thua.

3 Vaawlui tuh hang zah,

laephi tuh akhu hawte,

siapharan thinlung tuh

akaw-aleih ny kho um khyh.

4 Ngun kya-e a ia kha vua oh lah,

sivawsuhpaw nynh banang

rae nawlan uccaw a mue cih;

5 siapharan malang kyate

ccungccaw hoyleipaw kha

cciakhae oh lah, a bawi haungnaw tuh

dingnaw te atyn cih.

6 Siapharan malang khe

sawtuanaw la ccungkuh nan,

alesaepaw ccungccaw hae nynh

a umnaw hae kyakhe la thadyn nan;✝

7 pawccecize, "Hynhlang hin yn haung,"

cikupaw tuh,

"Nang laeze a piccan huapaw kha

phiapakuh," cipaw laeze ahoyhua.

8 Na mit nynh a muihpaw kha

byapiazung lang arangte thuakhae nan,

pawccecize na innpaw nynh

maethya ae law lanze

athangnaw kya pawtemou na cyih cih?

9 Na innpaw te byathan

na hoi oh paw kha

naemaw te naemaw ccawkunaw rae oh;

milae byaru kha la phy nan;

10 tuhkhyhze tuh aning nynh

he a thae te, maethya ae lah cih zah,

na thethyanaw tuh

thang vae lan khyh.

11 Ho lan accannaw kya hopaw bya tuh

ngun abawng lungkhu

umpaw sui athae te nynh aloku.

12 Ahawpaw thuiheitu bya tuh

a ngae rypaw hanlan

sui kuihpu khyhze

sui uccaw te nynh aloku.

13 Alungzipaw zeccuetu tuh

a sawtu hae hanlan

loohrue ccyh e vuiraw

akyaapaw te nynh aloku.

14 Lasung kae pya cih cite

pookuh zah a pya leipaw tuh

khuaaratui a umbia leipaw

maeking te khivae hawte nynh thua.

15 Lungsaenaw nynh

uktu bawi kha a soihbia kho,

byanepaw nynh ru kha a khya kho.

16 Khoitui na muih ze,

na byn khin te kyalya neih,

eih lung na nia ze,

na luaphukuh cih.

17 Na innpaw inn lang

atu te atu paebua nan,

tuhkhyhze tuh na innpaw nynh

phe ae khin cih zah ae hua cih.

18 A innpaw kha rawsete

ahme leipaw ccaekia a khanpaw tuh

tungbang, thaloi te

ahepaw the te nynh aloku.

19 Vawsaw tung lyaze

alungzi leipaw ccungccaw kha

doliaku tuh ahoy leipaw haw te

akhoupaw ccu hawte nynh thua.

20 A ngaethahpaw kha

hlaw a sahpahpaw tuh

khuacci lya uccaw a khahpaw te,

vaemaw kya loi a thuhpaw te nynh aloku.

21 Na rhawpaw kha a vuelaw ze,

ae lanpaw looh la pya;

a tuihaw ze, nia lanpaw tui la pya;✝

22 tuhte na cyi zetuh,

a lu vawlan maee-e

na pumpaw athua cih zah,

Bawipaw nynh lasung ae pya cih.

23 Thahlang e khisan nynh

khuaaratui kha yn thuakhae hawte,

thethya a hopaw lae nynh

thinrianaw kha a thuakhae.

24 Accohkuh thyapaw zu ryte

inn lungkhu umlae tuh

innccukaly apaki lang

umpaw tuh ahoyhua.

25 Asawnaw ram kyate

yn thuapaw thehoypaw tuh

tui a hawpaw hanlan

tui kyaapaw hawte nynh thua.

26 Ccungccaw hoyleipaw malang

a seipaw miding tuh

anuihpaw tuisung,

athupaw tuidy hawte nynh thua.

27 Khoitui patae niapaw tuh hoy khyh,

tuhawte sawtuakunaw

eih ry kaesypaw tuh hoy khyh.

28 A thinlung a sungkuh kho leipaw tuh

koihlupaw lungrua ting zah

uahalaepaw khua te nynh aloku.