1 Ahawpaw ccaaw tuh

a paaw thuiheinaw kha a ngae,

thuasalama ccungccaw

a saryapaw nynh tuh

thuiheinaw kha ngae khyh.

2 Ccungccaw hoypaw nynh

a bya kya-e athae athuapaw,

ahoypaw uccaw kha a ae,

thuasalama ahynpaw

ccungccaw hae nynh tuh

puathonaw kha a ry hae.

3 Munglae a raeringkuh hae paw tuh

mih hiinnaw kha a khynsaku hae;

raeringku leite bya a hopaw tuh

amaw toulou kha a roku.

4 A thawnawpaw nynh

ccangkhakheit kha a ry zemah

pawpaw sanmah mue khyh,

a zuakuhpaw nynh tuh

phe zaw lan a mue cih.

5 Miding nynh tuh hynbya kha a hua,

thuasalama ccungccaw hoyleipaw

ryalaw tuh nungsikuh zah

maethya lan a um.

6 Dingnaw nynh laanding

a zuipaw kha a thungkhaw,

thuasalama hoyleinaw nynh

misei hae kha a khulia hae.

7 Ccungccaw abang tuh

pawpaw sanmah a hoi khyh hae zemah,

mihoipaw hawte a umsaku hae,

abang nynh tuh sisua

patae a hoi hae zemah

ryachi hawte a umsaku hae.

8 Hoirumnaw tuh mihoipaw hiinnaw kha

shawkhawkunawpaw nynh thua,

thuasalama a ryachipaw nynh tuh

hurawnaw bya kha thae khyh.

9 Miding hae awnaw tuh phaephae a ak,

thuasalama ccungccaw hoylei hae paw

maeekhua tuh a chih cih.

10 Lysahkunaw nynh tuh

pekumaekunaw kha a thuakhae,

thuasalama hawnaw tuh

tuanaw pyakupaw

a lawkuh hae paw kyakhe a um.

11 Arangte muepaw hoirumnaw tuh

azyabung cih,

thuasalama beihtararaw te sisua

a tungkuh hae paw tuh

a hoithung cih hae.

12 Ngaehoinaw tuh accyh aro ze,

thinlung accih,

thuasalama rynaw he accing tuh

hiinnaw thingku nynh thua.

13 Ccangpyanaw kha

pawlang a ria leipaw tuh

amaw toulou tungvaw

ronaw a thuakhae,

thuasalama kawbya kha

saw a tuapaw tuh lasung a mue cih.

14 Mihawpaw kya-e ccangpyanaw tuh

chinaw kaang kha sibia nawlan

hiinnaw tuidy nynh thua,

15 Hawnaw hoypaw a hoipaw nynh

maehoynaw kha a mue,

thuasalama a lungzi leipaw

laanpi tuh ronaw laanpi nynh thua.

16 Mihawpaw tuh atyn-are kha

hawnaw khate nynh a cyi,

thuasalama mingaeepaw tuh

a ngaeenaw kha a langsaku.

17 Ahoy leipaw zeccuetu nynh

vawsawnaw a thuakhae,

thuasalama a lungzipaw locceihtu nynh

dannaw kha a thuakhae.

18 Thuiheinaw kha

pawlangria leipaw tuh

ryachinaw te maethyanaw nynh

a thuanua,

thuasalama thuiheinaw

a ngaepaw tuh sawtuanaw a mue.

19 Rypaw kha muepaw tuh

lungpawnaw nynh thua,

thuasalama hoyleinaw kyate

maeleihkupaw tuh

mingaee hae hanlan

anungsikuhpaw nynh thua.

20 Mihaw hae ryte

a mungkuh hae paw tuh a haw cih,

thuasalama mingaee hae ryte

a mungkuh hae paw tuh

vawsawnaw a tung cih.

21 Misei hae kha

vethyanaw nynh a deehui hae,

thuasalama miding hae tuh

hoynaw lasung a mue hae.

22 Ccungccaw hoypaw nynh tuh

a mintaw hae kyacia

rho a nungpya sya hae,

thuasalama miseipaw

hoirumnaw kha

miding hae hanlan suelua athua.

23 Khomaw loo nynh

ryachi hae hanlan

looh patae a voipya hae,

thuasalama tuh-e tuh

dingleinaw keiccuze phe azo.

24 Ccungngue a mang leipaw tuh

a ccaaw a huapaw nynh thua,

thuasalama a ccaaw

a sungsahpaw tuh a ccaaw

a di lya maw te hoyte a thuihei.

25 Miding tuh ae lanpaw

phe zaw lan a hoi,

thuasalama ccungccaw

hoylei hae paw tuh

zungzae mih vuelaw.