1 Awkhualan kong hanlan pookuh nan,

pawccecize tuh-e nin nynh

pawmou yn thuakhae cih cipaw

na nyh khyh.✝

2 Namaw khalang te pooku leite

milae nynh ae poo hae sah,

namaw mung te pooku leite

khycce hae nynh ae poo hae sah.

3 Lung te laesia tuh ari hae,

thuasalama mingaee nynh

yn thuakhaepaw thinrianaw tuh

tuh-e phuin ning hae laeze arihua.

4 Bungpawnaw tuh

rysawthyanaw thua zah,

thinrianaw tuh lungmohnaw nynh thua,

thuasalama eiungnaw tuh

hum nynh mou a taening kho cih?

5 Phe alangkuh lante

a seinaw phypyate thuiheipaw tuh

aphirute sungsahpaw laeze ahoyhua.

6 Ruiban hoypaw nynh

vaemaw ae muesah zemah,

sungsahnaw phang ae hoi,

thuasalama na rhawpaw nynh

ae myngpaw kha tuh

ae lingpaw nynh thua.

7 A byn vae paw nynh tuh

khoitui kha heize ry vae khyh,

thuasalama a kanmawpaw hanlan tuh

akhahpaw kha heize phe a e.

8 A inn kyate a khiavuikuhpaw

ccungccaw tuh

a bu kyate a khiavuikuhpaw

pavaw te nynh aloku.

9 Zimuin te amynkhuhpaw nynh

lung a tuasah,

thuasalama vawsawnaw nynh tuh

thinlung kha a koisah.

10 Na ruiban thuasah,

na paaw ruiban thuasah la vua nan;

vawsaw na tung lyakhe

na puizia inn lang la cceih nan;

Anaenaw umpaw innpaw tuh

asawnaw umpaw

puizia laeze ahoyhua.

11 Ka ccaaw, hawsakuh lah

ka lung yn tuasah tua,

tuhteze nynh yn theihrya hae paw kha

bya ka khung kho cih hae.

12 Mihawpaw nynh tuh

vawsawnaw kha muih zah

a retawku; thuasalama tuanaw

a zyapaw nynh tuh ccianua zah,

tuh-e vawsawnaw tuh a teing.

13 Nyku leipaw ccungccaw hanlan

aamah a khanpakuhpaw kya-e

boeining kha la lawkuh,

Ramccang ccungccaw hanlan

aamahkhan lante a ponpaw

uccaw kha la kyngpah.

14 Awkhua takaw te tho zah

a innpaw kha roi myarya

ccae lante hythua a pyapaw tuh,

thyalawnaw a raetupaw lang

ria athua cih.

15 Accohkuh thyapaw zu tuh

khuaane nin ze pharyphary

po arahpaw khuaa te nynh aloku;

16 tuh-e nopi kha phang kheepaw tuh

khivae kheepaw te nynh aloku,

tuhkhyhze ranglang kuihphe te

chitui phang huupaw te nynh aloku.

17 Sivaw nynh sivaw kha a hesah,

ccungccaw nynh ccangpaw

ccungccaw hawnaw kha a hesah.

18 Thaeku ku kha a do-oihpaw tuh

a thae kha a ae cih,

a bawipaw kha a do-oihpaw tuh

minhoynaw a mue cih.

19 Tui lungkhu khe na maee

na muihku hawte,

pawcihawpaw ccungccaw mou

athua cipaw kha

a thinlung nynh a langsah.

20 Michi khua te Abaddon ram tuh

a lungryccing khyh hawte,

ccungccaw mit tuh

a lungryccing boi khyh.

21 Sui te ngun tuh maee te

syntawtua athua,

tuhawte ccungccaw tuh

thehoynaw a ccoupaw khate

syntawtua athua.

22 Mingaee kha looh ryte

sung kyakhe sungkae te

phongde athua zemah,

a ngaeenaw tuh amaw kyate

phiakuh lan khyh.

23 Na tuuphu konglang kha

hoyte nyh lah,

na vaetua phu kha

hoyte pekitua;

24 pawccecize hoirumnaw tuh

zungzae tyn khyh,

siapharan lukhung mah

she takyh hanlan tyn khyh.

25 Lonua tuh zo zah

kinno thawpaw yn ccue,

te mua vawlan e lonua hae tuh

suelua he athua te,

26 tuutaw nynh na boeining kha

ae rin cih zah, miaa hae nynh

na laephi mee kha ae rin cih;

27 na looh lang thuasah,

na innbyn looh lang thuasah,

te na seenung hae looh lang thuasah

miaa mateitui tuh phe azaw cih.