1 Solomon phungtangbya hae:

Ahawpaw ccaaw nynh

a paaw lung kha a tuasah,

thuasalama angaeepaw ccaaw nynh tuh

a nung kha a ngaethyasah.

2 Hoyleinaw liate muepaw

sisua tuh amia um khyh,

thuasalama dingnaw nynh tuh

chinaw kyate a luesah.

3 Bawipaw nynh miding kha

a vuelawsah lan ua khyh,

thuasalama ccungccaw hoylei

hae paw kya-e ryduaanaw kha tuh

a pingpya hae.

4 Thawnawpaw kuih nynh

ryachinaw kha a thuasah,

thuasalama zuakunaw kuih nynh tuh

hoirumnaw kha a thuasah.

5 Hawnin ccyh kya uccaw

a ccakhungkuhpaw ccaaw tuh

a hawpaw nynh thua.

thuasalama loohrue ccyh lya

a ihpaw ccaaw tuh

maethyanaw kha a thuakhae.

6 Hythuanaw tuh

miding hae lu vawlan a um,

thuasalama ccungccaw hoyleipaw

mung nynh tuh puathonaw kha

phe a thuruh.

7 Midingpaw kha liathuinaw tuh

hythuanaw nynh thua,

thuasalama ccungccaw hoyleipaw

min kha tuh azo cih.

8 A hawpaw nynh tuh

kawbya kha a ccykeku,

thuasalama bya kathuhkaleih

a hopaw tuh ronaw kalan

a phungkuh cih.

9 Dingnaw kya a cceihpaw tuh

khyndadyh lan a cceihpaw nynh thua,

thuasalama akoupaw laanpi

a zuipaw tuh muihbia athua cih.

10 Mit phalyh a masipahpaw tuh

vawsawnaw kha a thuasah,

thuasalama rawthungte

a thuiheipaw tuh daenaw kha a rae.

11 Midingpaw khalang tuh

hiinnaw tuidy nynh thua,

thuasalama ccungccaw hoyleipaw

a khalang nynh tuh puathonaw kha

zya a thuruh.

12 Huakunaw nynh

pekumaekunaw lang a tangsah,

thuasalama sungsahnaw nynh

meseinaw balyn kha pong a bong.✝

13 Nythyanaw a hoipaw

munglae kyakhe hawnaw kha

muih athua,

thuasalama ccungngue tuh

tuanaw a hoi leipaw

ke hanlan nynh thua.

14 Mihawpaw nynh nynaw kha

a ccakhungku,

thuasalama mingaeepaw nynh

kathuhkaleih a hopaw bya tuh

ronaw te anaekuh.

15 Mihoipaw hoirumnaw tuh

a kya-e atynpaw khualungrua nynh thua,

A ryachipaw kya-e ryachinaw tuh

amaw ronaw nynh thua.

16 Miding hae ryalaw mee nynh

mimaw kha hiinnaw kalan

a cciakhae hae,

thuasalama ccungccaw hoylei

hae paw kya-e amia nynh

mimaw kha seinaw kalan

a cciakhae hae.

17 Thuiheinaw a ngaepaw tuh

hiinnaw laanpi kya nynh a um,

thuasalama thuiheinaw

a vuapaw tuh laanpi kha a mesei.

18 A hynpaw mung nynh

huakunaw kha a thuruh,

ccungccaw thethya a hopaw tuh

a ngaeepaw nynh thua.

19 Bya patae ho lanze,

seinaw a umthya,

mihawpaw tuh byahonaw kya

a sungkuh.

20 Miding hae munglae tuh

ngunphua hoypaw hawte nynh thua;

ccungccaw hoyleipaw

a thinlung tuh amee azya.

21 Midingpaw munglae nynh

ccungccaw patae kha looh a dan,

thuasalama mingaee hae tuh

tuanaw a hoi khyh keiccu hae ze

a chih hae.

22 Bawipaw hythuanaw nynh

hoirumnaw kha thuakhae zah,

tuh-e hoirumnaw kyakhe

ngaethyanaw kha pybia khyh.

23 Cyiseinaw hynh angaeepaw hanlan

lungpawnawpaw hawte nynh thua,

thuasalama nythyanaw

a hoipaw hanlan hawnaw tuh

lungpawnaw nynh thua.

24 Ccungccaw hoyleipaw nynh

a ripyapaw uccaw tuh

a tungvaw kya a thua cih,

thuasalama midingpaw nynh tuh

a rypaw kha a mue cih,

25 Khise atho ze, ccungccaw hoylei

hae paw tuh phe a zo hae,

thuasalama miding hae tuh

zungzae atyn hae.

26 Haw hanlan misutui ariapaw hawte,

mit hanlan maeekhuh hawte nynh

a thawnawpaw tuh

ryalaw a nawtupaw hanlan athua.

27 Bawipaw rawrinaw nynh

hiinshe a saesah,

thuasalama ccungccaw hoyleipaw

hiinshe tuh adyn cih.

28 Midingpaw ngaehoinaw tuh

lungtuanaw te nynh athang,

thuasalama ccungccaw hoyleipaw

ngaehoinaw tuh

accakaepaw lang nynh a tang.

29 Bawipaw laanpi tuh

miding hanlan rekunaw nynh thua,

thuasalama hoyleinaw

a rae hae paw kha a ro hae.

30 Miding hae kha

papin vua thua lan khyh hae,

thuasalama ccungccaw hoylei

hae paw tuh laephi kya

um lan khyh hae.

31 Midingpaw khalang nynh

hawnaw bya kha a ho,

thuasalama ahoy leipaw lae kha tuh

thoh pae lan aw athua cih.

32 Midingpaw mung nynh

nawccaw lan umpaw kha a ny,

thuasalama ccungccaw hoyleipaw

mung nynh tuh arawsekuhpaw bya kha a ho.